2 Reyes 25:3 - Chayahuita (Shahui)

^3-4 Pascoa yoqui quëran cara yoqui iscon tahuëri imasahuasoꞌ, Quirosarin ninanoquë cosharo taꞌhuantërin. Naporoꞌ Papironia sontaroꞌsasoꞌ, Quirosarin ninano pairanën pacoantopi. Napoaton Sitiquiasësoꞌ, sontaronënpitarë chachin naporo tashi taꞌapi. Cato paira yaꞌhuërinso parti yaꞌcoana yaꞌhuërintaquëchin pipipi. Copirno yancoronëntaquëchin ira yaꞌhuërinso masahuatonaꞌ, paꞌpi. Papironia sontaroꞌsa aꞌpaitapirinahuëꞌ, Cortaniiꞌ motopiana parti taꞌapi.

2 Reyes 25:3 ပူးပေါင်းရင်းမြစ်များ

2 Reyes 25:2

Tancapitochinaichin Sitiquiasë copirnosoꞌ, shonca piꞌipi nanianatërin.

2 Reyes 6:24

Aꞌna tahuëri Siria copirno Pin-ata itopisosoꞌ, sontaronënpita ayontoantarin. Ina quëran paaparahuatona Samaria ninano ahuëcaiso marëꞌ tancapitoonpi.

2 Reyes 6:25

Inapotopi niꞌton, co huachi cosharo macacaiso nanitopihuëꞌ. Napoaton inanaquësoꞌ, co manta capacaiso yaꞌhuërinhuëꞌ. Inapopi niꞌton, mora motoꞌ tëranta paꞌpi paꞌton. Posa shonca coriqui prata quëran nininsoꞌ paꞌtërin. Nëpë chiꞌchirinso tërantaꞌ, patoma quiro patomaíchin nipirinhuëꞌ, aꞌnatërápo coriqui prata quëran nininsoꞌ paꞌtërin.

Jeremías 19:9

Ca nohuanto tananëmaquë, huiꞌnamantaꞌ capomaꞌ. Inimiconëma tancapitohuachinënquëmaꞌ, tana yatëparáponquëmaꞌ. Napoaton amiconëma nipirinhuëꞌ, tëpatoma capomaꞌ, tënin Sinioro,’ itëquëꞌ,” itërinco.

Jeremías 37:21

Napotohuatora copirnosoꞌ, aꞌpaito sontaroꞌsa pëi iꞌiratënënquë acoinacosoꞌ camaitërin. Naporahuaton ina camaitërin quëran nani tahuëri pan quëshirinaco. “Pan camayoroꞌsa cachi” itopiquë nipisoꞌ quëshirinaco. Ninanoquë capamia capacaiso nicaquë huarëꞌ aꞌpaito sontaroꞌsa pëi iꞌiratënënquë yaꞌhuëárahuë.