2 Reyes 23:4 - Chayahuita (Shahui)

⁴ Sinioro natëcaisoꞌ shaꞌhuitopiso piquëran, Cosiasësoꞌ Iriquiasë corto huaꞌan përarin. Aꞌnapita corto huaꞌanoꞌsaꞌ, yaꞌcoana aꞌpairoꞌsaꞌ, inapitanta përasahuaton camairin: “Sinioro chinotopiso pëiquë, Paaro mamanshi chinotacaiso marëꞌ nisha nisha maꞌsha yaꞌhuërin, Asira mamanshi payanta moshacaiso marëꞌ yaꞌhuërin. Nisha nisha tayora moshacaiso marënta yaꞌhuërin. Yaꞌipi inapita ocoirahuatomaꞌ, ninano aipiran ahuiquitocoꞌ. Sitron iꞌsha yonsanquë iminoꞌsaquëntaꞌ, napopinchin ahuiquitocoꞌ. Ina ahuiquitëramaso yanonëntaꞌ, Pitiriꞌpaꞌ quëpacoꞌ,” itërin.

2 Reyes 23:4 ပူးပေါင်းရင်းမြစ်များ

2 Samuel 15:23

Tapisoꞌ caꞌtaninsopitarë chachin co napion ancantopi. Papona pochin naꞌnë́raapi. Inapochinachin Sitron iꞌsha pëntontopi. Aꞌnapitaꞌton quëchitopi. Piquëran copirnosoꞌ, pëntonin. Inapoatona piyapinënpitasoꞌ quëchitopi. Quëchitatona inotëro parti ira paꞌninsoꞌ paꞌtopi.

1 Reyes 12:29

Napotahuaton piyapinënpita camairin aꞌnara Pitiriquë acocaiso marëꞌ. Aꞌnaso nipirinhuëꞌ, Tano ninanoquë acopi. Napohuachina israiroꞌsasoꞌ, aꞌnaquën Pitiriquë paꞌpi. Aꞌnaquëontaꞌ, Tano ninanoquë pantapi. Toroaꞌhuaroꞌsa moshacaiso marëꞌ inaquëpita paꞌsápatonaꞌ, co huachi Yosë chinotacaiso marëꞌ Quirosarinquëso paꞌpihuëꞌ. Inapoatona israiroꞌsasoꞌ, oshahuanpi.

1 Reyes 16:31

Quiropoamo iráca co noyahuëꞌ ninin. Acaposo nipirinhuëꞌ, naꞌcon naꞌcon co noyahuëꞌ ninin. Canaan sanapi Quisapira itopisoꞌ macaton, naporin. Quisapirasoꞌ paꞌpin, Iti-paaro itopi. Inaso Sitonquë copirno yaꞌconinsoꞌ. Inapitasoꞌ Paaro mamanshi moshapi niꞌton, Acaponta ina moshapatërin.

1 Reyes 18:19

Iporasoꞌ Carmiro motopiquë israiroꞌsa ayontonquëꞌ. Catapini pasa aꞌnatërápo shonca yaꞌpi Paaro marëꞌ pënëntopisopitantaꞌ, përaquëꞌ. Catapini pasa Asira marëꞌ pënëntopisopitantaꞌ, huëꞌinaꞌ. Inapitasoꞌ Quisapirari pahuërërin, itërin Iniasëri.

1 Reyes 18:26

Napotohuachina inahuasoꞌ, aꞌnara toroaꞌhua huayonpi. Ina tëparahuatona artaro aipi acopi. Inapotahuatona tashiramiachin quëran camotëchin huarëꞌ Paaro nontápi: “¡Paaro aꞌpanicoi!” tosápi. Napoapona pochin, artaro conitatona pashi pashitërapi. Napopirinahuëꞌ co aꞌpanitërinhuëꞌ.

1 Reyes 18:40

Naporoꞌ Iniasëso camaitaton: —¡Paaro marëꞌ pënëntopisopita yaꞌipi macoꞌ! itërin. Napotohuachina israiroꞌsari yaꞌipi mapi. Nani mapachinara: “Quison iꞌshaquë quëparahuatëhuaꞌ, inaquë tëpaꞌahuaꞌ,” tënin. Napohuachina inaquë quëparahuatona tëpapi.

2 Reyes 23:12

Manasisi copirno yaꞌhuëapon, mamanshiroꞌsa moshacaiso marëꞌ artaroroꞌsa anitërin. Sinioro chinotacaso pëi iꞌiratënquë, anitërin. Aꞌnapita copirnoroꞌsantaꞌ, ina pochachin anitopi. Acaso copirno patoananën aꞌcaontarinso aipi artaroroꞌsa anitopi. Inapita artaroroꞌsantaꞌ, Cosiasë copirnori aohuatërin. Inapita paꞌqui paꞌquitopi. Inapotahuatona noꞌmorainpitasoꞌ, Sitron iꞌshaꞌpaꞌ inquiitopi.

2 Reyes 23:15

Napato huiꞌnin Quiropoamo copirnonta iráca, inaora nohuanton artaro acopisoanpi Pitiriquë acorin. Toroaꞌhua nonanpisoꞌ moshacaiso marëꞌ naporin. Inaquë moshatatonaꞌ, israiroꞌsa oshahuanpi. Cosiasë, corto huaꞌanoꞌsaꞌ, yaꞌcoana aꞌpairoꞌsaꞌ, inapitari paꞌsahuatonaꞌ, ohuatoonpi. Inapotahuatona paꞌqui paꞌquitopi. Noꞌmoraináchin acorahuatonaꞌ, ahuiquitopi. Inaquë chachin Asira mamanshi nonanpisonta yaꞌhuëpirinhuëꞌ, inanta inapotopi.

2 Reyes 25:18

Naporoꞌ Naposaratansoꞌ, Siraiasë corto huaꞌan manin. Ina quëran niantarinsonta manin. Inaso Sooniasë itopi. Naporahuaton cara huaꞌanoꞌsantaꞌ, Yosë pëinën aꞌpainaꞌpiroꞌsa manin.

Jeremías 7:9

Niihuaramaꞌ, nitëparamaꞌ, nitëhuananpitëramaꞌ, Yoscoarëꞌ tapomarahuë nonpinamaꞌ. Paaro moshatoma yonarin pochin nininsoꞌ aꞌpëramaꞌ. Nisha nisha mamanshiroꞌsanta co nohuitapomarahuëꞌ, mosharamaꞌ.

Oseas 4:15

Israiroꞌsanquëmaso nisha nisha cancantopiramahuëꞌ, Cota huëntonoꞌsaso ama inapoatona oshahuainasohuëꞌ. Ama huachi Quiricaro ninanoquë pacosohuëꞌ. Co Piti-apin ninanoquë tërantaꞌ, pantamaso yaꞌhuërinhuëꞌ. Inaquëpitasoꞌ, mamanshiroꞌsa marëꞌ inahuara nohuanton artaroroꞌsa acopiso yaꞌhuërin. Naporahuaton nonpatamantaꞌ: ‘Sinioro nanpiárin niꞌton, napotaranquën,’ ama tocosohuëꞌ.

Amós 4:4

Siniorori israiroꞌsa nocanananquë pënënaton itapon: “Pitiri, Quiricaro, inapita ninanoroꞌsaquë moshatamaso marëꞌ acoramaꞌ. Inaquëpita pacoꞌ. Co natëtomacohuëꞌ, naꞌcon naꞌcon oshahuancoꞌ. Chinotatomaco tëpamaso marëntaꞌ, tashíramiachin quëcoꞌ. Diesmo ca marëꞌ acoamaso yaꞌhuërinsontaꞌ, nani cara tahuëri quëran quëcoꞌ.

Mateo 26:3

Ina quëran corto huaꞌanoꞌsaꞌ, cotio ansianoꞌsaꞌ, inapita Caihuasë pëinënquë niyontonpi. Inasoꞌ corto huaꞌan, chini chiníquën nanantërin.

Mateo 27:1

Tahuërianpitohuachina, yaꞌipi corto huaꞌanoꞌsaꞌ, cotio ansianoꞌsaꞌ, inapita napopianachin yonquipi Quisoso atëpatacaiso marëꞌ.

Juan 18:1

Nani Yosë nontohuachina, Sitron itopisoꞌ iꞌshanantëꞌ aquëtëran paꞌnai. Inaquë nararoaꞌhua yaꞌhuërin.

Jueces 2:13

Inapoatona israiroꞌsasoꞌ, Sinioro aꞌpopi. Mamanshi Paaro itopisoꞌ moshacaiso marëꞌ aꞌpopi. Asotariti mamanshi paya, itopisonta moshapi.