2 Reyes 18:19 - Chayahuita (Shahui)

¹⁹ Canconpachinara, Asiria huaꞌanoꞌsari itaponaꞌ: “Naporin Asiria copirno: ‘Noya ipora yaꞌhuëarihuaꞌ,’ ama chinsohuëꞌ Isiquiasë.

2 Reyes 18:19 ပူးပေါင်းရင်းမြစ်များ

2 Reyes 18:17

Ina piquëran inasoꞌ, cara huaꞌanoꞌsa chiníquën nanantopisopita Naquisi quëran Quirosarinquë aꞌparin. Panca sontaroꞌsa huëntontaꞌ, inapitarë aꞌparin. Isiquiasë, sontaronënpita, inapitarë niahuëcaiso marëꞌ naporin. Inapita huaꞌanoꞌsasoꞌ, aꞌnara yaꞌipi sontaronënpita huaꞌanën yaꞌconin. Aꞌnantaꞌ, sontaroꞌsa quëpanaꞌpi huaꞌan yaꞌconin. Aꞌnaso nipirinhuëꞌ, catahuarinsoꞌ huaꞌan. Yaꞌipi inapita paꞌsahuatonaꞌ, Quion huinan quëran cashatonaꞌ, iꞌsha quëpapiso yaꞌcariꞌ yaꞌhuëconpi. Ina cashapisosoꞌ, panca tapainanquë mëtaiconin. Inaquë piyapiꞌsa pëꞌsainacaiso marëꞌ paꞌpi. Ina quëran Isiquiasë përapi nontacaiso marëꞌ. Përapirinahuëꞌ, inaso co paꞌninhuëꞌ, cara huaꞌanoꞌsa inapita nontacaiso marëꞌ aꞌparin. Aꞌnasoꞌ, huaꞌanëntërinso pëiquë camaitonaꞌpi. Inasoꞌ, Iriaquin itopi. Aꞌnanta copirnoroꞌsa onpo huaꞌanëntopisona ninshitonaꞌpi. Inasoꞌ, Sipina itopi. Asapo huiꞌnin Coa itopisontaꞌ, ninshitonaꞌpi. Inanta paꞌnin.

2 Reyes 18:22

Naporahuaton: ‘Sinioroso Yosënëhuëi niꞌton, ina catahuaponcoi,’ tënamaꞌ. Iráca canpitasoꞌ, itohua itohua ina Yosë chinotamaso marëꞌ artaroroꞌsa yaꞌhuëtërinquëmaꞌ. Isiquiasëso nipirinhuëꞌ, ina artaroroꞌsa ayatëraꞌpiarin. Naporahuaton yaꞌipi Quirosarinquë yaꞌhuëramasopita, ‘iso ninanoquë artaro yaꞌhuërin. Isëquëáchin Sinioro chinotocoꞌ,’ itërinquëmaꞌ. Yaꞌipi Cota huëntonquë yaꞌhuëpisopitantaꞌ, ina chachin camairin.

2 Reyes 19:10

Ninshitaton naporin: “Quëmaso Yosënën napotërinquën: ‘Ca nohuanton asiriaroꞌsasoꞌ, co minsëarinquëmahuëꞌ,’ itërinquën. Napotohuachinquëna, quëmasoꞌ ina natëran. Napotopirinquënhuëꞌ, ama natëquësohuëꞌ.