2 Pedro 2:3 - Chayahuita (Shahui)

³ Nisha aꞌchinaꞌpiroꞌsasoꞌ co nosororinënquëmahuëꞌ. Canacaiso marëꞌ nonpin nananoꞌsaꞌ aꞌchintarinënquëmaꞌ. Inaso nipirinhuëꞌ, iráca quëra huarëꞌ Yosëri yonquirin anaꞌintacasoꞌ. Aꞌna tahuëri noꞌtëquën anaꞌintarin. Co naniantarinhuëꞌ anaꞌintacasoꞌ.

2 Pedro 2:3 ပူးပေါင်းရင်းမြစ်များ

Salmos 66:3

“Nani maꞌsha acoransopitasoꞌ, paꞌyápiro ninan. Chini chiníquën nanantëran niꞌton, inimiconënpita tëꞌhuatatënën, anotatonaꞌ: ‘Tomonca,’ tëcaponaꞌ.

Isaías 60:22

Iporasoꞌ carayanquëma nipomarahuëꞌ, naꞌamiataramaꞌ. Carayanquëma nipomarahuëꞌ, panca nacion taranapomaꞌ. Caso Sinioroco. Ca nohuanton co huaꞌquiya quëranhuëꞌ naporahuësoꞌ nanipon. Tahuëri acorahuësoꞌ nanihuachin nanipon,” itërinquëmaꞌ.

Miqueas 3:11

Coisëroꞌsa pahuërëhuachinara, co huachi tëhuënaꞌpiroꞌsa anaꞌintopihuëꞌ. Corto huaꞌanoꞌsanta pahuërëai huarëꞌ, nanamëhuë aꞌchinpi. Pënëntonaꞌpiroꞌsanta pahuërëhuachinara: “Yosë catahuarinpoa canpoasoꞌ. Niꞌsárinpoa niꞌton, co manta onpoarihuahuëꞌ. Noya yaꞌhuëáparihuaꞌ,” itopi.

Habacuc 3:3

Timan parti quëran Yosë huëꞌsarin. Inasoꞌ, noyasáchin nicaton Paran motopi quëran huëꞌsarin. Huënaratërinsoꞌ, yaꞌipi piꞌiroꞌtë aꞌpintërin. Yaꞌipi isoroꞌpaquëntaꞌ, inasáchin chinotapi.

Malaquías 1:10

Inquëma tërantaꞌ, chinotëramacoso pëi yaꞌcoananën oncoatoma noyá patanantërama naporini, noya niitonhuëꞌ. Co huachi insonta yaꞌconaton, artaronëhuëquë topinan quëran aꞌpëchitonhuëꞌ. Co noyahuëꞌ ninama niꞌton, carimanta co noya niꞌnanquëmahuëꞌ. Maꞌsha quëshiramacosopitantaꞌ, co huachi maꞌpaponquëmahuëꞌ.

Mateo 23:14

Canpitaso nonpintënquëma niꞌton, ¡maꞌhuantacha nisarama paya! Quëyoronoꞌsaꞌ nonpintëramaꞌ. Noya nontapomarahuëꞌ, aꞌnaya aꞌnaya nonpintatomaꞌ, maꞌshanënapita matëramaꞌ. Ina quëran niyontonpiso pëiquë yaꞌconpatamara, huaꞌquiꞌ Yosë nontapomarahuëꞌ, co cancanëma quëran imaramahuëꞌ. Ina marëꞌ aquë aquëtëꞌ anaꞌintarinquëmaꞌ.]

Lucas 18:8

Tahuëri nanihuachin, aꞌnaroáchin anaꞌintarin. Napoaponahuëꞌ oꞌmantahuato, ¿naꞌa yaꞌpitaꞌmaꞌ natëarinaco quënaimapo to?” itërin Quisosori.

Lucas 20:20

Napoaton aꞌnaquën quëmapiꞌsaꞌ amatahuatonaꞌ, itaponaꞌ: “Nonpintatomaꞌ, Quisosoquë pacoꞌ. Yaimaramaso pochin nicatomaꞌ, ina nontocoꞌ atëhuëcaso marëꞌ. Ina quëran shaꞌhuirapihuatamaꞌ, huaꞌani sontaroꞌsaꞌ aꞌpaarin ina macacaso marëꞌ,” itopi.

Lucas 22:47

Nontaso chachin, naꞌa piyapiꞌsaꞌ canquipi. Cotasë quëchitëriarin. Inantaꞌ caꞌtanaponahuëꞌ, aꞌnotiarin. Quisoso yaꞌyoranquirahuaton, apinorin.

Juan 2:16

Nëpëꞌ paꞌanpisopita itapon: —Isopitantaꞌ quëpacoꞌ. ¡Ama Tatahuë pëinën mircato pochin nitocosohuëꞌ! itërin Quisosori.

Romanos 16:18

Quisocristosoꞌ huaꞌanënpoaꞌ nipirinhuëꞌ, co inapitarisoꞌ natëpihuëꞌ. Inahuara nohuantopisoráchin yonquipi. Noyasha nonaponaraihuëꞌ, co noꞌtëquën nonpihuëꞌ. Co noya nitotopiquëhuëꞌ aꞌchintohuachinara, aꞌnaroáchin nonpintopi.

2 Corintios 2:17

Aꞌnaquën nonpinatonaꞌ, inahuara canacaiso marëꞌ aꞌchinapi. “Yosë nanamën aꞌchintërainquëmaꞌ,” topirinahuëꞌ, co noꞌtëquën aꞌchinpihuëꞌ. Quiyaso nipirinhuëꞌ noꞌtëquën shaꞌhuitërainquëmaꞌ. Yosë aꞌparincoi niꞌton, ina nanansáchin aꞌchinarai. Yosë niꞌsárincoi niꞌton, Quisocristoíchin natëarai.

Deuteronomio 24:17

Nisha piyapiroꞌsaꞌ, saꞌahuaroꞌsaꞌ, inapita nosoroatoma ama maꞌsha onpotocosohuëꞌ. Quëyoronoꞌsa nihuihuachinquëmaꞌ, ayantinquëmaso nitotamaso marëꞌ, ama aꞌmorinso matocosohuëꞌ.

Deuteronomio 32:35

Anaꞌintaꞌhuaso tahuëri nanihuachin, naporo noꞌtëquën iꞌhuërëtarahuë. Anotërëso pochin nipachinaꞌ, naporo huarëꞌ anaꞌintarahuë. Nani huachi taꞌhuantacaiso tahuëri yaꞌcaritërin. ¡Nani ora naniriarin anaꞌintacasoꞌ!’ ” tënin.

1 Tesalonicenses 2:5

Co noyasha nonatoi, yanonpintërainquëmahuëꞌ. Co canacaꞌhuaiso marëꞌ napotërainquëmahuëꞌ. Yosë niꞌsárincoi, noꞌtëquën nontërainquëmaꞌ.

1 Tesalonicenses 5:3

Co imapisopitasohuëꞌ oꞌmantacasoꞌ tahuëri co yonquipihuëꞌ. “Noya yaꞌhuarëhuaꞌ, co mantaꞌ onpoarihuahuëꞌ,” topirinahuëꞌ. Aꞌnanaya chiníquën anaꞌintacasoꞌ naniarin, co chaꞌësapihuëꞌ. Sanapi yahuaihuachina, onporosona iquitacasoꞌ co nitotërinhuëꞌ. Aꞌnanaya iquitërin. Inapochachin aꞌnanaya Yosëri anaꞌintarin.

1 Timoteo 3:3

Ama noꞌpiinasohuëꞌ. Ama yaahuëchinasohuëꞌ. Sano yonquiꞌinaꞌ. Ama yanoꞌhuichinasohuëꞌ. Ama coriquiráchin cancanchinasohuëꞌ.

1 Timoteo 3:8

Ansianoꞌsaꞌ catahuarinsopitasoꞌ tiaconoꞌsaꞌ topi. Inapitantaꞌ natëtonoꞌsaꞌ niinaꞌ. Noꞌtëquënáchin noinaꞌ. Ama nisha nisha noinasohuëꞌ. Ama noꞌpiinasohuëꞌ. Ama nonpinatonaꞌ, coriqui canainasohuëꞌ.

1 Timoteo 6:5

Nitapicancantatonaꞌ, co niquëꞌyapihuëꞌ. Iráca Yosë nanamën nitotopirinahuëꞌ, ina naniantatonaꞌ, co huachi noꞌtëquën yonquipihuëꞌ. Maꞌsha canacaiso marëꞌ Yosë yaimaconpi. Co ina marëꞌ imacasohuëꞌ nipirinhuëꞌ, napopi. Ama inapitasoꞌ natanquësohuëꞌ.

Tito 1:11

Yapënëntohuachinaꞌ, shaꞌhuitëquëꞌ ama pënënchinasohuëꞌ. Maꞌsha canacaisoáchin yonquiatonaꞌ, aꞌchinapi. Nisha aꞌchintohuachinara, aꞌnaquën Yosë nanamën yaaꞌpopi. Quëmopinënpitarë chachin nisha imasapi.

Tito 1:7

Yosë nohuanton, ansianoꞌsaꞌ yaꞌhuëpi imapisopita catahuacaiso marëꞌ. Yosëri acorin niꞌton, noyasáchin niinaꞌ. Ama nocanchinasohuëꞌ. “Casáchin noꞌtëquën nitotërahuë,” topachinaꞌ, ama acoquësohuëꞌ. Ama yanoꞌhuichinasohuëꞌ. Ama noꞌpiinasohuëꞌ. Ama yaahuëchinasohuëꞌ. Ama coriquiráchin cancanchinasohuëꞌ. Ama piꞌpian tërantaꞌ nonpinatonaꞌ, canainasohuëꞌ. Insosona ina pochin cancantohuachin, ama ansiano acoquësohuëꞌ.

1 Pedro 2:8

Quiricanën quëran itantarin: “Iratohuatëra, naꞌpi iꞌpatahuatëꞌ, anotërëꞌ,” tënin. Inapochachin aꞌnaquën co Quisocristo nanamën natëtonaraihuëꞌ, nisha cancantopi. Ina marëꞌ Yosë nohuanton, naꞌinpi huachi.

1 Pedro 5:2

Quisoso imapisopita iyaroꞌsaꞌ noya niꞌcoꞌ. Yosë acorinquëmaꞌ yaꞌhuëramaquë aꞌchinacamaso marëꞌ. Huaꞌanëni ohuicanënpita noya aꞌpairinso pochin noya aꞌpaicoꞌ imamiachinaꞌ. Aꞌnaya tërantaꞌ co noyahuëꞌ nipachin, sanoanan quëran pënëncoꞌ noya yonquiantaꞌin. Nani tahuëri catahuacoꞌ noya imainaꞌ. Ama chirotomahuëꞌ, aꞌchincoꞌ. Ina pochin nicacasoꞌ Yosë nohuantërin. Niꞌton, canpitantaꞌ noya nohuantatomaꞌ, aꞌchincoꞌ. Ama canacaso marëꞌ aꞌchincosohuëꞌ. Nóya cancantatomaꞌ, Yosë marëꞌ sacatocoꞌ.

2 Pedro 1:16

“Chiníquën nanantaton, Quisocristo oꞌmantararin,” itërainquëmaꞌ. Sinioro oꞌmantacasoꞌ tahuëri noꞌtëquën aꞌchintërainquëmaꞌ. Co quiyaora yonquinëhuëi quëran aꞌchintërainquëmahuëꞌ. Co piꞌpisha tërantaꞌ nonpintërainquëmahuëꞌ. Iráca isoroꞌpaquë nipon, nisha pochin yaꞌnotërincoi. Yaꞌpirahuëi quëran chachin niꞌnai.

2 Pedro 2:1

Iráca Yosëri acorinsopita noꞌtëquën pënëntopi. Aꞌnaquënso nipirinhuëꞌ nonpin nanan pënëntatonaꞌ, israiroꞌsaꞌ nonpintopi. Inapochachin iporantaꞌ aꞌnaquën nonpin nanan yaaꞌchintarinënquëmaꞌ. Noyasha nontapirinënquëmahuëꞌ, nonpintarinënquëmaꞌ. “Quiyantaꞌ imarai,” taponaraihuëꞌ, nonpin nanan aꞌchinapi anishacancantacaiso marëꞌ. Quisocristo nichaꞌëinpoaso marëꞌ chiminin. Inaíchin natëcaso nipirinhuëꞌ, nisha aꞌchinaꞌpiroꞌsasoꞌ co yanatëpihuëꞌ. Ina marëꞌ aꞌna tahuëri Yosëri anaꞌintarin. Aꞌnanaya anaꞌintarin.

2 Pedro 2:9

Inapochachin ipora Quisocristo imapatëhuaꞌ, Yosë nanitërin catahuainpoasoꞌ. Sopai yaminsëpirinpoahuëntaꞌ, Yosë catahuarinpoaꞌ chaꞌëcaso marëꞌ. Oshahuanoꞌsaso nipirinhuëꞌ anaꞌintarin. Nani yonquirin chiníquën anaꞌintacasoꞌ. Ayaroꞌ tahuëri nanihuachin, noꞌtëquën anaꞌintaton, parisitopiquë aꞌpararin.

Judas 1:11

¡Maꞌhuantacha nisapi paya! Nonpinaꞌpiroꞌsasoꞌ, Caino pochin cancantatonaꞌ co Yosë natëpihuëꞌ. Paramo pochin cancantopi. Iráca Paramosoꞌ coriquiráchin cancantaton, piyapiꞌsaꞌ anishacancantërin. Corintaꞌ iráca co noyahuëꞌ ninin. Co huaꞌanoꞌsaꞌ yanatërinhuëꞌ, noꞌhuirin. Ina marëꞌ Yosë nohuanton, chiminin. Inapita pochin cancantopisopita Yosëri chiníquën anaꞌintarin.

Judas 1:15

Naporoꞌ yaꞌipi oshahuanoꞌsaꞌ anaꞌintarin huachi. Paꞌpi co noyahuëꞌ nipi niꞌton, anaꞌintacasoꞌ yaꞌhuërin. Yosë noꞌhuipisopita noꞌtëquën anaꞌintarin huachi,” tënin iráca.

Judas 1:16

Yosësoꞌ noya nosoropirinpoahuëꞌ, inapitasoꞌ maꞌsha onpohuachinara, ina noꞌhuipi. Co sano cancantopihuëꞌ. Maꞌsona tërantaꞌ yonquihuachinara, nipi. Co noyahuëꞌ cancantatonaꞌ, napopi. “Quiyasoꞌ noya noya nitotërai,” taꞌtonaꞌ, chiníquën nonconpi. Co piyapi nosoroaponaraihuëꞌ, noyasha nontopi. Inahuara canacaiso marëꞌ napotopi.

Judas 1:4

Tëhuënchachin aꞌnaquënsoꞌ nonpin nanan aꞌchintarinënquëmaꞌ. Paꞌpi co noyahuëꞌ inapitasoꞌ. “Quiyantaꞌ imarai,” taponaraihuëꞌ, co noꞌtëquën aꞌchinpihuëꞌ. “Maꞌsona nohuantërëhuaso niahuaꞌ. Yosë nosororinpoaꞌ niꞌton, co anaꞌintarinpoahuëꞌ,” taꞌtonaꞌ, paꞌpi co noyahuëꞌ nipi. Noꞌpipi, monshihuanpi, aꞌnaratipita nipi. Naporahuatonaꞌ, co tëhuënchachin Quisocristo imapihuëꞌ, inasáchin natëcaso nipirinhuëꞌ. Ina marëꞌ Yosëri chiníquën anaꞌintarin. Iráca quëra huarëꞌ nani yonquirin anaꞌintacasoꞌ. Napoaton niꞌcona canpitantaꞌ nonpintochinënquëmaꞌ. Chiníquën cancantatomaꞌ, noꞌtëquën aꞌchincoꞌ.

Judas 1:7

Iráca Sotomaquë yaꞌhuëpisopitantaꞌ paꞌpi co noyahuëꞌ yonquipi. Monshihuanacaisoáchin cancantopi. Aꞌnaratipita taparoꞌ nipi. Co ina pochin nicacasohuëꞌ nipirinhuëꞌ, napopi. Ina marëꞌ Yosëri chiníquën anaꞌintërin. Pën inápa quëran aꞌpaimarin ahuiquitacaso marëꞌ. Sotoma, Comora, inapita huiquitopi. Yaꞌcariya ninanoroꞌsantaꞌ huiquitopi. Ayonquiinpoaso marëꞌ ninshitërinpoaꞌ. Inapita yonquiatëhuaꞌ, “Aꞌna tahuëri oshahuanoꞌsaꞌ pënquë parisitomiatapi huachi,” tënëhuaꞌ.