2 Pedro 1:16 - Chayahuita (Shahui)

¹⁶ “Chiníquën nanantaton, Quisocristo oꞌmantararin,” itërainquëmaꞌ. Sinioro oꞌmantacasoꞌ tahuëri noꞌtëquën aꞌchintërainquëmaꞌ. Co quiyaora yonquinëhuëi quëran aꞌchintërainquëmahuëꞌ. Co piꞌpisha tërantaꞌ nonpintërainquëmahuëꞌ. Iráca isoroꞌpaquë nipon, nisha pochin yaꞌnotërincoi. Yaꞌpirahuëi quëran chachin niꞌnai.

2 Pedro 1:16 ပူးပေါင်းရင်းမြစ်များ

Malaquías 3:2

Ina oꞌmahuachinso napoaponahuëꞌ, ¡co insoari tërantaꞌ, chinitacaso nanitaponhuëꞌ! ¡Naporosoꞌ, yaꞌipinquëma tëhuëramaso anitotarinquëmaꞌ! Huaꞌna pënquë asoquirahuatonaꞌ, nëꞌhuëtërinso inquitopi. Inapochachin canpitantaꞌ, co noyahuëꞌ ninamaso inquitarinquëmaꞌ. Shapon nëꞌhuë inquitërinso pochin oshanëma inquitarinquëmaꞌ.

Malaquías 4:5

Niꞌcoꞌ. Anaꞌintaꞌhuaso tahuëri nanihuachin, paꞌpi huëhuëpiro nisarin. Coꞌhuara ina tahuëri naniátërasohuëꞌ, Iniasë pënëntonaꞌpi aꞌpataranquëmaꞌ.

Mateo 16:27

Yosë quëran quëmapico niꞌto, aꞌna tahuëri oꞌmantararahuë. Tatahuë huënaratërinso pochin cantaꞌ huënaratarahuë. Anquëniroꞌsapitarëꞌco oꞌmantararahuë. Naporoꞌ coisë pochin noꞌtëquën shaꞌhuitarahuë huachi. Noya nipachinaꞌ, noya acoarahuë. Co noyahuëꞌ nipachinaꞌ, anaꞌintarahuë huachi.

Mateo 16:28

Tëhuënchachin isoroꞌpaꞌ huaꞌanëntapo. Aꞌnaquëmaꞌ coꞌhuara chimiyantërasënquëmahuëꞌ, huaꞌanëntarahuësoꞌ niꞌsaramaꞌ, itërin.

Mateo 17:1

Saota tahuëri quëran Quisoso paꞌnin motopiꞌpaꞌ. Pitro, Santiaco, Coansha, inapitaráchin quëparin.

Mateo 24:27

Yosë quëran quëmapico niꞌto, aꞌna tahuëri oꞌmantararahuë. Oꞌmantahuato, yaꞌipi piyapiꞌsaꞌ niꞌsarinaco. Oꞌcoriꞌ huënshaꞌ topachina, yaꞌipi parti aꞌpintërin. Inapochachin aꞌna tahuëri huënaráchin huënaráchin oꞌmantararahuë, niꞌsaramaco.

Mateo 24:3

Ina quëran Oriposë panënquë paꞌsahuaton, inaquë huënsëconin. Caꞌtanoꞌsanënpitaráchin yaꞌhuëpi. Inapitari huëcapairahuatonaꞌ, itiipi: —¿Onporotaꞌ Maistro ohuatapi? Ayaroꞌ tahuëri yaꞌcaritohuachin, ¿maꞌtaꞌ onporahuachinaꞌ nitotapoi? ¿Onporotaꞌ oꞌmantararan? Inapita shaꞌhuitocoi quiyantaꞌ nitochii, itopi.

Mateo 28:18

Quisosori yaꞌcarirahuaton, itapon: —Tata Yosë nohuanton, chini chiníquën nanantërahuë. Inápaquë yaꞌhuërinsopita, isoroꞌpaquë yaꞌhuërinsopita, yaꞌipiya huaꞌanëntarahuë.

Marcos 13:26

Naporoꞌ yaꞌipi piyapiꞌsaꞌ niꞌsarinaco. Yosë quëran quëmapico niꞌto, chitoroꞌ huancana oꞌmantararahuë. Chiníquën nanantato, huënaráchin huënaráchin yaꞌnoarahuë.

Marcos 14:62

—Ca mini inaco. Aꞌna tahuëri niꞌsaramaco. Yosë quëran quëmapico niꞌto, Yosë chiníquën nanantaton, inchinan quëran ahuënsëarinco. Ina quëran chitoroꞌ huáncana oꞌmantararahuë niantaramaco, itërin Quisosori.

Lucas 1:2

Caꞌtanoꞌsanënpitasoꞌ iráca quëran huarëꞌ imatonaꞌ, naporinsoꞌ niꞌpi. Nani yaꞌipi noꞌtëquën shaꞌhuitërinacoi.

Lucas 9:43

Yaꞌipi piyapiꞌsari nicatonaꞌ, paꞌyanpi. “¡Ma noyacha Yosëri catahuarin niꞌton, sopai aꞌparin paya!” topi. Yaꞌipi piyapiꞌsari paꞌyanatonaꞌ, anoyatërinsoꞌ yonquirápirinahuëꞌ, caꞌtanoꞌsanënpita itantarin:

Juan 1:14

Quisocristo isoroꞌpaquë nasitimarin. Yosë niponahuëꞌ, piyapi chachin nasitërin. Canpoarë chachin yaꞌhuërin. Quiyasoꞌ niꞌnai. Inasoꞌ nóya, tënai. Yosë pochachin ninin. Inaíchin huiꞌnin inasoꞌ. Inaora nohuanton nosororinpoaꞌ. Noꞌtëquën nontërinpoaꞌ.

Juan 17:2

Nani chiníquën nanan quëtëranco yaꞌipi piyapiꞌsaꞌ huaꞌanëntaꞌhuaso marëꞌ. Quëma nohuanton, aꞌnaquën imasarinaco. Inapitasoꞌ anoyacancantërahuë quëma nohuitatënën nanpimiatacaiso marëꞌ.

Romanos 1:4

Yosë pochachin niꞌton, noyasáchin ninin. Chiminpirinhuëꞌ, Yosëri ananpitaantarin. “Inasoꞌ tëhuënchachin Yosë huiꞌnin. Chini chiníquën nanantarin,” tënëhuaꞌ. Ananpitaantarin niꞌton, nitotërëhuaꞌ. Quisocristo chachin huaꞌanëntërinpoaꞌ niꞌton, “Sinioro” itërëhuaꞌ.

1 Corintios 1:17

Nanamën aꞌchinaꞌhuaso marëꞌ Quisocristo acorinco. Co aporintaꞌhuaso marëꞌ acorincohuëꞌ. Aꞌchintohuatënquëmara, co naꞌcon nitotoroꞌsa pochin nontëranquëmahuëꞌ. Quisocristo corosëquë chiminin oshanënpoaꞌ inquitinpoaso marëꞌ, tënahuë. Inaíchin nanitaparin nichaꞌëinpoasoꞌ. Napoaton inasáchin aꞌchinahuë. Nisha nisha aꞌchinahuë naporini, Quisocristo nanianchitomahuëꞌ. Inaíchin yonquihuatëhuaꞌ, tëhuënchachin anoyacancantërinpoaꞌ.

1 Corintios 1:23

Quiyaso nipirinhuëꞌ Quisocristo nanamënáchin aꞌchinai: “Corosëquë canpoa marëꞌ chiminin,” tënai. Cotioroꞌsasoꞌ co natëtopihuëꞌ: “Inasoꞌ Yosë huiꞌnin naporini, co chimiintonhuëꞌ,” toconpi. Nisha piyapiroꞌsarintaꞌ co nohuantatonaraihuëꞌ, tëhuapi.

1 Corintios 1:7

Canpitaora co nanitëramahuëꞌ Yosë pochin cancantacamasoꞌ. Nipirinhuëꞌ, Yosë ananitarinquëmaꞌ. Co mantaꞌ pahuantarinquëmahuëꞌ noya nicacamaso marëꞌ. Catahuarinquëmaꞌ niꞌton, noya cancantatomaꞌ, Sinioro Quisocristo oꞌmantacasoꞌ tahuëri ninaramaꞌ.

1 Corintios 2:1

Canpitataquë paꞌpatëra, Yosë nanamën aꞌchintëranquëmaꞌ. Co iyaroꞌsaꞌ míso nonaꞌpi pochin nontëranquëmahuëꞌ. Co naꞌcon naꞌcon nitotërinso pochin aꞌchintëranquëmahuëꞌ.

1 Corintios 2:4

Co naꞌcon nitotonaꞌpi pochin nontëranquëmahuëꞌ. Ispirito Santo chachin catahuarinco nanamën nóya aꞌchinaꞌhuaso marëꞌ. Inasoꞌ yaꞌipi nanitaparin. Natanpatamaꞌ, “Yosë nanamën chachin aꞌchintërinpoaꞌ,” taꞌtomaꞌ, natëramaꞌ.

1 Corintios 5:4

Quisocristo imaramaꞌ niꞌton, niyontoncoꞌ. Niyontonpatamaꞌ, ca pochin cancantatomaꞌ, ina quëmapi chiníquën pënëncoꞌ. “Sinioro Quisoso nanan quëtërincoi niꞌton, ama huachi Tata Yosë aꞌpainquënsohuëꞌ, tënai. Sopai natëran niꞌton, parisitamasoꞌ yaꞌhuërin,” itocoꞌ. Inapotohuatamaꞌ, aꞌna tahuëri yonquiapon nimara. “Co noyahuëꞌ yonquirahuësoꞌ naniantato, Yosë imantaꞌi,” tapon nimara. Napohuachin, Sinioro Quisoso oꞌmantahuachin, nichaꞌësarin huachi.

2 Corintios 2:17

Aꞌnaquën nonpinatonaꞌ, inahuara canacaiso marëꞌ aꞌchinapi. “Yosë nanamën aꞌchintërainquëmaꞌ,” topirinahuëꞌ, co noꞌtëquën aꞌchinpihuëꞌ. Quiyaso nipirinhuëꞌ noꞌtëquën shaꞌhuitërainquëmaꞌ. Yosë aꞌparincoi niꞌton, ina nanansáchin aꞌchinarai. Yosë niꞌsárincoi niꞌton, Quisocristoíchin natëarai.

2 Corintios 4:2

Aꞌnaquënsoꞌ co noyahuëꞌ yonquiatonaꞌ, aꞌchinapi. Noyasha nonpirinahuëꞌ, nonpinacaiso marëꞌ napopi. Quiyaso nipirinhuëꞌ co mantaꞌ poꞌoana quëran ninaihuëꞌ niꞌton, co tapanaꞌhuaisoꞌ yaꞌhuërinhuëꞌ. Co nisha nisha aꞌchinaihuëꞌ. Yaꞌipi Yosë nanamën noꞌtëquën aꞌchintarainquëmaꞌ. Yosë niꞌsárincoi niꞌton, inasáchin aꞌchinarai. Aꞌninquëchin aꞌchinai yaꞌipi piyapiꞌsaꞌ yonquicaiso marëꞌ.

Efesios 4:14

Ina quëran noꞌtëquën yonquiarihuaꞌ. Co huachi huaꞌhuaroꞌsa pochin cancantarihuahuëꞌ. Huaꞌhuaroꞌsasoꞌ co yonquiyatërapihuëꞌ niꞌton, nisha nisha natëtopi. Canpoaso nipirinhuëꞌ chinotënpoa pochin noꞌtëquën yonquiaꞌahuaꞌ. Niꞌcoꞌ. Panca ihuan huëꞌpachina, poti niquëran niquëran ohuërërin. Co noꞌtëquën yanponinhuëꞌ. Inapochachin aꞌnaquën nisha nisha nanan natanpachinara, nisha nisha yonquipi. Co Quisocristo nanamënáchin yonquipihuëꞌ. Aꞌnaquën nisha nisha aꞌchinapi. Noyá nitotopi nonpinacaisoꞌ. Nonpin nanan imatonaꞌ, yanonpintopirinënquëmahuëꞌ, ama piꞌpian tërantaꞌ natëcosohuëꞌ.

Filipenses 3:21

Iporasoꞌ nonënpoaꞌ co chinirinhuëꞌ. Yacaniorëhuaꞌ. Chiminacasoꞌ yaꞌhuërin. Nipirinhuëꞌ, Quisocristo oꞌmantahuachin, nonënpoaꞌ anishatarin. Ina pochachin yaꞌnoarihuaꞌ. Nanitaparin niꞌton, yaꞌipi minsërahuaton, ananpitomiatarinpoaꞌ, noya noya acoarinpoaꞌ.

1 Tesalonicenses 2:19

Naꞌcon yonquiatëinquëmaꞌ, nóya cancantërai. ¿Maꞌmarë chachintaꞌ ina pochin cancantërai? Imaramaꞌ niꞌton, Yosë yaꞌhuërinꞌpaꞌ canpitantaꞌ paꞌsaramaꞌ, tënai. Aꞌna tahuëri Sinioro Quisocristo oꞌmantararin. Naporoꞌ: “Quiyari aꞌchintërai niꞌton, imapi,” taꞌtoi, noya cancantarai.

2 Tesalonicenses 2:9

Nipirinhuëꞌ, coꞌhuara ina oꞌmayatërasohuëꞌ, notohuaroꞌ piyapiꞌsaꞌ nonpintarin. Satanasëri catahuarin niꞌton, nani maꞌsha nanitapaarin nicacasoꞌ. Piyapi inaora co nanitërinhuëꞌ ina pochin nicacasoꞌ. Nonpintaton, nani maꞌsha sacaiꞌ nininsoꞌ aꞌnotohuachina, natërapi. Niꞌpachinaꞌ, paꞌyanapi.

1 Timoteo 1:4

Shimashonënpita iráca napopisoꞌ yonquiápi. Inahuara yonquinëna quëraontaꞌ nishaꞌhuitopisoꞌ yonquirápi. Ama huachi inapita yonquicaiso marëhuëꞌ shaꞌhuitëquëꞌ. Ina pochin aꞌchinpachinaꞌ, topinan quëran aꞌchinapi. Piyapiꞌsaꞌ nisha nisha nonsapi. Co catahuapihuëꞌ Yosë nohuitacaisoꞌ. Yosëíchin natëhuatëhuaꞌ, catahuarinpoaꞌ noya noya imacaso marëꞌ.

1 Timoteo 4:7

Nonpin nananoꞌsaso nipirinhuëꞌ tananpitëquëꞌ. Inahuara yonquinëna quëran naporapi niꞌton, tananpitëquëꞌ. Inapitasoꞌ topinan quëran aꞌchinapi. Quëmaso nipirinhuëꞌ nani tahuëri yonquiquëꞌ Yosë noya imacaso marëꞌ.

Tito 1:14

Ama cotioroꞌsaꞌ iráca napopisoꞌ natëinasohuëꞌ. Aꞌnaquën noꞌtën nanan aꞌporahuatonaꞌ, inahuara yonquinëna quëran aꞌchinapi. Ama inapita natëinasohuëꞌ.

2 Pedro 2:3

Nisha aꞌchinaꞌpiroꞌsasoꞌ co nosororinënquëmahuëꞌ. Canacaiso marëꞌ nonpin nananoꞌsaꞌ aꞌchintarinënquëmaꞌ. Inaso nipirinhuëꞌ, iráca quëra huarëꞌ Yosëri yonquirin anaꞌintacasoꞌ. Aꞌna tahuëri noꞌtëquën anaꞌintarin. Co naniantarinhuëꞌ anaꞌintacasoꞌ.

1 Juan 4:14

Tata Yosëri huiꞌnin isoroꞌpaquë aꞌpaimarin nichaꞌëinpoaso marëꞌ. Quiyarisoꞌ niꞌnai. Nani tahuëri piyapiꞌsaꞌ shaꞌhuitárai.

Judas 1:14

Iráca Inocori chachin inapita ninorin. Atan shiin inasoꞌ. Atan quëran saota shinpita yaꞌhuërin piquëran Inoco yaꞌhuërin. Ninoton, naporin: “Sinioro chachin oꞌmararin huachi. Huaꞌhuayatërahuëꞌ anquëniroꞌsarë chachin oꞌmararin.

Apocalipsis 1:7

Niꞌcochi. Quisocristo oꞌmantararin. Aꞌna tahuëri chitororë chachin oꞌmantararin. Naporoꞌ yaꞌipi piyapiꞌsari niꞌsapi. Iráca ohuanpisopitarintaꞌ niꞌsapi. Nisha nisha piyapiꞌsaꞌ sëtatonaꞌ, naꞌnërapi. “¿Onpoatëhuacha co natërëhuahuë paya?” tosapi. Tëhuënchachin naporapi. Amen.