2 Corintios 9:15 - Chayahuita (Shahui)

¹⁵ Yosëso nipirinhuëꞌ naꞌcon naꞌcon quëtërinpoaꞌ. Huiꞌnin chachin aꞌpaimarin nichaꞌëinpoaso marëꞌ. Inasoꞌ noya nóya niꞌton, “Yosparinquën, Sinioro,” itahuaꞌ.

2 Corintios 9:15 ပူးပေါင်းရင်းမြစ်များ

Isaías 49:6

Ina Sinioro chachin shaꞌhuitaantarinco: ‘Cacopo quëran pipipisopita huëntonoꞌsaꞌ, quëmari anoyataantapon. Inimicoroꞌsari quëpapirinahuëꞌ, quëmari ayontoantapon. Napoaponahuëꞌ, co inaíchin nicacaso marëꞌ acoranquënhuëꞌ, nisha piyapiꞌsanta aꞌchintaton, anohuitaancoso marëꞌ acoranquën. Aꞌpintërëso pochin nanamëhuë anitotaran. Yaꞌipi parti piyapiꞌsa chaꞌëcaiso marëꞌ aꞌchintëraꞌpiapon,’ itërinco,” tënin.

Isaías 9:6

Canpoa marëꞌ aꞌnara quëmapiaꞌhua nasitërin. Huiꞌnanpoa Yosë quëtërinpoaso pochin aꞌnara yaꞌipiya marëꞌ quëtërinpoaꞌ. Ina mini huaꞌanëntacaso marëꞌ acorinsoꞌ. Nisha nisha quëran nohuitaponaꞌ: “Paꞌyapiro yonquirinsoꞌ.” “Co minsëchináchinhuëꞌ Yosë.” “Yaꞌhuëmiatonaꞌpi tata.” “Sano cancantonaꞌpi huaꞌan.” Ina pochinpita nohuitaponaꞌ.

Lucas 2:14

“¡Ma noyacha Yosëso paya! Inápaquë yaꞌhuaponahuëꞌ, piyapinquëmaꞌ yonquirinquëmaꞌ. Cancantatoma ina yanatëramasopitasoꞌ sano cancantaramaꞌ,” itopi anquëniroꞌsari.

Lucas 2:38

Naporoꞌ inantaꞌ huëcaton, Quisosoaꞌhuaya niꞌnin. Noya cancantaton, Yosë nontërin. —Iso huaꞌhuasha nasitërinso marëꞌ: “Yosparinquën Sinioro,” itëranquën, tënin. Ina quëran Yosë imapisopita shaꞌhuitërin. —Yosë nohuanton, aꞌpaimarinsoꞌ nani nasitërin. Inasoꞌ nichaꞌësarinpoaꞌ, itërin. Naꞌa Quirosarinquë yaꞌhuëpisopita ina ninarapi niꞌton, napotërin.

Juan 1:16

Inasoꞌ paꞌpi nosororinpoaꞌ. Nóya niꞌton, nosoroatonpoaꞌ, naꞌcon catahuarinpoaꞌ. Co canpoara nanitopirëhuahuëꞌ, ina imapatëhuaꞌ, nani tahuëri catahuarinpoaꞌ.

Juan 3:16

Yosësoꞌ yaꞌipi piyapiꞌsaꞌ paꞌpi nosoromiatërin. Napoaton aꞌnaíchin huiꞌnin nipirinhuëꞌ, isoroꞌpaquë aꞌpaimarin chiminacaso marëꞌ. Ina natëtëhuaꞌ: “Ca marëꞌ chiminin,” topatëhuaꞌ, co parisitopiquë paꞌsarëhuahuëꞌ. Yosë nohuitatëhuaꞌ, nanpimiatarëhuaꞌ.

Romanos 5:15

Inasoꞌ yaꞌipinpoaꞌ nosororinpoaꞌ. Atanso nipirinhuëꞌ co ina pochin nininhuëꞌ. Co natërinso marëhuëꞌ oshanën yaꞌhuëtërin. Inapochachin yaꞌipi piyapiꞌsaꞌ oshahuanatonaꞌ, chiminpi. Ina quëran anaꞌintacasoꞌ yaꞌhuërin. Yosëso nipirinhuëꞌ inaora nohuanton, naꞌcon nosororinpoaꞌ. Nosoroatonpoaꞌ, huiꞌnin aꞌpaimarin naꞌaquënpoaꞌ anoyacancantinpoaso marëꞌ.

Romanos 6:23

Piyapi asacatohuatëra, pahuërërëꞌ. Inapochachin co noyahuëꞌ nipatëhuaꞌ, chiminpatëhuaꞌ parisitomiatarihuaꞌ. Yosëso nipirinhuëꞌ, inaora nohuanton nosororinpoaꞌ. Quisocristo imapatëhuaꞌ, ina nohuitatëhuaꞌ, nanpimiatarihua. Inasoꞌ huaꞌanënpoaꞌ. Inasáchin natërëhuaꞌ.

Romanos 8:32

Yosë chachin nosoroatonpoaꞌ co huiꞌnin tërantaꞌ apiratërinpoahuëꞌ. Isoroꞌpaquë aꞌpaimarin chiminacaso marëꞌ. Canpoa marëꞌ chiminin. Ipora chachintaꞌ nosoroatonpoaꞌ, catahuarinpoaꞌ. ¡Quisocristo imarëhuaꞌ niꞌton, co mantaꞌ pahuantarinpoahuëꞌ Yosë pochin cancantacaso marëꞌ! Nóya nichaꞌësarinpoaꞌ.

1 Corintios 15:57

Yaꞌhuëpirinhuëꞌ, ¡ma noyacha Tata Yosësoꞌ niꞌton, nichaꞌërinpoa paya! Ina nohuanton, Quisocristo yaꞌhuërëtërinpoaꞌ. Corosëquë chiminaton, sopai minsërin. Nanpiantarahuaton, chimiriontaꞌ minsërin. Ina marëꞌ: “Yosparinquën,” itahuaꞌ.

2 Corintios 2:14

Ma noyacha Tata Yosëso paya, tënëhuaꞌ. Quisocristo imarëhuaꞌ niꞌton, nani tahuëri ina catahuarinpoaꞌ inimiconënpoapita minsëcasoꞌ. Inapitasoꞌ co nohuantopihuëꞌ Quisocristo nanamën aꞌchinaꞌhuaisoꞌ. Co nohuantopirinahuëꞌ, nisha nisha parti paatoi, nanamën aꞌchinárai. Pimóton huaꞌsaiꞌ pimoanahuaninso pochin Quisocristo nanamën nahuinarin. Aꞌchintatoi, naꞌa piyapiꞌsaꞌ anitotërai.

2 Corintios 9:11

Noya catahuahuachinquëmaꞌ, aꞌnapitantaꞌ catahuaramaꞌ. Co apiratatomahuëꞌ, quëtaramaꞌ. Pahuantërinsopita quëtonpatoi, “Yosparinquën, Sinioro,” tosapi.

2 Corintios 9:14

Yosë nohuanton, naꞌcon nosororamaꞌ niꞌton, inapitantaꞌ nosoroatënquëmaꞌ, canpita marëꞌ Yosë nontapi huachi.

Efesios 5:20

Nani tahuëri Tata Yosë nontatomaꞌ: “Yosparinquën,” itocoꞌ. Maꞌsha onpoapomarahuëntaꞌ, noya cancantocoꞌ. “Sinioro Quisocristo nanan quëtërinco niꞌton, nontaranquën,” taꞌtomaꞌ Yosë nontocoꞌ.

Santiago 1:17

Yosësoꞌ noyasáchin yonquirinpoaꞌ. Noya noya cancantacaso marëꞌ catahuarinpoaꞌ. Inasáchin noya aꞌpintërinpoaꞌ noꞌtëquën yonquicaso marëꞌ. Piꞌi, yoqui, tayora, inapita inari acopirinhuëꞌ, co yaꞌipi tahuëri noya aꞌpininhuëꞌ. Aꞌna tashintaꞌ co mantaꞌ aꞌpininhuëꞌ. Yosëso nipirinhuëꞌ co ina pochin nininhuëꞌ. Nani tahuëriya nosoroatonpoaꞌ, catahuarinpoaꞌ.

Apocalipsis 4:9

Apira apira chinotapi. “¡Ma noyacha Yosëso paya! Yaꞌipi piyapiꞌsari chinochinaꞌ. Naꞌcon catahuarinpoaꞌ niꞌton, ‘Yosparinquën Sinioro,’ itahuaꞌ. Inasoꞌ huaꞌanëntomiatarinpoaꞌ. Co onporontaꞌ taꞌhuantarinhuëꞌ,” topachinara,