2 Corintios 8:6 - Chayahuita (Shahui)

⁶ Iꞌhua chachin Tito shaꞌhuitërinquëmaꞌ niꞌton, canpitantaꞌ yonquiramaꞌ coriqui yontonacamasoꞌ. “Imapisopita pahuantopi niꞌton, aꞌpatahuaꞌ,” tënamaꞌ. Napoaton iꞌhuamiachin Tito itërai: “Naquëranchin paantaton, pënëantaquëꞌ yaꞌipi coriqui yaaꞌpapisoꞌ ananiinaꞌ,” itërai.

2 Corintios 8:6 ပူးပေါင်းရင်းမြစ်များ

Hechos 24:17

Iráca Quirosarinquë yaꞌhuëpirahuëꞌ. Naꞌa piꞌipi aꞌna parti paꞌnahuë quëran iꞌhuamiáchin inaquë paantarahuë. Saꞌahuaroꞌsaꞌ nosoroato, coriqui quëtaꞌhuaso marëꞌ paꞌnahuë. Maꞌsha Yosë quëtaꞌhuaso marëntaꞌ paꞌnahuë.

Romanos 15:25

Iporaso nipirinhuëꞌ Quirosarinquëꞌton paꞌsarahuë. Inatohuaꞌ naꞌa imapisopita yaꞌhuëpirinahuëꞌ. Maꞌsha pahuantopi niꞌton, parisitapi. Ina natantahuatonaꞌ, Masitoniaquë imapisopitari inahuara nohuanton yacatahuapi. Acayaquë imapisopitarintaꞌ yacatahuapi. Pahuantërinsopita nosoroatonaꞌ, coriqui yontonpisoꞌ quëtërinaco. Ina quëtontaꞌhuaso marëꞌ paꞌsarahuë.

2 Corintios 12:18

“Inta, quëmari niꞌconiquëꞌ iyaroꞌsaꞌ,” itahuato, Tito aꞌparahuë. Inarëꞌ aꞌna iyayantaꞌ aꞌparahuë. Cantonpachinquëmaꞌ, co Tito nonpintërinquëmahuëꞌ. Cantaꞌ ina pochachin cancantërahuë. Co piꞌpisha tërantaꞌ canaraihuëꞌ.

2 Corintios 2:13

Napoaponahuëꞌ, iꞌhua chachin iya Tito canpitataquë aꞌpapirahuëꞌ. Co huënantarinhuë niꞌton, co sano cancantërahuëꞌ. “¿Onpoatoncha co iyasha huëntarinhuë nicaya?” taꞌto, piyapiꞌsaꞌ noyasha nontahuato, Masitoniaquë paꞌnahuë.

2 Corintios 8:10

Iꞌhua piꞌiquë yonquiramaꞌ aꞌnapita catahuacamasoꞌ. Naporoꞌ caniaritëramaꞌ coriqui yontonacasoꞌ. Iporasoꞌ naquëranchin yontoantacoꞌ, tënahuë. Inapohuatamaꞌ, noya nisaramaꞌ.

2 Corintios 8:19

Nisha nisha ninano quëran imapisopita niyontonahuatonaꞌ, ina quëmapi chachin huayonahuatonaꞌ, acopi caꞌtanaincoiso marëꞌ. Coriqui yocaꞌhuaiso marëꞌ paꞌpatoi, inantaꞌ paꞌsarin. Coriqui quëtonpatoi, noya cancantapona huachi. “Ma noyacha Tata Yosë nosororinpoa paya. Ina nohuanton, iyaroꞌsaꞌ noya cancantatonaꞌ, catahuarinënpoaꞌ,” taponaꞌ.

2 Corintios 8:23

“¿Intaꞌ Titosoꞌ?” itohuachinënquëmaꞌ, shaꞌhuitocoꞌ. “Coꞌta Paonorëꞌ aꞌchininsoꞌ. Inantaꞌ piyapiꞌsaꞌ catahuarin noya imacaiso marëꞌ,” itocoꞌ. “¿Maꞌmarëtaꞌ aꞌnapitantaꞌ huëꞌpi?” itohuachinënquëmaꞌ, “Nisha nisha ninano quëran aꞌpaipisoꞌ. Quisocristo noya imapi inapitantaꞌ,” itocoꞌ.

2 Corintios 8:4

“Quiyarintaꞌ aꞌnapita imapisopita catahuaꞌii, topiraihuëꞌ. Cotia parti naꞌcon pahuantopi niꞌton, iso coriqui quëtonquëꞌ,” itërinacoi. Naꞌcon ina pochin nontërinacoi.

2 Corintios 9:5

Napoaton iyaroꞌsaꞌ aquëchitërahuë. Iꞌhua yonquiramaꞌ aꞌnapita catahuacasoꞌ. Inapitasoꞌ catahuarinënquëmaꞌ coriqui yontonacamaso marëꞌ. Nani yontonpatamaꞌ, noya quënanconarai. Canpitaora nohuanton, quëtocoꞌ. Co quiyaora nohuanton, yamaꞌparainquëmahuëꞌ.

Filipenses 4:18

Iporasoꞌ nóya iꞌhuërëtëramaco huachi. Napoaton noya yaꞌhuarahuë. Co mantaꞌ pahuantërincohuëꞌ. Iꞌhua Ipapërotito huëꞌpachina, coriqui aꞌpatëramaco niꞌton, maꞌsha yaꞌhuëtërinco. Ina marëꞌ “Yosparinquëmaꞌ,” itëranquëmaꞌ. Yosë nosoroatomaꞌ, aꞌpatiramaco. Yosë chinotacaiso marëꞌ pimóchin nininsoꞌ aꞌpëhuachinara, Yosëri noya niꞌnin. Inapochachin canpitantaꞌ coriqui aꞌpatëramaco niꞌton, Yosë noya niꞌninquëmaꞌ.

1 Pedro 4:10

Yosë imarëhuasopita acorinpoaꞌ nisha nisha nicacasoꞌ. Inaora nohuanton, aꞌnaya aꞌnayanpoaꞌ catahuarinpoaꞌ maꞌsona nohuantërinsoꞌ nitotacasoꞌ. Napoaton ama topinan quëran yaꞌhuëcosohuëꞌ. Maꞌsona nitotohuatamaꞌ, noya nicoꞌ aꞌnapita catahuacaso marëꞌ. Noya noya imacamaso marëꞌ nicatahuacoꞌ.