2 Corintios 8:11 - Chayahuita (Shahui)

¹¹ Naporoꞌ paꞌpi nohuantopiramahuëꞌ, iporasoꞌ coriqui yaꞌhuëtohuachinquëmaꞌ, noya cancantatomaꞌ, yontoncoꞌ ananicaso marëꞌ.

2 Corintios 8:11 ပူးပေါင်းရင်းမြစ်များ

2 Corintios 8:12

Yaꞌipi cancanëma quëran quëtohuatamaꞌ, Yosë noya niꞌsarinquëmaꞌ. Co naꞌa coriquihuanpatamahuëꞌ, Yosë nitotërin. Co nanitëramahuëꞌ naꞌa quëtacasoꞌ. Co apiratomahuëꞌ, piꞌpian tërantaꞌ quëtohuatamaꞌ, noya niꞌsarinquëmaꞌ.

2 Corintios 8:19

Nisha nisha ninano quëran imapisopita niyontonahuatonaꞌ, ina quëmapi chachin huayonahuatonaꞌ, acopi caꞌtanaincoiso marëꞌ. Coriqui yocaꞌhuaiso marëꞌ paꞌpatoi, inantaꞌ paꞌsarin. Coriqui quëtonpatoi, noya cancantapona huachi. “Ma noyacha Tata Yosë nosororinpoa paya. Ina nohuanton, iyaroꞌsaꞌ noya cancantatonaꞌ, catahuarinënpoaꞌ,” taponaꞌ.

2 Corintios 8:3

Co apiratonahuëꞌ, naꞌcon quëtopi. Pahuantaiquëhuarëꞌ quëtopi, cari niꞌnahuë. Co shaꞌhuitopiraihuëꞌ, inahuara nohuantatonaꞌ, quëtërinacoi pahuantërinsopita quëtacaꞌhuaiso marëꞌ.

2 Corintios 9:2

Piyapiꞌsaꞌ yacatahuaramasoꞌ nitotërahuë. Yaꞌipi Masitonia parti paꞌpato, shaꞌhuitëraꞌpiarahuë. “Iꞌhua piꞌiquë chachin Acaya parti imapisopita naꞌcon yonquipi pahuantërinsopita catahuacaisoꞌ,” itërahuë. Masitoniaroꞌsaꞌ natantahuatonaꞌ, inahuantaꞌ nohuantopi. “Inapita pochin quiyantaꞌ catahuachi, topiraihuëꞌ,” itërinaco naꞌayaꞌpi.