2 Corintios 7:2 - Chayahuita (Shahui)

² Cancanëma quëran huarëꞌ nosorocoi. Co aꞌnayanquëma tërantaꞌ maꞌsha onpotërainquëmahuëꞌ. Co anishacancantërainquëmahuëꞌ. Co nonpintërainquëmahuëꞌ.

2 Corintios 7:2 ပူးပေါင်းရင်းမြစ်များ

Mateo 10:14

Insëquësona paꞌpatamaꞌ, ‘Ama isëquë huëcosohuëꞌ. Co yanatanainquëmahuëꞌ,’ itohuachinënquëmaꞌ, patocoꞌ. Yapaꞌpatamaꞌ, pënëncoꞌ. ‘Nani shaꞌhuitopiranquëmahuëꞌ. Co nohuantëramahuëꞌ niꞌton, canpitaora tëhuënëmaquë ninaꞌintaramaꞌ,’ itocoꞌ. Ina quëran aꞌna parti paco huachi.

Mateo 10:40

Ina quëran pënëantarin: “Insosona noya natanpachinquëmaꞌ, noya natanarinaco cantaꞌ. Yosë aꞌpaimarinco niꞌton, Yosë nanamën chachin imasapi huachi.

Lucas 10:8

Aꞌna ninanoquë paꞌpatamaꞌ, noya nontohuachinënquëmaꞌ, inaquë aꞌchintocoꞌ. Maꞌsona aꞌcahuachinënquëmaꞌ, caꞌcoꞌ.

Hechos 20:33

Aꞌchintohuatënquëmara, co aquëtëꞌ coriqui yonquirahuëꞌ. Aꞌna piyapi coriquinën co nohuantaparahuëꞌ. Co aꞌmopiso tërantaꞌ noyapatërahuëꞌ.

Romanos 16:18

Quisocristosoꞌ huaꞌanënpoaꞌ nipirinhuëꞌ, co inapitarisoꞌ natëpihuëꞌ. Inahuara nohuantopisoráchin yonquipi. Noyasha nonaponaraihuëꞌ, co noꞌtëquën nonpihuëꞌ. Co noya nitotopiquëhuëꞌ aꞌchintohuachinara, aꞌnaroáchin nonpintopi.

2 Corintios 1:12

Yosë niꞌsárincoi niꞌton, noꞌtëquën shaꞌhuitarainquëmaꞌ. Co piꞌpian tërantaꞌ nonpintërainquëmahuëꞌ. Noyápiachin cancantatoi, yaꞌipi parti aꞌchinai. Co quiyaora yonquinëhuëi quëran aꞌchintërainquëmahuëꞌ. Yosë inaora nohuanton, catahuarincoi niꞌton, noya ninai. Ina marëꞌ noya cancantërai.

2 Corintios 11:16

Naquëranchin shaꞌhuitantaꞌinquëmaꞌ. “Paonosoꞌ huaꞌyantërin,” toconpi aꞌnaquën. Ama inapita natëcosohuëꞌ. Nipirinhuëꞌ, piꞌpian ina pochin nontohuatënquëmaꞌ, ahuantatomaꞌ, natanco, topirahuëꞌ. Casoꞌ noya noya ninahuësoꞌ shaꞌhuitaranquëmaꞌ yonquicamaso marëꞌ.

2 Corintios 11:9

Canpitataquë yaꞌhuasoco, maꞌsha pahuantopirincohuëꞌ, co piꞌpisha tërantaꞌ maꞌparanquëmahuëꞌ. Masitonia parti quëran huëcatonaꞌ, quëtirinaco. Quisocristo imapi niꞌton, topinan maꞌsha quëtirinaco nanpicaꞌhuaso marëꞌ. Canpita maꞌshanëmaꞌ co maꞌparanquëmahuëꞌ. Co onporontaꞌ nohuantaparanquëmahuëꞌ.

2 Corintios 4:2

Aꞌnaquënsoꞌ co noyahuëꞌ yonquiatonaꞌ, aꞌchinapi. Noyasha nonpirinahuëꞌ, nonpinacaiso marëꞌ napopi. Quiyaso nipirinhuëꞌ co mantaꞌ poꞌoana quëran ninaihuëꞌ niꞌton, co tapanaꞌhuaisoꞌ yaꞌhuërinhuëꞌ. Co nisha nisha aꞌchinaihuëꞌ. Yaꞌipi Yosë nanamën noꞌtëquën aꞌchintarainquëmaꞌ. Yosë niꞌsárincoi niꞌton, inasáchin aꞌchinarai. Aꞌninquëchin aꞌchinai yaꞌipi piyapiꞌsaꞌ yonquicaiso marëꞌ.

Filipenses 2:29

Canconpachin, noya cancantatomaꞌ, nontocoꞌ. “Ma noyacha Sinioro catahuarinquën niꞌton, noya huënantaran paya,” itatomaꞌ, noya nontocoꞌ. Co canpitasoꞌ nanitëramahuëꞌ isëquë huëcacamasoꞌ. Napoaton ina aꞌpatiramaco. Isëquë huëcaton, shichiminin. Chiníquën parisitërin catahuaincoso marëꞌ. Ina pochin cancantopisopita nóya niꞌcoꞌ.

Colosenses 4:10

Aristarcontaꞌ isëquë yaꞌhuërarin. Quisocristo imarinso marëꞌ tashinan pëiquë poꞌmopi antaꞌ. Inantaꞌ yonquiarinquëmaꞌ, saludos aꞌpatarinquëmaꞌ. Marcontaꞌ saludos aꞌpatarinquëmaꞌ. Inasoꞌ Pirnapi quëmopinën. Canpitataquë paꞌpachin, noya nontatomaꞌ, catahuacoꞌ tënahuë. Nani ina shaꞌhuitëranquëmaꞌ.

1 Tesalonicenses 2:10

Noꞌtëquën Yosë natëtoi, noyasáchin ninai. Co mantaꞌ onpotërainquëmahuëꞌ. Yaꞌipi imaramasopita niꞌnamacoi. Yosëntaꞌ niꞌnincoi.

Filemón 1:12

Noya catahuapirincohuëꞌ, apira aꞌpataranquën. Naꞌcon nosoropirahuëꞌ, quëma piyapinën niꞌton, nani shaꞌhuitërahuë yaꞌhuëranquë panantacaso marëꞌ. Ca pochachin cancantaton, noya niꞌquëꞌ.

Filemón 1:17

Canposoꞌ Quisocristo imatëꞌ, noya nipayarëꞌ. Napoaton Onisimo cantonpachinquën, noya nontëquëꞌ. Ca nosororancoso pochin inantaꞌ nosoroquëꞌ.

2 Juan 1:10

Aꞌna piyapi huëꞌpachin: “Carinquëmaꞌ aꞌchinchinquëmaꞌ,” itohuachinquëmaꞌ, ama aꞌnaroáchin natëcosohuëꞌ. Co Quisocristo nanamën aꞌchintohuachinquëmahuëꞌ: “Inca. Co yanatanainquënhuëꞌ,” itocoꞌ. Ama yaꞌhuëramaquë ayaꞌconcosohuëꞌ. “Yosë catahuainquën,” ama itocosohuëꞌ.