2 Corintios 7:1 - Chayahuita (Shahui)

¹ Iyaroꞌsa naꞌcon nosororanquëmaꞌ. Ina pochin Yosë yonquirinpoa niꞌton, yaꞌipi co noyahuëꞌ yonquirëhuasopita naniantahuaꞌ. Yaꞌipi co noyahuëꞌ ninëhuasopitantaꞌ aꞌpoaꞌahuaꞌ. Yosë tëꞌhuatatëhuaꞌ, noyasáchin niahuaꞌ.

2 Corintios 7:1 ပူးပေါင်းရင်းမြစ်များ

Salmos 19:9

Sinioro tëꞌhuatatëhua natëhuatëhuaꞌ, co nëꞌhuëtërinso pochin nisarëhuahuëꞌ. Inapohuatëhuaꞌ, yaꞌhuëmiatarihuaꞌ. Shaꞌhuirinsopitasoꞌ, noꞌtëquënáchin. Yaꞌipi inapitasoꞌ, noyasáchin.

Salmos 51:10

Nasha cancan Sinioro quëtoco. Cancanëhuë anoyatohuatanco, noyápiachin cancantaantarahuë. Inapotohuatanco noyasáchin yonquiato, natëtochináchin cancantarahuë.

Proverbios 8:13

Sinioro noya nicatoma natëhuatamaꞌ, co noyahuëꞌ ninamasopita co quëꞌyamaso yaꞌhuërinhuëꞌ. ‘Caso noya noyaco,’ topachinara, co quëꞌyarahuëꞌ. Nocantohuachinaꞌ, co noyahuëꞌ nipachinaꞌ, nonpinpachinaꞌ, inapohuachinarantaꞌ, co quëꞌyarahuëꞌ.

Isaías 1:16

Amarëso pochin nicatomaꞌ, ¡ama huachi oshahuancosohuëꞌ! ¡Co noyahuëꞌ ninamasopita aꞌpoco huachi!

Isaías 55:7

Co noyahuëꞌ nipisopita, co noyahuëꞌ nipisoꞌ aꞌpoinaꞌ. Nitapicancanpisopitantaꞌ, co noyahuëꞌ yonquipisoꞌ aꞌpoinaꞌ. Yosë chachin tahuërëtaantatomaꞌ, natëantacoꞌ. Inaso noya niꞌton, oshanëma inquitarinquëmaꞌ.

Mateo 12:33

Ina quëran itaantarin: “ ‘Nara noya nipachina, noya nitërin. Co noya nitohuachinahuëꞌ, napoonin,’ topi. Nitërin quëran nara nohuitërëꞌ. Inapochachin piyapinpoantaꞌ ninëhuaꞌ. Noya yonquihuatëhuaꞌ, noꞌtëquën nonarihuaꞌ.

Mateo 5:48

Tata Yosë pochin cancantacasoꞌ yaꞌhuërin. Inaso noyasáchin ninin niꞌton, canpitantaꞌ ina pochin cancantatomaꞌ, noyasáchin nicoꞌ,” tënin.

Mateo 5:8

Yaꞌipi cancanëma quëran imapatamaꞌ, Yosë nohuitaramaꞌ. Naporahuaton, aꞌna tahuëri ina quënancontahuatamaꞌ, noyá nohuitaramaꞌ.

Hechos 9:31

Ina quëran Quisoso imapisopita noya yaꞌhuapi. Co huachi insoari tërantaꞌ aparisitërinhuëꞌ. Cotia parti, Cariria parti, Samaria parti, inaquëpita sano yaꞌhuatonaꞌ, noya noya imasapi. “Sinioro chiníquën nanantërin,” taꞌtonaꞌ, nóya natëpi. Ispirito Santori catahuarin niꞌton, aꞌnapitanta imasapi.

Romanos 5:20

Iráca Moisësë pënëntërin oshahuanëhuasoꞌ anitotinpoaso marëꞌ. Ina quëran naꞌcon oshahuanëhuasoꞌ nitotërëhuaꞌ. Naꞌcon oshahuanpirëhuahuëꞌ, inaora nohuanton, Yosë naꞌcon naꞌcon nosororinpoaꞌ.

1 Corintios 6:20

Quisocristo chiníquën parisitaton, chiminin nichaꞌëinpoaso marëꞌ. Nichaꞌërinpoaꞌ niꞌton, yaꞌipi nonënpoa quëran huarëꞌ huaꞌanëntinpoasoꞌ yaꞌhuërin. Napoaton noyasáchin nicoꞌ aꞌnapitantaꞌ nicatënënquëmaꞌ Yosë chinochinaꞌ.

2 Corintios 1:20

Yaꞌipi Yosë shaꞌhuitërinpoasoꞌ Quisocristo acotarinpoaꞌ. Napoaton “Quisocristosoꞌ noꞌtëquën nonaton, catahuarinpoaꞌ. Ma noyacha Yosëso paya,” tënëhuaꞌ.

Efesios 2:3

Iráca yaꞌipinpoaꞌ co Yosë natërëhuahuëꞌ. Co noyahuëꞌ yonquiatëhuaꞌ, co noyahuëꞌ ninëhuaꞌ. Canpoara nohuantërëhuasoráchin ninëhuaꞌ. Yanoꞌhuitohuatëhuara, noꞌhuitërëhuaꞌ. Yanoꞌpihuatëhuara, noꞌpirëhuaꞌ. Yaahuëtohuatëhuara, ahuëtërëhuaꞌ. Ina marëꞌ yaꞌipinpoaꞌ anaꞌintinpoasoꞌ yaꞌhuërin.

1 Tesalonicenses 3:13

Noya ninosorohuatamaꞌ, Quisocristo achinicancanarinquëmaꞌ noyasáchin nicacamaso marëꞌ. Catahuahuachinquëmaꞌ, noyápiachin cancantaramaꞌ. Ina quëran Quisocristo oꞌmantahuachin, Yosë noya niꞌsarinquëmaꞌ. Aꞌna tahuëri yaꞌipi piyapinënpitarë chachin oꞌmantararin.

1 Tesalonicenses 4:7

Co Yosë nohuantërinhuëꞌ oshahuanacasoꞌ. Acorinpoaꞌ noyasáchin nicacaso marëꞌ.

1 Tesalonicenses 5:23

Yosëíchin asanocancaninpoaꞌ. Canpita marëꞌ ina nontarahuë noyásha anoyacancanchinquëmaꞌ. “Catahuaquëꞌ Sinioro, yaꞌipi cancanëna quëran noyápiachin yonquiꞌinaꞌ. Naporahuaton, yaꞌipi yonquinëna quëran noya nininsopitaráchin nohuanchinaꞌ. Quëma nohuanton, yaꞌipi nonëna quëran huarë noyasáchin niinaꞌ,” itërahuë. Ina quëran Sinioro Quisocristo oꞌmantahuachin, nóya niꞌsarinquëmaꞌ.

Hebreos 12:23

Huëntonënquë chachin Yosë nani ayaꞌconinpoaꞌ. Inápaquë nininënpoaꞌ nani ninshitërinpoaꞌ huiꞌninpita pochin nicainpoaso marëꞌ. Inatohuaꞌ niyontonarihuaꞌ. Yosë chachin imarëhuaꞌ. Inasoꞌ yaꞌipiya huaꞌanëntaton, co imapisopitahuëꞌ noꞌtëquën anaꞌintarin. Aꞌnaquën imapisopita nani chiminpachinara, huaꞌyanënasoꞌ Yosëꞌpaꞌ yaꞌhuapi huachi. Yosë pochachin cancantopi. Inapitarëꞌquënpoa chachin niyontonarihuaꞌ

Hebreos 12:28

Huaꞌanëntërinquë chachin ayaꞌconinpoaꞌ. Inápaquë paꞌpatëhuaꞌ, co onporontaꞌ taꞌhuantarihuahuëꞌ. Napoaton: “Yosparinquën Sinioro,” itahuaꞌ. Yaꞌipi cancanënpoa quëran inasáchin chinotahuaꞌ. Noya cancantatëhuaꞌ, natëahuaꞌ noya nicainpoaso marëꞌ. Ipora huantaꞌ Yosësoꞌ noꞌtëquën anaꞌintarin niꞌton, tëꞌhuatacasoꞌ yaꞌhuërin. Pënquë maꞌsha ahuiquitërëso pochin yaꞌipi co noyahuëꞌ nininsopita anaꞌintarin.

Hebreos 4:1

Yosë nani shaꞌhuitërinpoaꞌ. “Ipora huantaꞌ yacatahuaranquëmaꞌ sano cancantacamaso marëꞌ,” itërinpoaꞌ. Noya nanan nani natanëhuaꞌ. Iráca natanpirinahuëꞌ, co natëpihuëꞌ. “Yosë noꞌtëquën nontërinpoaꞌ,” co topihuëꞌ. Topinan quëran natanpi niꞌton, co Yosëri anoyacancantërinhuëꞌ. Niꞌcona canpitantaꞌ topinan quëran natantamaꞌ. Co natëhuatamahuëꞌ, co sano cancantaramahuëꞌ.

Hebreos 6:9

Chiníquën iyaroꞌsaꞌ pënënpiranquëmahuëꞌ, nosororanquëmaꞌ. Co Yosë aꞌpoaramahuëꞌ. Noya imatomaꞌ, chaꞌësaramaꞌ tënahuë.

Santiago 4:8

Nani tahuëri Yosë yonquihuatamaꞌ, inantaꞌ yonquiarinquëmaꞌ, naꞌcon catahuarinquëmaꞌ. Yaꞌipi co noyahuëꞌ yonquiramasopita naniantatomaꞌ, noya nicoꞌ. Ama huachi nisha nisha yonquicosohuëꞌ. Noyápiachin cancantocoꞌ.

1 Pedro 1:15

Tata Yosë noyasáchin ninin. Huëntonënquë ayaꞌconinquëmaꞌ niꞌton, canpitantaꞌ ina pochin cancantocoꞌ.

1 Pedro 1:17

Yosë nontohuatamara, “Tata,” itëramaꞌ. Aꞌna tahuëri inasoꞌ coisë pochin niꞌton, yaꞌipi piyapiꞌsaꞌ noꞌtëquën shaꞌhuitarin. Co noyahuëꞌ nipisopita noꞌtëquën anaꞌintarin. Yaꞌipi oshahuaninsopita anaꞌintarin niꞌton, tëꞌhuatacasoꞌ yaꞌhuërin. Chiminaquë huarëꞌ ina yonquiatomaꞌ, noya nicoꞌ.

1 Pedro 1:22

Yosë nanamënsoꞌ noꞌtën nanan. Ina natëhuatamaꞌ, yaꞌipi co noyahuëꞌ yonquiramasopita naniantaramaꞌ. Noyápiachin cancantaramaꞌ. Yosë anoyacancantërinquëmaꞌ ninosorocamaso marëꞌ. Napoaton imaramasopita capini noya ninosorocoꞌ. Tëhuënchachin cancanëma quëran huarëꞌ ninosorocoꞌ.

1 Pedro 2:11

Nosororanquëmaꞌ iyaroꞌsaꞌ niꞌton, pënënaranquëmaꞌ. Quisocristo imatomaꞌ, co isoroꞌpaquë yaꞌhuëmiataramahuëꞌ. Yosëꞌpaꞌ yaꞌhuëmiataramasoꞌ. Napoaton ama maꞌsha isoroꞌpaquë yaꞌhuërinsopitaráchin yonquicosohuëꞌ. Isoroꞌpaquë noꞌpiápi, monshihuanapi, taparosáchin nonatonaꞌ, capa cancantapi. Ama ina pochin cancantocosohuëꞌ. Ina pochin cancantohuatamaꞌ, sopai minsëarinquëmaꞌ, co Yosë pochin cancantaramahuëꞌ.

1 Pedro 5:10

Yosë paꞌpi nosororinpoaꞌ. Quisocristo imarëhuaꞌ niꞌton, aꞌna tahuëri inápaquë quëpantarinpoaꞌ. Iporasoꞌ maꞌsha onpopirëhuahuëꞌ, catahuarinpoaꞌ. Co huaꞌquiꞌ parisitarihuahuëꞌ. Ina quëran nosoroatonpoaꞌ, anoyatarinpoaꞌ. Achinicancanarinpoaꞌ. Noya noya acoarinpoaꞌ.

1 Juan 1:7

Yosësoꞌ noyasáchin ninin. Tahuëri pochin cancantërin. Canpoantaꞌ tahuëri pochin yonquihuatëhuaꞌ, Yosë nohuitarihuaꞌ. Naporahuaton, noya niniꞌtëhuaꞌ yaꞌhuarihuaꞌ. Huiꞌnin chachin chiminin niꞌton, yaꞌipi oshanënpoaꞌ inquitarinpoaꞌ. Huënainën quëran anoyacancantarinpoaꞌ.

1 Juan 1:9

Onporosona co noyahuëꞌ nipatëhuaꞌ, Yosë nontahuaꞌ. “Tëhuënchachin co noyahuëꞌ nicato, oshahuanco,” topatëhuaꞌ, Yosë oshanënpoaꞌ inquitarinpoaꞌ. Co nonpintërinpoahuëꞌ. Quisocristo chiminin niꞌton, nanitërin yaꞌipi oshanënpoaꞌ inquitinpoasoꞌ. Noyápiachin cancan quëtarinpoaꞌ.

1 Juan 3:3

“Aꞌna tahuëri Quisocristo niꞌsarëhuaꞌ,” taꞌtëhuaꞌ, co noyahuëꞌ yonquirëhuasopita naniantarëhuaꞌ. Quisocristosoꞌ noyápiachin cancantërin niꞌton, canpoantaꞌ noyápiachin cancantacasoꞌ nohuantarihuaꞌ.