2 Corintios 6:15 - Chayahuita (Shahui)

¹⁵ Quisocristo sopairëꞌ co napopináchin yonquipihuëꞌ. Naporahuaton, canpoasoꞌ Quisocristo imarëhuaꞌ niꞌton, co oshahuanoꞌsa pochin cancantërëhuahuëꞌ.

2 Corintios 6:15 ပူးပေါင်းရင်းမြစ်များ

1 Reyes 18:21

Naporo Iniasëso israiroꞌsa yaꞌcarirahuaton, itapon: —Ama huachi cato imatocosohuëꞌ. Sinioro Yosë nipachin inasáchin imacoꞌ. Paaronta Yosë nipachin, ina nipachin imacosoꞌ, itërin. Napotohuachina co aꞌpanitopihuëꞌ.

Marcos 16:16

Insosona noya nanan natëhuachinaꞌ, chaꞌësapi. Aporihuanahuatonaꞌ, imapachinaco, chaꞌësapi huachi. Co nanamëhuë natëhuachinahuëꞌ, Yosëri anaꞌintarin.

Hechos 5:14

Naporahuaton, naꞌcon naꞌcon piyapiꞌsari Quisoso natëtonaꞌ, imasapi antaꞌ. Naꞌa quëmapiꞌsaꞌ sanapiꞌsarë chachin yaꞌconachinpi.

Hechos 8:20

Pitrorisoꞌ itapon: —Maꞌpitacha yonquiran paya. Coriqui marëꞌ Ispirito Santo ¿yamaꞌparanco ti? Co ina marëꞌ Yosë quëtërinpoahuëꞌ. Co inasoꞌ paꞌanëhuëꞌ. Ina pochin yonquihuatan, parisitopiquë paꞌsaran. ¡Coriquirëꞌquën chachin inaquë paꞌsaran!

1 Corintios 6:6

Canpitaso nipirinhuëꞌ imaramaso capini nipinotomaꞌ, nishaꞌhuirapiramaꞌ. Naporahuaton, coisësoꞌ co Yosë natëpirinhuëꞌ, inaquë niquëpahuatamara, co noyahuëꞌ ninamaꞌ.

1 Timoteo 5:8

Quëmopinënaꞌ tëhuënchachin nosorocasoꞌ yaꞌhuërin. Pahuantohuachinaꞌ, catahuainaꞌ. Aꞌshinaꞌ, paꞌpinaꞌ, huiꞌninpita, inapita naꞌcon naꞌcon nosorocasoꞌ yaꞌhuërin. Catahuainaꞌ, nocomaꞌinaꞌ. Insoarisona co nocomahuachinahuëꞌ, co huachi Yosë natëapihuëꞌ. Co quëmopinënaꞌ nosorohuachinarahuëꞌ, naꞌcon naꞌcon oshahuanapi.

1 Pedro 1:21

Quisocristo anoyacancantërinquëmaꞌ niꞌton, Yosë nohuitatomaꞌ, natëramaꞌ: “Tëhuënchachin catahuarinpoaꞌ,” tënamaꞌ. Quisocristo chiminaponahuëꞌ, Yosëri ananpitaantarin. Inápaquë quëpantarahuaton, chiníquën nanan quëtërin. Napoaton Yosëíchin imaramaꞌ. “Canpoantaꞌ ananpitaantarinpoaꞌ,” taꞌtomaꞌ, ninaramaꞌ.

1 Samuel 2:12

Iri huiꞌninpitasoꞌ, co noyahuëꞌ cancantopi. Napoatonaꞌ, co Sinioro tëranta tëꞌhuatatonaraihuëꞌ, co noyahuëꞌ nisápi.