2 Corintios 4:4 - Chayahuita (Shahui)

⁴ Sopai nohuanton, co nanitopihuëꞌ noꞌtëquën yonquicaisoꞌ. Maꞌsha aꞌpintërëso pochin nanamën quëran Yosë anitotërinpoaꞌ Quisocristo nohuitacaso marëꞌ. Inasoꞌ Yosë chachin ninin. Inapitaso nipirinhuëꞌ somaraya pochin cancantatonaꞌ, co nanitopihuëꞌ natëtacaisoꞌ.

2 Corintios 4:4 ပူးပေါင်းရင်းမြစ်များ

1 Reyes 22:22

“Yaꞌipi pënëntonaꞌpiroꞌsa Acapo camairinso nonpintarahuë. Inapitari shaꞌhuitohuachina, ahuëtapon paꞌsarin,” itërin sopairi. Ina natanaton, Siniorori itapon: “Naporinchi paya. Nonpintaran niꞌsora. Paꞌmaton inapotëquëꞌ,” itërin.

Isaías 6:10

Piyapinëhuëpita yonquinëna tapitëquëꞌ. Nëꞌhuëya pochin cancanchinaꞌ. Somarayapiso pochin cancantatonaꞌ, ama manta noꞌtëquën yonquiꞌinasohuëꞌ. Shaꞌhuitërahuësoꞌ noꞌtëquën yonquipi naporini, oshanëna aꞌpoitonahuëꞌ. Inapopi naporini, co huachi anaꞌintaꞌhuasoꞌ yaꞌhuëitonhuëꞌ,” itërinco.

Mateo 13:22

Aꞌnaquën piyapiꞌsantaꞌ nahuanoꞌ yaꞌhuërinso pochin niconpi. Yosë nanamën natanpachinara, yaimapirinahuëꞌ, maꞌsharáchin yonquiatonaꞌ, naniantopi. ‘Naꞌa coriqui, maꞌsha, inapita yaꞌhuëtohuachincoi, nóya cancantarai,’ topirinahuëꞌ, co ina quëran noya cancantacasohuëꞌ nipirinhuëꞌ. Napoaton nahuanoꞌsari imotërinso pochin, maꞌsharáchin yonquiatonaꞌ, Yosë nanamën naniantopi. Co imamiatopihuëꞌ.

Juan 1:14

Quisocristo isoroꞌpaquë nasitimarin. Yosë niponahuëꞌ, piyapi chachin nasitërin. Canpoarë chachin yaꞌhuërin. Quiyasoꞌ niꞌnai. Inasoꞌ nóya, tënai. Yosë pochachin ninin. Inaíchin huiꞌnin inasoꞌ. Inaora nohuanton nosororinpoaꞌ. Noꞌtëquën nontërinpoaꞌ.

Juan 1:18

Co inquënpoa tërantaꞌ Yosë quënanëhuahuëꞌ. Huiꞌniniso nipirinhuëꞌ noyá nohuitërin. Yosë pochachin niꞌton, napopianachin yonquipi. Inasáchin Tata Yosë anohuitërinpoaꞌ.

Juan 12:31

Iporasoꞌ co natëpisopitahuëꞌ noꞌhuiarinaco niꞌton, anaꞌintacasoꞌ yaꞌhuërin huachi. Huaꞌquiꞌ sopairi piyapiꞌsaꞌ camaipirinhuëꞌ, cari minsërahuato, ocoiarahuë.

Juan 12:35

—Iporáchin tahuëri pochin aꞌpintaranquëmaꞌ. Co huachi huaꞌquiꞌ yaꞌhuapohuëꞌ. Aꞌpininso pochin noꞌtëquën anitotëranquëmaꞌ. Anitotohuatënquëmaꞌ, noya nicoꞌ. Niꞌcona tashinan pochin cancantotamaꞌ. Tashinanquë iratohuatëra, chihuërëꞌ.

Juan 12:40

“Yosëri tananpitërin niꞌton, tanshirëso pochin cancantatonaꞌ, co natëtochináchinhuëꞌ cancantopi. Huaꞌquiꞌ co yanatëpihuëꞌ niꞌton, napotërin. Noya niꞌpi naporini, quënanchitonahuëꞌ. Noya natanpi naporini, natëchitonahuëꞌ. Imarinaco naporini, anoyacancanchitohuëꞌ,” tënin.

Juan 12:45

Ca nohuitohuatamaco, Yosëntaꞌ nohuitaramaꞌ.

Juan 14:30

Co huachi huaꞌquiꞌ nontaranquëmahuëꞌ. Sopai huaꞌan nohuanton, masarinaco. Inari camairin niꞌton, nani huëꞌsapi macainacoso marëꞌ. Co casoꞌ piꞌpian tërantaꞌ ina camaincosohuëꞌ nipirinhuëꞌ,

Juan 15:24

Naꞌa piyapiꞌsaꞌ aꞌnaroáchin anoyatërahuë. Nani maꞌsha Yosë pochin ninahuë. Aꞌnapita piyapiꞌsasoꞌ co nanitapapihuëꞌ. Yosë anohuitaꞌhuaso marëꞌ sacaiꞌ nininsoꞌ aꞌnotërahuë. Co aꞌnotërahuëꞌ naporini, co ina marëꞌ oshahuaintonahuëꞌ. Nani nicaponaracohuëꞌ, noꞌhuirinaco. Tata Yosëntaꞌ noꞌhuipi.

Juan 8:12

Ina quëran piyapiꞌsaꞌ aꞌchintantarin. —Casoꞌ aꞌpintatë pochin nicato, yaꞌipi piyapiꞌsaꞌ noꞌtëquën anitotarahuë. Imapatamaco, co huachi tashinan pochin cancantaramahuëꞌ. Tahuëri pochin cancantaramaꞌ. Ina pochin cancantohuatamaꞌ, Yosë nohuitatomaꞌ nanpimiataramaꞌ.

Hechos 26:18

Nisha piyapiꞌsantaꞌ aꞌchintëquëꞌ nanamëhuë nitochinaꞌ. Somaraya pochin cancantatonaꞌ, co nohuitërinacohuëꞌ. Nanamëhuë aꞌchintohuatan, nohuitarinaco. Iporasoꞌ tashi pochin cancantopi. Nohuitohuachinaco, tahuëri pochin cancantapi. Iporasoꞌ sopai huaꞌani camaihuachina, natëpi. Aꞌna tahuërisoꞌ Yosë natërapi. Natëtonaco, imapachinaco, oshanënaꞌ Yosëri inquitarin. Yaꞌipi natërinacosopita nasha cancan quëtarahuë. Yosë piyapinënpita chachin nisapi,’ itërinco.

Hechos 26:23

Yosë nohuanton, Cristo chiminapon. Chiminaponahuëꞌ, Yosëri ananpitaantarin. Inaꞌton nanpiantarin. Ina quëran aꞌchintapon tahuëri pochin cancantacaiso marëꞌ. Co cotioroꞌsaráchin nichaꞌësarinhuëꞌ. Nisha piyapiꞌsantaꞌ nichaꞌësarin, topi ninshitatonaꞌ,” tënin.

1 Corintios 10:20

Nisha piyapiꞌsaso nipirinhuëꞌ mamanshi moshacaiso marëꞌ maꞌsha tëpahuachinara, co Yosë yonquipihuëꞌ. Sopairoꞌsaꞌ yonquipi. Co casoꞌ nohuantërahuëꞌ canpitantaꞌ sopairoꞌsaꞌ yonquicamasoꞌ.

2 Corintios 2:11

Co nanan anoyatohuatëhuahuëꞌ, Satanasë minsëarinpoaꞌ. Inasoꞌ nisha nisha yanonpintërinpoasoꞌ nitotërëhuaꞌ.

2 Corintios 2:12

Iꞌhua Troasëquë paꞌnahuë Quisocristo nanamën aꞌchinaꞌhuaso marëꞌ. Yosë nohuanton, naꞌa piyapiꞌsaꞌ nohuantopi niꞌton, aꞌchintërahuë.

2 Corintios 3:11

Iráca pënëntërinso shaꞌhuitohuachina, huënaráchin pochin yaꞌnopirinhuëꞌ, sacorin huachi, co yaꞌhuëmiatarinhuëꞌ. Iporasoꞌ nasha quëran anoyatërinsosoꞌ, yaꞌhuëmiatarin. Co onporontaꞌ nishatarinhuëꞌ niꞌton, noya noya, tënëhuaꞌ.

2 Corintios 3:14

Israiroꞌsaso nipirinhuëꞌ co natantochináchinhuëꞌ cancantopi. Ipora huantaꞌ Yosë quiricanën iráca ninshitopisoꞌ nontopirinahuëꞌ, co noꞌtëquën yonquipihuëꞌ. Nipaꞌcopirayatërinso pochin cancantatonaꞌ, co nanitopihuëꞌ Yosë quiricanën noꞌtëquën nitotacaisoꞌ. Quisocristoíchin catahuarinpoaꞌ noꞌtëquën nitotacasoꞌ.

2 Corintios 3:18

Sinioro imapatëhuaꞌ, co huachi nipaꞌcopirayatërëso pochin cancantarihuahuëꞌ. Isihuicoquë maꞌsha aꞌnotërëso pochin ninëhuaꞌ. Yosë nóya nininsoꞌ piyapiꞌsaꞌ anitotërëhuaꞌ. Apira apira ina yonquihuatëhuaꞌ, oshaquëran Yosë pochachin cancantarihuaꞌ. Ina nohuanton, Ispirito Santo catahuarinpoaꞌ noya noya cancantacaso marëꞌ.

2 Corintios 4:6

Yaꞌnan isoroꞌpaꞌ acoapon yaꞌipi parti tashipirinhuëꞌ: “Niiꞌsohuanchin huachi,” tënin Yosë. Napohuachina, tahuëri yaꞌhuërin. Inapochachin iporasoꞌ cancanënpoaquë aꞌpintërinpoaꞌ ina nohuitacaso marëꞌ. Inasoꞌ noya noya. Quisocristo yaꞌpirin quëran aꞌpintërinpoaso pochin ninin. Ina yonquihuatëhuaꞌ, Yosë chachin anohuitarinpoa huachi.

Gálatas 1:4

Oshanënpoaꞌ inquitinpoaso marëꞌ Quisocristo chiminin. Inaora nohuanton, yaꞌhuërëtërinpoaꞌ. Notohuaroꞌ piyapiꞌsaꞌ co noyahuëꞌ yonquipi. Ama inapita pochin cancantacaso marëhuëꞌ chiminaton, anoyacancantërinpoaꞌ. Tata Yosë nohuanton, nichaꞌërinpoaꞌ.

Efesios 2:2

Coꞌhuara Quisocristo imashatërapomahuëꞌ, sopai huaꞌan natëtomaꞌ, co noyahuëꞌ ninamaꞌ. Inasoꞌ ihuan yaꞌhuërinquë yaꞌhuaton, yaꞌipi sopairoꞌsaꞌ huaꞌanëntarin. Co quënanpirëhuahuëꞌ, isoroꞌpaquë sacatárin minsëinpoaso marëꞌ. Yonquinëmaquë camairinquëmaꞌ niꞌton, co Yosë natëramahuëꞌ.

Efesios 6:12

Inimiconënpoaꞌ co piyapi pochin quënanëhuahuëꞌ. Sopai huaꞌansoꞌ yaminsërinpoaꞌ. Naꞌa sopairoꞌsantaꞌ inápaquë yaꞌhuatonaꞌ, yacamairinënpoaꞌ. Co quënanpirëhuahuëꞌ, yonquinënpoa quëran yacamairinënpoaꞌ co noyahuëꞌ nicacaso marëꞌ. Iporasoꞌ notohuaroꞌ piyapiꞌsaꞌ tashi pochin cancantatonaꞌ, sopai natëpi. Inari camairin niꞌton, paꞌpi co noyahuëꞌ yonquipi.

Filipenses 2:6

Inasoꞌ, iráca quëran huarëꞌ Yosëꞌpaꞌ yaꞌhuërin. Yosë chachin niponahuëꞌ, co inaora nipaꞌyatacasoꞌ yonquirinhuëꞌ. Nosoroatonpoaꞌ, yonquirinpoaꞌ. Inápaquë chini chiníquën nanantaponahuëꞌ, co ina naꞌcon naꞌcon nohuantërinhuëꞌ.

Colosenses 1:15

Tata Yosësoꞌ co quënanëhuëꞌ. Nipirinhuëꞌ, huiꞌnin isoroꞌpaquë oꞌmaton, paꞌpin anohuitërinpoaꞌ. Inantaꞌ Yosë chachin niꞌton, nóya anohuitërinpoaꞌ. Coꞌhuara isoroꞌpaꞌ yaꞌhuëyátërasohuëꞌ, huiꞌniontaꞌ inápaquë yaꞌhuërin.

Colosenses 1:27

“Quisocristo chachin ayaꞌcoancantaranquëmaꞌ,” itërinpoaꞌ. Canpitantaꞌ nisha piyapinquëmaꞌ nipiramahuëꞌ, yaꞌcoancantërinquëmaꞌ. Yaꞌipinpoaꞌ yaꞌcoancantërinpoaꞌ niꞌton, aꞌna tahuëri Yosëꞌpaꞌ noya noya yaꞌhuëcontarihuaꞌ. Iráca co mantaꞌ ina nitotopirinahuëꞌ, nani anitotërinpoa huachi. Quisocristo nohuitatëhuaꞌ, ina ninarëhuaꞌ. Ma noyacha Tata Yosësoꞌ yonquirinpoa paya, tënëhuaꞌ.

1 Timoteo 1:11

Yosë nanamënsoꞌ noya nóya. Ina quëran nichaꞌërinpoaꞌ. “Ma noyacha Yosëso paya,” itërëhuaꞌ. Ina chachin acorinco nanamën shaꞌhuicaꞌhuaso marëꞌ.

Tito 2:13

Noya cancantatëhuaꞌ, Quisocristo ninarëhuaꞌ. Aꞌna tahuëri chiníquën nanantaton, oꞌmantararin. Inasoꞌ Yosë chachin niꞌton, huënaráchin huënaráchin yaꞌnoarin. Ina quënanpatëhuaꞌ, nóya cancantarihuaꞌ. Chiníquën nanantaton, noyá nichaꞌësarinpoaꞌ.

Hebreos 1:3

Inasoꞌ paꞌpin pochachin noya nóya ninin. Ina pochachin niꞌton, inasáchin Yosë noꞌtëquën anohuitërinpoaꞌ. Chiníquën nanantërin niꞌton, ipora huantaꞌ ina nohuanton, maꞌsha yaꞌhuërarin. Co yonquirinpoahuëꞌ naporini, yaꞌipiya taꞌhuanchitërihuahuëꞌ. Iráca oshanënpoaꞌ inquitinpoaso marëꞌ chiminin. Chiminpirinhuëꞌ, nanpiantarahuaton, inápaquë panantarin. Inaquë panantarahuaton, Yosë inchinanën quëran huënsërin. Chiníquën nanantaton, huaꞌanëntarin.

Hebreos 6:4

Ama Quisocristo aꞌpocosohuëꞌ. Ina aꞌpohuatamaꞌ, co nanitërinhuëꞌ anoyacancantinquëmasoꞌ. Aꞌnaquën Quisocristo nanamën nani nitotopi. “Quisocristo nichaꞌësarinpoaꞌ,” taꞌtonaꞌ, imapi. Cosharoꞌ piꞌnirëso pochin piꞌpian nohuitopi. Ispirito Santori chachin catahuarin.

2 Pedro 1:19

Ina yonquiatoi: “Ma noꞌtëquëncha Yosëri ninorin paya,” tënai. Iráca quëra huarëꞌ pënëntonaꞌpiroꞌsaꞌ ninshitërinënpoaꞌ. Yosë nohuanton, coꞌhuara nasichátëraponhuëꞌ, Quisocristo napocasoꞌ ninopi. “Noꞌtëquën ninshitopi,” taꞌtoi, quiricanën naꞌcon natërai. Canpitantaꞌ ina nontatomaꞌ, yonquicoꞌ. Noꞌtëquën anitotërinpoaꞌ. Tashiꞌ nipachina, nanparin noya aꞌpintërinpoaꞌ. Inapochachin Yosë quiricanën quëran aꞌpintërinpoaꞌ noꞌtëquën yonquicaso marëꞌ. Tahuërianpitaquë huarëꞌ nanparin noya orotërin. Inapochachin ipora Quisocristo oꞌmantaquë huarëꞌ quiricanën yaꞌhuëtërinpoaꞌ ina nohuitacaso marëꞌ. Oꞌmantahuachin, noyá nohuitarihuaꞌ. Huënio tayora huënaráchin aꞌpininso pochin aꞌpintarinpoaꞌ.

1 Juan 2:11

Nipirinhuëꞌ ninoꞌhuihuatamaꞌ, tashi pochin cancantaramaꞌ. Co noyahuëꞌ cancantatomaꞌ, co mantaꞌ yonquiaramahuëꞌ. Co nanitaramahuëꞌ noꞌtëquën yonquicamasoꞌ. Sopai nohuanton, somaraya pochin cancantaramaꞌ. Napoaton iyaroꞌsaꞌ, cancanëma quëran huarëꞌ ninosorocoꞌ.

1 Juan 2:8

Co nasha camaitërinsohuëꞌ niponahuëꞌ, nasha pochin ninshitaranquëmaꞌ cancanëma quëran huarëꞌ ninosorocamaso marëꞌ. Quisocristo yaꞌipi piyapi nosororin. Nosoroatonquëmaꞌ, aꞌpintërëso pochin anoyacancantërinquëmaꞌ tahuëri pochin cancantacamaso marëꞌ. Ninosorohuatamaꞌ, co huachi tashi pochin cancantaramahuëꞌ.

1 Juan 5:19

Imarëhuasopitasoꞌ Yosë huiꞌninpitanpoaꞌ ninëhuaꞌ. Aꞌnapitaso nipirinhuëꞌ co imapihuëꞌ niꞌton, sopairi huaꞌanëntërin. Camaihuachina, ina natëpi. Ina nitotërëhuaꞌ.