2 Corintios 3:3 - Chayahuita (Shahui)

³ Aꞌchintohuatëinquëmara, noya natanatomaꞌ Quisocristo imaramaꞌ niꞌton, noya carta pochin ninamaꞌ. Quisocristo chachin ninshitërinsoꞌ. Ina cartasoꞌ co napisëquë ninshitërinhuëꞌ. Co naꞌpiquë tërantaꞌ ninshitërinhuëꞌ. Yosësoꞌ nanpimiatarin niꞌton, Ispirito Santo anoyacancantërinquëmaꞌ nóya nicacamaso marëꞌ.

2 Corintios 3:3 ပူးပေါင်းရင်းမြစ်များ

Salmos 40:8

Quëma nohuantëranso chachin nohuantërahuë nicaꞌhuasoꞌ. Pënëntëransoꞌ, cancanëhuë quëran yonquirárahuë.

Salmos 42:2

Yamoro yatëparincoso pochin cancantato, Yosë naꞌcon naꞌcon nohuantërahuë. Inasoꞌ nanpiárin niꞌton, yachinotërahuë. ¿Onporo huarëcha ina pëinënquë paato, chinotaantarëꞌpoya? tënahuë.

Salmos 84:2

Ina iꞌiratëquë canconaꞌhuaso marëꞌ co napion cancantarahuë. Quëma nohuanton Sinioro nanpirai. Yaꞌipi cancanëhuë quëran quëma cantanën cantararahuë.

Éxodo 24:12

Siniorori Moisësë itaantapon: —Iso Sinai motopiquë nisarahuë niꞌton, huënantaton ninaco. Inaquë cato naꞌpitëaꞌhua quëchinquën. Inaquë pënëntërahuësoꞌ, camaitërahuësoꞌ, inapita nani ninshitërahuë. Ina quëran israiroꞌsa aꞌchintaramaꞌ, itërin.

Éxodo 31:18

Sinai motopiquë Siniorori nani yaꞌipi Moisësë shaꞌhuitohuachina, cato naꞌpitëaꞌhua quëtërin. Ina naꞌpitëaꞌhuaroꞌsaquë, inaora chachin pënëntërinso nanan ninshitërin.

Éxodo 32:15

Ina quëran Moisësë oꞌmarin. Naꞌpitëaꞌhuaroꞌsaquë ninshitopinan Yosë pënëntërinsoꞌ quëmarin. Ina naꞌpitëaꞌhuaroꞌsasoꞌ, cato quëran chachin ninshitopinan.

Éxodo 34:1

Siniorori, Moisësë itaantapon: —Cato naꞌpitëaꞌhuaroꞌsa iꞌhua paꞌpaaransopita pochachin tapaquëꞌ. Inaquë iꞌhua ninshitërahuëso pochachin ninshitaantarahuë.

Proverbios 7:3

Imisëranënpitaquë tonpoantëquëꞌ. Naporahuaton yonquinën quëran nitotëquëꞌ.

Jeremías 31:33

Naporo tahuëriꞌsa israiroꞌsarëꞌco anoyatohuato, iso pochin nisarahuë: Aꞌchintërahuësopita yonquinëna quëran anitotarahuë. Ina nitotohuachinaꞌ, noꞌtëquën natëtacaisoꞌ catahuararahuë. Casáchin chinotarinaco. Inapitanta piyapinëhuëpita nisapi.

Daniel 6:26

Yaꞌipi huaꞌanëntërahuëso noꞌpaquë, Naniriri chinotërinso Yosë tëꞌhuatatomaꞌ, nóya niꞌcoꞌ. Inasáchin Yosë yaꞌhuëmiatërinsoꞌ. Huaꞌanëntërinsoꞌ, co onporonta taꞌhuantaponhuëꞌ. Chiníquën nanantërinsontaꞌ, co nitiquiaponhuëꞌ.

Mateo 16:16

Simon Pitrori itërin: —Quëmasoꞌ Cristo. Yosë huiꞌnin chachinquën. Ina nanpiton, aꞌpaimarinquën, itërin.

1 Corintios 3:5

Co ca imamacosoꞌ yaꞌhuërinhuëꞌ. Aporosëntaꞌ co imacaisoꞌ yaꞌhuërinhuëꞌ. Quiyantaꞌ topinan piyapicoi nipiraihuëꞌ, Yosë shaꞌhuitërincoi niꞌton, aꞌchintërainquëmaꞌ. Natanpatamaꞌ, Yosë imasaramaꞌ.

2 Corintios 3:6

Ina nani acorincoi aꞌchinaꞌhuaiso marëꞌ. Acohuachincoira, catahuarincoi nasha quëran anoyatërinso aꞌchintaꞌhuainquëmaso marëꞌ. Ina imapatëhuaꞌ, Ispirito Santo catahuarinpoaꞌ Yosë nohuitatëhuaꞌ nanpimiatacaso marëꞌ. Iráca anoyatërinso Moisësëri ninshitopirinhuëꞌ. Ina imapatëhua, co onporontaꞌ noya cancantërëhuahuëꞌ. “Co natëhuatamahuëꞌ, chiminpatamaꞌ, anaꞌintacasoꞌ yaꞌhuërin,” tënin. Co ina aꞌchintërainquëmahuëꞌ.

2 Corintios 3:7

Iráca Yosë pënëntërinsoꞌ shaꞌhuihuachina, naꞌpiquë ninshitërin. Yosësoꞌ noya noya niꞌton, huënaráchin yaꞌnorin. Moisësë yaꞌpiriontaꞌ huënaratarin niꞌton, co israiroꞌsaꞌ nanitopihuëꞌ huaꞌquiꞌ nirayacaisoꞌ. Huënarataponahuëꞌ, oshaquëran sacorayarin. Pënëntërinsontaꞌ noya niponahuëꞌ, co yaꞌhuëmiatërinhuëꞌ. Co yaꞌipi natëhuachinahuëꞌ, chiminpachinaꞌ, anaꞌintacasoꞌ yaꞌhuërin.

2 Corintios 6:16

Yosë chinotërëhuaquë noyasáchin nicacasoꞌ yaꞌhuërin. Co inaquësoꞌ mamanshi moshacasoꞌ yaꞌhuërinhuëꞌ. Inapochachin canpoantaꞌ Yosë imapatëhuaꞌ, yaꞌcoancantarinpoaꞌ niꞌton, ina pëinën pochin ninëhuaꞌ. Yosësoꞌ nanpiárin. Quiricanën quëran naporin: “Imapatamaco, yaꞌcoancantaranquëmaꞌ. Canpitaroꞌco yaꞌhuarahuë. Chinotohuatamaco, noya aꞌpaiaranquëmaꞌ. Piyapinëhuëpita pochin niꞌsaranquëmaꞌ,” tënin.

1 Tesalonicenses 1:9

Inapita chachin canpita naporamasoꞌ shaꞌhuiantapi: “Paono niꞌquihuachincoira, noya aꞌchintërincoi. Noya natanatoi, aꞌnaroáchin natërai. Mamanshi aꞌporahuatoi, Tata Yosëíchin chinotërai. Ina imarai huachi. Yosësoꞌ nanpirárin. Inasáchin chinotacasoꞌ yaꞌhuërin.

Hebreos 10:16

“Aꞌna tahuëri piyapinëhuëpitarëꞌco anoyatohuato, iso pochin nisarahuë: Nasha cancan quëtarahuë natëtochináchin cancantacaiso marëꞌ. Anoyacancantarahuë noya yonquicaiso marëꞌ.

Hebreos 8:10

Ina quëran itantarin: “Tahuëri nanihuachin, nasha quëran anoyataantarahuë. Naporoꞌ anoyacancantarahuë noya yonquicaiso marëꞌ. Nasha cancan quëtarahuë ca pochin cancantacaiso marëꞌ. Casáchin chinotarinaco niꞌton, noya aꞌpaiarahuë. Ca pochin cancantatonaꞌ, piyapinëhuëpita chachin nisapi.

Hebreos 9:14

Quisocristo huënainënso nipirinhuëꞌ noya nóya. Inasoꞌ Yosë huiꞌnin niꞌton, co piꞌpisha tërantaꞌ oshahuaninhuëꞌ. Ispirito Santo yaꞌhuëmiatërinsori catahuarin niꞌton, canpoa marëꞌ chiminaton anoyacancantomiatërinpoaꞌ. Inaso huënainën aꞌparin oshanënpoaꞌ inquitinpoaso marëꞌ. Inapoaton noyápiachin cancan quëtërinpoaꞌ. Ina quëtohuachinpoaꞌ, Yosë noya chinotarihuaꞌ. Inasoꞌ nanpiarin niꞌton, canpoantaꞌ ina marëꞌ noya sacatarihuaꞌ.

Josué 3:10

Yosëso nanpiárin. Ipora napoarin quëran catahuarinpoaso anitotarinpoaꞌ. Canpitaso ahuëta marëꞌ paꞌnamaquë, inimicoroꞌsa minsëraꞌpiapomaꞌ. Yosë catahuarinquëma niꞌton, napotaramaꞌ. Cananoꞌsaꞌ ataꞌhuantaramaꞌ. Itiroꞌsaꞌ, iporoꞌsaꞌ, huirisëroꞌsaꞌ, quiriquiroꞌsaꞌ, amororoꞌsaꞌ, quiposoroꞌsaꞌ, inapitanta napotaramaꞌ.

Apocalipsis 2:1

Ina quëran shaꞌhuitërinco: —Aꞌna quiricaquë ninshitaton, ansiano Ipisoquë yaꞌhuërinsoꞌ aꞌpatëquëꞌ nontohuachin imapisopita natainaꞌ. “Ca Quisosoco quirica aꞌpataranquëmaꞌ, niꞌcoꞌ. Inchinanëhuë quëran canchisë tayoraroꞌsaꞌ sëꞌquërahuë. Canchisë sëꞌparahuan nanparin pochin nininsopita huancánachin paꞌsárahuë.

Apocalipsis 2:12

Ina quëran shaꞌhuitaantarinco: —Ansiano Pircamoquë yaꞌhuërinsontaꞌ ninshitëquëꞌ nonchin imapisopita natainaꞌ. “Ca Quisosoco quirica aꞌpataranquëmaꞌ, niꞌcoꞌ. Chiníquën nanantato, sahuëni cato quëran chachin toꞌnapinan pochin nininsoꞌ yaꞌhuëtërinco anaꞌintaꞌhuaso marëꞌ.

Apocalipsis 2:18

Ina quëran itaantarinco: —Ansiano Tiatiraquë yaꞌhuërinsontaꞌ ninshitëquëꞌ nonchin imapisopita natainaꞌ. “Ca Yosë huiꞌninco quirica aꞌpataranquëmaꞌ. Yaꞌpirahuë pën nënërinso pochin niꞌton, yaꞌipi yonquiramaso quëran huarëꞌ nitotërahuë. Nantëhuëntaꞌ shaꞌpi huaꞌna pënquë aꞌpërëso pochin niꞌton, huënaráchin yaꞌnorin.

Apocalipsis 2:8

Ina quëran shaꞌhuitaantarinco: —Ansiano Ismirinaquë yaꞌhuërinsontaꞌ ninshitëquëꞌ nonchin imapisopita natainaꞌ. “Ca Quisosoco quirica aꞌpataranquëmaꞌ, niꞌcoꞌ. Iráca quëran huarëꞌ yaꞌhuërahuë. Co onporontaꞌ taꞌhuantarahuëꞌ. Chiminaporahuëꞌ, nanpiantarahuë.

Apocalipsis 3:1

Ina quëran Quisoso shaꞌhuitaantarinco: —Ansiano Sartisiquë yaꞌhuërinsontaꞌ ninshitëquëꞌ nonchin imapisopita natainaꞌ. “Ca Quisosoco ninshitaranquëmaꞌ. Casoꞌ canchisë ispiritoroꞌsaꞌ Yosëri camairinsoꞌ cantaꞌ camairahuë, natërinaco. Naporahuaton, tayoraroꞌsaꞌ sëꞌquërahuëso pochin, ansianoroꞌsantaꞌ acorahuë aꞌchinacaiso marëꞌ. Canpitasoꞌ nohuitëranquëmaꞌ. Yaꞌipi co noyahuëꞌ ninamasopita nitotërahuë. Aꞌnapitasoꞌ nicatënënquëmaꞌ, ‘noya imapi,’ topirinahuëꞌ, co tëhuënchachin imaramacohuëꞌ. Chimipi pochin cancantëramaꞌ.

Apocalipsis 3:14

—Ina quëran ansiano Naotisiaquë yaꞌhuërinsoꞌ ninshitëquëꞌ nonchin imapisopita natainaꞌ. “Ca Quisosoco quirica aꞌpataranquëmaꞌ, niꞌcoꞌ. Noꞌtëquën nonato, noꞌtën nanan aꞌchintëranquëmaꞌ. Co onporontaꞌ nonpintëranquëmahuëꞌ. Yosë nohuanton, yaꞌipi maꞌsha ninahuë. Napoaton, yaꞌipi piyapiꞌsaꞌ natëinacosoꞌ yaꞌhuërin.

Apocalipsis 3:22

Imaramaco niꞌton, Ispirito Santo chachin nontarinquëmaꞌ. Huëratëhuanpatamaꞌ, noya natanatomaꞌ, yonquicoꞌ. Nani huachi,” itëquëꞌ ninshitohuatan, itërinco Quisoso.

Apocalipsis 3:7

Ina quëran itaantarinco: —Ansiano Piratiripiaquë yaꞌhuërinsontaꞌ ninshitëquëꞌ nonchin imapisopita natainaꞌ. “Ca Quisosoco quirica aꞌpataranquëmaꞌ, niꞌcoꞌ. Casoꞌ noya noyaco. Casáchin noꞌtëquën aꞌchinahuë. Iráca Yosëri Tapi shaꞌhuitërin. ‘Aꞌna tahuëri quëma shiparinquën yaꞌipi piyapinëhuëpita huaꞌanëntarin,’ itërin. Iráca ninorincoso chachin nani oꞌmarahuë Yosë huëntonënquë ayaꞌconaꞌhuanquëmaso marëꞌ. Niahuiquë yaꞌcoana iꞌsoarahuatëꞌ, ayaꞌconëꞌ. Inapochachin carinquëmaꞌ ayaꞌconpatënquëmaꞌ, co insontaꞌ nanitërinhuëꞌ ocoiinquëmasoꞌ. Oncotohuatëra, co aꞌnapita nanitopihuëꞌ yaꞌconacaisoꞌ.

1 Samuel 17:26

Napopisoꞌ, co Tapi nataninhuëꞌ. Co natanatonhuëꞌ, aꞌnapita sontaroꞌsa natanin: —Canpoasoꞌ, Yosë nanpiárin nininso imarëhuaꞌ. Ina catahuarinpoa ahuëtarëhuaꞌ. Paso huiristinosoꞌ, co ina chinotërinhuëꞌ. ¡Napoaton co piꞌpian tëranta ina pochin noꞌhuiinpoaso yaꞌhuërinhuëꞌ! Insosona ina tëpaton taparo nitarinpoasoꞌ acopitohuachinaꞌ: ¿Maꞌta copirnori quëtapon? itërin.