2 Corintios 3:2 - Chayahuita (Shahui)

² Canpitasoꞌ cartanëhuëi pochin ninamaꞌ, cancanëhuëiquë Quisocristori ninshitërinsoꞌ. Nanamën chachin aꞌchintohuatëinquëmara, noya imaramaꞌ. Yaꞌipi piyapiꞌsaꞌ niꞌninënquëmaꞌ. “Paono caꞌtaninsopitarë chachin aꞌchintërin niꞌton, noya cancantopi,” taꞌtonaꞌ, noya niꞌninacoi.

2 Corintios 3:2 ပူးပေါင်းရင်းမြစ်များ

Romanos 1:8

Canpitasoꞌ noya Yosë natëramaꞌ, natantërahuë. Yaꞌipi piyapi napopi. Ina natantato, “Yosparinquën Sinioro,” itërahuë Yosë. Inaꞌton napotërahuë. Quisocristo catahuarinco ina pochin Yosë nontaꞌhuaso marëꞌ.

1 Corintios 3:10

Natëricho quëran yapëihuatëra, acopoꞌ ihuatahuatëꞌ, siminto acorëꞌ. Inaꞌton acorëso pochin carinquëmaꞌton aꞌchintëranquëmaꞌ. Yosë catahuarinco noꞌtëquën aꞌchinaꞌhuasoꞌ. Ina quëran aꞌnapitantaꞌ aꞌchintantarinënquëmaꞌ. Napoaponahuëꞌ, aꞌnaya aꞌnaya noya yonquiaton pëirinso pochin aꞌnapita noya aꞌchintacasoꞌ yaꞌhuërin.

2 Corintios 11:11

“Co nosororinquëmahuëꞌ niꞌton, maꞌshanëmaꞌ co maꞌparinquëmahuëꞌ,” itopirinënquëmahuëꞌ, co noꞌtëquën nonpihuëꞌ. Yosë niꞌsárinco, naꞌcon nosororanquëmaꞌ, tënahuë.

2 Corintios 12:15

Napoaton co mantaꞌ maꞌparanquëmahuëꞌ. Noya cancantato, sacatarahuë cosharoꞌ paꞌanaꞌhuaso marëꞌ. Ina quëran parisitaporahuëꞌ, aꞌchintaranquëmaꞌ noya imacamaso marëꞌ. Carimasoꞌ naꞌcon naꞌcon nosoropiranquëmahuëꞌ, canpitasoꞌ co onpopinchin nosororamacohuëꞌ topirahuëꞌ.

2 Corintios 3:1

“Ina pochin nonpatamaꞌ, naquëranchin aꞌnapita nocanaramaꞌ,” ¿itëramacoi ti? Co insontaꞌ nocanaihuëꞌ. Aꞌnaquënsoꞌ carta aꞌnapitari ninshitërinsoꞌ aꞌnotërinquëmaꞌ nohuitacaso marëꞌ. “Iso quëmapisoꞌ noya. Aꞌchintohuachinquëmaꞌ, noya natancoꞌ,” tënin quiricaquë. Inanpi quirica co maꞌparainquëmahuëꞌ. Co ina pochin nohuantëraihuëꞌ. Nani noyá nohuitëramacoi.

2 Corintios 7:3

Co nocanatënquëmaꞌ pënënanquëmahuëꞌ. Naꞌcon nosororainquëmasoꞌ nani shaꞌhuitërainquëmaꞌ. Chiminaꞌhuaiquë huarëꞌ nosoromiatarainquëmaꞌ.

Filipenses 1:7

Naꞌcon nosororanquëmaꞌ niꞌton, ina pochin noya yonquiranquëmaꞌ. Iráca Quisocristo nanamën aꞌchinpatëra, catahuaramaco. Tashinan pëiquë poꞌmohuachinacorantaꞌ, co naniantëramacohuëꞌ. Inaquëntaꞌ catahuaramaco. Imarahuëso marëꞌ shaꞌhuirapirinaco. Coisëquë quëpapirinacohuëꞌ, co tapanatohuëꞌ, Yosë nanamën noꞌtëquën shaꞌhuitërahuë. Canpitantaꞌ “Yosë catahuarinpoaꞌ,” taꞌtomaꞌ, co tapanaramahuëꞌ. Napoaton canpita yonquiatënquëmaꞌ, noya cancantërahuë. Iyahuëpita pochachin niꞌnanquëmaꞌ.

1 Tesalonicenses 1:8

Noya imaramaꞌ niꞌton, yaꞌipi inaquë yaꞌhuëpisopita nicatënënquëmaꞌ, yonquipi. Naporahuaton, yaꞌipi ina parti nahuinin. Co quiyari shaꞌhuitopiraihuëꞌ, yaꞌipiya nitotopi.