2 Corintios 2:14 - Chayahuita (Shahui)

¹⁴ Ma noyacha Tata Yosëso paya, tënëhuaꞌ. Quisocristo imarëhuaꞌ niꞌton, nani tahuëri ina catahuarinpoaꞌ inimiconënpoapita minsëcasoꞌ. Inapitasoꞌ co nohuantopihuëꞌ Quisocristo nanamën aꞌchinaꞌhuaisoꞌ. Co nohuantopirinahuëꞌ, nisha nisha parti paatoi, nanamën aꞌchinárai. Pimóton huaꞌsaiꞌ pimoanahuaninso pochin Quisocristo nanamën nahuinarin. Aꞌchintatoi, naꞌa piyapiꞌsaꞌ anitotërai.

2 Corintios 2:14 ပူးပေါင်းရင်းမြစ်များ

Salmos 148:14

¡Piyapinënpitanpoa chiníquën nanan quëtërinpoaꞌ! Yaꞌipi imarinsopitari chinochinaꞌ. Israiroꞌsanpoasoꞌ, cancantërinpoaꞌ. Ina piyapinënpoa ninëhuaꞌ. ¡Ma noyacha Sinioroso paya!

Juan 16:33

Nani naꞌcon shaꞌhuitëranquëmaꞌ sano cancantacamaso marëꞌ. Casáchin yonquihuatamaco, sano cancantaramaꞌ. Co paꞌyanaramahuëꞌ. Piyapiꞌsaꞌ aparisitopirinënquëmahuëꞌ, catahuaranquëmaꞌ niꞌton, chiníquën cancantocoꞌ. Yaꞌipi isoroꞌpaquë co noyahuëꞌ nipisopita nani minsëarahuë, itërincoi Quisoso.

Romanos 1:8

Canpitasoꞌ noya Yosë natëramaꞌ, natantërahuë. Yaꞌipi piyapi napopi. Ina natantato, “Yosparinquën Sinioro,” itërahuë Yosë. Inaꞌton napotërahuë. Quisocristo catahuarinco ina pochin Yosë nontaꞌhuaso marëꞌ.

Romanos 15:19

Tëhuënchachin Ispirito Santo ananitërinco niꞌton, naꞌa caniaꞌpiroꞌsaꞌ aꞌnaroáchin anoyatërahuë Yosë natëcaiso marëꞌ. Ina niꞌsahuatonaꞌ, natëpi. Ispirito Santori yaꞌcoancantërin niꞌton, imapi. Quirosarinquë aꞌchintërahuë. Ina quëran paꞌsápato, Iriricoquë huarëꞌ Quisocristo nanamën aꞌchintëraꞌpiarahuë. Yaꞌipi parti pënëntërahuë.

Romanos 6:17

Iráca oshanëma natëtomaꞌ, co noyahuëꞌ nipiramahuëꞌ. Quisocristo nanamën aꞌchintohuachinënquëmara, noya natanamaꞌ. Yaꞌipi cancanëma quëran noya natëramaꞌ. Ina yonquiatëhuaꞌ, “Yosparinquën” itërëhuaꞌ Yosë.

Romanos 8:37

Ina nipirinhuëꞌ, Quisocristo nosororinpoaꞌ. Parisitapirëhuahuëꞌ, nani tahuëri catahuarinpoaꞌ sopai minsëcaso marëꞌ. Nóya cancantarëhuaꞌ.

1 Corintios 12:8

Ispirito Santo nohuanton, aꞌnaquën noyá nitotërin pënëntacasoꞌ. Noꞌtëquën yonquiaton, pënëntarin. Aꞌnaquëontaꞌ noya noya nitotaton, aꞌchinarin.

1 Corintios 15:37

Tricoraya yonquiaꞌahuaꞌ. Ina shaꞌpatamara, aipi noshinënsoꞌ co papotërinhuëꞌ. Yaꞌpiraꞌhuain papotohuachina, nisha yaꞌnorin huachi.

1 Corintios 15:57

Yaꞌhuëpirinhuëꞌ, ¡ma noyacha Tata Yosësoꞌ niꞌton, nichaꞌërinpoa paya! Ina nohuanton, Quisocristo yaꞌhuërëtërinpoaꞌ. Corosëquë chiminaton, sopai minsërin. Nanpiantarahuaton, chimiriontaꞌ minsërin. Ina marëꞌ: “Yosparinquën,” itahuaꞌ.

2 Corintios 1:11

Canpitantaꞌ quiya marëꞌ chiníquën Yosë nontocoꞌ catahuaincoi. Naꞌanquëmaꞌ quiya marëꞌ Yosë nontohuatamaꞌ, Yosë catahuarincoi. Ina quëran canpitantaꞌ noya cancantaramaꞌ. “Ma noyacha Yosëri catahuarin paya,” taꞌtomaꞌ, “Yosparinquën Sinioro,” tosaramaꞌ.

2 Corintios 8:16

Titontaꞌ naꞌcon yonquirinquëmaꞌ. Ina marëꞌ noya cancantato, “Yosparinquën, Sinioro,” itërahuë.

2 Corintios 9:15

Yosëso nipirinhuëꞌ naꞌcon naꞌcon quëtërinpoaꞌ. Huiꞌnin chachin aꞌpaimarin nichaꞌëinpoaso marëꞌ. Inasoꞌ noya nóya niꞌton, “Yosparinquën, Sinioro,” itahuaꞌ.

Efesios 5:2

Quisocristo nosoroatonpoaꞌ, canpoa marëꞌ chiminin. Oshanënpoa marëꞌ chiminpachina, Yosëri noya niꞌnin. Napoaton canpoantaꞌ nani tahuëriya inapochachin ninosoroaꞌahuaꞌ Yosë noya niꞌinpoaꞌ.

Efesios 5:20

Nani tahuëri Tata Yosë nontatomaꞌ: “Yosparinquën,” itocoꞌ. Maꞌsha onpoapomarahuëntaꞌ, noya cancantocoꞌ. “Sinioro Quisocristo nanan quëtërinco niꞌton, nontaranquën,” taꞌtomaꞌ Yosë nontocoꞌ.

Filipenses 4:18

Iporasoꞌ nóya iꞌhuërëtëramaco huachi. Napoaton noya yaꞌhuarahuë. Co mantaꞌ pahuantërincohuëꞌ. Iꞌhua Ipapërotito huëꞌpachina, coriqui aꞌpatëramaco niꞌton, maꞌsha yaꞌhuëtërinco. Ina marëꞌ “Yosparinquëmaꞌ,” itëranquëmaꞌ. Yosë nosoroatomaꞌ, aꞌpatiramaco. Yosë chinotacaiso marëꞌ pimóchin nininsoꞌ aꞌpëhuachinara, Yosëri noya niꞌnin. Inapochachin canpitantaꞌ coriqui aꞌpatëramaco niꞌton, Yosë noya niꞌninquëmaꞌ.

Colosenses 1:23

Imamiatohuatamaꞌ, Yosë noya niꞌsarinquëma huachi. Noya nanan natanamaꞌ. “Nichaꞌësarinpoaꞌ,” taꞌtomaꞌ, natërama huachi. Natëmiatocoꞌ. Ama, iyaroꞌsaꞌ, nisha nisha yonquicosohuëꞌ. Ama piꞌpian tërantaꞌ aꞌpocosohuëꞌ. Yaꞌipi parti noya nanan chachin aꞌchinapi. Inachachin cantaꞌ aꞌchinarahuë.

Colosenses 1:6

Noya nanan chachin yaꞌipi parti aꞌchinapi. Aꞌna parti aꞌna parti piyapiꞌsaꞌ natëtatonaꞌ, noya imasapi. Canpitantaꞌ noya imasaramaꞌ. Yaꞌnan natantapomaꞌ, natëramaꞌ. “Yosë nosoroatonpoaꞌ, inaora nohuanton, nichaꞌësarinpoaꞌ,” itërinënquëmaꞌ. Napotohuachinënquëmara, “Noꞌtëquën shaꞌhuitërinpoaꞌ,” taꞌtomaꞌ, natëramaꞌ.

Colosenses 2:15

Quisocristosoꞌ chini chiníquën nanantërin. Corosëquë chiminaton, yaꞌipi sopai huaꞌanoꞌsaꞌ, sopairoꞌsaꞌ, inapita aꞌninquëchin minsërahuaton, atapanin. Co huachi inapita nanitapihuëꞌ shaꞌhuirapiinpoasoꞌ.

1 Tesalonicenses 1:8

Noya imaramaꞌ niꞌton, yaꞌipi inaquë yaꞌhuëpisopita nicatënënquëmaꞌ, yonquipi. Naporahuaton, yaꞌipi ina parti nahuinin. Co quiyari shaꞌhuitopiraihuëꞌ, yaꞌipiya nitotopi.

1 Tesalonicenses 3:9

Capa cancantërai niꞌton, ¿onporahuatëicha noya noya: “Yosparinquën Tata Yosë,” ichii? ¡Coꞌchi nanitëraihuë paya!

1 Timoteo 2:8

Napoaton nani parti niyontonpachinaꞌ, quëmapiꞌsaꞌ Yosë nonchinaꞌ, tënahuë. Ama noꞌhuichinasohuëꞌ. Ama nisha nisha ninonchinasohuëꞌ. Noyápiachin cancantatonaꞌ, Yosë nonchinaꞌ.

2 Timoteo 2:2

Piyapiꞌsaꞌ niyontonpachinara, Yosë nanamën aꞌchintërahuë. Quëmantaꞌ natanan. Inapochachin quëmantaꞌ caraíchin quëmapiꞌsaꞌ huayonahuaton, ina nanan chachin aꞌchintantaquëꞌ. Noya natërinsopita aꞌchintëquëꞌ. Inahuanta aꞌnapita aꞌchintacaiso marëꞌ inapotëquëꞌ.

Apocalipsis 7:12

“Tëhuënchachin Sinioro, piyapiꞌsaꞌ nichaꞌëran. ¡Ma noyanquëncha quëmaso paya! Yaꞌipiya chinochinënquën. Yaꞌipi nitotëran. Chini chiníquën nanantaton, yaꞌipiya nanitaparan niꞌton, yaꞌipi natëinënquën. ‘Yosparinquën,’ ichinënquën. Naꞌcon natëmiatarainquën. Co onporontaꞌ aꞌpoarainquënhuëꞌ. Amen,” itapi.