2 Corintios 2:10 - Chayahuita (Shahui)

¹⁰ Nanan anoyatohuatamaꞌ, cantaꞌ nanan anoyatërahuë pochin cancantarahuë. Canpita yonquiatënquëmaꞌ, nanan anoyatërahuë. “Quisocristo nani tahuëri niꞌsarinpoaꞌ,” taꞌto, cancanëhuë quëran huarëꞌ nanan anoyatërahuë.

2 Corintios 2:10 ပူးပေါင်းရင်းမြစ်များ

Mateo 18:18

Oshahuanacasoꞌ co yananiantohuachinhuëꞌ, shaꞌhuitëquëꞌ: ‘Tëhuënchachin iyasha oshahuanan. Co naniantëranhuëꞌ niꞌton, co Yosë inquitarinquënhuëꞌ,’ itëquëꞌ. Yosërintaꞌ inachachin napotapon. Nipirinhuëꞌ, oshanën marëꞌ sëtaton Yosë yonquiantahuachin, noyatapon. ‘Oshanën iyasha Yosë inquitarinquën,’ itëquëꞌ. Yosërintaꞌ oshanën inquitaton, noya niꞌsarin huachi.

Juan 20:23

Insosona natëhuachinquëmaꞌ, “Oshanën iyasha Yosë inquitarinquën,” itocoꞌ. Inquitarin mini. Nipirinhuëꞌ, co yanatëhuachinquëmahuëꞌ, “Co oshanën iyasha inquitarinquënhuëꞌ,” itocoꞌ. Tëhuënchachin co inquitarinhuëꞌ, itërincoi. Itahuatoncoi, paꞌnin.

1 Corintios 5:4

Quisocristo imaramaꞌ niꞌton, niyontoncoꞌ. Niyontonpatamaꞌ, ca pochin cancantatomaꞌ, ina quëmapi chiníquën pënëncoꞌ. “Sinioro Quisoso nanan quëtërincoi niꞌton, ama huachi Tata Yosë aꞌpainquënsohuëꞌ, tënai. Sopai natëran niꞌton, parisitamasoꞌ yaꞌhuërin,” itocoꞌ. Inapotohuatamaꞌ, aꞌna tahuëri yonquiapon nimara. “Co noyahuëꞌ yonquirahuësoꞌ naniantato, Yosë imantaꞌi,” tapon nimara. Napohuachin, Sinioro Quisoso oꞌmantahuachin, nichaꞌësarin huachi.

2 Corintios 4:6

Yaꞌnan isoroꞌpaꞌ acoapon yaꞌipi parti tashipirinhuëꞌ: “Niiꞌsohuanchin huachi,” tënin Yosë. Napohuachina, tahuëri yaꞌhuërin. Inapochachin iporasoꞌ cancanënpoaquë aꞌpintërinpoaꞌ ina nohuitacaso marëꞌ. Inasoꞌ noya noya. Quisocristo yaꞌpirin quëran aꞌpintërinpoaso pochin ninin. Ina yonquihuatëhuaꞌ, Yosë chachin anohuitarinpoa huachi.

2 Corintios 5:20

Quisocristo chachin acorincoi aꞌnapita anitotaꞌhuaiso marëꞌ. Ina yaꞌhuërënamën pochin shaꞌhuitarainquëmaꞌ. “Yosë nontocoꞌ nanan anoyachinquëmaꞌ,” itárainquëmaꞌ.

2 Corintios 6:6

“Quisocristo imarai,” taꞌtoi, noyasáchin ninai. Yosë nanamën noya nitotërai. Maꞌsha onpotopirinacoihuëꞌ, co noꞌhuiraihuëꞌ, ahuantërai. Yaꞌipi piyapiꞌsaꞌ nóya nontatoi, catahuarai. Ispirito Santo yaꞌcoancantërincoi niꞌton, catahuarincoi noya nicaꞌhuaisoꞌ. Tëhuënchachin cancanëhuëi quëran huarëꞌ piyapiꞌsaꞌ nosororai.

Efesios 4:32

Yaꞌipi piyapi noya nontocoꞌ. Nosoroatomaꞌ, catahuacoꞌ. Maꞌsha onpotohuachinënquëmaꞌ, ama ina yonquicosohuëꞌ. Quisocristo imaramaꞌ niꞌton, Yosë oshanëmaꞌ inquitërinquëmaꞌ. Canpita marëꞌ chiminin niꞌton, nanan anoyatërinquëmaꞌ. Inapochachin canpitantaꞌ aꞌnapita maꞌsha onpotohuachinënquëmaꞌ, nanan anoyatatomaꞌ, noya nontocoꞌ.