2 Corintios 13:7 - Chayahuita (Shahui)

⁷ Canpita marëꞌ Yosë nontarai. “Catahuaquëꞌ noyasáchin niinaꞌ,” itërai. Co aꞌnapita noya nicainacoiso marë naporaihuëꞌ. Canpita noya noya imacamaso marëꞌ naporai. Aꞌnapita co noyahuëꞌ yonquiarapipirinacoihuëꞌ, co ina yonquiraihuëꞌ.

2 Corintios 13:7 ပူးပေါင်းရင်းမြစ်များ

Mateo 6:13

Co noyahuëꞌ yonquihuatoi, catahuacoi aꞌnaroáchin nanianchii. Catahuacoi ama sopai minsëincoisohuëꞌ. [Quëmasáchin huaꞌanëntarancoi. Yaꞌipi nanitaparan. Ipora quëran huarëꞌ yaꞌipiya natëinënquën. Amen,]’ itocoꞌ Yosë nontohuatamaꞌ.

Juan 17:15

Co nohuantërahuëꞌ isoroꞌpa quëran ocoicamasoꞌ. Isëquë yaꞌhuëpirinahuëꞌ, catahuaquëꞌ ama sopairi minsëinsohuëꞌ.

Romanos 1:28

Co Yosë yanatëpihuëꞌ niꞌton, inari aꞌporin co noyahuëꞌ nicacaiso marëꞌ. Nitapicancamiatopi.

Romanos 12:17

Aꞌna piyapi maꞌsha onpotohuachinquëmaꞌ, ama iꞌhuërëtocosohuëꞌ. Noya nicoꞌ aꞌnapitantaꞌ catahuacaso marëꞌ.

Romanos 13:13

Tahuëri nipachina, aꞌninquëchin niꞌton, noyasáchin ninëꞌ. Aꞌnaquënso nipirinhuëꞌ pitasachin paꞌyatopi. Naꞌa tahuëri nansarápi, oꞌosápi, coshatápi, noꞌpiápi. Ama pitasoꞌ paꞌyatocosohuëꞌ. Ama noꞌpicosohuëꞌ. Ama piꞌpisha tërantaꞌ nimonshitacamasoꞌ yonquicosohuëꞌ. Ama ninoꞌhuicosohuëꞌ. Ama aꞌna piyapi noyapatomaꞌ, noꞌhuicosohuëꞌ.

Romanos 16:10

Apirisëntaꞌ saludos aꞌpatarahuë. Yaꞌipi cancanën quëran Quisocristo natërin. Aꞌnapitari aparisitopirinahuëꞌ, co aꞌporinhuëꞌ. Aristoporo pëinënquë yaꞌhuëpisopitantaꞌ saludos aꞌpatarahuë.

1 Corintios 11:19

Co yaꞌipi cancanëma quëran imapatamahuëꞌ, nisha nisha yonquiaramaꞌ. Co napopináchin yonquiaramahuëꞌ. Ina quëran Yosë cancanën manëhuasopita nohuitërinënpoaꞌ. Co yaꞌipinpoaꞌ nisha nisha yonquirëhuahuëꞌ. Aꞌnapitaso nipirinhuëꞌ co noya yonquiatonahuëꞌ, co noꞌtëquën imapihuëꞌ.

2 Corintios 10:10

Aꞌnaquën itërinënquëmaꞌ: “Paono naꞌcon ninshitatonpoaꞌ, chiníquën pënënpirinpoahuëꞌ. Huëꞌpachinasoꞌ, co chiníquën nanantonaꞌpi pochin nontërinpoahuëꞌ. Sanoanayan quëran aꞌchintërinpoaꞌ niꞌton, co chiníquën nanantërinhuëꞌ,” toconpi.

2 Corintios 10:18

“Casoꞌ noyaco,” topatëhuaꞌ, co ina marëꞌ Yosë noya niꞌsarinpoahuëꞌ. Noya cancantohuatëhuaꞌ, Yosë noya niꞌsarinpoaꞌ. Ina naꞌcon naꞌcon yonquiaꞌahuaꞌ.

2 Corintios 13:6

Tëhuënchachin imapatamaꞌ, co topinan quëran aꞌchintërainquëmahuëꞌ, tënahuë. Ina quëran canpitantaꞌ inachachin yonquiaramaꞌ. “Tëhuënchachin Quisocristori acorin pënënainpoaso marëꞌ,” tosaramaꞌ.

2 Corintios 13:8

Noꞌtën nanan natëcamaso marëꞌ catahuarainquëmaꞌ. Co nohuantëraihuëꞌ nisha aꞌchintaꞌhuainquëmasoꞌ.

2 Corintios 13:9

Co chiníquën nanantonaꞌpi pochin nipiraihuëꞌ, co ina marëꞌ sëtëraihuëꞌ. Noya imapatamaꞌ, nóya cancantarai. Ipora huantaꞌ Yosë nontarai. “Catahuaquëꞌ, Sinioro, noya noya cancanchinaꞌ,” itërai.

2 Corintios 6:4

Maꞌsona tërantaꞌ nipatoira, Yosëíchin natërai piyapiꞌsaꞌ nicatonacoi ina yonquicaiso marëꞌ. Aparisitopirinacoihuëꞌ, co iꞌhuërëtëraihuëꞌ. Maꞌsha, cosharoꞌ, inapita pahuantopirincoihuëꞌ, ahuantatoi, chiníquën cancantërai. Maꞌsha onpoapoiraihuëꞌ, co paꞌyanaihuëꞌ.

2 Corintios 8:21

Noyasáchin nisarai Yosë noya nicaincoiso marëꞌ. Piyapiꞌsantaꞌ noya nicainacoisoꞌ nohuantërai.

Filipenses 4:8

Isoíchin iyaroꞌsaꞌ pënënaranquëmaꞌ. Noꞌtën nanansáchin yonquicoꞌ. Noya imatonaꞌ, noya nipisopita yonquicoꞌ. Ama nonpin nananoꞌsaꞌ natëtocosohuëꞌ. Noyápiachin cancantocoꞌ. Aꞌnapita noyasáchin yonquirapicoꞌ. Noya nahuininsoráchin yonquicoꞌ. Aꞌnapita noya nipisoꞌ yonquiatomaꞌ: “Ma noyacha Yosëri catahuarin paya,” itocoꞌ. Ina pochin yonquihuatamaꞌ, Yosë noya niꞌsarinquëmaꞌ.

1 Tesalonicenses 5:23

Yosëíchin asanocancaninpoaꞌ. Canpita marëꞌ ina nontarahuë noyásha anoyacancanchinquëmaꞌ. “Catahuaquëꞌ Sinioro, yaꞌipi cancanëna quëran noyápiachin yonquiꞌinaꞌ. Naporahuaton, yaꞌipi yonquinëna quëran noya nininsopitaráchin nohuanchinaꞌ. Quëma nohuanton, yaꞌipi nonëna quëran huarë noyasáchin niinaꞌ,” itërahuë. Ina quëran Sinioro Quisocristo oꞌmantahuachin, nóya niꞌsarinquëmaꞌ.

1 Timoteo 2:2

Copirnoroꞌsa marëꞌ Yosë nontocoꞌ noya huaꞌanëntacaiso marëꞌ. Yaꞌipi huaꞌanoꞌsa marëꞌ Yosë nontocoꞌ noya nicacaiso marëꞌ. Noya huaꞌan nipachin, co aquëtëꞌ piyapiꞌsaꞌ ninoꞌhuiapihuëꞌ. Sano yonquiatëhuaꞌ, noya yaꞌhuarihuaꞌ. Ina quëran Yosë yonquiatëhuaꞌ, noya nisarihuaꞌ.

2 Timoteo 2:15

Noyasáchin niquëꞌ Yosë noya niꞌinquën. Yosë nanamën maꞌsona tapon naporinsopita noya nitotaton, noꞌtëquën aꞌchinquëꞌ. Ina marëꞌ noya sacatohuatan, co Yosëꞌpaꞌ tapanaranhuëꞌ.

2 Timoteo 4:18

Paꞌpi co noyahuëꞌ yonquirapihuachinacontaꞌ, onpopiontaꞌ nichaꞌësarinco. Quisocristo anoyacancantërinco niꞌton, aꞌna tahuëri huaꞌanëntërinquë quëpantarinco. ¡Ma noyacha Quisocristoso paya! Ipora quëra huarëꞌ inasáchin chinotahuaꞌ. Amen.

Santiago 1:12

Yaꞌipinpoaꞌ maꞌsha onporëhuaꞌ. Caniorëhuaꞌ, parisitërëhuaꞌ, naporëhuaꞌ. Noya ahuantohuatëhuaꞌ, nóya cancantarihuaꞌ. “Parisitaponaraihuëꞌ, nóya imasarinaco,” taꞌton, Yosë noya niꞌsarinpoaꞌ. Ina marëꞌ inápaquë noya acanararinpoaꞌ. Nanpimiatarihuaꞌ. “Tëhuënchachin nosorohuatamaco, ananpitaantaranquëmaꞌ,” itërinpoaꞌ. Shaꞌhuitërinpoaꞌ niꞌton, co onporontaꞌ nonpintarinpoahuëꞌ.

1 Pedro 2:12

Co imapisopitahuëꞌ pinorinënquëmaꞌ. “Co noyahuëꞌ nipi,” topi. Ina nipirinhuëꞌ, noyasáchin nicoꞌ niꞌinënquëmaꞌ. Ina quëran aꞌna tahuëri Yosëri catahuarin niꞌton, noꞌtëquën yonquihuachinaꞌ, yonquiarinënquëmaꞌ. “Ma noyacha Yosëri catahuarin niꞌton, noya nipi paya,” tosapi.