2 Corintios 12:21 - Chayahuita (Shahui)

²¹ Iráca aꞌnaquëmaꞌ co noyahuëꞌ yonquiramaꞌ. Monshihuanamaꞌ, sanapirachin yonquiramaꞌ. Ipora huantaꞌ aꞌnaquëmaꞌ inapoaramaꞌ nimara. Co ina naniantohuatamahuëꞌ, canconpato, paꞌpi sëtarahuë. Carinquëmaꞌ aꞌchintëranquëmasoꞌ niꞌton, Yosë atapanarinco. Co oshanëmaꞌ aꞌpohuatamahuëꞌ, chiníquën asëtaramaco.

2 Corintios 12:21 ပူးပေါင်းရင်းမြစ်များ

Salmos 119:136

Quëma aꞌchinansopita co piyapiꞌsa natëpihuëꞌ. Ina marëꞌ sëtato naꞌnërárahuë.

Éxodo 32:31

Inapoaton naquëranchin Moisësë motopiꞌpaꞌ panantarin. Inaquë Sinioro nontaton itapon: —Tëhuënchachin piyapinënpita oshahuanpi. Mamanshi oro quëran nicatona moshapi niꞌton, oshahuanpi. Ina nipirinhuëꞌ, oshanën inquitaton, nóya niantaquëꞌ. Coꞌsoꞌ yainapotohuatanhuëꞌ, nininëhuë quiricanënquë ninshitëransoꞌ tapiquë, itërin.

Jeremías 9:1

Maꞌcha inotëro parti yaꞌhuëcaꞌhuaso marëꞌ pëi yaꞌhuëtërincohuë paya. Inaquë paꞌsahuato yaꞌhuëꞌitohuëꞌ. Israiroꞌsasoꞌ quëmopinëhuëpita nipirinhuëꞌ, pachitohuëꞌ. Yaꞌipiya quëran inahuasoꞌ, co Yosëíchin cancantopihuëꞌ. Nonpintahuatona patopi. Inapitasoꞌ quëmopinëhuëpita nipirinahuëꞌ, naꞌcon taquiapi niꞌton, tahuëri tashirë chachin naꞌnëi, topirahuë. ¡Iꞌsha paꞌirinsoꞌ, huinan, inapita pochin yaꞌpiratërahuë naporini, noya noya niitonhuëꞌ!

Romanos 13:13

Tahuëri nipachina, aꞌninquëchin niꞌton, noyasáchin ninëꞌ. Aꞌnaquënso nipirinhuëꞌ pitasachin paꞌyatopi. Naꞌa tahuëri nansarápi, oꞌosápi, coshatápi, noꞌpiápi. Ama pitasoꞌ paꞌyatocosohuëꞌ. Ama noꞌpicosohuëꞌ. Ama piꞌpisha tërantaꞌ nimonshitacamasoꞌ yonquicosohuëꞌ. Ama ninoꞌhuicosohuëꞌ. Ama aꞌna piyapi noyapatomaꞌ, noꞌhuicosohuëꞌ.

Romanos 9:2

Tëhuënchachin israiroꞌsaꞌ yonquiato, sëtërahuë. Cancanëhuë quëran huarëꞌ sëtárahuë.

1 Corintios 5:1

Aꞌnaquënsoꞌ co noyahuëꞌ nicaton, monshihuanin, topi natantërahuë. Inasoꞌ paꞌpin saꞌin monshitërin. Inapoaton, paꞌpi co noyahuëꞌ ninin. Co imapisopitahuë tërantaꞌ co onporontaꞌ ina pochin nipihuëꞌ.

2 Corintios 10:6

Canpita noya natëhuatamaꞌ, noya cancantarai. Ina quëran canconpatoi, co natëpisopitahuëꞌ noꞌtëquën anaꞌintarai.

2 Corintios 12:7

Yosë naꞌcon naꞌcon anitotërinco. Ina quëran ama aꞌnapita nocanaꞌhuaso marëhuëꞌ ina nohuanton, maꞌsha onporahuë. Nahuan acoposha ohuanincoso pochin natanahuë. Co oshahuanaporahuëꞌ, Satanasë naꞌcon aparisitërinco.

2 Corintios 13:2

Iꞌhua niꞌconpatënquëmara, pënënanquëmaꞌ. “Co oshanëmaꞌ naniantohuatamahuëꞌ, aꞌna huëꞌpato, noꞌtëquën anaꞌintaranquëma huachi,” itëranquëmaꞌ. Iporasoꞌ co inatohuaꞌ yaꞌhuëpirahuëꞌ, inachachin pënëantaranquëmaꞌ. Co iꞌhua oshahuaninsoachin yonquirahuëꞌ. Yaꞌipinquëmaꞌ pënënaranquëmaꞌ.

2 Corintios 8:24

Inapita cantonpachinquëmaꞌ, noya nontocoꞌ. Ina quëran coriqui pahuantërinsopita marëꞌ yontonamasoꞌ quëtohuatamaꞌ, noya niꞌsarinënquëmaꞌ. “Paono noꞌtëquën nontërinpoaꞌ. Corintoquë imapisopitasoꞌ pahuantopisopita nosoropi mini,” tosapi. Ina quëran yaꞌhuëpiquë chachin paantahuachinaꞌ, shaꞌhuirapi antaꞌ. Yaꞌipi imapisopita nitotapi huachi.

Gálatas 5:19

Piyapiꞌsaꞌ inahuara co nanitopihuëꞌ Yosëíchin yonquicaisoꞌ. Co noyahuëꞌ yonquipisopita nitotërëhuaꞌ. Co noyahuëꞌ yonquihuachinara, co noyahuëꞌ nipi. Yamonshihuanpi, taparoꞌ nonpi, sanapi sëꞌhuachinachin cancantopi.

Deuteronomio 9:15

Motopi quëran nohuaramahuatora, cato naꞌpitëaꞌhuaroꞌsa quëmarahuë. Inaquë Yosërëꞌquënpoa anoyatërëhuasoꞌ, nani ninshitërin. Naporoꞌ motopiquësoꞌ, pën tënëntárin.

Deuteronomio 9:25

Mamanshi moshatoma oshahuanamaso marëꞌ Sinioro yaataꞌhuantërinquëmaꞌ. Ina niꞌton, naquëranchin iꞌhua naporahuëso pochin, catapini shonca tahuëri tashirë chachin isonahuë. Isonahuato chiníquën Sinioro nontërahuë: ‘Sinioro, ama piyapinënpita ataꞌhuantëquësohuëꞌ. Chiníquën nanantaton, inapitaso Iquipito quëran ocoiran. Inapotaton huaꞌanëntëran niꞌton, ama ataꞌhuantëquësohuëꞌ.

Colosenses 3:5

Napoaton piꞌpian tërantaꞌ co noyahuëꞌ yonquihuatamaꞌ, aꞌnaroáchin naniantocoꞌ. Ama monshihuancosohuëꞌ. Ama taparoꞌ yonquicosohuëꞌ. Ama aꞌna sanapi sëꞌhuacamasoꞌ yonquicosohuëꞌ. Ama aꞌna quëmapi saꞌin noyapacosohuëꞌ. Ama nani maꞌsha nohuantapatocosohuëꞌ. Aꞌnaquënsoꞌ maꞌsha naꞌcon nohuantatonaꞌ, mamanshi moshapiso pochin niconpi.

Hebreos 13:4

Quëmapiꞌsaꞌ saꞌapachinaꞌ, ama aꞌna sanapi yonquiꞌinasohuëꞌ. Sanapiꞌsantaꞌ soꞌyahuachinaꞌ, ama soꞌinaꞌ tëhuananpichinasohuëꞌ. Ama mantaꞌ monshihuainasohuëꞌ. Monshihuanpatamaꞌ, Yosë chiníquën anaꞌintarinquëmaꞌ.

2 Pedro 2:18

Inahuara nipaꞌyatatonaꞌ, topinan quëran nontarinënquëmaꞌ. Nisha nisha yonquipi. Nasha yaꞌconpisopita aꞌnaroáchin nonpintopi. Ipora huarëꞌ co noyahuëꞌ yonquipisopita naniantapirinahuëꞌ. “Huëcoꞌ noꞌpiahuaꞌ. Noya noꞌpicasoꞌ. Noya monshihuanacasoꞌ,” itopi nonpintatonaꞌ.

Judas 1:23

Niꞌcoꞌ iyaroꞌsaꞌ. Maꞌsha pënquë anotohuachina, aꞌnaroáchin manëꞌ ama huiquitacaso marëhuëꞌ. Inapochachin piyapiꞌsaꞌ naꞌcon pënëncoꞌ ama parisitopiquë paacaiso marëhuëꞌ. Aꞌnaquënso nipirinhuëꞌ nonpin nanan paꞌyatatonaꞌ, co noyahuëꞌ nipi. Inapitantaꞌ nosoroatomaꞌ, pënëncoꞌ. Nipirinhuëꞌ, ama piꞌpian tërantaꞌ inapita pochin cancantocosohuëꞌ. Napopisoꞌ ama yonquicosohuëꞌ. Niꞌcona sopai minsëchinquëmaꞌ canpitantaꞌ.

Judas 1:7

Iráca Sotomaquë yaꞌhuëpisopitantaꞌ paꞌpi co noyahuëꞌ yonquipi. Monshihuanacaisoáchin cancantopi. Aꞌnaratipita taparoꞌ nipi. Co ina pochin nicacasohuëꞌ nipirinhuëꞌ, napopi. Ina marëꞌ Yosëri chiníquën anaꞌintërin. Pën inápa quëran aꞌpaimarin ahuiquitacaso marëꞌ. Sotoma, Comora, inapita huiquitopi. Yaꞌcariya ninanoroꞌsantaꞌ huiquitopi. Ayonquiinpoaso marëꞌ ninshitërinpoaꞌ. Inapita yonquiatëhuaꞌ, “Aꞌna tahuëri oshahuanoꞌsaꞌ pënquë parisitomiatapi huachi,” tënëhuaꞌ.

Apocalipsis 21:8

Aꞌnapitaso nipirinhuëꞌ parisitáponaꞌ. Ayaroꞌ tahuëri naꞌa piyapiꞌsaꞌ pënquë paꞌsapi. Tëꞌhuatonaꞌ aꞌpopisopita, co natëpisopitahuëꞌ, co natëtochináchinhuëꞌ cancantopisopita, tëpatonaꞌpiroꞌsaꞌ, monshihuaninsopita, pënotonoꞌsaꞌ, mamanshi chinotopisopita, nonpinaꞌpiroꞌsaꞌ, inapita panca sono shaꞌpimoꞌshirë chachin pën tënëntápaquë paꞌsapi. Inaquë parisitáponaꞌ. Huaranca huaranca piꞌipintaꞌ nipirinhuëꞌ, co onporontaꞌ pipiapihuëꞌ.

Apocalipsis 22:15

Aꞌnaquënso nipirinhuëꞌ, co onporontaꞌ Yosë yaꞌhuërinquë paꞌsapihuëꞌ. Niꞌni pochin cancantopisopita, pënotonoꞌsaꞌ, monshihuanaꞌpiroꞌsaꞌ, tëpatoroꞌsaꞌ, mamanshi chinotopisopita, inapita aipiran yaꞌhuëmiatapi. Aꞌnaquëontaꞌ nonpinápi niꞌton, co nohuantapihuëꞌ noꞌtën nanan imacaisoꞌ. Inapitantaꞌ co onporontaꞌ Yosëꞌpaꞌ paꞌsapihuëꞌ.

Apocalipsis 22:20

Quisoso chachin anitotërincosoꞌ yaꞌipi ninshitëranquëmaꞌ. “Tëhuënchachin co huaꞌquiya quëranhuëꞌ oꞌmantararahuë,” tënin. ¡Inapoquëꞌ Sinioro! Aꞌnaroáchin oꞌmantaquëꞌ, itërahuë.

1 Samuel 15:35

Naporo quëran huarëꞌ Samoirosoꞌ nanpipon co huachi Saono quënanchininhuëꞌ. Siniorori Saono israiroꞌsa copirnonën nicacaso marëꞌ acorin. Napoaponahuëꞌ, co huachi ina marëꞌ nohuantërinhuëꞌ niꞌton, Samoiro sëtërin. Sëtaponahuëꞌ, co huachi niꞌchininhuëꞌ.