2 Corintios 12:18 - Chayahuita (Shahui)

¹⁸ “Inta, quëmari niꞌconiquëꞌ iyaroꞌsaꞌ,” itahuato, Tito aꞌparahuë. Inarëꞌ aꞌna iyayantaꞌ aꞌparahuë. Cantonpachinquëmaꞌ, co Tito nonpintërinquëmahuëꞌ. Cantaꞌ ina pochachin cancantërahuë. Co piꞌpisha tërantaꞌ canaraihuëꞌ.

2 Corintios 12:18 ပူးပေါင်းရင်းမြစ်များ

Romanos 4:12

Cotioroꞌsantaꞌ Apraan pochin natëtohuachinara, huiꞌninpita pochin nipi antaꞌ. Co marca niacotopiso marëꞌ noya cancantopihuëꞌ. Coꞌhuara marca niacochatërasohuëꞌ, Apraansoꞌ natëtërin. Aꞌnapitantaꞌ ina pochin cancantohuachinara, Yosëri noya niꞌsarin.

1 Corintios 4:21

Nosororanquëmaꞌ niꞌton, sanoanan quëran yapënënpiranquëmahuëꞌ. Co Yosë natëhuatamahuëꞌ, paꞌpato anaꞌintaꞌhuanquëmasoꞌ yaꞌhuërin. Canconpato, ¿maꞌcha onpochinquëma nicaya? tënahuë.

2 Corintios 7:2

Cancanëma quëran huarëꞌ nosorocoi. Co aꞌnayanquëma tërantaꞌ maꞌsha onpotërainquëmahuëꞌ. Co anishacancantërainquëmahuëꞌ. Co nonpintërainquëmahuëꞌ.

2 Corintios 7:6

Sëtohuatëhuaꞌ, Yosë achinicancaninpoaꞌ niꞌton, quiyantaꞌ achinicancanincoi. Ina nohuanton, Tito huëꞌnin.

2 Corintios 8:6

Iꞌhua chachin Tito shaꞌhuitërinquëmaꞌ niꞌton, canpitantaꞌ yonquiramaꞌ coriqui yontonacamasoꞌ. “Imapisopita pahuantopi niꞌton, aꞌpatahuaꞌ,” tënamaꞌ. Napoaton iꞌhuamiachin Tito itërai: “Naquëranchin paantaton, pënëantaquëꞌ yaꞌipi coriqui yaaꞌpapisoꞌ ananiinaꞌ,” itërai.

1 Pedro 2:21

Ina pochin ahuantacasoꞌ Yosë nohuantërin. Quisocristo canpoa marëꞌ parisitërin. Parisitaton, aꞌchintërinpoaꞌ canpoantaꞌ ina pochin ahuantacasoꞌ. Ina iyaroꞌsaꞌ nonancoꞌ.