2 Corintios 12:1 - Chayahuita (Shahui)

¹ Co nohuantërahuëꞌ aꞌnapita nocanaꞌhuasoꞌ. “Casoꞌ noya noya piyapico,” co taporahuëꞌ, piꞌpian ina pochin shaꞌhuichinquëmaꞌ. Iráca Yosë nohuanton, huaꞌnarëso pochin maꞌsha niꞌnahuë. Quisocristo chachin anitotërincosoꞌ.

2 Corintios 12:1 ပူးပေါင်းရင်းမြစ်များ

Juan 16:7

Noꞌtëquën itëranquëmaꞌ. Canpita marëꞌ paantaꞌhuasoꞌ noya, tënahuë. Co paantahuatohuëꞌ, Ispirito Santo co oꞌmarinhuëꞌ catahuainquëmaso marëꞌ. Nipirinhuëꞌ, paantahuato, ina aꞌpatimaranquëmaꞌ.

Juan 18:14

Iꞌhua inasoꞌ cotioroꞌsaꞌ shaꞌhuitërin: “Ama yaꞌipinpoaꞌ chiminacaso marëhuëꞌ ina chimiꞌin, tënahuë,” itërin. Inaquë quëpapi natanacaiso marëꞌ.

Hechos 18:9

Aꞌna tashiꞌ Yosë nohuanton, Paono huaꞌnarëso pochin niantarin. Siniorori chachin itapon: “Ama tëꞌhuaton, copitëquësohuëꞌ. Aꞌchináquëꞌ.

Hechos 23:11

Naporoꞌ tashiꞌ Siniorori yaꞌnotimarahuaton, Paono itapon: “¡Ama tëꞌhuatonhuëꞌ, chiníquën cancantëquëꞌ! Quirosarinquë nanamëhuë nani shaꞌhuiran. Inapochachin Nomaquëntaꞌ paaton, shaꞌhuiantamasoꞌ yaꞌhuërin,” itërin.

1 Corintios 10:23

“Maꞌsona tërantaꞌ yanipatëhuaꞌ, noya nicacasoꞌ,” topi. Napoaponahuëꞌ, co yaꞌipi ninëhuasopita catahuarinpoahuëꞌ noya cancantacasoꞌ. Tëhuënchachin yaꞌipi noya nicacaso nipirinhuëꞌ, co yaꞌipi catahuarinpoahuëꞌ aꞌnapita achinicancanacasoꞌ.

1 Corintios 14:6

Yosë aꞌchintohuachincora, inachachin iyaroꞌsaꞌ shaꞌhuitëranquëmaꞌ. Ina anitotohuachincora, nanamën chachin aꞌchintëranquëmaꞌ. Inapotato, catahuaranquëmaꞌ noya noya imacamaso marëꞌ. Nisha nananquë nonpiso pochin nontëranquëmaꞌ naporini, co nataintomacohuëꞌ. Co ina quëran noya noya imaitomahuëꞌ. Canpita nananquë chachin noꞌtën nanan pënënpatënquëmaꞌ, tëhuënchachin catahuaranquëmaꞌ.

1 Corintios 6:12

“Maꞌsona tërantaꞌ yanipatëhuaꞌ, noya nicacasoꞌ,” topi aꞌnaquën. Napoaponahuëꞌ, co yaꞌipi ninëhuasopita catahuarinpoahuëꞌ noya cancantacaso marëꞌ. Napoaton maꞌsona tërantaꞌ anishacancantohuachinco, co nisarahuëꞌ. Anoꞌquihuachinco.

2 Corintios 12:11

Nisha aꞌchinaꞌpiroꞌsaꞌ paꞌyatëramaꞌ niꞌton, huaꞌyantërinso pochin nontëranquëmaꞌ. “Paono nóya aꞌchintërincoi,” itëramaꞌ naporini, co ina pochin cantaꞌ nonacaꞌhuasoꞌ yaꞌhuëꞌitonhuëꞌ. “Quiyasoꞌ noya noyacoi,” itopirinënquëmahuëꞌ, co ca quëran noya noyahuëꞌ inahuasoꞌ. Co caora nanitaporahuëꞌ, Quisocristo catahuarinco niꞌton, noya ninahuë.

2 Corintios 12:5

Noya noya nininsoꞌ anitotërinco niꞌton, nocantochináchin cancantopirahuëꞌ, tananpitërahuë. Co caora nohuanto, chiníquën nanantërahuëꞌ. Co caora nanitërahuëꞌ noya nicaꞌhuasoꞌ, tënahuë.

2 Corintios 12:7

Yosë naꞌcon naꞌcon anitotërinco. Ina quëran ama aꞌnapita nocanaꞌhuaso marëhuëꞌ ina nohuanton, maꞌsha onporahuë. Nahuan acoposha ohuanincoso pochin natanahuë. Co oshahuanaporahuëꞌ, Satanasë naꞌcon aparisitërinco.

2 Corintios 12:9

Sinioro shaꞌhuitërinco: “Ca nohuanto, ipora huantaꞌ parisitapiranhuëꞌ, nosoroatënquën, naꞌcon catahuaranquën. Carinquën achinicancanaranquën noya ahuantamaso marëꞌ. Co quëmaora nanitohuatanhuëꞌ, naꞌcon naꞌcon catahuaranquën. Maꞌsona tërantaꞌ onpohuatan, co onporontaꞌ pataranquënhuëꞌ,” itërinco. Napoaton co huachi sëtërahuëꞌ. “Co caora nanitohuatërahuëꞌ, Quisocristo naꞌcon naꞌcon catahuarinco,” taꞌto, noya cancantërahuë.

2 Corintios 8:10

Iꞌhua piꞌiquë yonquiramaꞌ aꞌnapita catahuacamasoꞌ. Naporoꞌ caniaritëramaꞌ coriqui yontonacasoꞌ. Iporasoꞌ naquëranchin yontoantacoꞌ, tënahuë. Inapohuatamaꞌ, noya nisaramaꞌ.

Gálatas 1:12

Quisocristo chachin nanamën anitotërinco. Co aꞌna piyapi shaꞌhuitërincohuëꞌ. Co insontaꞌ ina nanamën aꞌchintërincohuëꞌ. Inaora chachin anitotërinco.

Gálatas 2:2

Yosë ayonquirinco pacaꞌhuasoꞌ niꞌton, paꞌnahuë imapisopita nontaꞌhuaso marëꞌ. Ansianoꞌsarachin niyontonpachinara, shaꞌhuitërahuë. “Casoꞌ nisha piyapiꞌsaꞌ aꞌchintohuato, Quisocristoíchin imacaisoꞌ yaꞌhuërin, tënahuë. Iráca pënëntërinsoꞌ imacaisoꞌ co aꞌchintërahuëꞌ,” itërahuë. “Co noꞌtëquën aꞌchinanhuëꞌ,” itërinaco naporini, topinan quëran aꞌchinchitënquëmahuëꞌ, tënahuë yonquiato. Ansianoꞌsaso nipirinhuëꞌ “Noya aꞌchinan,” itërinaco.

Efesios 3:3

Iráca quëran huarëꞌ Yosë yonquirin nichaꞌëinquëmasoꞌ. Napoaponahuëꞌ, co piyapiꞌsaꞌ anitotërinhuëꞌ. Iporaso nipirinhuëꞌ inaora nohuanton, anitotërinco niꞌton, nani piꞌpian ninshitëranquëmaꞌ.

1 Tesalonicenses 4:15

Oꞌmantahuachin, co nanpirëhuasopitaráchin pantarihuahuëꞌ. Chiminpisopitaꞌton nanpiantarapi. Sinioro Quisoso shaꞌhuitërinpoaso chachin shaꞌhuichinquëmaꞌ.

1 Juan 5:20

Yosë huiꞌnin chachin oꞌmaton, noꞌtëquën Yosë anohuitërinpoaꞌ. Inasáchin noꞌtëquën yonquirin. Yosë nohuitatëhuaꞌ, yonquirinsoráchin imasarëhuaꞌ. Quisocristo nohuitërëhuaꞌ niꞌton, catahuarinpoaꞌ noꞌtëquën yonquicaso marëꞌ. Inaíchin Yosësoꞌ niꞌton, chinotacasoꞌ yaꞌhuërin. Ina nohuitohuatëhuaꞌ, nanpimiatarihuaꞌ.