2 Corintios 11:3 - Chayahuita (Shahui)

³ Aꞌnaquënso nipirinhuëꞌ yaanishacancantërinënquëmaꞌ. Iráca yaꞌhuani Ipa nonpintërinso pochin yanonpintërinënquëmaꞌ ama Quisocristoíchin yonquicamaso marëhuëꞌ.

2 Corintios 11:3 ပူးပေါင်းရင်းမြစ်များ

Génesis 3:1

Sinioroso Yosë niꞌton, yaꞌipi tananquë maꞌsharoꞌsa yaꞌhuërinsopita acorin. Yaꞌhuanso nipirinhuëꞌ, aꞌnapita maꞌsharoꞌsa quëran yonqui yonquínahuan ninin. Sanapi yanonpintaton, paaparin nontacaso marëꞌ: —¿Tëhuënchachin taꞌma Yosë apiratërinquëma yaꞌipi isopita nararoꞌsa nitërinso capamaso to? itërin.

Génesis 3:13

Napotohuachina, sanapi yaꞌhuërëꞌ tahuërëtahuaton, itapon: —¿Onpoatonta naporansoꞌ? itërin. —Yaꞌhuan nonpintërinco niꞌton, caꞌnahuë, tënin sanapi.

Génesis 3:20

Atansoꞌ, saꞌin nininën acotërin, Ipa itërin. Ina quëran yaꞌipi piyapi naꞌacaiso niꞌton, ina pochin nohuitërin.

Génesis 3:4

—Co napoarinhuëꞌ. Co chiminaramahuëꞌ. Caꞌpatamasoꞌ, yaꞌipi noya nininsopita, yaꞌipi co noyahuëꞌ nininsopitantaꞌ, nitotarama huachi. Inapita nitotatomaꞌ, Yosë pochachin nisaramaꞌ. Ina nitotaton, Yosë apiratërinquëmaꞌ, itërin.

Mateo 24:24

Naꞌa nonpin nanan pënëntonaꞌpiroꞌsaꞌ huëcaponaꞌ. ‘Casoꞌ Cristoco’ tosapi aꞌnaquën. ‘Casoꞌ ninotonaꞌpico,’ tosapi aꞌnaquëontaꞌ. Sacaiꞌ nininsopita nisapi piyapiꞌsaꞌ nonpintacaiso marëꞌ. Huayoninsopitantaꞌ nonpintochinaichin nisapi.

Juan 8:44

Sopai huaꞌan mini tataparinquëmasoꞌ. Ina pochin cancantatomaꞌ, inasáchin natëaramaꞌ. Iráca quëran huarëꞌ piyapiꞌsaꞌ tëpanaꞌpi inasoꞌ. Co noꞌtëquën nitononinhuëꞌ niꞌton, co piꞌpisha tërantaꞌ natëcasoꞌ yaꞌhuërinhuëꞌ. Paꞌpi nonpintëꞌ inasoꞌ. Inachin, nonpinacasoráchin cancantërin. Ina nohuanton, nonpinëꞌ.

Romanos 12:8

Aꞌnaquëontaꞌ nitotopi achinicancanacasoꞌ. Nitotohuatamaꞌ, noya cancantatomaꞌ achinicancancoꞌ imamiachinaꞌ. Aꞌnaquëontaꞌ ina nohuanton, coriqui, maꞌsha, inapita yaꞌhuëtopi. Aꞌnapita quëtohuatamaꞌ, ama piyapiꞌsaꞌ noya nicainënquëmaso marëꞌ quëtocosohuëꞌ. Yosë yonquiatomaꞌ, quëtocoꞌ. “Ina nosororinco niꞌton, carintaꞌ nosoroꞌi,” taꞌtomaꞌ, quëtocoꞌ. Aꞌnaquëontaꞌ ina nohuanton chachin, chiníquën nanan yaꞌhuëtopi. Ansianohuë nipon, huaꞌanhuë nipon yaꞌconpatamaꞌ, ama chirotomarahuëꞌ, noya pënëntocoꞌ. Noya noncoꞌ. Aꞌnaquëontaꞌ ina nohuanton, caniaꞌpiroꞌsaꞌ, saꞌahuaroꞌsaꞌ, inapita catahuapi. Inapita nicapomaꞌ paꞌpatamaꞌ, noya cancantatomaꞌ, catahuacoꞌ.

2 Corintios 1:12

Yosë niꞌsárincoi niꞌton, noꞌtëquën shaꞌhuitarainquëmaꞌ. Co piꞌpian tërantaꞌ nonpintërainquëmahuëꞌ. Noyápiachin cancantatoi, yaꞌipi parti aꞌchinai. Co quiyaora yonquinëhuëi quëran aꞌchintërainquëmahuëꞌ. Yosë inaora nohuanton, catahuarincoi niꞌton, noya ninai. Ina marëꞌ noya cancantërai.

2 Corintios 11:20

Inapitasoꞌ chiníquën camairinënquëmaꞌ. Maꞌshanëmaꞌ topinan mapi. Nocaninënquëmaꞌ, yaahuërinënquëmaꞌ. Inapotopirinënquëmahuëꞌ, ¿maꞌmarëcha noya natanama nicaya? tënahuë, yonquiato.

2 Corintios 11:29

Aꞌnaquën co chiníquën cancantohuachinahuëꞌ, cantaꞌ ina pochin ninatanahuë. Aꞌna piyapi anishacancantohuachinquëmara, nosororanquëmaꞌ niꞌton, ina noꞌhuirë pochin cancantërahuë.

2 Corintios 2:17

Aꞌnaquën nonpinatonaꞌ, inahuara canacaiso marëꞌ aꞌchinapi. “Yosë nanamën aꞌchintërainquëmaꞌ,” topirinahuëꞌ, co noꞌtëquën aꞌchinpihuëꞌ. Quiyaso nipirinhuëꞌ noꞌtëquën shaꞌhuitërainquëmaꞌ. Yosë aꞌparincoi niꞌton, ina nanansáchin aꞌchinarai. Yosë niꞌsárincoi niꞌton, Quisocristoíchin natëarai.

2 Corintios 4:2

Aꞌnaquënsoꞌ co noyahuëꞌ yonquiatonaꞌ, aꞌchinapi. Noyasha nonpirinahuëꞌ, nonpinacaiso marëꞌ napopi. Quiyaso nipirinhuëꞌ co mantaꞌ poꞌoana quëran ninaihuëꞌ niꞌton, co tapanaꞌhuaisoꞌ yaꞌhuërinhuëꞌ. Co nisha nisha aꞌchinaihuëꞌ. Yaꞌipi Yosë nanamën noꞌtëquën aꞌchintarainquëmaꞌ. Yosë niꞌsárincoi niꞌton, inasáchin aꞌchinarai. Aꞌninquëchin aꞌchinai yaꞌipi piyapiꞌsaꞌ yonquicaiso marëꞌ.

Gálatas 1:6

Yosë ayonquirinquëmaꞌ imacamaso marëꞌ. Quisocristo inaora nohuanton nosoroatënquëmaꞌ, catahuarinquëmaꞌ niꞌton, imaramaꞌ. Imapiramahuëꞌ, aꞌnaroáchin ina naniantatomaꞌ, nisha nanan yaimaramaꞌ. Ina yonquiato, paꞌyanahuë.

Gálatas 2:4

Aꞌnaquën cotioroꞌsaso nipirinhuëꞌ, “Quiyantaꞌ imarai,” taponaraihuëꞌ, co Quisocristoráchin imapihuëꞌ. Iráca pënëntërinsontaꞌ imapi. Yashaꞌhuirapitonacoi, niyontonpiso pëiquë yaꞌconpi Quisocristo imatoi naporaisopita nicacaiso marëꞌ. “Iráca pënëntërinsontaꞌ natëcasoꞌ yaꞌhuërin,” taꞌtonaꞌ, yaanishacancantërinacoi nisha nisha natëcaꞌhuaiso marëꞌ.

Gálatas 3:1

Co noꞌtëquën iyaroꞌsaꞌ yonquiramahuëꞌ. ¿Intaꞌ ahuaꞌyantatënquëmaꞌ, anishacancantërinquëmaꞌ? tënahuë yonquiato. “Quisocristo corosëquë patanantopi. Canpoa marëꞌ chiminin,” itërainquëmaꞌ. Aꞌninquëchin quënanëso pochachin shaꞌhuitohuatënquëmara, natanamaꞌ. “Ina pochin chiminaton, oshanënpoaꞌ inquitërinpoaꞌ,” taꞌtomaꞌ, Quisocristo imaramaꞌ.

Gálatas 4:11

Noꞌtëquën iyaroꞌsaꞌ aꞌchintopiranquëmahuëꞌ, naniantëramaꞌ nimara, tënahuë. “Topinan quëran aꞌchintërahuë nimara,” taꞌto sëtërahuë.

Efesios 4:14

Ina quëran noꞌtëquën yonquiarihuaꞌ. Co huachi huaꞌhuaroꞌsa pochin cancantarihuahuëꞌ. Huaꞌhuaroꞌsasoꞌ co yonquiyatërapihuëꞌ niꞌton, nisha nisha natëtopi. Canpoaso nipirinhuëꞌ chinotënpoa pochin noꞌtëquën yonquiaꞌahuaꞌ. Niꞌcoꞌ. Panca ihuan huëꞌpachina, poti niquëran niquëran ohuërërin. Co noꞌtëquën yanponinhuëꞌ. Inapochachin aꞌnaquën nisha nisha nanan natanpachinara, nisha nisha yonquipi. Co Quisocristo nanamënáchin yonquipihuëꞌ. Aꞌnaquën nisha nisha aꞌchinapi. Noyá nitotopi nonpinacaisoꞌ. Nonpin nanan imatonaꞌ, yanonpintopirinënquëmahuëꞌ, ama piꞌpian tërantaꞌ natëcosohuëꞌ.

Efesios 4:22

Iráca paꞌpi co noyahuëꞌ ninamaꞌ. Noꞌpiramaꞌ, monshihuanamaꞌ, nisha nisha yonquiramaꞌ. Inapohuatamara, “noya cancantarëhuaꞌ,” topiramahuëꞌ, ninonpintëramaꞌ. Co tëhuënchachin noya cancantëramahuëꞌ. Iráca naporamasoꞌ chanatërinso pochin Yosë niꞌninquëmaꞌ. Iporasoꞌ yaꞌipi co noyahuëꞌ yonquiramasopita naniantoco huachi.

Efesios 6:24

Quisocristo huaꞌanëntarinpoaꞌ. Ina nosoromiatohuatamaꞌ, inaora nohuanton, Yosë noya catahuainquëmaꞌ, tënahuë. Amen. Nani ninshitëranquëma huachi. Paono

Colosenses 2:18

Nisha aꞌchinaꞌpiroꞌsaso nipirinhuëꞌ taponaꞌ: “Quiyasoꞌ anquëniroꞌsaꞌ chinotërai. Huaꞌnarëso pochin quënanai. Co canpitasoꞌ quiya pochin nipatamahuëꞌ, co noya cancantaramahuëꞌ,” itohuachinënquëmaꞌ, ama piꞌpisha tërantaꞌ natëtocosohuëꞌ. Inapitasoꞌ nonpinatonaꞌ, “Nani maꞌsha Yosë anitotërincoi niꞌton, noya noyacoi,” topirinahuëꞌ, inahuara yonquinëna quëran napopi.

Colosenses 2:4

Aꞌnaquënso nipirinhuëꞌ nisha aꞌchinpi. Ama Quisocristoíchin yonquicamaso marëhuëꞌ noyásha nontarinënquëmaꞌ. Niꞌcona nonpintochinënquëmaꞌ.

Colosenses 2:8

Aꞌnaquënso nipirinhuëꞌ nisha aꞌchinpi. Niꞌcona oshaquëran anishacancantochinquëmaꞌ. Nonpin nanan inahuara yonquipisoꞌ aꞌchinapi. Piyapiꞌsaꞌ yonquipisoráchin imasapi. Quisocristo aꞌchininsoꞌ co imapihuëꞌ. Nisha nisha isoroꞌpaquë chiníquën nanantopisopita yonquiatonaꞌ, nisha pënëntapi. Yaocoirinënquëmaꞌ. Canpitaso nipirinhuëꞌ ama inapita natëcosohuëꞌ.

1 Tesalonicenses 3:5

Napoaton casoꞌ co huachi ahuantatohuëꞌ, Timotio aꞌpatëranquëmaꞌ onpopinsona imaramasoꞌ nitotaꞌhuaso marëꞌ. Sopai yanonpintërinpoaꞌ Yosë aꞌpocaso marëꞌ. Minsërinquëmaꞌ naporini, topinan quëran aꞌchinchitënquëmahuëꞌ. “Co huachi noya imamaraihuëꞌ,” taꞌtoi, Timotio aꞌpatërainquëmaꞌ.

1 Timoteo 1:3

Iꞌhua Masitoniaquë yapaꞌpatëra, shaꞌhuitëranquën. “Ipisoquë yaꞌhuëtaquëꞌ pënëntamaso marëꞌ,” itëranquën. Iporantaꞌ inachachin shaꞌhuitaranquën. Inaquëranchin yaꞌhuaton, pënëntáquëꞌ. Aꞌnaquën nisha nisha nanan aꞌchinapi. Inapita shaꞌhuitëquëꞌ ama ina pochin aꞌchiꞌinasohuëꞌ.

1 Timoteo 2:14

Naporahuaton, sanapiꞌton co noyahuëꞌ ninin. Sopairi nonpintohuachina, ina natëton oshahuanin. Co Atan nonpintërinhuëꞌ.

2 Timoteo 3:13

Co noyahuëꞌ nipisopita, nonpintëroꞌsaꞌ, inapitasoꞌ aquë aquëtëꞌ co noyahuëꞌ nisapi. Naꞌcon piyapiꞌsa nonpintopi quëran, aꞌnapitarintaꞌ nonpintapi.

Tito 1:10

Naꞌa quëmapiꞌsaꞌ co natëtochináchinhuëꞌ cancantopi. Inahuara yonquinëna quëran aꞌchinapi niꞌton, topinan quëran nonsápi. Cotioroꞌsaꞌ pënëntërinsoꞌ imatonaꞌ, napopi. Nisha nisha nonatonaꞌ, yanonpinapi.

Hebreos 13:9

Aꞌnaquën nisha aꞌchintohuachinënquëmaꞌ, ama natancosohuëꞌ, nonpintochinënquëmaꞌ. Noꞌtëquën yonquicoꞌ. Nisha nisha nicacasoꞌ pënënpirinënpoahuëꞌ, co ina quëran noya cancantërëhuahuëꞌ. Naꞌa piyapiꞌsaꞌ nisha nisha cosharoꞌ aꞌpoaponaraihuëꞌ, co noya cancantopihuëꞌ. Quisocristoíchin nanitërin anoyacancantinpoasoꞌ. Inaora nohuanton, nosoroatonpoaꞌ, catahuarinpoaꞌ imamiatacasoꞌ.

2 Pedro 3:17

Napoaton iyaroꞌsaꞌ nani pënënanquëmaꞌ niꞌton, niꞌcona nonpintochinënquëmaꞌ. Iporasoꞌ noya yonquipiramahuëꞌ. Co noyahuëꞌ nipisopita yanonpintarinënquëmaꞌ inapita pochin nisha nisha cancantacamaso marëꞌ.

2 Pedro 3:3

Isoꞌ naꞌcon yonquicoꞌ. Oꞌmantacasoꞌ tahuëri yaꞌcaritohuachin, co noyahuëꞌ piyapiꞌsaꞌ yaꞌhuaponaꞌ. Co Yosë natëtonaraihuëꞌ, maꞌsona yonquipisoꞌ nisapi. Co noyahuëꞌ cancantapi. Quisocristo shaꞌhuitërinpoasoꞌ tëhuaapi.

1 Juan 2:18

Co huaꞌquiya quëranhuëꞌ, apiaꞌhuaroꞌsaꞌ, Quisocristo oꞌmantararin. “Cristo yaoꞌmahuachin, inimiconën huëꞌsarin,” itërinënpoaꞌ. Nani natantëramaꞌ canpitantaꞌ. Iporasoꞌ naꞌa piyapiꞌsari Cristo yainimicotopi. Napoaton oꞌmantacasoꞌ tahuëri naniriarin, tënëhuaꞌ.

1 Juan 4:1

Naꞌcon iyaroꞌsaꞌ nosororanquëmaꞌ niꞌton, pënënaranquëmaꞌ. Naꞌa nonpin nanan pënëntonaꞌpiroꞌsaꞌ nonpin nanan aꞌchinapi. “Yosë nanamën aꞌchinahuë,” topirinahuëꞌ, co noꞌtëquën aꞌchinpihuëꞌ. Napoaton aꞌchintohuachinënquëmaꞌ, ama aꞌnaroáchin natëtocosohuëꞌ. “Nonpin nanan nimara,” taꞌtomaꞌ, yonquicoꞌ. Yaꞌipi Yosë quiricanën quëran aꞌchintërinpoasoꞌ yonquiatomaꞌ, tantiacoꞌ. Co ina pochin aꞌchintohuachinënquëmahuëꞌ, ama natëcosohuëꞌ.

Judas 1:4

Tëhuënchachin aꞌnaquënsoꞌ nonpin nanan aꞌchintarinënquëmaꞌ. Paꞌpi co noyahuëꞌ inapitasoꞌ. “Quiyantaꞌ imarai,” taponaraihuëꞌ, co noꞌtëquën aꞌchinpihuëꞌ. “Maꞌsona nohuantërëhuaso niahuaꞌ. Yosë nosororinpoaꞌ niꞌton, co anaꞌintarinpoahuëꞌ,” taꞌtonaꞌ, paꞌpi co noyahuëꞌ nipi. Noꞌpipi, monshihuanpi, aꞌnaratipita nipi. Naporahuatonaꞌ, co tëhuënchachin Quisocristo imapihuëꞌ, inasáchin natëcaso nipirinhuëꞌ. Ina marëꞌ Yosëri chiníquën anaꞌintarin. Iráca quëra huarëꞌ nani yonquirin anaꞌintacasoꞌ. Napoaton niꞌcona canpitantaꞌ nonpintochinënquëmaꞌ. Chiníquën cancantatomaꞌ, noꞌtëquën aꞌchincoꞌ.

Apocalipsis 12:15

Chiníquën noꞌhuiton, yaꞌhuani yamapirinhuëꞌ. Nanamën quëran panca iiꞌ pipirin. Tëquëin pochin pipirin sanapi quëpacaso marëꞌ.

Apocalipsis 12:9

Inapotatonaꞌ, panca yaꞌhuan pochin nininsoꞌ inápa quëran tëꞌyatopi. Inasoꞌ sopai chachin, Satanasë itopisoꞌ. Yaꞌipi piyapiꞌsaꞌ yanonpintërin. Ina minsërahuatonaꞌ, anquëninënpitarë chachin isoroꞌpaquë tëꞌyatopi.

Apocalipsis 20:2

Oꞌmarahuaton, panca yaꞌhuan pochin nininsoꞌ masarin. Sopai chachin inasoꞌ. Iráca quëran huarëꞌ piyapi nonpintërin, Satanasë itopisoꞌ. Ina masahuaton, catinaquë tonporin. Huaranca piꞌipintaꞌ nipirinhuëꞌ co niꞌquiritarinhuëꞌ.