2 Corintios 1:12 - Chayahuita (Shahui)

¹² Yosë niꞌsárincoi niꞌton, noꞌtëquën shaꞌhuitarainquëmaꞌ. Co piꞌpian tërantaꞌ nonpintërainquëmahuëꞌ. Noyápiachin cancantatoi, yaꞌipi parti aꞌchinai. Co quiyaora yonquinëhuëi quëran aꞌchintërainquëmahuëꞌ. Yosë inaora nohuanton, catahuarincoi niꞌton, noya ninai. Ina marëꞌ noya cancantërai.

2 Corintios 1:12 ပူးပေါင်းရင်းမြစ်များ

2 Samuel 22:22

Quëma camaitëransopita noꞌtëquën natërahuë. Pënëntëransopita noꞌtëquënáchin natërahuë.

Hechos 23:1

Paono yaꞌconahuaton, huaꞌanoꞌsaꞌ notëërahuaton, itapon: —Ipora iyaroꞌsaꞌ piꞌpian nonchinquëmaꞌ natanco. Huaꞌhuatapo quëran huarëꞌ noya ninahuë. Yosë niꞌsárinco, co mantaꞌ onporahuëꞌ, itërin.

Hechos 24:16

Napoaton nani tahuëriya Yosë noꞌtëquën yanatërahuë. Piyapiꞌsantaꞌ co yanonpintërahuëꞌ.

Romanos 9:1

Quisocristo imato, noꞌtëquën nonahuë. Co nonpinahuëꞌ. Ispirito Santo yaꞌcoancantërinco niꞌton, noꞌtëquën nontaranquëmaꞌ, tënahuë.

1 Corintios 1:17

Nanamën aꞌchinaꞌhuaso marëꞌ Quisocristo acorinco. Co aporintaꞌhuaso marëꞌ acorincohuëꞌ. Aꞌchintohuatënquëmara, co naꞌcon nitotoroꞌsa pochin nontëranquëmahuëꞌ. Quisocristo corosëquë chiminin oshanënpoaꞌ inquitinpoaso marëꞌ, tënahuë. Inaíchin nanitaparin nichaꞌëinpoasoꞌ. Napoaton inasáchin aꞌchinahuë. Nisha nisha aꞌchinahuë naporini, Quisocristo nanianchitomahuëꞌ. Inaíchin yonquihuatëhuaꞌ, tëhuënchachin anoyacancantërinpoaꞌ.

1 Corintios 12:8

Ispirito Santo nohuanton, aꞌnaquën noyá nitotërin pënëntacasoꞌ. Noꞌtëquën yonquiaton, pënëntarin. Aꞌnaquëontaꞌ noya noya nitotaton, aꞌchinarin.

1 Corintios 15:10

Inaora nohuanton, Yosë catahuarinco. Co catahuarincohuëꞌ naporini, co mantaꞌ nanichitohuëꞌ. Catahuahuachincora, paꞌnahuë nanamën aꞌchinapo. Co topinan quëran catahuarincohuëꞌ. Casoꞌ naꞌcon naꞌcon Yosë marëꞌ sacatërahuë. Co carisoꞌ piyapiꞌsaꞌ anoyacancantërahuëꞌ. Yosë achinicancaninco aꞌchinaꞌhuaso marëꞌ. Ina catahuarinco niꞌton, aꞌchinpatëra naꞌa piyapiꞌsaꞌ imasapi.

1 Corintios 2:13

Quiyantaꞌ ina nitotatoi, aꞌnapita aꞌchintarai. Co quiyaora yonquinëhuëi quëran aꞌchinaihuëꞌ. Ispirito Santo ayonquirincoi noya aꞌchinaꞌhuaiso marëꞌ. Chinoton pochin cancantopisopita aꞌchintohuatoira, maꞌsona tapon naporinsopita aꞌchintarai.

1 Corintios 4:4

Noya mini natërahuë, topirahuëꞌ, co casoꞌ Yosë pochin nitotërahuëꞌ. “Noyaco,” tënahuëso marëꞌ co Yosë noya niꞌsarincohuëꞌ. Inaíchin yaꞌipi nitotaton, noꞌtëquën shaꞌhuitarinpoaꞌ.

1 Corintios 5:8

Pascoa pita naꞌhuasoiꞌ, yaꞌipi ahuëpocatërinsoꞌ tëꞌyatopi. Inapochachin canpoantaꞌ yaꞌipi co noyahuëꞌ yonquirëhuasopita aꞌpoatëhuaꞌ, noyasáchin niahuaꞌ. Ama huachi co noyahuëꞌ niahuasohuëꞌ. Noyápiachin cancantatëhuaꞌ, noꞌtëquënáchin yonquiaꞌahuaꞌ.

2 Corintios 1:17

Napoaton: “Paono nisha nisha yonquirin,” ¿topiramahuëꞌ ti? Co nisha nisha yonquirahuëꞌ. Aꞌnaquënsoꞌ maꞌsona tërantaꞌ shaꞌhuipirinhuëꞌ, co tëhuënchachin naporinhuëꞌ. Co casoꞌ ina pochin cancantërahuëꞌ.

2 Corintios 11:3

Aꞌnaquënso nipirinhuëꞌ yaanishacancantërinënquëmaꞌ. Iráca yaꞌhuani Ipa nonpintërinso pochin yanonpintërinënquëmaꞌ ama Quisocristoíchin yonquicamaso marëhuëꞌ.

2 Corintios 2:17

Aꞌnaquën nonpinatonaꞌ, inahuara canacaiso marëꞌ aꞌchinapi. “Yosë nanamën aꞌchintërainquëmaꞌ,” topirinahuëꞌ, co noꞌtëquën aꞌchinpihuëꞌ. Quiyaso nipirinhuëꞌ noꞌtëquën shaꞌhuitërainquëmaꞌ. Yosë aꞌparincoi niꞌton, ina nanansáchin aꞌchinarai. Yosë niꞌsárincoi niꞌton, Quisocristoíchin natëarai.

2 Corintios 4:2

Aꞌnaquënsoꞌ co noyahuëꞌ yonquiatonaꞌ, aꞌchinapi. Noyasha nonpirinahuëꞌ, nonpinacaiso marëꞌ napopi. Quiyaso nipirinhuëꞌ co mantaꞌ poꞌoana quëran ninaihuëꞌ niꞌton, co tapanaꞌhuaisoꞌ yaꞌhuërinhuëꞌ. Co nisha nisha aꞌchinaihuëꞌ. Yaꞌipi Yosë nanamën noꞌtëquën aꞌchintarainquëmaꞌ. Yosë niꞌsárincoi niꞌton, inasáchin aꞌchinarai. Aꞌninquëchin aꞌchinai yaꞌipi piyapiꞌsaꞌ yonquicaiso marëꞌ.

2 Corintios 8:8

Co camairanquëmahuëꞌ. Aꞌnapita naꞌcon Yosë marëꞌ acopisoꞌ shaꞌhuitëranquëmaꞌ yonquicamaso marëꞌ. Tëhuënchachin aꞌnapita nosorohuatamaꞌ, ama topinan quëran nontocosohuëꞌ. Catahuacoꞌ ama pahuanchinasohuëꞌ.

Gálatas 6:4

Ama aꞌnapita napopisoꞌ nicatomaꞌ, nitantiacosohuëꞌ. Quëmaora naporanso yonquiaton, nitantiaquëꞌ. Noya cancantohuatan, Yosë noya niꞌsarinquën. Ina quëran “Yosë noya niꞌsarinco,” taꞌton, capa cancantaran.

Efesios 6:14

Napoaton chiníquën cancantatomaꞌ, panca sintoronquë nitonpotopiso pochin noꞌtën nanan naꞌcon nohuantocoꞌ. Ina imatomaꞌ, noꞌtëquën noncoꞌ. Co piꞌpisha tërantaꞌ nonpinacasoꞌ yaꞌhuërinhuëꞌ. Huaꞌna coton aꞌmopiso pochin noyasáchin nicoꞌ Yosë catahuainquëmaso marëꞌ.

Filipenses 1:10

Yosë nanamën naꞌcon yonquihuatamaꞌ, noya noya nitotatomaꞌ, noya nisaramaꞌ. Noꞌtëquën yonquihuatamaꞌ, noyápiachin cancantaramaꞌ. Noyasáchin nipatamaꞌ, Quisocristo oꞌmantahuachina, nóya niꞌsarinquëmaꞌ. Co anaꞌintarinquëmahuëꞌ.

1 Tesalonicenses 2:10

Noꞌtëquën Yosë natëtoi, noyasáchin ninai. Co mantaꞌ onpotërainquëmahuëꞌ. Yaꞌipi imaramasopita niꞌnamacoi. Yosëntaꞌ niꞌnincoi.

1 Timoteo 1:5

Noꞌtën nanansáchin imapatëhuaꞌ, catahuarinpoaꞌ noya ninosorocasoꞌ. Noyápiachin cancantohuatëhuaꞌ, co nisha nisha yonquiarihuahuëꞌ. Ina quëran cancanënpoa quëran huarëꞌ natëarihuaꞌ. Ina pochin cancantohuatëhuaꞌ, noya nosoroarihuaꞌ. Ina Yosësoꞌ nohuantërin.

Tito 2:7

Quëmantaꞌ api, noyasáchin niquëꞌ aꞌnapita nonanainquënso marëꞌ. Noya cancantaton, Yosë nanamën noꞌtëquën aꞌchinquëꞌ. Yaꞌipi yonquinën quëran huarëꞌ aꞌchinquëꞌ.

Hebreos 13:18

Quiya marëꞌ Yosë nontocoꞌ. Noya nisarai, taꞌtoi, noyápiachin cancantërai. Yaꞌipi cancanëhuëi quëran Yosë yanatërai.

Santiago 4:6

Sacaiꞌ Yosëíchin yonquicaso nipirinhuëꞌ, inari chachin inaora nohuanton catahuarinpoaꞌ ina pochin cancantacasoꞌ. “Caora noya ninahuë,” topatëhuaꞌ, co Yosë noya niꞌsarinpoahuëꞌ. Nipirinhuëꞌ, “Co caora nanitërahuëꞌ noya nicaꞌhuasoꞌ. Catahuaco Sinioro,” topatëhuaꞌ, Yosë catahuarinpoaꞌ. Nosoroatonpoaꞌ, catahuarinpoaꞌ, tënin Yosë quiricanënquë.

Josué 24:14

—Yaꞌipi ina shaꞌhuitëranquëmasoꞌ yonquiatomaꞌ, Sinioro tëꞌhuatocoꞌ. Tëꞌhuatatoma noꞌtëquënáchin natëcoꞌ. Iráca shimashonëmapita Iopiratisiiꞌ yonsanquë yaꞌhuëaponaꞌ, nisha nisha mamanshi moshapi. Iquipitoquënta inapopi. Inapita aꞌporahuatoma Sinioroíchin chinotocoꞌ.

1 Pedro 3:16

Ama noꞌhuitë pochin chiníquën shaꞌhuitocosohuëꞌ. Sanoanan quëran pënëncoꞌ. Yosë yonquihuatamaꞌ, noya shaꞌhuitaramaꞌ. Quisocristo imaramaꞌ niꞌton, noyasáchin nicatomaꞌ, noyápiachin cancantocoꞌ. Ina quëran pinopirinënquëmahuëꞌ, “Coꞌta noya nisapi. Quëmarisoꞌ nonpinapiran,” itarin aꞌnarintaꞌ. Itohuachina, pinotonaꞌpisoꞌ tapanarin.

1 Pedro 3:21

Inapochachin iporasoꞌ Yosë nichaꞌësarinpoaꞌ. Anoyacancantohuachinpoaꞌ, aporintërinënpoaꞌ. Co nëꞌhuë inquitinënpoaso marëꞌ aporintërinënpoahuëꞌ. Aporintohuachinënpoara, Yosë nontërëhuaꞌ catahuainpoaso marëꞌ. “Yaꞌipi oshanëhuë inquitoco. Catahuaco noyasáchin nicato, noyápiachin cancanchi,” itërëhuaꞌ. Ina marëꞌ anoyacancantërinpoaꞌ. Quisocristo nanpiantarin niꞌton, nichaꞌësarinpoaꞌ.