1 Timoteo 6:4 - Chayahuita (Shahui)

⁴ “Yaꞌipiya nitotërai,” topirinahuëꞌ, co yonquipihuëꞌ. Topinan quëran nonsápi. Nisha nisha nananoꞌsaꞌ yonquiatonaꞌ, nonconpi. Paꞌyatopi piyapiꞌsaꞌ anoꞌhuitacaisoꞌ. Inapita natanpachinara, niapiratopi, ninoꞌhuipi, nipinopi. “Nonpintërinco nimara,” taꞌtonaꞌ, co huachi natërapihuëꞌ.

1 Timoteo 6:4 ပူးပေါင်းရင်းမြစ်များ

Proverbios 13:7

Aꞌnaquën maꞌhuan pochin yaꞌnoponaraihuëꞌ, co manta yaꞌhuëtopihuëꞌ. Aꞌnaquëontaꞌ, popriya pochin yaꞌnoponaraihuëꞌ, co manta pahuantopihuëꞌ.

Isaías 58:4

Ayono tahuëri nipirinhuëꞌ, ninoꞌhuitoma niahuëramaꞌ. Inapoatoma nitëniama huarëꞌ niacoramaꞌ. Inapochin ayonatoma nontohuatamaco, co aꞌpaniaꞌhuanquëmaso yaꞌhuërinhuëꞌ.

Hechos 15:2

Paonosoꞌ, co ina pochin yonquirinhuëꞌ. “Co niacotacasoꞌ yaꞌhuërinhuëꞌ,” tënin. Pirnapintaꞌ inachachin yonquirin. Napoaton canquipisopitarëꞌ ninontopi. “Co noꞌtëquën aꞌchinamahuëꞌ,” nitatonaꞌ, chiníquën ninontopi. Napoaton imapisopitari itaponaꞌ: “Quirosarinquë pacoꞌ. Caꞌtanoꞌsaꞌ, ansianoꞌsaꞌ, inapita natancoꞌ. ¿Maꞌtamaꞌ shaꞌhuichinënquëmapaꞌ?” taꞌtonaꞌ, Paono, Pirnapi, inapita aꞌpapi. Aꞌnapitantaꞌ inapitarëꞌ aꞌpapi.

Hechos 18:15

Nipirinhuëꞌ, nisha nisha nanan cotioroꞌsanquëmaꞌ yaꞌhuëtërinquëmaꞌ. Nipënënamasoꞌ quiricantaꞌ yaꞌhuëtërinquëmaꞌ. Co casoꞌ nohuantërahuëꞌ ina yonquicaꞌhuasoꞌ. Canpita capini anoyatocoꞌ, itërin.

Hechos 8:9

Inaquë aꞌna quëmapi Simon itopisoꞌ yaꞌhuërin. Coꞌhuara Pinipi huëꞌshatërasohuëꞌ, naꞌcon pënotërin. Nani huaꞌquiꞌ piyapiꞌsaꞌ nonpintërin. “Casoꞌ chiníquën nanantërahuë,” tëninso marëꞌ paꞌyatopi.

Romanos 12:16

Noya ninicatomaꞌ yaꞌhuëcoꞌ. Ama aꞌna piyapi tërantaꞌ nocancosohuëꞌ. Topinan piyapi pochin cancantatomaꞌ, yaꞌipiya catahuacoꞌ. Ama: “Casoꞌ naꞌcon naꞌcon nitotërahuë,” tocosohuëꞌ. Ama ina pochin yonquicosohuëꞌ.

Romanos 13:13

Tahuëri nipachina, aꞌninquëchin niꞌton, noyasáchin ninëꞌ. Aꞌnaquënso nipirinhuëꞌ pitasachin paꞌyatopi. Naꞌa tahuëri nansarápi, oꞌosápi, coshatápi, noꞌpiápi. Ama pitasoꞌ paꞌyatocosohuëꞌ. Ama noꞌpicosohuëꞌ. Ama piꞌpisha tërantaꞌ nimonshitacamasoꞌ yonquicosohuëꞌ. Ama ninoꞌhuicosohuëꞌ. Ama aꞌna piyapi noyapatomaꞌ, noꞌhuicosohuëꞌ.

Romanos 14:1

Aꞌnaquënsoꞌ Quisocristo imasapirinahuëꞌ, co yaꞌipi cancanëna quëran natëyátërapihuëꞌ. “Pënëntërinsontaꞌ natëcasoꞌ yaꞌhuërin,” topi. Inapitantaꞌ huëꞌpachinaꞌ, noya nontocoꞌ. “Huëcoꞌ iyaroꞌsaꞌ Yosë chinotahuaꞌ,” itatomaꞌ, cortoquë ichiyaꞌconcoꞌ. Ama ninocanacamaso marëꞌ ninontocosohuëꞌ.

Romanos 2:8

Nipirinhuëꞌ, canpoara nohuantërëhuasoráchin nipatëhuaꞌ, noꞌhuiarinpoaꞌ. Noꞌtëquën anitotopirinpoahuëꞌ co natëhuatëhuahuëꞌ, anaꞌintarinpoaꞌ. Co noyahuëꞌ nipatëhuaꞌ, chiníquën anaꞌintarinpoaꞌ.

1 Corintios 11:16

Aꞌnaquëmaꞌ nisha yonquihuatamaꞌ, isoíchin shaꞌhuitaranquëmaꞌ: Quiyasoꞌ co nisha nisha aꞌchinaihuëꞌ. Yaꞌipi parti imapisopitantaꞌ inachintopi.

1 Corintios 11:18

Yosë chinotacaso marëꞌ niyontonpatamara, aꞌna huënton aꞌna huënton nicatomaꞌ, ninoꞌhuiramaꞌ, natantërahuë. Noꞌtëquën shaꞌhuitërinaco, topirahuëꞌ.

1 Corintios 3:18

Ama inquëma tërantaꞌ isoroꞌparáchin yonquiatomaꞌ, ninonpintocosohuëꞌ. “Caora noya noya nitotërahuë,” co taꞌcasoꞌ yaꞌhuërinhuëꞌ. Ama ina pochin yonquicosohuëꞌ. “Caora co noꞌtëquën yonquirahuëꞌ. Catahuaco Sinioro noya yonquiꞌi,” topatamaꞌ, Yosë catahuarinquëmaꞌ noya noya yonquicasoꞌ.

1 Corintios 3:3

Co noyahuëꞌ yonquiramasopita co nanianchátëraramahuëꞌ. Canpita capini ninoyapatomaꞌ, ninoꞌhuiramaꞌ. ¿Onpoatontaꞌ canpitaora nohuantëramasoachin yonquiconamaꞌ? Nisha nisha yonquiatomaꞌ, co imapisopitahuë pochin cancantëramaꞌ.

2 Corintios 11:20

Inapitasoꞌ chiníquën camairinënquëmaꞌ. Maꞌshanëmaꞌ topinan mapi. Nocaninënquëmaꞌ, yaahuërinënquëmaꞌ. Inapotopirinënquëmahuëꞌ, ¿maꞌmarëcha noya natanama nicaya? tënahuë, yonquiato.

Gálatas 5:15

Ninoꞌhuihuatamaꞌ, paꞌpi co noyahuëꞌ nisaramaꞌ. Tanan niꞌniroꞌsaꞌ niquëtëpiso pochin cancantaramaꞌ. Nipinocasontaꞌ co noyahuëꞌ. Ina pochin nipatamaꞌ, niꞌcona yaꞌipinquëmaꞌ nitapicancantamaꞌ.

Gálatas 5:26

Ama noya ninëhuaso marëꞌ aꞌnapita nocahuansohuëꞌ. Ninocanpatëhuaꞌ, aꞌnaroáchin ninoꞌhuiarihuaꞌ. Itohuara capini ninoyapatëhuaꞌ, ninoꞌhuiarihuaꞌ. Ama ina pochin cancantahuasohuëꞌ.

Gálatas 6:3

“Casoꞌ noya piyapico,” topatan, quëmaora ninonpintaran, co noꞌtëquën yonquiranhuëꞌ. Co insontaꞌ Yosë pochachin cancantërinhuëꞌ. Co Yosë catahuarinpoahuëꞌ naporini, co mantaꞌ noya niitërihuahuëꞌ.

Filipenses 1:15

Aꞌnaquën noya nosororinaco niꞌton, noya cancantatonaꞌ, aꞌchinapi. “Paono tashinan pëiquë yaꞌhuëpirinhuëꞌ, Yosë nohuanton, inaquë poꞌmopi Quisocristo nanamën noꞌtëquën shaꞌhuicaso marëꞌ,” taꞌtonaꞌ, noya aꞌchinapi. Aꞌnaquënso nipirinhuëꞌ, co nosororinacohuëꞌ. Apiratatë pochin nitërinaco. “Quiyasoꞌ noya noya aꞌchinarai,” toconatonaꞌ, co noyahuëꞌ niꞌninaco. “Paono tashinan pëiquë yaꞌhuasoꞌ, quiyasoꞌ aꞌchinpatëira, naꞌcon naꞌcon piyapiꞌsaꞌ paꞌyatatonaꞌ, nataninacoi. Ina quëran Paonori apiratë pochin nicaton, aquë aquëtëꞌ sëtarin,” topi natantërahuë.

Filipenses 2:14

Noya ninicatomaꞌ iyaroꞌsaꞌ yaꞌhuëcoꞌ. Ama ninoꞌhuicosohuëꞌ. Maꞌsona tërantaꞌ nipatamaꞌ, noya cancantatomaꞌ, nicoꞌ.

Filipenses 2:3

Aꞌnaquën chiníquën nanan nohuantopi. Inasáchin yonquiatonaꞌ, aꞌnapita nocanpi. “Casoꞌ noya noyaco,” topi yonquinëna quëran. Canpitaso nipirinhuëꞌ ama ina pochin cancantocosohuëꞌ. Aꞌnapita noya noya niꞌcoꞌ.

Colosenses 2:18

Nisha aꞌchinaꞌpiroꞌsaso nipirinhuëꞌ taponaꞌ: “Quiyasoꞌ anquëniroꞌsaꞌ chinotërai. Huaꞌnarëso pochin quënanai. Co canpitasoꞌ quiya pochin nipatamahuëꞌ, co noya cancantaramahuëꞌ,” itohuachinënquëmaꞌ, ama piꞌpisha tërantaꞌ natëtocosohuëꞌ. Inapitasoꞌ nonpinatonaꞌ, “Nani maꞌsha Yosë anitotërincoi niꞌton, noya noyacoi,” topirinahuëꞌ, inahuara yonquinëna quëran napopi.

2 Tesalonicenses 2:4

Inasoꞌ Yosë inimicotërin. “Ama Yosë chinotocosohuëꞌ. Ama mantaꞌ moshacosohuëꞌ. Casáchin natëco. Yosë yaꞌhuërëtarahuë,” tosarin. Yosë chinotopiso pëiquë chachin huënsëapon piyapiꞌsari chinotacaiso marëꞌ. Paꞌpi co noyahuëꞌ nisarin. Chiníquën nanantaton, yaꞌipi piyapiꞌsaꞌ yacamaiapon.

1 Timoteo 1:4

Shimashonënpita iráca napopisoꞌ yonquiápi. Inahuara yonquinëna quëraontaꞌ nishaꞌhuitopisoꞌ yonquirápi. Ama huachi inapita yonquicaiso marëhuëꞌ shaꞌhuitëquëꞌ. Ina pochin aꞌchinpachinaꞌ, topinan quëran aꞌchinapi. Piyapiꞌsaꞌ nisha nisha nonsapi. Co catahuapihuëꞌ Yosë nohuitacaisoꞌ. Yosëíchin natëhuatëhuaꞌ, catahuarinpoaꞌ noya noya imacaso marëꞌ.

1 Timoteo 1:7

“Quiyasoꞌ maistrocoi. Yaꞌipi pënëntërinsoꞌ nitotërai,” topirinahuëꞌ, co noꞌtëquën nitotopihuëꞌ. Chiníquën nonpirinahuëꞌ, co nitotopihuëꞌ.

1 Timoteo 3:6

Huaꞌqui imapisopitaráchin ansiano yaꞌcoinaꞌ. Nasha imarinsoꞌ yaꞌconpachin, co noyahuëꞌ yonquiamara: “Casoꞌ ansianoco niꞌton, noya noyaco,” tapon nimara yonquinënquë. Iráca sopai huaꞌan ina pochin yonquihuachina, Yosëri anaꞌintërin. Niꞌcona inapochachin anaꞌintochinquëmaꞌ.

2 Timoteo 2:14

Ina nanan chachin api yaꞌipi piyapiꞌsaꞌ shaꞌhuitaantaquëꞌ yonquiꞌinaꞌ: “Yosë niꞌsarinpoa niꞌton, ama nisha nisha ninontocosohuëꞌ,” itëquëꞌ. Inahuara yonquinëna quëran nisha nisha ninontohuachinara, topinan quëran nonsapi. Insosona inapita natanpachinaꞌ, co huachi noya Yosë imasapihuëꞌ. Nisha cancantatonaꞌ, yaaꞌpoapi.

2 Timoteo 2:23

Aꞌnaquën co Yosë yonquiatonahuëꞌ, nisha nisha ninontapi. Topinan quëran ninontatonaꞌ, ninoꞌhuiapi. Quëmaso nipirinhuëꞌ ama inapitarëꞌquën chiníquën ninontocosohuëꞌ.

2 Timoteo 3:4

Iina niponaraihuëꞌ, nonpinapitonaꞌ shaꞌhuirapiapi. Co huachi yonquiapihuëꞌ: “Quiyasáchin nitotërai,” tosapi. Nipaꞌyatacasoáchin yonquiatonaꞌ, co huachi Yosë nohuantapihuëꞌ.

Tito 3:9

Aꞌnaquën co noyahuëꞌ yonquiatonaꞌ, nisha nisha nonpi. Cotio mashocoroꞌsaꞌ yonquiatonaꞌ, inahuara yonquinëna quëran nisha nisha aꞌchinpi. Cotioroꞌsaꞌ iráca pënëntopisoꞌ nisha nisha aꞌchinatonaꞌ, ninoꞌhuipi. Ama inapita natancosohuëꞌ. Ina pochin ninontohuachinara, topinan quëran ninontopi. Co mantaꞌ catahuarinpoahuëꞌ. Yosë nanamënáchin imacasoꞌ yaꞌhuërin.

Santiago 1:19

Napoaton iyaroꞌsaꞌ, ama topinan nonacamasoáchin yonquicosohuëꞌ. Yosë nanamën naꞌcon naꞌcon natancoꞌ. Naporahuaton, ama yanoꞌhuitocosohuëꞌ.

2 Pedro 2:12

Nisha aꞌchinaꞌpiroꞌsasoꞌ maꞌsharoꞌsa pochin cancantopi. Co mantaꞌ yonquipihuëꞌ. Maꞌsona tërantaꞌ yanipachinara, nipi. Yosë yonquirinsoꞌ co nitotatonaraihuëꞌ pinopi. Niꞌcoꞌ. Maꞌsharoꞌsaꞌ tananquë quënanpatëra, tëparëꞌ, co nosororëhuëꞌ. Ina marëꞌ Yosëri acorin. Inapochachin nisha aꞌchinaꞌpiroꞌsasoꞌ taꞌhuantapi. Oshanëna marëꞌ Yosëri anaꞌintarin.

2 Pedro 2:18

Inahuara nipaꞌyatatonaꞌ, topinan quëran nontarinënquëmaꞌ. Nisha nisha yonquipi. Nasha yaꞌconpisopita aꞌnaroáchin nonpintopi. Ipora huarëꞌ co noyahuëꞌ yonquipisopita naniantapirinahuëꞌ. “Huëcoꞌ noꞌpiahuaꞌ. Noya noꞌpicasoꞌ. Noya monshihuanacasoꞌ,” itopi nonpintatonaꞌ.

Judas 1:10

Nisha aꞌchinaꞌpiroꞌsaso nipirinhuëꞌ Yosë yonquirinsoꞌ co nitotatonaraihuëꞌ, tëhuapi. Maꞌsharoꞌsa pochin cancantatonaꞌ, co yonquipihuëꞌ. Maꞌsona tërantaꞌ yanipachinara, nipi. Inapoatonaꞌ, nitapicancanpi. Anaꞌintacasoꞌ yaꞌhuërin.

Judas 1:16

Yosësoꞌ noya nosoropirinpoahuëꞌ, inapitasoꞌ maꞌsha onpohuachinara, ina noꞌhuipi. Co sano cancantopihuëꞌ. Maꞌsona tërantaꞌ yonquihuachinara, nipi. Co noyahuëꞌ cancantatonaꞌ, napopi. “Quiyasoꞌ noya noya nitotërai,” taꞌtonaꞌ, chiníquën nonconpi. Co piyapi nosoroaponaraihuëꞌ, noyasha nontopi. Inahuara canacaiso marëꞌ napotopi.

Apocalipsis 3:17

Canpitasoꞌ naporamaꞌ: ‘Naꞌa maꞌsha yaꞌhuëtërincoi niꞌton, noya yaꞌhuarai. Quiyasoꞌ noya piyapicoi. Aꞌnapita quëran noya noya nitotërai. Co mantaꞌ pahuantërincoihuëꞌ,’ topiramahuëꞌ, co noꞌtëquën yonquiramahuëꞌ. Cancanëma quëran yonquiramasopita nitotërahuë. Saꞌahuaya pochin niꞌnanquëmaꞌ. Coriqui pahuantërinso pochin canpitasoꞌ naꞌcon pahuantarinquëmaꞌ noya cancantacamasoꞌ. Somaraya pochin cancantatomaꞌ, co tëhuënchachin nohuitëramacohuëꞌ. Saꞌahua capa aꞌmocasoꞌ nininso pochin co noyápiachin cancantëramahuëꞌ. Paꞌpi nosorotëramaꞌ.