1 Timoteo 6:2 - Chayahuita (Shahui)

² “Patronënantaꞌ Quisocristo imapachin, ama ina marëꞌ chiroinasohuëꞌ. Iyaparin pochin nicatonaꞌ, noya noya sacachinaꞌ. Imarinsoꞌ catahuarapi niꞌton, nóya sacachinaꞌ. Inantaꞌ Yosëri nosororin niꞌton, noya catahuainaꞌ,” itëquëꞌ. Yaꞌipi carinquën pënënanquënsoꞌ, aꞌchinquëꞌ. Onpopiontaꞌ pënënquëꞌ natëinaꞌ.

1 Timoteo 6:2 ပူးပေါင်းရင်းမြစ်များ

Joel 2:28

Naquëranchin Sinioro taantarin: “Ina tahuëriꞌsa naꞌhuërinso piquëran, ispiritonëhuë yaꞌipi piyapinëhuëpita ayaꞌcoancantarahuë. Inapotohuato, huiꞌnamapita quëmapiꞌsaꞌ, sanapiꞌsaꞌ, yonquirahuëso shaꞌhuiponaꞌ. Mashoyaroꞌsanta huaꞌnataponaꞌ. Huiꞌnapiꞌsanta huaꞌnarëso pochin aꞌnotërahuësoꞌ, niꞌsapi.

Mateo 23:8

Canpitaso nipirinhuëꞌ, ama maistro itiinëmaso nohuantocosohuëꞌ. Yaꞌipinquëmaꞌ iyama pochin nisaramaꞌ. Casáchin noꞌtëquën aꞌchintëranquëmaꞌ.

Mateo 25:40

‘Coꞌta, imarinacosopita parisitohuachinara, catahuaramaꞌ. Topinan piyapiꞌsaꞌ, saꞌahuaroꞌsaꞌ, inapita maꞌsha pahuantohuachinara, quëtëramaꞌ. Imatomaco, aꞌnapita catahuaramaꞌ niꞌton, cantaꞌ catahuaramacoso pochin niꞌnahuë,’ itarahuë.

Mateo 6:24

Ina quëran itaantarin: “Aꞌna piyapi catoꞌ patron yaꞌhuëtohuachina, nisha nisha camaitopi niꞌton, co nanitërinhuëꞌ cato chachin natëcasoꞌ. Aꞌnasoꞌ nohuantaton, noya natëarin. Aꞌnaso nipirinhuëꞌ co onpopinchin nohuantatonhuëꞌ, co natëarinhuëꞌ. Inapochachin canpitantaꞌ coriquiráchin cancantohuatamaꞌ, co nanitaramahuëꞌ Yosë natëcamasoꞌ,” tënin.

Hechos 1:15

Ina quëran naꞌa Quisoso imapisopita niyontonpi. Pasa cato shonca piyapiꞌsa pochin yaꞌhuëpi. Pitrori huancánachin huanirahuaton, itërin:

Romanos 11:17

Nara quëran aꞌchinchinquëmaꞌ. Oripo nara sëꞌpaꞌ co noya nitohuachinahuëꞌ, nishitëtahuatëꞌ, tëꞌyatërëꞌ. Ina quëran apinapinsoꞌ oripo sëꞌpaquën tërantaꞌ achinpitërëꞌ papotacaso marëꞌ. Aꞌnaquën israiroꞌsasoꞌ oripo nara sëꞌpa pochin nipi. Co natëpihuëꞌ niꞌton, Yosëri tananpitërin. Canpitasoꞌ nisha piyapinquëmaꞌ nipiramahuëꞌ, huëntonënquë ayaꞌconinquëmaꞌ. Piyapinënpita pochachin niꞌninquëmaꞌ.

Romanos 8:29

Iráca quëran huarëꞌ Yosë nohuitërinpoaꞌ. Nohuitatonpoaꞌ, huayoninpoaꞌ Quisocristo pochachin cancantacaso marëꞌ. Quisocristosoꞌ noya noya ninin. Ina quëran naꞌaquënpoaꞌ imapatëhuaꞌ, ina pochin cancantarihuaꞌ. Yosë huiꞌninpita pochin niꞌsarinpoaꞌ canpoantaꞌ.

Gálatas 5:6

Quisocristo imapatëhuaꞌ, co marca yonquiarihuahuëꞌ. Aꞌnaquënsoꞌ nani niacotopi. Aꞌnaquënso nipirinhuëꞌ co niacotopihuëꞌ. Co ina yonquicasoꞌ yaꞌhuërinhuëꞌ. Cancanënpoa quëran huarëꞌ imacasoꞌ yaꞌhuërin. “Quisocristo catahuarinpoaꞌ. Co nonpintarinpoahuëꞌ,” taꞌtëhuaꞌ, yaꞌipi cancanënpoa quëran natëahuaꞌ. Ina natëhuatëhuaꞌ, catahuarinpoaꞌ nóya ninosorocasoꞌ. Ina pochin cancantohuatëhuaꞌ, Yosë noya niꞌsarinpoaꞌ.

Efesios 1:1

Ca Paonoco ninshitaranquëmaꞌ, niꞌcoꞌ. ¿Noyanquëmaꞌ canpitantaꞌ? Noya cantaꞌ yaꞌhuarahuë. Yosë nohuanton, Quisocristo acorinco nanamën aꞌchinaꞌhuaso marëꞌ. Canpitantaꞌ Quisocristo noya imaramaꞌ niꞌton, Yosë noya niꞌninquëmaꞌ. Ipisoquë yaꞌhuëramasopita ninshitaranquëmaꞌ.

Efesios 1:15

“Quisocristo anoyacancantërinpoaꞌ,” taꞌtomaꞌ, inasáchin imaramaꞌ. Ina imatomaꞌ, yaꞌipi imaramasopita capini noya ninosoroaramaꞌ, natantërahuë. Ina natantato, nóya cancantërahuë.

Efesios 3:6

Naꞌa piꞌipi cotioroꞌsaráchin Yosë chinotopi. “Nichaꞌësaranquëmaꞌ,” itaton, Yosëri naꞌcon catahuarin. Iporaso nipirinhuëꞌ nisha piyapiꞌsanquëmantaꞌ catahuarinquëmaꞌ. Noya nanan natanatomaꞌ, Quisocristo imaramaꞌ niꞌton, canpitantaꞌ nichaꞌësarinquëmaꞌ. Napoaton aꞌna huëntoínchin pochin ninëhuaꞌ.

Colosenses 1:2

Yaꞌipi imaramasopita Corosasëquë yaꞌhuaramasoꞌ, ninshitaranquëmaꞌ. Canpitantaꞌ Quisocristo imamiataramaꞌ niꞌton, Yosë noya niꞌninquëmaꞌ. Ina imaramaꞌ niꞌton, iyahuëi pochin niꞌnainquëmaꞌ. Inaora nohuanton, Tata Yosë naꞌcon catahuainquëmaꞌ. Asanocancainquëmaꞌ.

Colosenses 4:1

Aꞌnaquëmaꞌ patronquëmaꞌ ninamasoꞌ. Piyapinëmapita nosoroatomaꞌ, noꞌtëquën pahuërëcoꞌ. Ama topinan quëran anaꞌintocosohuëꞌ. Canpitantaꞌ huaꞌanëmaꞌ yaꞌhuëtërinquëmaꞌ. Yosë inápaquë yaꞌhuaponahuëꞌ, yaꞌipinpoaꞌ huaꞌanëntërinpoaꞌ.

2 Tesalonicenses 1:3

Iporasoꞌ iyaroꞌsaꞌ noya noya imasaramaꞌ. Cancanëma quëran huarëꞌ ina natëramaꞌ. Naꞌcon naꞌcon ninosororamaꞌ niꞌton, nani tahuëri “Yosparinquën,” itërai Yosë. Ina naꞌcon catahuarinquëmaꞌ niꞌton, ina pochin nontacasoꞌ yaꞌhuërin. Ina Yosë nohuantërin.

1 Timoteo 4:11

Nani aꞌchintëranquën niꞌton, inachachin api aꞌchinquëꞌ. Aꞌchinaton, pënëntëquëꞌ natëinaꞌ.

1 Timoteo 5:1

Mashoroꞌsaꞌ co noyahuëꞌ nipachinaꞌ, ama noꞌhuiquësohuëꞌ. Tata pochin nicaton, sanoanan quëran pënënquëꞌ. Napopináchin piꞌipitëramasoꞌ, iyaparin pochin niꞌquëꞌ. Inapitantaꞌ nosoroaton, sanoanan quëran pënënquëꞌ.

Tito 2:1

Quëmaso nipirinhuëꞌ Yosë nanamën noꞌtëquën aꞌchinquëꞌ. Ina aꞌchinaton, pënënquëꞌ noya nicacaiso marëꞌ.

Tito 2:15

Ina nanan aꞌchintáquëꞌ. Noya nontaton, achinicancanquëꞌ. Co noyahuëꞌ nipachinaꞌ, chiníquën nanantaton, pënënquëꞌ. Co mashonquënhuëꞌ niponahuëꞌ, Quisocristo nanamën aꞌchintëran niꞌton, natëinënquënsoꞌ yaꞌhuërin.

Tito 3:8

Noꞌtëquën shaꞌhuitëranquën. Quëmantaꞌ inachachin aꞌchintëquëꞌ, tënahuë. Pënënáquëꞌ yaꞌipi imapisopita noya nicacaiso marëꞌ. Aꞌchintëranquënsosoꞌ nóya imacasoꞌ. Natëhuatëhuaꞌ, noya noya yaꞌhuarihuaꞌ.

Hebreos 3:1

Imaramaꞌ niꞌton, Yosë anoyacancantërinquëmaꞌ. Huëntonënquë ayaꞌconinquëmaꞌ. Napoaton iyaroꞌsaꞌ Quisocristo naꞌcon yonquicoꞌ. Yosëri aꞌpaimarin nanamën aꞌchintinpoaso marëꞌ. Corto huaꞌan chini chiníquën nanantërinso pochin acorin. Ina nohuanton, imarëhuaꞌ.

Hebreos 3:14

Iráca Quisocristo natërëhuaꞌ. Chiminaquë huarëꞌ noya imahuaꞌ. Co aꞌpohuatëhuahuëꞌ, Quisocristorëꞌquënpoaꞌ yaꞌhuëcontarihuaꞌ.

1 Pedro 5:1

Yaꞌipi ansianoꞌsanquëmantaꞌ pënënanquëmaꞌ. Cantaꞌ ansianoco niꞌto, achinicancainquëmaꞌ, tënahuë. Quisocristo isoroꞌpaquë nipon, nohuitërahuë. Corosëquë parisitohuachina, cari niꞌnahuë niꞌton, shaꞌhuirárahuë. Oꞌmantahuachin, canpoantaꞌ inarëꞌquënpoaꞌ huaꞌanëntarihuaꞌ. Napoaton iporasoꞌ pënënaranquëmaꞌ noya nicacamaso marëꞌ.

2 Pedro 2:10

Aꞌnaquën co piꞌpisha tërantaꞌ Yosë yanatëpihuëꞌ. Inapitasoꞌ chini chiníquën anaꞌintarin. Co Yosë natëtonahuëꞌ, co noyahuëꞌ nicacaisoráchin yonquipi. Aꞌnaratipita taparoꞌ nisáponaraihuëꞌ, co ina marëꞌ tapanpihuëꞌ. “Caora noya nitotërahuë,” taꞌtonaꞌ, co inso tërantaꞌ yanatëpihuëꞌ. Chiníquën nanantopisopita Yosëri acorinsoꞌ co quënanpirinahuëꞌ, pinopi.

Judas 1:8

Inapochachin iporantaꞌ nisha aꞌchinaꞌpiroꞌsasoꞌ, huëꞌëiri ahuaꞌyantërinso pochin cancantatonaꞌ, inahuara yonquinëna quëran nonpin nanan imasapi. Naꞌcon monshihuanatonaꞌ, nitapicancanapi. Co inso tërantaꞌ yanatëpihuëꞌ. “Co insontaꞌ camaiinpoasoꞌ yaꞌhuërinhuëꞌ,” toconpi. Chiníquën nanantopisopita Yosëri acorinsoꞌ inapitantaꞌ tëhuapi.