1 Timoteo 6:10 - Chayahuita (Shahui)

¹⁰ Coriquiráchin paꞌyatohuatëra, nisha nisha yonquirëꞌ. Co noyahuëꞌ ninëꞌ. Nonpinëꞌ, ihuatërëꞌ, noꞌhuitërëꞌ, ina pochin yonquirëꞌ. Aꞌnaquën coriquiráchin yonquiatonaꞌ, Yosë aꞌpopi. Ina quëran cancanëna quëran co huachi noya cancantopihuëꞌ. Sëtatonaꞌ, chiníquën parisitapi.

1 Timoteo 6:10 ပူးပေါင်းရင်းမြစ်များ

Génesis 29:14

Napanori natanahuaton itapon: “Quëmasoꞌ tëhuënchachin quëmopinëhuënquën ninan,” itërin. Cacoposoꞌ Napano pëinënquë aꞌna yoquiraꞌ nani yacapatërin.

Génesis 29:26

—Isëquëso api, co huaꞌhua nininsoꞌton, asoꞌyaraihuëꞌ.

Génesis 34:27

Aꞌnapita iinpitanta canquirahuatonaꞌ, yaꞌipi quëmapiꞌsa nani tëpapi niꞌton, ninanoquë maꞌsha yaꞌhuërinso mamiatopi. Oshina Siquimori tapirinso marëꞌ, iꞌhuërëtatona inapotopi.

2 Reyes 5:27

Co ina pochin yonquiranso marëhuëꞌ, Namano chana canio inquirinsoꞌ, quëmaquë paꞌsarin. Quëmá quëran pipipisopitantaꞌ, inanpihuanaponaꞌ. Co onporonta inquiapihuëꞌ, itërin. Napotohuachina piyapinënsoꞌ paꞌnin. Paaso chachin chana caniori pipitohuachina, ocai pochin huirihuantërin paꞌnin huachi.

Salmos 32:10

Inpioroꞌsasoꞌ, naꞌcon parisitaponaꞌ. Sinioro ninarëhuasopitaso nipirinhuëꞌ, canopiaꞌhua soꞌquëtërëso pochin nitatonpoaꞌ, nosoromiatërinpoaꞌ.

Proverbios 1:19

Maꞌhuanacaisoráchin cancantopisopitasoꞌ, inapo taꞌhuantaponaꞌ.

Proverbios 1:31

Napoaton ina naꞌintarinquëma parisitamaso yaꞌhuërin. Amiquë huarëꞌ caꞌnëso pochin parisitaramaꞌ. ‘Caora nohuantato napoarahuë,’ tënamaso marëꞌ napoaramaꞌ.

Isaías 1:23

Huaꞌanoꞌsanëma quëran huarëꞌ co natantochináchinhuëꞌ cancantopi. Ihuatëroꞌsarëꞌ nipayapi. Pahuërëhuachinara, co huachi noꞌtëquën anaꞌintopihuëꞌ. Maꞌsha topinan quëtápaisoꞌ nohuantoonpi. Saꞌahuaroꞌsaꞌ, quëyoronoꞌsaꞌ, inapita maꞌsha onpotohuachinara, co paꞌpoyapihuëꞌ.

Miqueas 3:11

Coisëroꞌsa pahuërëhuachinara, co huachi tëhuënaꞌpiroꞌsa anaꞌintopihuëꞌ. Corto huaꞌanoꞌsanta pahuërëai huarëꞌ, nanamëhuë aꞌchinpi. Pënëntonaꞌpiroꞌsanta pahuërëhuachinara: “Yosë catahuarinpoa canpoasoꞌ. Niꞌsárinpoa niꞌton, co manta onpoarihuahuëꞌ. Noya yaꞌhuëáparihuaꞌ,” itopi.

Malaquías 1:10

Inquëma tërantaꞌ, chinotëramacoso pëi yaꞌcoananën oncoatoma noyá patanantërama naporini, noya niitonhuëꞌ. Co huachi insonta yaꞌconaton, artaronëhuëquë topinan quëran aꞌpëchitonhuëꞌ. Co noyahuëꞌ ninama niꞌton, carimanta co noya niꞌnanquëmahuëꞌ. Maꞌsha quëshiramacosopitantaꞌ, co huachi maꞌpaponquëmahuëꞌ.

Mateo 13:22

Aꞌnaquën piyapiꞌsantaꞌ nahuanoꞌ yaꞌhuërinso pochin niconpi. Yosë nanamën natanpachinara, yaimapirinahuëꞌ, maꞌsharáchin yonquiatonaꞌ, naniantopi. ‘Naꞌa coriqui, maꞌsha, inapita yaꞌhuëtohuachincoi, nóya cancantarai,’ topirinahuëꞌ, co ina quëran noya cancantacasohuëꞌ nipirinhuëꞌ. Napoaton nahuanoꞌsari imotërinso pochin, maꞌsharáchin yonquiatonaꞌ, Yosë nanamën naniantopi. Co imamiatopihuëꞌ.

Mateo 23:13

Ina quëran Quisosori cotio maistroꞌsaꞌ, parisioroꞌsa inapita pënënaton itapon: “Cotio maistroꞌsanquëmaꞌ, parisioroꞌsanquëmaꞌ, canpitaso nonpintënquëma niꞌton, ¡maꞌhuantacha nisarama paya! Co noꞌtëquën aꞌchinamahuëꞌ niꞌton, Yosë iranën yaꞌcopiatë pochin nitëramaꞌ. Co noꞌtëquën Yosë imatomahuëꞌ, co canpita tërantaꞌ Yosë huaꞌanëntërinquë yaꞌconaramahuëꞌ. Aꞌnapitantaꞌ yayaꞌconpirinahuëꞌ, co catahuaramahuëꞌ yaꞌconacaisoꞌ. Canpita nonaninënquëmaꞌ niꞌton, inapitantaꞌ co yaꞌconpihuëꞌ. [

Mateo 6:19

Ina quëran itaantarin: “Ama iyaroꞌsaꞌ maꞌsharáchin yonquicosohuëꞌ. Ama naꞌcon coriqui, maꞌsha, inapita yontoncosohuëꞌ. Isoroꞌpaquë yaꞌipi maꞌsha aꞌnaroáchin mocarin, chanatërin. Noꞌsoni pëꞌyarin. Chiꞌchirotërin. Ihuatëroꞌsaꞌ yaꞌconatonaꞌ, ihuarinënpoaꞌ. Naporin. Napoaton, isoroꞌpaquë yaꞌhuërinsopita co yaꞌhuëmiatërinhuëꞌ.

Marcos 4:19

maꞌsharáchin yonquipi. ‘Naꞌa coriqui, maꞌsha, inapita yaꞌhuëtohuachincoi, noya cancantarai,’ topi. Napoaton nahuanoꞌsari imotërinso pochin, nani maꞌsha nohuantatonaꞌ, Yosë nanamën naniantopi. Co imamiatopihuëꞌ.

Colosenses 3:5

Napoaton piꞌpian tërantaꞌ co noyahuëꞌ yonquihuatamaꞌ, aꞌnaroáchin naniantocoꞌ. Ama monshihuancosohuëꞌ. Ama taparoꞌ yonquicosohuëꞌ. Ama aꞌna sanapi sëꞌhuacamasoꞌ yonquicosohuëꞌ. Ama aꞌna quëmapi saꞌin noyapacosohuëꞌ. Ama nani maꞌsha nohuantapatocosohuëꞌ. Aꞌnaquënsoꞌ maꞌsha naꞌcon nohuantatonaꞌ, mamanshi moshapiso pochin niconpi.

1 Timoteo 3:3

Ama noꞌpiinasohuëꞌ. Ama yaahuëchinasohuëꞌ. Sano yonquiꞌinaꞌ. Ama yanoꞌhuichinasohuëꞌ. Ama coriquiráchin cancanchinasohuëꞌ.

1 Timoteo 6:21

Aꞌnaquën nisha nanan imatonaꞌ, Yosë aꞌpopi. Ama inapita natëquësohuëꞌ. Inaora nohuanton, Yosë noya catahuainquën. Nani ninshitëranquën huachi. Paono

1 Timoteo 6:9

Aꞌnaquënso nipirinhuëꞌ coriqui canacasoáchin yonquipi. Inasáchin cancantatonaꞌ, sopai natëpi. Nani maꞌsha nohuantatonaꞌ huënsonquë maꞌsha manëso pochin nisapi. Inasáchin yonquiatonaꞌ, aquë aquëtëꞌ nohuantaponaꞌ. Ina marëꞌ Yosëri chiníquën anaꞌintarin.

2 Timoteo 3:2

Piyapiꞌsaꞌ niapiratatonaꞌ, co huachi aꞌnapita yonquiapihuëꞌ. Coriquiráchin cancantapi. Aꞌnapita nocanapi. “Casoꞌ noya noyaco,” taꞌtonaꞌ, aꞌnapita co noyahuëꞌ niꞌsapi. Nipinosapi; Yosëntaꞌ pinosapi. Aꞌshinaꞌ, paꞌpinaꞌ, inapita co natërapihuëꞌ. Nani maꞌsha quëtopirinahuëꞌ, ina marëꞌ “Yosparinquën,” co itopihuëꞌ. Co Yosë chinotapihuëꞌ.

2 Timoteo 4:10

Timasësoꞌ isoroꞌparáchin yonquiaton, patërinco. Tisaronicaquë paꞌnin. Crisinti Carasiaquë paꞌnin. Titontaꞌ Tarëmasiaquë paꞌnin.

Tito 1:11

Yapënëntohuachinaꞌ, shaꞌhuitëquëꞌ ama pënënchinasohuëꞌ. Maꞌsha canacaisoáchin yonquiatonaꞌ, aꞌchinapi. Nisha aꞌchintohuachinara, aꞌnaquën Yosë nanamën yaaꞌpopi. Quëmopinënpitarë chachin nisha imasapi.

Santiago 5:19

Noya iyaroꞌsaꞌ nipënëncoꞌ. Aꞌnasoꞌ noꞌtën nanan nitotaponahuëꞌ, nisha cancantohuachina, aꞌnaya aꞌnayanquëmaꞌ pënëncoꞌ noꞌtëquën yonquiantaꞌin.

Judas 1:11

¡Maꞌhuantacha nisapi paya! Nonpinaꞌpiroꞌsasoꞌ, Caino pochin cancantatonaꞌ co Yosë natëpihuëꞌ. Paramo pochin cancantopi. Iráca Paramosoꞌ coriquiráchin cancantaton, piyapiꞌsaꞌ anishacancantërin. Corintaꞌ iráca co noyahuëꞌ ninin. Co huaꞌanoꞌsaꞌ yanatërinhuëꞌ, noꞌhuirin. Ina marëꞌ Yosë nohuanton, chiminin. Inapita pochin cancantopisopita Yosëri chiníquën anaꞌintarin.

Apocalipsis 18:13

Nisha nisha pimoanacaso marëntaꞌ yaꞌhuërin. Canina, nisha nisha cosharoꞌ apimotacasoꞌ nininsopita, yonarin pochin pimóchin nininsoꞌ, pimo yaquiꞌ, pimo huaꞌsaiꞌ, huino, tomaꞌ, arina, trico, inapita yaꞌhuërin. Ohuacaroꞌsaꞌ, ohuicaroꞌsaꞌ, cahuarioroꞌsaꞌ, toronanoꞌsaꞌ, inapitantaꞌ yaꞌhuërin. Piyapiroꞌsantaꞌ paꞌanapi asacatacaiso marëꞌ. Piyapi chachin nipirinhuëꞌ, maꞌsharoꞌsa pochin yapaꞌanpi. Notohuaroꞌ maꞌsha yaꞌhuëpirinhuëꞌ, co huachi paꞌanapihuëꞌ.