1 Timoteo 6:1 - Chayahuita (Shahui)

¹ Patron marëꞌ sacatopisopita, pënënquëꞌ patronënaꞌ noya nicatonaꞌ natëinaꞌ. Co natëhuachinahuëꞌ, noꞌhuitatonaꞌ, Yosë pinoponaꞌ nimara. “Yosë nanamënsoꞌ napoonin niꞌton, ina imatonaꞌ co yanatërinacohuëꞌ,” taponaꞌ nimara. Co ina Yosë nohuantërinhuëꞌ.

1 Timoteo 6:1 ပူးပေါင်းရင်းမြစ်များ

Génesis 16:9

Naporoꞌ Sinioro anquëninëni, itapon: —Naquëranchin patronanën paapantaquëꞌ. Maꞌsona camairinquënsopita, natëquëꞌ, itërin.

Génesis 24:12

Naporahuaton inaquë chachin Yosë nontërin: “Niꞌquë Sinioro, quëmaso Yosënquën. Huaꞌanëhuë Apraan, natërinquën. Huaꞌanëhuë nosoroaton catahuaco.

Génesis 24:2

Aꞌna tahuëri, piyapinën masho masho nininsoꞌ, përarin. Inari yaꞌipi maꞌshanënpita aꞌpairin. Huëꞌpachina itapon: —Natëancoso nitotaꞌhuaso marëꞌ, tonaroana sëꞌhuatoco. Sëꞌhuatatonco: “Sinioroso Yosë niꞌton, inápaquë huaꞌanëntaton, isoroꞌpanta huaꞌanëntërin. Ina niꞌsárinco niꞌton, noꞌtëquën natëaranquën. Co isoporinquë Canaan sanapi nininsoꞌ, Isaco macacaso yaꞌhuërinhuëꞌ,” itoco.

2 Samuel 12:14

Napoaponahuëꞌ, co noyahuëꞌ ninanso marëꞌ inimiconënpitari Yosë nocanpi. Inapotopi niꞌton, huiꞌnan nasha huaꞌhuatërinsoꞌ, chiminacaso yaꞌhuërin, itërin.

2 Reyes 5:13

Paꞌsapirinhuëꞌ, piyapinënpitari yaꞌcarirahuatonaꞌ: —Sinioro. Sacai nininsonta pënëntonaꞌpi shaꞌhuitërinquën naporini, aꞌnaroáchin natëitonhuëꞌ. Aquëtë huarëꞌ iporasoꞌ, co sacaiyátërahuëꞌ camairinquën. Yaꞌcoitohuatan noyataran, itopi.

Isaías 52:5

Iporaso nipirinhuëꞌ, papironiaroꞌsari yaꞌhuërëꞌ, topinan quëran aparisitapi niꞌnahuë. Huaꞌanëntatonaꞌ: ‘Ma noyacha quiyasoꞌ ninai paya,’ tosápi. Napoatona apira apira pinorinaco.

Isaías 58:6

Ama ina pochin yonquicosohuëꞌ. Co ina pochin ayono nicacaso yaꞌhuërinhuëꞌ. Noya nicaꞌhuanquëmaso marëꞌ ayonahuatamaꞌ, isopocoꞌ: Noꞌtëquënáchin yonquirapitomaꞌ, aꞌnapitanta noya niꞌcoꞌ. Co manta onpopirinahuëꞌ catinaquëtohuachinaꞌ, parisitopi. Inapita pochin nitopisopita, iꞌshiritatë pochin nitocoꞌ. Toro asacatohuachinara, onquinënquë nara oyontopi. Ina tonpotopisoꞌ iꞌshiritatë pochin, piyapiꞌsa inapo aparisitapisoꞌ, nichaꞌëcoꞌ. Ama huachi noꞌhuitatoma piyapiꞌsa inapo aparisitocosohuëꞌ.

Malaquías 1:6

Siniorosoꞌ, yaꞌipi nanitaparin. Corto huaꞌanoꞌsa pënënaton: “Huaꞌhuaroꞌsasoꞌ, paꞌpina noya nicatona natëcaiso yaꞌhuërin. Patronoꞌsantaꞌ, piyapinënpitari natëcaiso yaꞌhuërin. Caso canpita tatanëmaco niꞌquëhuarëꞌ, ¡noya nicatomaco natëamacoso yaꞌhuërin! Patronëmaco niꞌquëhuarëꞌ, ¡natëamacoso yaꞌhuërin! Canpitaso napoaponahuëꞌ, nocanamaco. Napoapomarahuëꞌ: ‘¿Maquëta nocanainquën?’ itëramaco.

Mateo 11:30

Maꞌsona nicacaso shaꞌhuitohuatënquëmaꞌ, catahuaranquëmaꞌ noya nicacamasoꞌ. Catahuaranquëmaꞌ niꞌton, co sacaihuëꞌ imasaramaco huachi,” itërin Quisosori.

Mateo 11:9

Pënëntërinsoꞌ natanacamaso marëꞌ paꞌnamaꞌ, tënahuë. Coansha tëhuënchachin nóya pënëntërin. Co topinan quëran pënëntërinhuëꞌ. Yosëri chachin aꞌparin pënëntacaso marëꞌ.

Lucas 17:1

Ina quëran caꞌtanoꞌsanënpita pënëantarin. “Nisha nisha maꞌsha yaꞌhuërin anishacancantiinpoasoꞌ. Nipirinhuëꞌ, anishacancantonaꞌpisoꞌ paꞌpi co noyahuëꞌ niꞌton, ¡maꞌhuantacha nisarin paya! Ina marëꞌ Yosëri chiníquën anaꞌintarin.

Hechos 10:22

—Capitan Cornirio aꞌparincoi. Inasoꞌ nóya quëmapi. Nisha piyapi niponahuëꞌ, Yosë chinotërin. Yaꞌipi cotioroꞌsari noya niꞌpi. Iꞌhuara yaꞌhuasoꞌ, aꞌnanaya anquëniri yaꞌnotimarahuaton, shaꞌhuitimarin. “Piyapiꞌsaꞌ aꞌpaquëꞌ Pitro macontaꞌinaꞌ. Ina aꞌchintarinquën, noya natanquëꞌ,” itërin niꞌton, aꞌparincoi huëꞌnai, itërin.

Hechos 10:7

Anquëni paꞌpachina, catoꞌ piyapinën amatërin. Aꞌna sontarontaꞌ amatërin, nani tahuëri camairinsoꞌ. Inantaꞌ Yosë chinotërin.

Hechos 15:10

Iráca Moisësë nisha nisha pënëntopirinhuëꞌ, shimashonënpoaꞌ co nanitopihuëꞌ yaꞌipiya noꞌtëquën natëcaisoꞌ. Canpoantaꞌ co nanitaparëhuahuëꞌ. ¿Maꞌmarëtaꞌ nipachin nisha piyapiꞌsaꞌ imapachinaꞌ, iráca pënëntopisoꞌ aꞌchinacasoꞌ nohuantëramaꞌ? tënahuë. Yosëri noya niꞌpachina, co canpoari nisha shaꞌhuicasoꞌ yaꞌhuërinhuëꞌ. Quisoso imapisopita tananpitahuaꞌ, Yosë anaꞌintohuachinpoaꞌ.

Romanos 2:24

Co noyahuëꞌ cancantëramaꞌ niꞌton, nisha piyapiꞌsantaꞌ co Yosë noya niꞌsapihuëꞌ. Quiricanënquë chachin naporin:

1 Corintios 10:32

Ama insontaꞌ anishacancantocosohuëꞌ. Cotioroꞌsaꞌ, nisha piyapiꞌsaꞌ, Quisocristo imapisopita, yaꞌipiya nosorocasoꞌ yaꞌhuërin.

Gálatas 5:1

Quisocristo nichaꞌërinpoaꞌ inasáchin yonquiatëhuaꞌ noya cancantacaso marëꞌ. Ina imapatëhuaꞌ, catahuarinpoaꞌ noya nicacasoꞌ. Napoaton ama naquëranchin iráca pënëntërinsoꞌ imahuasohuëꞌ. Quisocristoráchin yonquiaꞌahuaꞌ.

1 Timoteo 5:14

Napoaton nanoꞌsaꞌ soꞌinari ayananpihuachinaꞌ, soꞌyantaꞌinaꞌ, tënahuë. Soꞌyantatonaꞌ, huaꞌhuaantaꞌinaꞌ. Soꞌinaꞌ, huaꞌhuinpita, inapita nocomahuachinaꞌ, noya nisapi. Napohuachinaꞌ, co aꞌnapitari pinosapihuëꞌ.

Tito 2:5

Noya yonquicaiso marëꞌ pënëinaꞌ. Ama mantaꞌ soꞌinaꞌ tëhuananpitacaisoꞌ yonquiꞌinasohuëꞌ. Soꞌinaꞌ noya nocomaꞌinaꞌ. Yaꞌipi piyapi noya nonchinaꞌ. Soꞌinaꞌ noya natëinaꞌ ama aꞌnapitari Yosë nanamën nonapicaiso marëhuëꞌ.

1 Pedro 2:12

Co imapisopitahuëꞌ pinorinënquëmaꞌ. “Co noyahuëꞌ nipi,” topi. Ina nipirinhuëꞌ, noyasáchin nicoꞌ niꞌinënquëmaꞌ. Ina quëran aꞌna tahuëri Yosëri catahuarin niꞌton, noꞌtëquën yonquihuachinaꞌ, yonquiarinënquëmaꞌ. “Ma noyacha Yosëri catahuarin niꞌton, noya nipi paya,” tosapi.

1 Pedro 3:16

Ama noꞌhuitë pochin chiníquën shaꞌhuitocosohuëꞌ. Sanoanan quëran pënëncoꞌ. Yosë yonquihuatamaꞌ, noya shaꞌhuitaramaꞌ. Quisocristo imaramaꞌ niꞌton, noyasáchin nicatomaꞌ, noyápiachin cancantocoꞌ. Ina quëran pinopirinënquëmahuëꞌ, “Coꞌta noya nisapi. Quëmarisoꞌ nonpinapiran,” itarin aꞌnarintaꞌ. Itohuachina, pinotonaꞌpisoꞌ tapanarin.