1 Timoteo 5:22 - Chayahuita (Shahui)

²² Ansiano yaacohuatan, noya yonquiaton, oshaquëran acoquëꞌ. Aꞌnaroáchin acohuatan, co noyahuëꞌ nipachina, quëmantaꞌ naꞌianan. Noyasáchin niquëꞌ.

1 Timoteo 5:22 ပူးပေါင်းရင်းမြစ်များ

Hechos 13:3

Napoaton co coshatatonaraihuëꞌ, inapita marëꞌ chiníquën Yosë nontopi. Nani Yosë nontohuachinara, sëꞌhuamotorahuatonaꞌ, acopi paatonaꞌ aꞌchinacaiso marëꞌ. Ina quëran aꞌpapi.

Hechos 18:6

Inapitaso nipirinhuëꞌ noꞌhuitonaꞌ, Paono pinopi. Napoaton tananpitërin. —Tëhuënchachin Yosë anaꞌintarinquëmaꞌ. Nani yaꞌipi aꞌchintopiranquëmahuëꞌ, co yanatëramahuëꞌ niꞌton, canpitaora tëhuënëmaquë ninaꞌintaramaꞌ. Iporaso nisha piyapiꞌsaꞌ aꞌchintarahuë huachi, tënin Paono.

Hechos 20:26

Yaꞌipi Yosë yonquirinpoasoꞌ nani shaꞌhuitëranquëmaꞌ. Napoaton noꞌtëquën itëranquëmaꞌ. Insosona co natëhuachinahuëꞌ, ina marëꞌ co Yosë anaꞌintarincohuëꞌ. Inahuara tëhuënënaquë ninaꞌintapi.

Hechos 6:6

Inapita huayonahuatonaꞌ, caꞌtanoꞌsaquë quëpi. Yosë nontahuatonaꞌ, sëꞌhuamotopi acocaiso marëꞌ. Inapotatonaꞌ, acopi huachi.

Efesios 5:11

Aꞌnaquën tashi pochin cancantatonaꞌ, co noyahuëꞌ nipi. Topinan quëran yaꞌhuërapi niꞌton, ama inapita pochin cancantocosohuëꞌ. Noꞌtëquën shaꞌhuitocoꞌ co noyahuëꞌ nipisopita naniantacaiso marëꞌ.

1 Timoteo 3:10

Ama aꞌnaroáchin ayaꞌconcosohuëꞌ. Piꞌpian tënitomaꞌ, niꞌcoꞌ. Noya nipachinaꞌ, yaꞌcoinaꞌ.

1 Timoteo 3:2

Napoaton yayaꞌconpachinaꞌ, nóya nipisopitaráchin yaꞌcoinaꞌ. Ama piyapiꞌsari pinocaiso marëhuëꞌ noyasáchin niinaꞌ. Aꞌna saꞌináchin yaꞌhuëchinaꞌ. Co monshihuanacaisoꞌ yaꞌhuërinhuëꞌ. Sano yonquiꞌinaꞌ. Ama nisha nisha yonquiꞌinasohuëꞌ. Yaꞌipi cancanëna quëran imainaꞌ. Niꞌtoroꞌsaꞌ huëꞌpachinaꞌ, noya nonchinaꞌ, oꞌshichinaꞌ. Aꞌchinacaisoꞌ noya nitochinaꞌ.

1 Timoteo 3:6

Huaꞌqui imapisopitaráchin ansiano yaꞌcoinaꞌ. Nasha imarinsoꞌ yaꞌconpachin, co noyahuëꞌ yonquiamara: “Casoꞌ ansianoco niꞌton, noya noyaco,” tapon nimara yonquinënquë. Iráca sopai huaꞌan ina pochin yonquihuachina, Yosëri anaꞌintërin. Niꞌcona inapochachin anaꞌintochinquëmaꞌ.

1 Timoteo 4:12

Co mashonquënhuëꞌ niponahuëꞌ, noya pënëntëquëꞌ mashoroꞌsantaꞌ natëinënquën. Yaꞌipi piyapiꞌsaꞌ noya nontëquëꞌ. Nosoroaton, catahuaquëꞌ. Cancanën quëran huarëꞌ Yosë natëquëꞌ. Sano yonquiaton, noyápiachin cancantëquëꞌ. Noyasáchin niquëꞌ imapisopita nonainënquënso marëꞌ.

1 Timoteo 4:14

Iráca ansianoꞌsaꞌ niyontonahuatonaꞌ, acorinënquën Yosë nanamën aꞌchinamaso marëꞌ. Sëꞌhuamotorahuatënënquën, nanan quëtërinënquën aꞌchinamaso marëꞌ. Ina quëran Yosë catahuarinquën nóya aꞌchinamasoꞌ. Ama ina naniantaton, topinan yaꞌhuëquësohuëꞌ.

2 Timoteo 1:6

Iráca sëꞌhuamotorahuatënquën, acoranquën pënëntamaso marëꞌ. Naporoꞌ Yosë chachin ananitërinquën niꞌton, nóya pënëntëran. Imapisopita noya aꞌchintëran. Iporantaꞌ api, ina yonquiaton chiníquën cancantëquëꞌ. Niꞌquëꞌ. Pënsha yatacopihuachina, pishitohuatëra noya orotaantarin. Inapochachin chiníquën cancantaton, pënëntaantaquëꞌ, tënahuë. Napoaton ninshitaranquën achinicancanaꞌhuanquënso marëꞌ.

2 Timoteo 2:2

Piyapiꞌsaꞌ niyontonpachinara, Yosë nanamën aꞌchintërahuë. Quëmantaꞌ natanan. Inapochachin quëmantaꞌ caraíchin quëmapiꞌsaꞌ huayonahuaton, ina nanan chachin aꞌchintantaquëꞌ. Noya natërinsopita aꞌchintëquëꞌ. Inahuanta aꞌnapita aꞌchintacaiso marëꞌ inapotëquëꞌ.

Hebreos 6:2

Ina quëran aporihuanacasontaꞌ aꞌchintërainquëmaꞌ. Naporahuaton, “Nani imapachinaꞌ, sëꞌhuamotorahuatomaꞌ, Yosë nontocoꞌ inari catahuacaso marëꞌ,” itërainquëmaꞌ. Ina quëran Yosë ananpitaantainpoaso yaꞌhuërinsontaꞌ aꞌchintërainquëmaꞌ. “Ayaroꞌ tahuëri yaꞌipinpoaꞌ noꞌtëquën shaꞌhuitarinpoaꞌ. Co noyahuëꞌ nipisopita anaꞌintomiatarin,” itërainquëmaꞌ. Yaꞌnan imapomaꞌ, inapitaꞌton anitotërainquëmaꞌ. Inasoꞌ noya nipirinhuëꞌ, co inaíchin yonquicasoꞌ yaꞌhuërinhuëꞌ.

2 Juan 1:11

Co Quisocristo natëtonahuëꞌ, co noyahuëꞌ nipi. Ama piꞌpian tërantaꞌ natanacamasoꞌ nohuantocosohuëꞌ. Canpitataquë nisha nanan aꞌchintohuachinquëmaꞌ, aꞌnaquën nonpin nanan imaponaꞌ nimara. Imapachinaꞌ, ina marëꞌ canpitantaꞌ oshahuanaramaꞌ.

Apocalipsis 18:4

Ina topachina, inápa quëran aꞌnari itërin: —Yaꞌipi imaramasopita pënënaranquëmaꞌ, natanco. Niꞌcona papironiaroꞌsaꞌ anishacancantochinënquëmaꞌ. Ina quëran pipiramaso pochin nicatomaꞌ, ama inapita pochin cancantocosohuëꞌ. Co noyahuëꞌ nipatamaꞌ, Yosë anaꞌintarinquëmaꞌ canpitantaꞌ.