1 Timoteo 4:8 - Chayahuita (Shahui)

⁸ Nani tahuëriya sacatohuatëhuara, chinipirëhuahuëꞌ, noya noya Yosë imacasoꞌ yonquihuatëhuaꞌ, achinicancaninpoaꞌ. Achinicancanpachinpoaꞌ, noya noya nisarëhuaꞌ, tënahuë. Noya noya imapatëhuaꞌ, isoroꞌpaquë noya nanpiarëhuaꞌ. Aꞌna tahuërintaꞌ Yosëꞌpaꞌ nanpimiatarihuaꞌ.

1 Timoteo 4:8 ပူးပေါင်းရင်းမြစ်များ

Salmos 145:19

Noya nicatona natëpisopitasoꞌ, Siniorori nohuantopisoꞌ acotërin. Catahuacaso marëꞌ nontohuachinara, natanaton nichaꞌësarin.

Salmos 37:11

Sano piyapiroꞌsaso nipirinhuëꞌ, iso noꞌpaꞌ huaꞌanëntaponaꞌ. Naporahuatonaꞌ, sano cancantapi huachi.

Salmos 37:29

Noya nipisopitasoꞌ, iso noꞌpaꞌ huaꞌanëntaponaꞌ. Naporahuatonaꞌ, inaquë yaꞌhuëmiataponaꞌ.

Salmos 37:9

Co noyahuëꞌ nipisopitasoꞌ, yaꞌhuëpiso noꞌpa quëran aꞌpaponaꞌ. Sinioro chinotopisopitaso nipirinhuëꞌ, yaꞌhuëpisoꞌ noꞌpaꞌ huaꞌanëntaponaꞌ.

Salmos 84:11

Siniorosoꞌ Yosë niꞌton, paꞌpoyarinpoaꞌ. Aꞌpintatë pochin catahuarinpoa noꞌtëquën yonquicasoꞌ. Noyasáchin nipatëhuaꞌ, nosororinpoaꞌ. Noya nicatonpoaꞌ, noya nininsoꞌ co apiratërinpoahuëꞌ.

Proverbios 22:4

Sano piyapi nicatëhua Yosë natëhuatëhuaꞌ, maꞌhuanacasoꞌ, huaꞌqui nanpicasoꞌ, noya nicainënpoasoꞌ, inapita quënanarihuaꞌ.

Jeremías 6:20

Israiroꞌsanquëmaꞌ, canpitaso Sapa noꞌpa quëran yonarin pochin nininsoꞌ quëshiramaco. Pimo nararoꞌsanta áquë noꞌparoꞌsa quëran quëshiramaco. Inapita quëshipiramacohuëꞌ: ¡Topinan quëran quëshiramaco! Chinotamacoso marëꞌ artaronëhuëquë maꞌsha tëparahuatoma aꞌnaquën yaꞌipi ahuiquitëramaꞌ. Aꞌnaquënsoꞌ, piꞌpiyan ahuiquitëramaꞌ. Inaporamasopita, ¡yaꞌipi co noyahuëꞌ niꞌnahuë!” tënin.

Mateo 12:32

Casoꞌ Yosë quëran quëmapico nipirahuë pinopatamaco, ina marëꞌ oshahuanpiramahuëꞌ, oshanëma marëꞌ sëtohuatamaꞌ, inquitarinquëmaꞌ. Nipirinhuëꞌ, Ispirito Santo pinopatamaꞌ, co oshanëmaꞌ inquitarinquëmahuëꞌ. Co onporontaꞌ inquitarinquëmahuëꞌ,” itërin Quisosori.

Mateo 19:29

Aꞌnaquëma mini imamacoso marëꞌ maꞌshanëmaꞌ pataramaꞌ. Ina marëꞌ Yosë acanaarinquëmaꞌ. Aꞌnaquëmaꞌ pëinëmaꞌ, iyaparimaꞌ, oshiparimaꞌ, tataparimaꞌ, mamaparimaꞌ, saꞌamaꞌ, huiꞌnamaꞌ, noꞌpanëmaꞌ inapita pataramaꞌ aꞌchinacaso marëꞌ. Inapohuatamaꞌ, aꞌnaíchin marëꞌ pasa aquëtë canarëso pochin quëtarinquëmaꞌ. Ina quëran aꞌna tahuëri Yosëꞌpaꞌ nanpimiataramaꞌ.

Mateo 6:33

Napoaton Yosë naꞌcon naꞌcon yonquicoꞌ. Aꞌnapitantaꞌ catahuacoꞌ huaꞌanëntërinquë yaꞌconacaiso marëꞌ. Yosë nontocoꞌ noyasáchin yonquicamaso marëꞌ. Ina pochin cancantohuatamaꞌ, catahuarinquëmaꞌ. Ina nohuanton, maꞌsha pahuantërinquëmasopita yaꞌhuëtarinquëmaꞌ.

Marcos 10:30

Ca imamacoso marëꞌ napohuatamaꞌ, Yosë naꞌcon naꞌcon quëtantarinquëmaꞌ. Isoroꞌpaquë chachin pasaroꞌ aquëtë pochin pëiroꞌsaꞌ, iyaroꞌsaꞌ, oshiroꞌsaꞌ, mamaroꞌsaꞌ, huaꞌhuaroꞌsaꞌ, noꞌparoꞌsaꞌ inapita quëtarinquëmaꞌ. Noya cancantaramaꞌ. Napoaponahuëꞌ, aparisitarinënquëma antaꞌ. Aꞌna tahuëriso huachi Yosëꞌpaꞌ nanpimiataramaꞌ.

Lucas 5:38

Shaꞌmoroꞌ huinosoꞌ nasha morsaquë taꞌpanëꞌ. Huino, morsantaꞌ noya nisarin.

Romanos 8:28

Yosë nosorohuatëhuaꞌ, noyasáchin yonquirinpoaꞌ. Maꞌsha onpohuatëhuara, naꞌcon catahuarinpoaꞌ. Piꞌpian parisitapirëhuahuëꞌ, ina nohuanton, parisitërëhua quëran noya noya pipiarëhuaꞌ. Achinicancaninpoaꞌ niꞌton, noya noya imarihuaꞌ. Nani huayoninpoaꞌ ina nohuantërinsoꞌ nicacaso marëꞌ.

1 Corintios 3:22

Ina nohuanton, carinquëmaꞌ aꞌchintëranquëmaꞌ. Aporosë, Pitro, inapitantaꞌ Yosëri aꞌparin aꞌchintinquëmaso marëꞌ. Nani maꞌsha isoroꞌpaquë quëtërinpoaꞌ noya yaꞌhuëcaso marëꞌ. Anoyacancantërinpoaꞌ Yosë nohuitatëhuaꞌ noya noya nanpicaso marëꞌ. Chiminpatëhuaꞌ, yaꞌhuërinꞌpaꞌ noya noya yaꞌhuëcontarihuaꞌ. Ipora tahuëriꞌsaꞌ noya catahuarinpoaꞌ. Oꞌmantacasoꞌ tahuërintaꞌ co naniantarinpoahuëꞌ. Noyasáchin yonquirinpoaꞌ.

1 Corintios 8:8

Tëhuënchachin caꞌpatëhuaꞌ, co ina marëꞌ oshahuanëhuahuëꞌ. Aꞌpohuatëhuaꞌ, co ina marëꞌ Yosë noya noya niꞌninpoahuëꞌ. Co inasoꞌ cosharoꞌ yonquirinhuëꞌ. Cancanënpoa quëran noya yonquicasoꞌ naꞌcon naꞌcon nohuantërin.

1 Timoteo 4:7

Nonpin nananoꞌsaso nipirinhuëꞌ tananpitëquëꞌ. Inahuara yonquinëna quëran naporapi niꞌton, tananpitëquëꞌ. Inapitasoꞌ topinan quëran aꞌchinapi. Quëmaso nipirinhuëꞌ nani tahuëri yonquiquëꞌ Yosë noya imacaso marëꞌ.

1 Timoteo 6:3

Quisocristo noꞌtëquën aꞌchintërinpoaꞌ. Natëhuatëhuaꞌ, noya noya cancantarihuaꞌ. Aꞌnaquënso nipirinhuëꞌ Sinioro nanamën co natëtonahuëꞌ, nisha aꞌchinpi. Nonpin nananoꞌsaꞌ aꞌchinapi.

1 Timoteo 6:5

Nitapicancantatonaꞌ, co niquëꞌyapihuëꞌ. Iráca Yosë nanamën nitotopirinahuëꞌ, ina naniantatonaꞌ, co huachi noꞌtëquën yonquipihuëꞌ. Maꞌsha canacaiso marëꞌ Yosë yaimaconpi. Co ina marëꞌ imacasohuëꞌ nipirinhuëꞌ, napopi. Ama inapitasoꞌ natanquësohuëꞌ.

1 Timoteo 6:6

Noꞌtëquën Yosë imapatëhuaꞌ, tëhuënchachin canamiatarihuaꞌ. Co naꞌa maꞌsha yaꞌhuëtopirinpoahuëꞌ, sano cancantohuatëhuaꞌ, nóya yaꞌhuarihua huachi.

2 Timoteo 3:5

“Quiyantaꞌ Yosë imarai,” topirinahuëꞌ, co tëhuënchachin imapihuëꞌ. Chinotopirinahuëꞌ, co cancanëna quëran huarëꞌ natëpihuëꞌ niꞌton, co Yosëri catahuarinhuëꞌ ina pochin cancantacaisoꞌ. Ama inapita natanquësohuëꞌ. Tananpitëquëꞌ paꞌinaꞌ.

Tito 3:8

Noꞌtëquën shaꞌhuitëranquën. Quëmantaꞌ inachachin aꞌchintëquëꞌ, tënahuë. Pënënáquëꞌ yaꞌipi imapisopita noya nicacaiso marëꞌ. Aꞌchintëranquënsosoꞌ nóya imacasoꞌ. Natëhuatëhuaꞌ, noya noya yaꞌhuarihuaꞌ.

Hebreos 13:9

Aꞌnaquën nisha aꞌchintohuachinënquëmaꞌ, ama natancosohuëꞌ, nonpintochinënquëmaꞌ. Noꞌtëquën yonquicoꞌ. Nisha nisha nicacasoꞌ pënënpirinënpoahuëꞌ, co ina quëran noya cancantërëhuahuëꞌ. Naꞌa piyapiꞌsaꞌ nisha nisha cosharoꞌ aꞌpoaponaraihuëꞌ, co noya cancantopihuëꞌ. Quisocristoíchin nanitërin anoyacancantinpoasoꞌ. Inaora nohuanton, nosoroatonpoaꞌ, catahuarinpoaꞌ imamiatacasoꞌ.

1 Juan 2:25

Quisocristo chachin shaꞌhuitërinpoaꞌ: “Imamiatohuatamaco, Yosë nohuitatomaꞌ, nanpimiataramaꞌ,” itërinpoaꞌ.

Apocalipsis 3:12

Sopai minsëhuatamaꞌ, Yosë yaꞌhuërinquë chachin pantaramaꞌ. Piyon pëiꞌ achinirinso pochin naꞌcon nohuantaranquëmaꞌ. Napoaton yaꞌhuëmiatontaramaꞌ. Co pipiaramahuëꞌ. Yosë co onporontaꞌ aꞌpoarinquëmahuëꞌ. Nininën chachin acotaranquëmaꞌ. Aꞌna tahuëri panca ninanoꞌ yaꞌhuapon. Inápa quëran oꞌmararin. Nasha Quirosarin itopisoꞌ. Ina nininëontaꞌ acotaranquëmaꞌ. Cantaꞌ Quisosoco oꞌmantahuato, nasha nininëhuë acotaranquëmaꞌ. Co onporontaꞌ aꞌpoaranquëmahuëꞌ.

Apocalipsis 3:21

Nani sopai minsërahuato, Tata Yosëꞌpaꞌ yaꞌhuarahuë. Yaꞌipiya huaꞌanëntarai. Canpitantaꞌ sopai minsëhuatamaꞌ, Yosëꞌpaꞌ noya acoaranquëmaꞌ. Canpitaroꞌco huaꞌanëntarahuë.

1 Samuel 15:22

Napotohuachina Samoirori itapon: “Maꞌsha Sinioro marëꞌ tëpatona piꞌpian ahuiquitacaisoꞌ, noya. Yaꞌipi ahuiquitacaisontaꞌ, noya. Sinioro camaitërinso natëcasoso nipirinhuëꞌ, noya noya. Maꞌsha Sinioro marëꞌ tëpatona piꞌpian ahuiquitacaisoꞌ, noya. Carniro tomaquën ahuiquitasontaꞌ, noya. Camaitërinso noya natanatë natëcasoso nipirinhuëꞌ, noya noya.