1 Timoteo 4:6 - Chayahuita (Shahui)

⁶ Nani pënënanquën. Ina nanan aꞌchinpatan, noya nisaran. Quisocristo noya niꞌsarinquën. Cosharoꞌ achinirinposo pochin Yosë nanamën natëhuatan, achinicancanarinquën. Noꞌtëquën aꞌchintërainquën niꞌton, noya imasaran.

1 Timoteo 4:6 ပူးပေါင်းရင်းမြစ်များ

Salmos 19:7

Sinioro pënëntërinsontaꞌ, noya noya. Anitotohuachinpoaꞌ, anoyacancantërinpoaꞌ. Shaꞌhuirinsopita noya natëhuachinaꞌ, apínapichin yonquipisopitantaꞌ, yonquínanhuan quëparitapi.

Jeremías 15:16

Quëma nontohuatancora, paꞌyátërahuë natanaꞌhuasoꞌ. Huaꞌanëntëranco niꞌton, quëma nanamën acapacancamiatërinco. Quëmaso Sinioro Yosënquën, yaꞌipi nanitaparan.

Mateo 13:52

—Yosë quiricanën nani nitotaramaꞌ. Yosë huaꞌanëntërinsoꞌ aꞌchintëranquëmaꞌ niꞌton, pëiꞌ huaꞌanën pochin nisaramaꞌ. Pëiꞌ huaꞌanën noya nipachina, yaꞌipi pëinënquë yaꞌhuëpisopita noya nocomarin. Nani naꞌcon aꞌchintëranquëmaꞌ Yosë nanamën aꞌchinacamaso marëꞌ. Iráca ninshitopisoꞌ nitotëramaꞌ. Naporahuaton, aꞌnantaꞌ nashamiachin aꞌchintaranquëmaꞌ. Yaꞌipiya nitotatomaꞌ, aꞌchintëraꞌpiaramaꞌ, itërin Quisosori.

Lucas 1:3

Cantaꞌ yaꞌipi nanamën nitotërahuë. Huaꞌquiꞌ natanato, nani noyá nitotërahuë. Napoaton, iya Tiohuiro ninshichinquën, tënahuë. Quëmasoꞌ paꞌpi noya piyapinquën niꞌton, ninshitaranquën. Yaꞌnan nininso quëran huarëꞌ yaꞌipiya ninshitaranquën.

Hechos 1:15

Ina quëran naꞌa Quisoso imapisopita niyontonpi. Pasa cato shonca piyapiꞌsa pochin yaꞌhuëpi. Pitrori huancánachin huanirahuaton, itërin:

Hechos 20:31

Napoaton iyaroꞌsaꞌ, niꞌcona nonpintochinënquëmaꞌ. Cara piꞌipi catahuaranquëmaꞌ. Tahuërirë chachin, tashirë chachin pënënanquëmaꞌ. Naꞌcon nosororanquëmaꞌ niꞌton, naꞌnëto, aꞌnaya aꞌnayanquëmaꞌ pënënanquëmaꞌ. Ina yonquiatomaꞌ, nipënëncoꞌ, nicatahuacoꞌ.

Hechos 20:35

Canpitantaꞌ nonanco. Sacatatomaꞌ, pahuantërinsopita maꞌsha quëtocoꞌ. Sinioro Quisoso noninsoꞌ yonquicoꞌ. ‘Aꞌnapita maꞌsha topinan quëtohuachinquëmaꞌ, noya cancantëramaꞌ. Nipirinhuëꞌ, canpitarintaꞌ nosoroatomaꞌ, topinan quëtohuatamaꞌ, noya noya cancantaramaꞌ,’ tënin Quisoso,” itërin Paonori.

Romanos 15:15

Napoaponahuëꞌ, chiníquën miachin pënënatënquëmaꞌ, ninshitaranquëmaꞌ naꞌcon naꞌcon ayonquicaꞌhuanquëmaso marëꞌ. Yosë nosoroatonco, acorinco nanamën aꞌchinaꞌhuaso marëꞌ.

1 Corintios 4:17

Ina marëꞌ Timotio aꞌpatëranquëmaꞌ. Inasoꞌ noya niꞌnahuë. Aꞌchintohuatëra, Quisocristo imarin niꞌton, huiꞌnahuë pochin niꞌnahuë. Nóya Sinioro imarin. Yaꞌipi naporahuësoꞌ ayonquiarinquëmaꞌ noya noya imacamaso marëꞌ. Insëquësona paꞌpatëra, Quisocristo nanamënsáchin aꞌchinahuë. Imapisopita niyontonpachinara, aꞌchintërahuë.

2 Corintios 11:23

“Quisocristo shaꞌhuitërincoi niꞌtoi, natërai,” itopirinënquëmahuëꞌ. ¡Casoꞌ naꞌcon naꞌcon natërahuë! Inapitasoꞌ nocaninaco niꞌton, huaꞌyantërinso pochin nonato, piꞌpian inapita pochin nonchinquëmaꞌ noꞌtëquën yonquicamaso marëꞌ. Yosë marëꞌ casoꞌ chini chiníquën sacatërahuë. Paꞌsápato, Yosë nanamën aꞌchinahuë. Ina marëꞌ naꞌcon naꞌcon parisitaporahuëꞌ, ahuantërahuë. Inantaꞌ shaꞌhuichinquëmaꞌ. Aꞌchinahuëso marëꞌ naꞌaroꞌ tashinan pëiquë poꞌmorinaco. Naꞌaroꞌ ahuërinaco. Shitëparinaco.

2 Corintios 3:6

Ina nani acorincoi aꞌchinaꞌhuaiso marëꞌ. Acohuachincoira, catahuarincoi nasha quëran anoyatërinso aꞌchintaꞌhuainquëmaso marëꞌ. Ina imapatëhuaꞌ, Ispirito Santo catahuarinpoaꞌ Yosë nohuitatëhuaꞌ nanpimiatacaso marëꞌ. Iráca anoyatërinso Moisësëri ninshitopirinhuëꞌ. Ina imapatëhua, co onporontaꞌ noya cancantërëhuahuëꞌ. “Co natëhuatamahuëꞌ, chiminpatamaꞌ, anaꞌintacasoꞌ yaꞌhuërin,” tënin. Co ina aꞌchintërainquëmahuëꞌ.

2 Corintios 6:4

Maꞌsona tërantaꞌ nipatoira, Yosëíchin natërai piyapiꞌsaꞌ nicatonacoi ina yonquicaiso marëꞌ. Aparisitopirinacoihuëꞌ, co iꞌhuërëtëraihuëꞌ. Maꞌsha, cosharoꞌ, inapita pahuantopirincoihuëꞌ, ahuantatoi, chiníquën cancantërai. Maꞌsha onpoapoiraihuëꞌ, co paꞌyanaihuëꞌ.

Efesios 6:21

Iya Tiquico yaꞌipi naporahuësoꞌ shaꞌhuitarinquëmaꞌ nitotamaso marëꞌ. Inasoꞌ naꞌcon nosoroato, iyahuë pochin niꞌnahuë. Sinioro nanamën noya aꞌchinarin.

Filipenses 2:20

Inasoꞌ naꞌcon nosororinquëmaꞌ. Cancanën quëran huarëꞌ yacatahuarinquëmaꞌ. Ca pochachin nosororinquëmaꞌ. Inasáchin ina pochin cancantërin.

Filipenses 2:22

Timotioso nipirinhuëꞌ nohuitëramaꞌ. “Inasoꞌ noya quëmapi,” topi yaꞌipi piyapiꞌsaꞌ. Huiꞌnahuë pochin niꞌton, catahuarinco Yosë nanamën aꞌchinaꞌhuaso marëꞌ. Inantaꞌ nitotëramaꞌ.

Filipenses 3:16

Anitotohuachinpoaꞌ, ama topinan quëran natahuansohuëꞌ. Naꞌcon yonquiaꞌahuaꞌ natëcaso marëꞌ. Yaꞌipi cancanënpoa quëran huarëꞌ imahuaꞌ.

Colosenses 2:19

Inapitasoꞌ co tëhuënchachin Quisocristo imapihuëꞌ. Inasáchin motënpoaꞌ pochin nicaton, huaꞌanëntarinpoaꞌ. Niꞌcoꞌ. Nonënpoaꞌ nisha nisha yaꞌhuëtërin. Motënpoari yaꞌipi camairin noya sacatacaiso marëꞌ. Inapochachin imarëhuasopitantaꞌ Quisocristoíchin noya camairinpoaꞌ. Achinirinpoaꞌ soꞌsorëso pochin nicacaso marëꞌ. Ina pochin nicacasoꞌ Yosë nohuantërin.

Colosenses 3:16

Yaꞌipi Quisocristo nanamën yonquirácoꞌ. Naꞌcon ina yonquicoꞌ. Noya nitotatomaꞌ, niaꞌchintocoꞌ, nipënëncoꞌ. Yosë cantanën nisha nisha nininsopita cantacoꞌ. Sarmo quirica nontatomaꞌ, inantaꞌ cantacoꞌ. Canpitaora yonquinëma quëraontaꞌ ocoirahuatomaꞌ, cantacoꞌ: “Ma noyanquëncha Tata niꞌton, catahuarancoi paya,” itatomaꞌ, cancanëma quëran huarëꞌ cantacoꞌ.

Colosenses 4:7

Iya Tiquico aꞌpataranquëmaꞌ. Inasoꞌ nóya niꞌnahuë. Iyahuë pochachin nosororahuë. Noya catahuarinco. Inantaꞌ Sinioro natëton, noya nanan aꞌchinarin. Onpopinsona yaꞌhuërahuësoꞌ shaꞌhuitarinquëmaꞌ.

1 Tesalonicenses 3:2

Timotio aꞌpatërainquëmaꞌ nitotacaso marëꞌ. Inantaꞌ noya imarin. Yosëri acorin Quisocristo nanamën aꞌchinacaso marëꞌ. Achinicancainquëmaso marëꞌ aꞌpatërainquëmaꞌ.

1 Timoteo 1:10

Nisha nisha nicacaisoꞌ yonquipi. Saꞌinaꞌ, soꞌinaꞌ inapita yaꞌhuëtaponaraihuëꞌ, monshihuanpi. Quëmapi capini, sanapi capini nisëꞌhuapi. Piyapiꞌsa chachin ihuatopi paꞌanacaiso marëꞌ. Nonpintopi. “Tëhuënchachin noꞌtëquën nonahuë,” taponaraihuëꞌ, nonpinpi. Yosësoꞌ noya nicacasoꞌ aꞌchintopirinpoahuëꞌ, co nohuantopihuëꞌ natëcaisoꞌ. Ina pochin nipisopita tëhuënchinsoꞌ pënënacasoꞌ yaꞌhuërin.

1 Timoteo 4:16

Nani tahuëri yonquiquëꞌ nóya imacamaso marëꞌ. Naporahuaton, noꞌtëquën aꞌchinquëꞌ. Inapohuatan, Yosë catahuarinquën imamiataton chaꞌëcaso marëꞌ. Aꞌnapitantaꞌ natanpachinquën, chaꞌësapi.

1 Timoteo 6:3

Quisocristo noꞌtëquën aꞌchintërinpoaꞌ. Natëhuatëhuaꞌ, noya noya cancantarihuaꞌ. Aꞌnaquënso nipirinhuëꞌ Sinioro nanamën co natëtonahuëꞌ, nisha aꞌchinpi. Nonpin nananoꞌsaꞌ aꞌchinapi.

2 Timoteo 1:6

Iráca sëꞌhuamotorahuatënquën, acoranquën pënëntamaso marëꞌ. Naporoꞌ Yosë chachin ananitërinquën niꞌton, nóya pënëntëran. Imapisopita noya aꞌchintëran. Iporantaꞌ api, ina yonquiaton chiníquën cancantëquëꞌ. Niꞌquëꞌ. Pënsha yatacopihuachina, pishitohuatëra noya orotaantarin. Inapochachin chiníquën cancantaton, pënëntaantaquëꞌ, tënahuë. Napoaton ninshitaranquën achinicancanaꞌhuanquënso marëꞌ.

2 Timoteo 3:10

Quëmaso nipirinhuëꞌ noya cancantaton, huaꞌquiꞌ caꞌtananco. Yosë nanamën aꞌchinpatëra, noya natanan. Yaꞌipi naporahuësoꞌ niꞌnan. Yosëíchin yonquiato, imamiatarahuë. Cancanëhuë quëran huarëꞌ natërahuë. Co piyapiꞌsaꞌ noꞌhuirahuëꞌ, nosororahuë. Maꞌsha onpoaporahuëꞌ, chiníquën cancantërahuë.

2 Timoteo 4:3

Aꞌna tahuëri piyapiꞌsaꞌ co nohuantapihuëꞌ Yosë nanamën natanacaisoꞌ. Nonpin nananoꞌsaꞌ nisha nisha aꞌchinpachinaꞌ, paꞌyatapi. Inahuara costapisorachin yanatanapi.

Tito 2:1

Quëmaso nipirinhuëꞌ Yosë nanamën noꞌtëquën aꞌchinquëꞌ. Ina aꞌchinaton, pënënquëꞌ noya nicacaiso marëꞌ.

1 Pedro 2:2

Yosë huëntonënquë yaꞌconpatëhuaꞌ, huaꞌhuasha nasha huaipiso pochin ninëhuaꞌ. Niꞌcoꞌ. Canopiaꞌhuaya shoꞌsho apira apira nayarin. Shoꞌshotaton, noya chinirarin. Inapochachin canpitantaꞌ Yosë noninso chachin naꞌcon naꞌcon nohuantocoꞌ. Ina yonquihuatamaꞌ, oshaquëran noya noya nisaramaꞌ. Chiníquën cancantatomaꞌ, noya chaꞌësaramaꞌ. Yosë nanamënáchin achinicancaninpoaꞌ.

2 Juan 1:9

Aꞌnaquën co Quisocristo nanamënáchin imapihuëꞌ. “Quiyasoꞌ naꞌcon naꞌcon nitotërai,” toconpi. Inapitasoꞌ co Tata Yosë nohuitapihuëꞌ. Quisocristo nanamën imapatëhuaꞌ, Tata Yosë nohuitarihuaꞌ. Huiꞌniontaꞌ nohuitarihuaꞌ.

Judas 1:5

Nani nitotopiramahuëꞌ, naquëranchin shaꞌhuitantaranquëmaꞌ yonquicamaso marëꞌ. Iráca Yosë piyapinënpita Iquipito parti parisitopirinahuëꞌ, Yosëri nichaꞌërin. Yaꞌipiya noya pipiponaraihuëꞌ, ina quëran aꞌnaquën co yanatëhuachinahuëꞌ, Yosëri chiníquën anaꞌintaton, ataꞌhuantërin. Inapochachin iporantaꞌ imaponaraihuëꞌ nisha cancantohuachinaꞌ, chiníquën anaꞌintarin.