1 Timoteo 4:14 - Chayahuita (Shahui)

¹⁴ Iráca ansianoꞌsaꞌ niyontonahuatonaꞌ, acorinënquën Yosë nanamën aꞌchinamaso marëꞌ. Sëꞌhuamotorahuatënënquën, nanan quëtërinënquën aꞌchinamaso marëꞌ. Ina quëran Yosë catahuarinquën nóya aꞌchinamasoꞌ. Ama ina naniantaton, topinan yaꞌhuëquësohuëꞌ.

1 Timoteo 4:14 ပူးပေါင်းရင်းမြစ်များ

Hechos 11:30

Nani coriqui yontonpachinara, Pirnapi, Saono, inapita quëtopi quëpacaiso marëꞌ. Quirosarinquë quëparahuatonaꞌ, ansianoꞌsaꞌ quëtonpi pahuantërinsopita quëtacaiso marëꞌ.

Hechos 13:3

Napoaton co coshatatonaraihuëꞌ, inapita marëꞌ chiníquën Yosë nontopi. Nani Yosë nontohuachinara, sëꞌhuamotorahuatonaꞌ, acopi paatonaꞌ aꞌchinacaiso marëꞌ. Ina quëran aꞌpapi.

Hechos 19:6

Ina quëran Paonori sëꞌhuamotohuachina, Ispirito Santori yaꞌcoancantimarin. Ina nohuanton, nisha nisha nananquë nonpi. Co nitotopirinahuëꞌ, aꞌnaroáchin nonpi antaꞌ. Naporahuaton, Ispirito Santori catahuarin Yosëri anitotërinso shaꞌhuicaiso marëꞌ.

Hechos 22:5

Yanitotohuatamaꞌ, corto huaꞌan chini chiníquën nanantërinsontaꞌ inachachin shaꞌhuitarinquëmaꞌ. Cotio ansianoꞌsantaꞌ nitotopi. Inapitasoꞌ quirica ninshitërinaco iyaroꞌsaꞌ Tamascoquë yaꞌhuëpisopita quëtonaꞌhuaso marëꞌ. Inatohuaꞌ paꞌnahuë Quisoso imapisopita macaꞌhuaso marëꞌ. ‘Tonporahuato, Quirosarinquë quëmaarahuë anaꞌintacaiso marëꞌ, taꞌto,’ paꞌnahuë.

Hechos 6:6

Inapita huayonahuatonaꞌ, caꞌtanoꞌsaquë quëpi. Yosë nontahuatonaꞌ, sëꞌhuamotopi acocaiso marëꞌ. Inapotatonaꞌ, acopi huachi.

Hechos 8:17

Ina quëran sëꞌhuamotohuachinara, Ispirito Santori yaꞌcoancantërin.

1 Tesalonicenses 5:19

Ispirito Santo yaꞌcoancantërinquëmaꞌ. Cancanëmaquë nontohuachinquëmaꞌ, aꞌnaroáchin natëcoꞌ. Niꞌcoꞌ. Pën noya orotohuachina, noya napëntërëꞌ. Inapochachin Ispirito Santo yacatahuarinpoaꞌ noya cancantacaso marëꞌ. Ama pën atacopitërëso pochin nitocosohuëꞌ.

1 Timoteo 1:18

Huiꞌnahuë pochin api, niꞌnanquën. Iꞌhua chachin ansianoꞌsaꞌ Yosë nontatonaꞌ, acorinënquën Yosë nanamën aꞌchinamaso marëꞌ. Naporoꞌ Yosëri anitotërinsoꞌ shaꞌhuitatënën, pënëninënquën. “Yosë nohuanton, api, nanamën noya aꞌchinaran. Ina marëꞌ acorinquën. Parisitaponahuëꞌ, catahuarinquën. Napoaton Quisoso aꞌchininso chachin aꞌchinquëꞌ,” itërinënquën. Iporantaꞌ inachachin pënënaranquën. Quisoso nanamën chachin aꞌchinquëꞌ sopai minsëcaso marëꞌ. Tëhuënchachin sopai yacanapirinpoahuëꞌ, Quisocristo catahuarinpoaꞌ minsëcaso marëꞌ.

1 Timoteo 4:15

Yosë nanamën naꞌcon yonquiaton, aꞌchináquëꞌ. Yaꞌipi cancanën quëran huarëꞌ imaquëꞌ. Ina quëran pënënpatan, aꞌnapita noya niꞌsarinënquën. “Ma noya Yosëri catahuarin niꞌton, noya noya pënëntërin,” tosapi.

1 Timoteo 5:17

Aꞌnaquën ansianoꞌsaꞌ noya noya Yosë marëꞌ sacatopi. Paatonaꞌ, nani tahuëri aꞌchinápi, pënëntápi. Inapita noya noya niꞌcoꞌ.

1 Timoteo 5:19

Nanan natantohuatan, ama aꞌnaroáchin natëquësohuëꞌ. Aꞌna piyapiriachin ansiano shaꞌhuirapihuachin, co natëcasoꞌ yaꞌhuërinhuëꞌ. Catoyaꞌpihuë nipon, carayaꞌpihuë nipon, inachachin shaꞌhuirapihuachinaꞌ, naporo huarëꞌ natëtëquëꞌ.

1 Timoteo 5:22

Ansiano yaacohuatan, noya yonquiaton, oshaquëran acoquëꞌ. Aꞌnaroáchin acohuatan, co noyahuëꞌ nipachina, quëmantaꞌ naꞌianan. Noyasáchin niquëꞌ.

1 Timoteo 6:12

Iráca imapisopita niyontonpachinara, chiníquën cancantaton, “Casoꞌ Quisocristo imarahuë,” itëran. Napoaton “Yosë catahuarinco,” taꞌton, sopai minsëquëꞌ. Yosë nani huëntonënquë ayaꞌconinquën niꞌton, imamiatëquëꞌ. Ina quëran aꞌna tahuëri inápaquë nanpimiataran.

2 Timoteo 1:6

Iráca sëꞌhuamotorahuatënquën, acoranquën pënëntamaso marëꞌ. Naporoꞌ Yosë chachin ananitërinquën niꞌton, nóya pënëntëran. Imapisopita noya aꞌchintëran. Iporantaꞌ api, ina yonquiaton chiníquën cancantëquëꞌ. Niꞌquëꞌ. Pënsha yatacopihuachina, pishitohuatëra noya orotaantarin. Inapochachin chiníquën cancantaton, pënëntaantaquëꞌ, tënahuë. Napoaton ninshitaranquën achinicancanaꞌhuanquënso marëꞌ.