1 Timoteo 4:1 - Chayahuita (Shahui)

¹ Tëhuënchachin Ispirito Santo ninoton, aꞌninquëchin shaꞌhuitërinpoaꞌ: “Aꞌna tahuëri aꞌnaquën piyapiꞌsaꞌ Yosë nanamën aꞌporapi. Sopai natëtonaꞌ, nonpin nanan aꞌchinpachinaꞌ, imasapi. Ayaroꞌ tahuëri yaꞌcaritohuachin, naporapi,” tënin.

1 Timoteo 4:1 ပူးပေါင်းရင်းမြစ်များ

Génesis 3:13

Napotohuachina, sanapi yaꞌhuërëꞌ tahuërëtahuaton, itapon: —¿Onpoatonta naporansoꞌ? itërin. —Yaꞌhuan nonpintërinco niꞌton, caꞌnahuë, tënin sanapi.

Isaías 2:2

Ayaro tahuëri yaꞌcaritohuachin, Sinioro chinotacaso pëi yaꞌhuërinquë motopisoꞌ, Siniorori noya noya acoapon. Aꞌnapita motopiroꞌsa quëran ina inápa nisarin. Nisha nisha nacionquë yaꞌhuëpisopita inaquë huëcaponaꞌ.

Oseas 3:5

Ina piquëran israiroꞌsasoꞌ, Yosë chachin tahuërëtaantaponaꞌ. Naporahuaton aꞌnara Tapi copirno shiin, copirnonëna nisarin. Tahuëri yanitiquirahuachin, Sinioro noya nicatonaꞌ, chinotapi. Inapotohuachina inarintaꞌ, noya nicaton catahuaantapon.

Miqueas 4:1

Ayaro tahuëri yaꞌcaritohuachin, Sinioro chinotërëhuaso pëi yaꞌhuërinquë motopiaꞌhua, aꞌnapita motopiroꞌsa quëran noya noya Siniorori acoapon. Naporahuaton aꞌnapita motopiroꞌsa quëran ina inápa acoapon. Yaꞌipi isoroꞌpaquë yaꞌhuëpisopita inaquë huëcaponaꞌ.

Números 24:14

Iporasoꞌ mini quëma naporanso chachin, yaꞌhuërahuëquë paantarahuë. Napoaponahuëꞌ, coꞌhuara paꞌshátërasocohuëꞌ, maꞌsona pasopita aꞌna tahuëri onpotiinquëmaso shaꞌhuichinquën.

Mateo 18:7

Isoroꞌpaquë sacaiꞌ Yosë imacasoꞌ. Nisha nisha yaꞌhuërin piyapiꞌsaꞌ anishacancantacaisoꞌ. Ina marëꞌ oshahuanpi. Anishacancantonaꞌpiso nipirinhuëꞌ, naꞌcon naꞌcon oshahuanin. Yosëri chiníquën anaꞌintarin niꞌton, ¡maꞌhuantacha nisarin paya!

Lucas 17:1

Ina quëran caꞌtanoꞌsanënpita pënëantarin. “Nisha nisha maꞌsha yaꞌhuërin anishacancantiinpoasoꞌ. Nipirinhuëꞌ, anishacancantonaꞌpisoꞌ paꞌpi co noyahuëꞌ niꞌton, ¡maꞌhuantacha nisarin paya! Ina marëꞌ Yosëri chiníquën anaꞌintarin.

Juan 16:13

Nipirinhuëꞌ, Ispirito Santo oꞌmahuachin, yaꞌipi nanamëhuë aꞌchintarinquëmaꞌ. Noꞌtëquën anitotarinquëmaꞌ. Co inaora yonquirinsoꞌ aꞌchintarinquëmahuëꞌ. Yosë yonquirinso chachin aꞌchintarinquëmaꞌ. Aꞌna tahuëri maꞌsha onpocaisontaꞌ anitotarinquëmaꞌ.

Hechos 13:2

Aꞌna tahuëri co coshatatonaraihuëꞌ, Sinioro chinotopi. Napohuachinara, Ispirito Santori shaꞌhuitërin: “Pirnapi, Saono inapita nohuantërahuë paatonaꞌ, piyapiꞌsaꞌ aꞌchintacaiso marëꞌ. Ina marëꞌ inapita acorahuatomaꞌ, aꞌpacoꞌ paꞌinaꞌ,” itërin.

Hechos 17:18

Inaquë nisha nisha yonquipisoꞌ aꞌchinaꞌpiroꞌsantaꞌ huëꞌpi. Aꞌnaquën ipicorioroꞌsaꞌ itopi. Aꞌnaquëontaꞌ istoicoroꞌsaꞌ itopi. Paono quënanahuatonaꞌ, ninontopi. —Iso quëmapi paꞌpi nonaꞌpi. ¿Maꞌtaꞌ tëcapon naporin? itopi aꞌnaquën. —Ahuën. Nisha yosëroꞌsaꞌ imacaiso marëꞌ aꞌchinamara, topi aꞌnaquën. “Quisoso chiminin. Ina quëran nanpiantarin,” tëninso marëꞌ napotopi.

Hechos 20:23

Nisha nisha ninanoroꞌsaquë paꞌpatora, Ispirito Santo nohuanton, shaꞌhuitëraꞌpiarinaco: ‘Quirosarinquë paꞌpatan, tashinan pëiquë poꞌmoarinënquën, chiníquën aparisitarinënquën,’ itërinaco.

Hechos 21:11

Huëꞌsahuaton, Paono sintoronën ocoirahuaton, inaora tanpaquën nantënë chachin nitonporin. —Ispirito Santo nohuanton iyasha, ninorahuë. Quirosarinquë paꞌpatan, sintoronënquë nitonporahuëso pochachin cotioroꞌsaꞌ tonpoarinënquën. Nisha piyapiꞌsaquë yoꞌcoaninënquën anaꞌintinënquënso marëꞌ, itërin.

Hechos 28:25

Nisha nisha yonquiatonaꞌ, yapipipi. Yapipihuachinara, Paonori itaantarin: —Ma noꞌtëquën iyaroꞌsaꞌ Ispirito Santori nontërin shimashonënpoaꞌ pënënacaso marëꞌ. Ina nohuanton, Isaiasë ninshitaton, naporin:

1 Corintios 10:20

Nisha piyapiꞌsaso nipirinhuëꞌ mamanshi moshacaiso marëꞌ maꞌsha tëpahuachinara, co Yosë yonquipihuëꞌ. Sopairoꞌsaꞌ yonquipi. Co casoꞌ nohuantërahuëꞌ canpitantaꞌ sopairoꞌsaꞌ yonquicamasoꞌ.

1 Corintios 11:19

Co yaꞌipi cancanëma quëran imapatamahuëꞌ, nisha nisha yonquiaramaꞌ. Co napopináchin yonquiaramahuëꞌ. Ina quëran Yosë cancanën manëhuasopita nohuitërinënpoaꞌ. Co yaꞌipinpoaꞌ nisha nisha yonquirëhuahuëꞌ. Aꞌnapitaso nipirinhuëꞌ co noya yonquiatonahuëꞌ, co noꞌtëquën imapihuëꞌ.

1 Corintios 12:11

Yaꞌipi imarëhuasopita catahuarinpoaꞌ. Aꞌnaíchin Ispirito Santo niponahuëꞌ, catahuarinpoaꞌ nisha nisha nitotacasoꞌ. Inaora nohuantërinsoꞌ ananitërinpoaꞌ.

1 Corintios 2:10

Imarëhuasopitaso nipirinhuëꞌ, nitotërëhuaꞌ. Yosë nohuanton, Ispirito Santo anitotërinpoaꞌ. Yaꞌipi Yosë yonquirinsopita Ispirito Santo nitotërin.

2 Corintios 11:3

Aꞌnaquënso nipirinhuëꞌ yaanishacancantërinënquëmaꞌ. Iráca yaꞌhuani Ipa nonpintërinso pochin yanonpintërinënquëmaꞌ ama Quisocristoíchin yonquicamaso marëhuëꞌ.

Deuteronomio 32:29

Yonquinahuanoꞌsa nipi naporini, shaꞌhuitërahuësoꞌ yonquiꞌitonahuëꞌ. Natëtopi naporini, co maꞌsha onpoꞌitonahuëꞌ, tënahuë.

Deuteronomio 4:30

Nisha nisha parisitápatomaꞌ, mamanshi chinotëramaso aꞌpoaramaꞌ. Ina aꞌpoatoma Sinioroíchin chinotocoꞌ. Napohuatamaꞌ, inaso nóya nichinapon chachin, co aꞌpoarinquëmahuëꞌ. Co ataꞌhuantarinquëmahuëꞌ. Noya cancantaantahuatamaꞌ, shimashonëmapitarëꞌ anoyatërinso yonquiaton catahuantarinquëmaꞌ: ‘Caso Yosëco niꞌto, noꞌtëquën nontëranquën,’ itërin niꞌton, catahuarinquëmaꞌ.

Colosenses 2:18

Nisha aꞌchinaꞌpiroꞌsaso nipirinhuëꞌ taponaꞌ: “Quiyasoꞌ anquëniroꞌsaꞌ chinotërai. Huaꞌnarëso pochin quënanai. Co canpitasoꞌ quiya pochin nipatamahuëꞌ, co noya cancantaramahuëꞌ,” itohuachinënquëmaꞌ, ama piꞌpisha tërantaꞌ natëtocosohuëꞌ. Inapitasoꞌ nonpinatonaꞌ, “Nani maꞌsha Yosë anitotërincoi niꞌton, noya noyacoi,” topirinahuëꞌ, inahuara yonquinëna quëran napopi.

2 Timoteo 3:13

Co noyahuëꞌ nipisopita, nonpintëroꞌsaꞌ, inapitasoꞌ aquë aquëtëꞌ co noyahuëꞌ nisapi. Naꞌcon piyapiꞌsa nonpintopi quëran, aꞌnapitarintaꞌ nonpintapi.

2 Timoteo 4:4

Yosë noꞌtëquën noninsoꞌ aꞌporahuatonaꞌ, piyapi yonquirinsoꞌ natëapi.

Santiago 3:15

Co Yosë nohuanton ina pochin cancantërëhuahuëꞌ. Piyapiꞌsaꞌ inahuara ina pochin yonquipi. Ninocanatonaꞌ, niapiratopi. Inachin yonquipi. Sopai nohuanton, ina pochin yonquipi.

1 Pedro 1:20

Iráca coꞌhuara isoroꞌpaꞌ yaꞌhuëyátërasohuëꞌ, Yosë yonquirin huiꞌnin aꞌpaimacaso marëꞌ. Ipora huarëꞌ yaꞌnorin canpitantaꞌ nichaꞌëinquëmaso marëꞌ. Nani ayaroꞌ tahuëri yaꞌcaritapon chachin yaꞌnorin.

2 Pedro 2:1

Iráca Yosëri acorinsopita noꞌtëquën pënëntopi. Aꞌnaquënso nipirinhuëꞌ nonpin nanan pënëntatonaꞌ, israiroꞌsaꞌ nonpintopi. Inapochachin iporantaꞌ aꞌnaquën nonpin nanan yaaꞌchintarinënquëmaꞌ. Noyasha nontapirinënquëmahuëꞌ, nonpintarinënquëmaꞌ. “Quiyantaꞌ imarai,” taponaraihuëꞌ, nonpin nanan aꞌchinapi anishacancantacaiso marëꞌ. Quisocristo nichaꞌëinpoaso marëꞌ chiminin. Inaíchin natëcaso nipirinhuëꞌ, nisha aꞌchinaꞌpiroꞌsasoꞌ co yanatëpihuëꞌ. Ina marëꞌ aꞌna tahuëri Yosëri anaꞌintarin. Aꞌnanaya anaꞌintarin.

2 Pedro 3:3

Isoꞌ naꞌcon yonquicoꞌ. Oꞌmantacasoꞌ tahuëri yaꞌcaritohuachin, co noyahuëꞌ piyapiꞌsaꞌ yaꞌhuaponaꞌ. Co Yosë natëtonaraihuëꞌ, maꞌsona yonquipisoꞌ nisapi. Co noyahuëꞌ cancantapi. Quisocristo shaꞌhuitërinpoasoꞌ tëhuaapi.

1 Juan 2:18

Co huaꞌquiya quëranhuëꞌ, apiaꞌhuaroꞌsaꞌ, Quisocristo oꞌmantararin. “Cristo yaoꞌmahuachin, inimiconën huëꞌsarin,” itërinënpoaꞌ. Nani natantëramaꞌ canpitantaꞌ. Iporasoꞌ naꞌa piyapiꞌsari Cristo yainimicotopi. Napoaton oꞌmantacasoꞌ tahuëri naniriarin, tënëhuaꞌ.

1 Juan 4:6

Quiyaso nipirinhuëꞌ Yosë nohuitatoi, noꞌtëquën aꞌchinai. Yosë imapisopita noya nataninacoi. Inasoꞌ noꞌtën nanan, topi. Co imapisopitasohuëꞌ nipirinhuëꞌ, co yanatërinacoihuëꞌ. Ispirito Santosoꞌ noꞌtëquënáchin nonin. Napoaton nonpin nanan paꞌyatopisopitasoꞌ co Ispirito Santo yanatëpihuëꞌ. Ina quëran nonpin nananoꞌsaꞌ nohuitërëhuaꞌ.

Judas 1:18

“Ayaroꞌ tahuëri naniriahuachin, co noyahuëꞌ quëmapiꞌsaꞌ yaꞌhuërapi. Yosë nanamën tëhuaapi. Co noyahuëꞌ cancantatonaꞌ, aꞌnaratipita nisapi,” itërinpoaꞌ.

Judas 1:4

Tëhuënchachin aꞌnaquënsoꞌ nonpin nanan aꞌchintarinënquëmaꞌ. Paꞌpi co noyahuëꞌ inapitasoꞌ. “Quiyantaꞌ imarai,” taponaraihuëꞌ, co noꞌtëquën aꞌchinpihuëꞌ. “Maꞌsona nohuantërëhuaso niahuaꞌ. Yosë nosororinpoaꞌ niꞌton, co anaꞌintarinpoahuëꞌ,” taꞌtonaꞌ, paꞌpi co noyahuëꞌ nipi. Noꞌpipi, monshihuanpi, aꞌnaratipita nipi. Naporahuatonaꞌ, co tëhuënchachin Quisocristo imapihuëꞌ, inasáchin natëcaso nipirinhuëꞌ. Ina marëꞌ Yosëri chiníquën anaꞌintarin. Iráca quëra huarëꞌ nani yonquirin anaꞌintacasoꞌ. Napoaton niꞌcona canpitantaꞌ nonpintochinënquëmaꞌ. Chiníquën cancantatomaꞌ, noꞌtëquën aꞌchincoꞌ.

Apocalipsis 13:14

Nisha nisha acoarin, sacaiꞌ nininsoꞌ. Maꞌsha paꞌpi tëꞌhuatoroꞌ nininsoꞌ niꞌtonënquë naporin. Piyapiꞌsari niꞌpachinaꞌ: “Tëhuënchachin inasoꞌ Yosë,” tosapi. Notohuaroꞌ piyapiꞌsaꞌ nonpintarin. Ina quëran itapon: “Panca mamanshi niahuaꞌ. Sahuëniquë ahuëatonaꞌ shitëpapirinahuëꞌ, noyataantarinsoꞌ nonanatëhuaꞌ chinotahuaꞌ,” itohuachinaꞌ, nisapi.

Apocalipsis 16:14

Sopairoꞌsaꞌ niꞌton, nani maꞌsha nanitapapi. Sacaiꞌ nininsopita nisapi piyapiꞌsari natëcaiso marëꞌ. Nonpintatonaꞌ, napoapi. Nisha nisha copirnoroꞌsaꞌ camairaꞌpiaponaꞌ quira nicacaiso marëꞌ. Anaꞌintacasoꞌ tahuëri nani yaꞌcaritëriarin niꞌton, niyontonaponaꞌ. “Canpoari Yosë minsëahuaꞌ,” taꞌtonaꞌ, napoaponaꞌ.

Apocalipsis 18:2

Oꞌmarahuaton, chiníquën nonin. “Nani huachi Papironia taꞌhuantarin. Panca ninanoꞌ niponahuëꞌ, taꞌhuantarin. Inaquë nisha nisha sopairoꞌsaꞌ yaꞌhuaponaꞌ. Nisha nisha chanaroꞌ caꞌtëroꞌsantaꞌ inaquë paꞌsapi.

Apocalipsis 18:23

Co huachi nanpara iꞌchinpiapihuëꞌ. Co huachi inaquë saꞌasapihuëꞌ. Iráca notohuaroꞌ maꞌsha paꞌanaꞌpiroꞌsaꞌ inaquë yaꞌhuatonaꞌ, naꞌcon canapirinahuëꞌ, noyá taꞌhuantapi. Naꞌcon pënotatonaꞌ, nisha nisha piyapiꞌsaꞌ isoroꞌpaquë anishacancantopirinahuëꞌ, Yosëri anaꞌintarin huachi,” tënin.

Apocalipsis 19:20

Quira nipachinara, huiri cahuario aipi huënsërinsoari canarin. Canarahuaton, maꞌsha paꞌpi tëꞌhuatoroꞌ nininsoꞌ masarin. Nonpin nanan pënëntonaꞌpintaꞌ, masarin. Inasoꞌ, sacaiꞌ nininsoꞌ nicaton, notohuaroꞌ piyapiꞌsaꞌ nonpintërin maꞌsha paꞌpi tëꞌhuatoroꞌ nininsoꞌ imacaiso marëꞌ. Marcanën niacotahuatonaꞌ, mamanshinën moshapirinahuëꞌ, minsëarin huachi. Minsërahuaton, cato chachin masahuaton, anaꞌintomiatarin. Nanpirapirinahuëꞌ, parisitopiquë tëꞌyatarin huachi. Inaquë panca sono shaꞌpimoꞌshirë chachin pën tënëntápon. Co onporontaꞌ pipiapihuëꞌ.

Apocalipsis 2:11

Imaramaco niꞌton, Ispirito Santo chachin nontarinquëmaꞌ. Huëratëhuanpatamaꞌ, noya natanatomaꞌ, yonquicoꞌ. Sopai minsëhuatamaꞌ, co parisitopiquë paatomaꞌ, parisitomiataramahuëꞌ. Nani huachi,” itëquëꞌ, ninshitohuatan, itërinco.

Apocalipsis 2:17

Imaramaco niꞌton, Ispirito Santo chachin nontarinquëmaꞌ. Huëratëhuanpatamaꞌ, noya natanatomaꞌ, yonquicoꞌ. Sopai minsëhuatamaꞌ, noya cancantarama huachi. Iráca israiroꞌsaꞌ Yosëri cosharoꞌ aꞌpatimarin, mana itopisoꞌ. Inachachin poꞌorahuësoꞌ carimantaꞌ quëchinquëmaꞌ sano cancantacamaso marëꞌ. Imaramaco niꞌton, nasha nininëmaꞌ aꞌnaya aꞌnayanquëmaꞌ acoꞌinquëmaꞌ. Canpitaora nitotaramaꞌ. Huiri naꞌpiquë ninshitahuato, quëchinquëmaꞌ. Cancanëma quëran noya noya nohuitaramaco huachi. Nani huachi,” itëquëꞌ, ninshitohuatan, itërinco.

Apocalipsis 2:29

Imaramaco niꞌton, Ispirito Santo nontarinquëmaꞌ. Huëratëhuanpatamaꞌ, noya natanatomaꞌ, yonquicoꞌ. Nani huachi,” itëquëꞌ, ninshitohuatan, itërinco.

Apocalipsis 2:7

Imaramaco niꞌton, Ispirito Santo chachin nontarinquëmaꞌ. Huëratëhuanpatamaꞌ, noya natanatomaꞌ, yonquicoꞌ. Sopai minsëhuatamaꞌ, Yosëꞌpaꞌ yaꞌhuëmiataramaꞌ. Inatohuaꞌ nanpirin nara nitërinsoꞌ caꞌpatamaꞌ, noya noya nanpimiataramaꞌ. Nani huachi,” itëquëꞌ, ninshitohuatan, itërinco Quisoso.

Apocalipsis 20:10

Ina quëran sopai anaꞌintomiatarin. Huaꞌquiꞌ piyapiꞌsaꞌ nonpintërin niꞌton, Yosëri anaꞌintarin. Panca sono shaꞌpimoꞌshirë chachin pën orotërinquë tëꞌyatarin. Co onporontaꞌ pipiarinhuëꞌ. Inaquë maꞌsha paꞌpi tëꞌhuatoroꞌ nininsontaꞌ parisitarin. Nonpin nanan pënëntonaꞌpintaꞌ inaquë chachin parisitarin. Tahuërirë chachin, tashirë chachin chiníquën parisitapi. Co onporontaꞌ sanoarinhuëꞌ. Co onporontaꞌ pipiapihuëꞌ.

Apocalipsis 20:8

Ocoiantahuachin, isoroꞌpaquë huënantarin nisha nisha piyapiꞌsaꞌ nonpintacaso marëꞌ. Yaꞌipi parti paaton, notohuaroꞌ piyapiꞌsaꞌ nonpintarin, Coco, Macoco inapita itopisoꞌ. Inotë pochin co pichicasohuëꞌ. Sopairi nonpintërin niꞌton, niyontonapi quira nicacaiso marëꞌ.

Apocalipsis 3:13

Imaramaco niꞌton, Ispirito Santo chachin nontarinquëmaꞌ. Huëratëhuanpatamaꞌ, noya natanatomaꞌ, yonquicoꞌ. Nani huachi,” itëquëꞌ, ninshitohuatan, itërinco.

Apocalipsis 3:22

Imaramaco niꞌton, Ispirito Santo chachin nontarinquëmaꞌ. Huëratëhuanpatamaꞌ, noya natanatomaꞌ, yonquicoꞌ. Nani huachi,” itëquëꞌ ninshitohuatan, itërinco Quisoso.

Apocalipsis 3:6

Imaramaco niꞌton, Ispirito Santo chachin nontarinquëmaꞌ. Huëratëhuanpatamaꞌ, noya natanatomaꞌ, yonquicoꞌ. Nani huachi,” itëquëꞌ, ninshitohuatan, itërinco.

Apocalipsis 9:20

Naꞌa piyapiꞌsaꞌ chiminpirinahuëꞌ, co naporo tërantaꞌ aꞌnapitasoꞌ yonquiapihuëꞌ. Niꞌsaponaraihuëꞌ, inachachin co noyahuëꞌ cancantapi. Aquëtë chachin sopairoꞌsaꞌ chinotapi. Nisha nisha mamanshi moshapi. Oro quëran, prata quëran, huaꞌna quëran, naꞌpi quëran, nara quëran, ina quëranpita nipisoꞌ. Co inapitasoꞌ quënantopihuëꞌ, co natantopihuëꞌ, co iratopihuëꞌ. Co nanpipirinahuëꞌ, mosharapi.