1 Timoteo 3:3 - Chayahuita (Shahui)

³ Ama noꞌpiinasohuëꞌ. Ama yaahuëchinasohuëꞌ. Sano yonquiꞌinaꞌ. Ama yanoꞌhuichinasohuëꞌ. Ama coriquiráchin cancanchinasohuëꞌ.

1 Timoteo 3:3 ပူးပေါင်းရင်းမြစ်များ

Proverbios 1:19

Maꞌhuanacaisoráchin cancantopisopitasoꞌ, inapo taꞌhuantaponaꞌ.

Isaías 28:1

¡Maꞌhuántacha Samaria ninanoquë yaꞌhuëpisopita nisapi paya! Inaquë Israiro copirno huaꞌanëntërin. Yanco ahuirin quëran yancotë nipiso pochin nipirinhuëꞌ, ina ninanosoꞌ, israiroꞌsari paꞌyatërin. Inapitasoꞌ noꞌpicaisoráchin cancantatonaꞌ, co noyahuëꞌ nipi. Noyaroꞌpaꞌ motopiana inapatontarinquë ina ninanoso acopirinahuëꞌ, yaꞌhuëhuanoꞌsasoꞌ, huino oꞌotona noꞌpicaisoráchin cancantopi. Napoaton inapita anaꞌintacaso marëꞌ Siniorori aꞌnara chiníquën quëmapi acorin. Inari ocai anotërinso pochin chiníquën nanantaton anoantarin. Panca ihuan maꞌsha quiquirinso pochin, ihuaiꞌ sharoꞌsa inquirinso pochin, pacon huëhuëpiro paꞌninso pochin, yaꞌipi atatahuaton toꞌpi toꞌpitarinso pochin, ina quëmapiri nitapon. Samariaquë noꞌpicaisoráchin cancantopisopita ataꞌhuantapon. Noyápiachin yancotë yaꞌhuëtohuachinara nipaꞌyatopiso pochin ina ninanosoꞌ israiroꞌsari paꞌyatopirinahuëꞌ, inapotapon. Iquira huayo yaꞌnan cayarinsopita quënanpachinara, co oshatapihuëꞌ macatona capacaisoꞌ. Inapochachin ina quëmapintaꞌ, canquihuachin co oshataponhuëꞌ ina ninano ataꞌhuantacasoꞌ.

Isaías 28:7

Samariaroꞌsa huino oꞌotona pisan pisan toconpi. Máin paꞌyatatonaꞌ, inpan inpan toconpi. Inapita pochachin corto huaꞌanoꞌsaꞌ, pënëntonaꞌpiroꞌsaꞌ, inapitanta ina pochin oꞌotona noꞌpirápi. Huino oꞌosápatona naponin yonquipi. Inapitasoꞌ huaꞌnarëso pochin quënantacaiso nipirinhuëꞌ, maꞌsona nicacasoꞌ shaꞌhuicaiso nipirinhuëꞌ, noꞌpirahuëroꞌsa niꞌton, co Siniorori anitotërinhuëꞌ.

Miqueas 2:11

Nonpi nanan shaꞌhuitonaꞌ: ‘Naꞌcon huino yaꞌhuëapon. Nisha nisha oꞌoi yaꞌhuëhuachin, oꞌotoma noꞌpirápomaꞌ,’ topisopita tëhuënchinsoꞌ, canpitaso paꞌyatëramaꞌ,” itërin.

Miqueas 3:11

Coisëroꞌsa pahuërëhuachinara, co huachi tëhuënaꞌpiroꞌsa anaꞌintopihuëꞌ. Corto huaꞌanoꞌsanta pahuërëai huarëꞌ, nanamëhuë aꞌchinpi. Pënëntonaꞌpiroꞌsanta pahuërëhuachinara: “Yosë catahuarinpoa canpoasoꞌ. Niꞌsárinpoa niꞌton, co manta onpoarihuahuëꞌ. Noya yaꞌhuëáparihuaꞌ,” itopi.

Miqueas 3:5

Naquëranchin Sinioro taantarin: “Piyapinëhuëpitasoꞌ, chihuëpiso pochin nisha nisha yonquipi. Nonpi nanan pënëntopisopitari nonpintopi niꞌton, napopi. Inapitasoꞌ insoari tëranta aꞌcahuachinaꞌ: ‘Quëmasoꞌ noya yaꞌhuëaran,’ itopi. Yaꞌhuërëꞌ co aꞌcahuachinarahuëꞌ: ‘Quëmaso napoonin yaꞌhuëapon,’ itopi. Napoaton cari chachin inapita itapo:

Malaquías 1:10

Inquëma tërantaꞌ, chinotëramacoso pëi yaꞌcoananën oncoatoma noyá patanantërama naporini, noya niitonhuëꞌ. Co huachi insonta yaꞌconaton, artaronëhuëquë topinan quëran aꞌpëchitonhuëꞌ. Co noyahuëꞌ ninama niꞌton, carimanta co noya niꞌnanquëmahuëꞌ. Maꞌsha quëshiramacosopitantaꞌ, co huachi maꞌpaponquëmahuëꞌ.

Mateo 21:13

—Yosë quiricanën quëran pënëninpoaꞌ. “Ca nohuanto, pëinëhuë yaꞌhuërin piyapiꞌsaꞌ nontinacoso marëꞌ,” tënin Yosë. Canpitaso nipirinhuëꞌ, ihuatëroꞌsaꞌ yaꞌhuëpiquë pochin nitëramaꞌ, itërin Quisosori.

Hechos 20:33

Aꞌchintohuatënquëmara, co aquëtëꞌ coriqui yonquirahuëꞌ. Aꞌna piyapi coriquinën co nohuantaparahuëꞌ. Co aꞌmopiso tërantaꞌ noyapatërahuëꞌ.

Romanos 16:18

Quisocristosoꞌ huaꞌanënpoaꞌ nipirinhuëꞌ, co inapitarisoꞌ natëpihuëꞌ. Inahuara nohuantopisoráchin yonquipi. Noyasha nonaponaraihuëꞌ, co noꞌtëquën nonpihuëꞌ. Co noya nitotopiquëhuëꞌ aꞌchintohuachinara, aꞌnaroáchin nonpintopi.

Efesios 5:18

Aꞌnaquën noꞌpicasoáchin cancantopi. “Huëcoꞌ noꞌpiahuaꞌ. Capa cancantahuaꞌ,” nitopirinahuëꞌ. Ama canpitasoꞌ noꞌpicosohuëꞌ, nishacancantotamaꞌ. Yosë nontocoꞌ Ispirito Santo noyá yaꞌcoancanchinquëmaꞌ. Nani tahuëri yaꞌcoancantomiachinquëmaꞌ. Ina quëran co noꞌpipomarahuëꞌ, tëhuënchachin capa cancantomiataramaꞌ.

1 Tesalonicenses 5:14

Canpita capini iyaroꞌsaꞌ nipënëncoꞌ. Aꞌnaquën co yasacatopihuëꞌ. Inapita pënëncoꞌ ama chiroinasohuëꞌ. Aꞌnaquën maꞌsha onpohuachinara, Yosë yananiantopi. Inapitantaꞌ noya nontocoꞌ chiníquën cancanchinaꞌ. Aꞌnaquëontaꞌ cancanëna quëran co chinipihuëꞌ. Catahuacoꞌ ama Yosë nanianchinasohuëꞌ. Inapohuatamaꞌ, ama insontaꞌ noꞌhuicosohuëꞌ. Sanoanan quëran pënëncoꞌ.

1 Timoteo 3:8

Ansianoꞌsaꞌ catahuarinsopitasoꞌ tiaconoꞌsaꞌ topi. Inapitantaꞌ natëtonoꞌsaꞌ niinaꞌ. Noꞌtëquënáchin noinaꞌ. Ama nisha nisha noinasohuëꞌ. Ama noꞌpiinasohuëꞌ. Ama nonpinatonaꞌ, coriqui canainasohuëꞌ.

2 Timoteo 3:2

Piyapiꞌsaꞌ niapiratatonaꞌ, co huachi aꞌnapita yonquiapihuëꞌ. Coriquiráchin cancantapi. Aꞌnapita nocanapi. “Casoꞌ noya noyaco,” taꞌtonaꞌ, aꞌnapita co noyahuëꞌ niꞌsapi. Nipinosapi; Yosëntaꞌ pinosapi. Aꞌshinaꞌ, paꞌpinaꞌ, inapita co natërapihuëꞌ. Nani maꞌsha quëtopirinahuëꞌ, ina marëꞌ “Yosparinquën,” co itopihuëꞌ. Co Yosë chinotapihuëꞌ.

Tito 1:11

Yapënëntohuachinaꞌ, shaꞌhuitëquëꞌ ama pënënchinasohuëꞌ. Maꞌsha canacaisoáchin yonquiatonaꞌ, aꞌchinapi. Nisha aꞌchintohuachinara, aꞌnaquën Yosë nanamën yaaꞌpopi. Quëmopinënpitarë chachin nisha imasapi.

Tito 1:7

Yosë nohuanton, ansianoꞌsaꞌ yaꞌhuëpi imapisopita catahuacaiso marëꞌ. Yosëri acorin niꞌton, noyasáchin niinaꞌ. Ama nocanchinasohuëꞌ. “Casáchin noꞌtëquën nitotërahuë,” topachinaꞌ, ama acoquësohuëꞌ. Ama yanoꞌhuichinasohuëꞌ. Ama noꞌpiinasohuëꞌ. Ama yaahuëchinasohuëꞌ. Ama coriquiráchin cancanchinasohuëꞌ. Ama piꞌpian tërantaꞌ nonpinatonaꞌ, canainasohuëꞌ. Insosona ina pochin cancantohuachin, ama ansiano acoquësohuëꞌ.

Tito 2:3

Sanapiꞌsaꞌ payamiachin nipisopitantaꞌ aꞌchintëquëꞌ sano yonquiatonaꞌ yaꞌhuëꞌinaꞌ. Ama maꞌtona maꞌtona noinasohuëꞌ. Ama noꞌpicaisoꞌ paꞌyachinasohuëꞌ. Noya niinaꞌ aꞌnapita sanapiꞌsarintaꞌ nicatonaꞌ nonanacaiso marëꞌ. Naporahuatonaꞌ, noya nicacaisoꞌ aꞌchiinaꞌ.

Tito 3:2

Ama pinochinasohuëꞌ. Ama ninoꞌhuiinasohuëꞌ. Noya ninicatonaꞌ yaꞌhuëꞌinaꞌ. Yaꞌipi piyapiꞌsaꞌ noya nicatonaꞌ, sanoanan quëran nonchinaꞌ.

Hebreos 13:5

Ama coriquiráchin paꞌyatocosohuëꞌ. Co naꞌcon maꞌsha yaꞌhuëtopirinquëmahuëꞌ, sano cancantocoꞌ. Ama naꞌcon naꞌcon nohuantocosohuëꞌ. Yosë chachin nani shaꞌhuitërinpoaꞌ. “Co onporontaꞌ pataranquëmahuëꞌ. Co naniantaranquëmahuëꞌ,” itërinpoaꞌ.

Santiago 4:1

¿Onpoatomataꞌ ninoꞌhuitomaꞌ, yaniahuëramaꞌ? tënahuë, yonquiato. Canpitaora cancanëma quëran nisha nisha maꞌsha nohuantëramaꞌ niꞌton, co noyahuëꞌ cancantëramaꞌ. Nipaꞌyatacasoáchin yonquiramaꞌ. Napoaton ninoꞌhuiramaꞌ.

1 Pedro 5:2

Quisoso imapisopita iyaroꞌsaꞌ noya niꞌcoꞌ. Yosë acorinquëmaꞌ yaꞌhuëramaquë aꞌchinacamaso marëꞌ. Huaꞌanëni ohuicanënpita noya aꞌpairinso pochin noya aꞌpaicoꞌ imamiachinaꞌ. Aꞌnaya tërantaꞌ co noyahuëꞌ nipachin, sanoanan quëran pënëncoꞌ noya yonquiantaꞌin. Nani tahuëri catahuacoꞌ noya imainaꞌ. Ama chirotomahuëꞌ, aꞌchincoꞌ. Ina pochin nicacasoꞌ Yosë nohuantërin. Niꞌton, canpitantaꞌ noya nohuantatomaꞌ, aꞌchincoꞌ. Ama canacaso marëꞌ aꞌchincosohuëꞌ. Nóya cancantatomaꞌ, Yosë marëꞌ sacatocoꞌ.

2 Pedro 2:3

Nisha aꞌchinaꞌpiroꞌsasoꞌ co nosororinënquëmahuëꞌ. Canacaiso marëꞌ nonpin nananoꞌsaꞌ aꞌchintarinënquëmaꞌ. Inaso nipirinhuëꞌ, iráca quëra huarëꞌ Yosëri yonquirin anaꞌintacasoꞌ. Aꞌna tahuëri noꞌtëquën anaꞌintarin. Co naniantarinhuëꞌ anaꞌintacasoꞌ.

Judas 1:11

¡Maꞌhuantacha nisapi paya! Nonpinaꞌpiroꞌsasoꞌ, Caino pochin cancantatonaꞌ co Yosë natëpihuëꞌ. Paramo pochin cancantopi. Iráca Paramosoꞌ coriquiráchin cancantaton, piyapiꞌsaꞌ anishacancantërin. Corintaꞌ iráca co noyahuëꞌ ninin. Co huaꞌanoꞌsaꞌ yanatërinhuëꞌ, noꞌhuirin. Ina marëꞌ Yosë nohuanton, chiminin. Inapita pochin cancantopisopita Yosëri chiníquën anaꞌintarin.

Apocalipsis 1:9

Ca Coanshaco ninshitaranquëmaꞌ. Canpitaroꞌco chachin imarahuë. Ina marëꞌ parisitopirëhuahuëꞌ, huaꞌanëntërinquë ayaꞌconinpoaꞌ. Quisocristo chachin catahuahuachinpoaꞌ, noya ahuantarëhuaꞌ. Yosë nanamën aꞌchinahuëso marëꞌ aparisitërinaco. Quisocristo imarahuë niꞌton, aꞌna soꞌtonꞌpaꞌ aꞌparinaco, Patomosë itopiquë.

1 Samuel 8:3

Inahuaso napoaponahuëꞌ, co paꞌpina pochin noya nipihuëꞌ. Maꞌsha naꞌcon naꞌcon cancantopi. Napoatona pahuërëhuachinara co huachi noꞌtëquën anaꞌintopihuëꞌ. Inapoatona paꞌpi co noyahuëꞌ nipi.