1 Timoteo 1:9 - Chayahuita (Shahui)

⁹ Noya nipisopita co pënënacasoꞌ yaꞌhuërinhuëꞌ. Aꞌnapitaso nipirinhuëꞌ pënënacasoꞌ yaꞌhuërin. Co Yosë natëtonahuëꞌ, co insontaꞌ yanatëpihuëꞌ. Co natantonhuëꞌ niconpi. Paꞌpi co noyahuëꞌ nipi, oshahuanpi. Yosëntaꞌ tëhuapi. Co ina chinotopihuëꞌ. Aꞌnaquënsoꞌ paꞌpinaꞌ, aꞌshinaꞌ inapita co quëꞌyatonahuëꞌ, yatëpapi. Aꞌnaquëontaꞌ tëpatopi.

1 Timoteo 1:9 ပူးပေါင်းရင်းမြစ်များ

2 Samuel 16:11

Napotahuaton Apisai, sontaro huaꞌanoꞌsaꞌ, inapita itapon: —Niꞌcoꞌ. Huiꞌnahuë chachin nipirinhuëꞌ, yatëparinco. Aquëtë huarëꞌ Mincamin huënton piyapisoꞌ tëpaincosonta yaꞌhuërin. ¡Tananpitoco noꞌhuiinco! Siniorori ina pochin camaimara.

2 Reyes 19:37

Aꞌna tahuëri Asiria copirnosoꞌ, Nisoroco mamanshi moshapiso pëiquë yaꞌconin. Ina moshaso chachin cato huiꞌninpitari huëcapairahuatona tëpapi. Inapitasoꞌ Atëramirico, Sarisiri, inapita. Paꞌpina tëparahuatonaꞌ, Ararato parti taꞌapi. Chimipicosoꞌ, aꞌnanta huiꞌnin yaꞌhuëtërin Isaraton itërinsoꞌ. Inari paꞌpin yaꞌhuërëtaton, Asiria huaꞌanëntaantarin.

Éxodo 20:13

Ama piyapi tëpacosohuëꞌ.

Jeremías 23:11

Napoaton Sinioro naporin: “Pënëntonaꞌpiroꞌsaꞌ, corto huaꞌanoꞌsa inapitaso noya noya nicacaiso nipirinhuëꞌ, inapitaꞌton paꞌpi co noyahuëꞌ nipi. Pëinëhuëquë chachin co noyahuëꞌ nipisoꞌ, quënayatërahuë.

Mateo 10:21

Aꞌnaquën imasarinaco. Aꞌnaquënso nipirinhuëꞌ co nohuantarinacohuëꞌ niꞌton, quëmopinënpita capini ninoꞌhuiapi. Aꞌnaquën iin chachin niponahuëꞌ, shaꞌhuirapiarin tëpacaiso marëꞌ. Aꞌnaquëontaꞌ huiꞌnin niponahuëꞌ, imapachinco, paꞌpini chachin shaꞌhuirapiarin. Aꞌnaquëontaꞌ aꞌshin chachin, paꞌpin chachin niponahuëꞌ, imapachinaco, huiꞌninpitari shaꞌhuirapiapi.

Romanos 1:30

Nipinopi. Yosë inimicotopi. Maꞌtona maꞌtona nonpi. “Casoꞌ noya noyaco,” taꞌtonaꞌ, aꞌnapita nocanpi. Yonquirápi co noyahuëꞌ nicacaiso marëꞌ. Paꞌpinaꞌ, aꞌshinaꞌ, co inapita tërantaꞌ natëpihuëꞌ.

Romanos 4:13

Iráca Yosëri Apraan itapon: “Nosoroatënquën, páncaroꞌpaꞌ quëchinquën. Piyapinëhuë pochin niꞌsaranquën. Quëma shinparinpitantaꞌ noya catahuaarahuë. Aꞌna tahuëri yaꞌipiroꞌpaꞌ huaꞌanëntaponaꞌ,” itërin. “Yosë co onporontaꞌ nonpintarincohuëꞌ,” tëninso marëꞌ Yosëri noya niꞌnin. Co naporoꞌ Moisësë pënënchátërarinhuëꞌ. Napoaton co ina natërinso marëꞌ Apraan noya niꞌninhuëꞌ.

Romanos 5:20

Iráca Moisësë pënëntërin oshahuanëhuasoꞌ anitotinpoaso marëꞌ. Ina quëran naꞌcon oshahuanëhuasoꞌ nitotërëhuaꞌ. Naꞌcon oshahuanpirëhuahuëꞌ, inaora nohuanton, Yosë naꞌcon naꞌcon nosororinpoaꞌ.

Romanos 6:14

Inapohuatamaꞌ, co huachi oshanëma huaꞌanëntatë pochin nitarinquëmahuëꞌ. Co yaꞌipi pënëntërinsoꞌ natëpiramahuëꞌ, inaora nohuanton, Yosë anoyacancantërinquëmaꞌ. Nosoroatënquëmaꞌ, catahuarinquëmaꞌ noya nicacamaso marëꞌ.

Gálatas 3:19

¿Maꞌmarëtaꞌ nipachin pënëntërinso nanan yaꞌhuërin? Co topinan quëran cotioroꞌsaꞌ pënëninhuëꞌ. Oshahuanëhuasoꞌ anitotinpoaso marëꞌ pënënin. Quisocristo nasitaquë huarëꞌ pënëntërinsoachin yaꞌhuërin imacaisoꞌ. Quisocristo nasitohuachina, iráca Apraan shaꞌhuitërinso chachin oꞌmarin. Yosë pënëntohuachina, anquëniroꞌsaꞌ aꞌpaimarin Moisësë shaꞌhuitacaso marëꞌ. Ina quëran Moisësëri piyapiꞌsaꞌ shaꞌhuitërin.

Gálatas 5:18

Cancanënpoaquë Ispirito Santo nontërinpoaꞌ maꞌsona noya nicacasoꞌ. Ina natëhuatëhuaꞌ, co huachi iráca pënëntërinsoꞌ camairinpoahuëꞌ. Ispirito Santo nohuantërinso chachin yonquiarihuaꞌ.

Gálatas 5:21

Co noyahuëꞌ yonquihuachinara, aꞌnapita maꞌshanënpita noyapatonaꞌ, noꞌhuipi. Noꞌpipi, pitaroꞌsaquë caꞌmiatopi, oꞌomiatopi, aꞌnaratipita nipi. Iráca pënënanquëmaꞌ. Iporantaꞌ pënëantaranquëmaꞌ. Inapohuatamaꞌ, co Yosë huaꞌanëntërinquë yaꞌconaramahuëꞌ. Ina pochin nipisopita co Yosëꞌpaꞌ pantarapihuëꞌ.

Gálatas 5:23

Ispirito Santo natëhuatëhuaꞌ: “Casoꞌ noya noyaco,” co tëcarihuahuëꞌ. Sano piyapi nicarihuaꞌ. Co noyahuëꞌ nicacasoꞌ yonquipirëhuahuëꞌ, ina catahuarinpoaꞌ naniantacasoꞌ. Inapohuatëhuaꞌ, Yosë noya niꞌsarinpoaꞌ. Co pënëinënpoasoꞌ yaꞌhuaponhuëꞌ.

2 Tesalonicenses 2:8

Yaꞌnohuachin, piyapiꞌsaꞌ aquë aquëtëꞌ co noyahuëꞌ cancantapi. Inari camaihuachin, notohuaroꞌ piyapiꞌsari natëapi. Ayaroꞌ tahuëriso nipirinhuëꞌ, Sinioro Quisosori anaꞌintarin. Huënaráchin huënaráchin oꞌmantahuachin, minsëarin. Topinan noncharapirinhuëꞌ, ataꞌhuantarin. Co huachi nanitarinhuëꞌ piyapiꞌsaꞌ nonpintacasoꞌ.

1 Timoteo 4:7

Nonpin nananoꞌsaso nipirinhuëꞌ tananpitëquëꞌ. Inahuara yonquinëna quëran naporapi niꞌton, tananpitëquëꞌ. Inapitasoꞌ topinan quëran aꞌchinapi. Quëmaso nipirinhuëꞌ nani tahuëri yonquiquëꞌ Yosë noya imacaso marëꞌ.

1 Timoteo 6:20

Noꞌtëquën api Quisocristo nanamën aꞌchintëranquën. Ama naniantatonhuëꞌ, noya imaquëꞌ. Nonpin nananoꞌsaso nipirinhuëꞌ ama natanquësohuëꞌ. Nisha nisha nonpi. “Yaꞌipiya noꞌtëquën nitotërai,” topirinahuëꞌ, co noꞌtëquën nitotopihuëꞌ.

2 Timoteo 2:16

Nonpin nananoꞌsaso nipirinhuëꞌ tananpitëquëꞌ. Ama natanquësohuëꞌ. Topinan quëran ninontapi. Inapita imapatëhuaꞌ, co huachi Yosë pochin yonquiarëhuahuëꞌ.

2 Timoteo 3:2

Piyapiꞌsaꞌ niapiratatonaꞌ, co huachi aꞌnapita yonquiapihuëꞌ. Coriquiráchin cancantapi. Aꞌnapita nocanapi. “Casoꞌ noya noyaco,” taꞌtonaꞌ, aꞌnapita co noyahuëꞌ niꞌsapi. Nipinosapi; Yosëntaꞌ pinosapi. Aꞌshinaꞌ, paꞌpinaꞌ, inapita co natërapihuëꞌ. Nani maꞌsha quëtopirinahuëꞌ, ina marëꞌ “Yosparinquën,” co itopihuëꞌ. Co Yosë chinotapihuëꞌ.

Tito 1:10

Naꞌa quëmapiꞌsaꞌ co natëtochináchinhuëꞌ cancantopi. Inahuara yonquinëna quëran aꞌchinapi niꞌton, topinan quëran nonsápi. Cotioroꞌsaꞌ pënëntërinsoꞌ imatonaꞌ, napopi. Nisha nisha nonatonaꞌ, yanonpinapi.

Tito 1:16

“Yosë nohuitërahuë,” topirinahuëꞌ, co noyahuëꞌ nipi. Ina marëꞌ co tëhuënchachin imapihuëꞌ, tënahuë. Co Yosëri noya niꞌninhuëꞌ. “Napoonpi,” tënin. Co mantaꞌ yanatëpihuëꞌ. Yosë aꞌpoatonaꞌ, co piꞌpisha tërantaꞌ nanitopihuëꞌ noya nicacaisoꞌ.

Tito 1:6

Ansianoꞌsaꞌ yaacohuatan, noya imapisopitaráchin acoquëꞌ. Aꞌnaíchin saꞌin yaꞌhuëtërinsoꞌ. Huiꞌninpitantaꞌ Quisocristo imainaꞌ. Aꞌnaquënsoꞌ ansiano yayaꞌconpirinahuëꞌ, huiꞌninpita co noya cancantopihuëꞌ. Co yonquínahuan nipihuëꞌ. Co paꞌpinaꞌ yanatëpihuëꞌ. Co huiꞌninpita tërantaꞌ pënënpachinahuëꞌ, aꞌnapitarintaꞌ co yanatëponahuëꞌ. Napoaton co inapita acocasoꞌ yaꞌhuërinhuëꞌ.

Tito 3:3

Iráca canpoantaꞌ co noyahuëꞌ cancantërëhuaꞌ. Coꞌhuara Yosë nanamën nitochatërarihuahuëꞌ, co yonquirëhuahuëꞌ. Co yanatërëhuahuëꞌ. Sopai nonpintërinpoaꞌ niꞌton, nisha nisha nicacasoꞌ nohuantërëhuaꞌ. Maꞌpitasona paꞌyatacasoáchin yonquirëhuaꞌ. Aꞌna piyapi maꞌshanënpita noyapatërëhuaꞌ. Ninoꞌhuitëhuaꞌ, co niquëꞌyarëhuahuëꞌ. Noꞌhuípiroꞌ ninëhuaꞌ. Inapoatëhuaꞌ, topinan quëran yaꞌhuërëhuaꞌ.

Hebreos 11:31

Yaꞌipi yaꞌhuëhuanoꞌsaꞌ co Yosë yanatëpihuëꞌ niꞌton, chiminpi. Aꞌna sanapiáchin natëton, chaꞌërin. Oshahuanaꞌpi inasoꞌ, Nacapa itopisoꞌ. Inimico niponahuëꞌ, Israiro comisionënpita huëꞌpachinara, inari poꞌorin ama sontaroꞌsari tëpacaiso marëhuëꞌ.

Hebreos 12:16

Niꞌcona nisha nisha cancantotamaꞌ. Ama monshihuancosohuëꞌ. Noyápiachin cancantocoꞌ. Ama maꞌsha yonquiatomaꞌ, Yosë naniantocosohuëꞌ. Isao iráca naporinsoꞌ yonquicoꞌ. Maꞌsharáchin yonquiaton, co onpopinchin Yosë yonquirinhuëꞌ. Tanaton, iin nontërin: “¿Yosë naꞌcon catahuainquënsoꞌ nohuantëran ti? Co casoꞌ ina yonquirahuëꞌ. Cosharoꞌ naꞌcon naꞌcon nohuantërahuë,” itërin.

1 Pedro 2:7

Quisocristo natëhuatëhuaꞌ, ina naꞌcon nohuantarihuaꞌ. Aꞌnaquënso nipirinhuëꞌ co natëtonaraihuëꞌ, co Quisocristo nohuantopihuëꞌ. Quiricanën quëran naporin: “Naꞌpi quënanpachinara, sacatoroꞌsaꞌ co nohuantopihuëꞌ. Tëꞌyatopi. Ina naꞌpiso nipirinhuëꞌ noya noya ninin pëicaso marëꞌ,” tënin. Inapochachin Quisocristo noya nipirinhuëꞌ co nohuantopihuëꞌ.

1 Pedro 3:20

Inapitasoꞌ iráca Noi nanpisoꞌ, paꞌpi co noyahuëꞌ cancantopi niꞌton, ina nohuanton, Noi pënëntárin. Pënëntopirinhuëꞌ, co yanatëpihuëꞌ. Yosësoꞌ co aꞌnaroáchin anaꞌintërinhuëꞌ. Noi panca nancha nicasoꞌ, ninarapirinhuëꞌ, co natëpihuëꞌ niꞌton, anaꞌintërin. Ipora huantaꞌ parisitapi. Noisoꞌ nancha tinirahuaton, yaꞌconin. Naporoꞌ posayaꞌpíchin iiꞌ quëran chaꞌëpi.

1 Pedro 4:18

Yosë quiricanënquë shaꞌhuitërinpoaꞌ: “Noya piyapiꞌsantaꞌ parisi quëran chaꞌësapi. ¡Oshahuanoꞌsaso nipirinhuëꞌ co onporontaꞌ chaꞌësapihuëꞌ! Yaꞌipi co noyahuëꞌ nipisopita chiníquën parisitomiatapi,” tënin.

Judas 1:15

Naporoꞌ yaꞌipi oshahuanoꞌsaꞌ anaꞌintarin huachi. Paꞌpi co noyahuëꞌ nipi niꞌton, anaꞌintacasoꞌ yaꞌhuërin. Yosë noꞌhuipisopita noꞌtëquën anaꞌintarin huachi,” tënin iráca.

Apocalipsis 21:8

Aꞌnapitaso nipirinhuëꞌ parisitáponaꞌ. Ayaroꞌ tahuëri naꞌa piyapiꞌsaꞌ pënquë paꞌsapi. Tëꞌhuatonaꞌ aꞌpopisopita, co natëpisopitahuëꞌ, co natëtochináchinhuëꞌ cancantopisopita, tëpatonaꞌpiroꞌsaꞌ, monshihuaninsopita, pënotonoꞌsaꞌ, mamanshi chinotopisopita, nonpinaꞌpiroꞌsaꞌ, inapita panca sono shaꞌpimoꞌshirë chachin pën tënëntápaquë paꞌsapi. Inaquë parisitáponaꞌ. Huaranca huaranca piꞌipintaꞌ nipirinhuëꞌ, co onporontaꞌ pipiapihuëꞌ.

Apocalipsis 22:15

Aꞌnaquënso nipirinhuëꞌ, co onporontaꞌ Yosë yaꞌhuërinquë paꞌsapihuëꞌ. Niꞌni pochin cancantopisopita, pënotonoꞌsaꞌ, monshihuanaꞌpiroꞌsaꞌ, tëpatoroꞌsaꞌ, mamanshi chinotopisopita, inapita aipiran yaꞌhuëmiatapi. Aꞌnaquëontaꞌ nonpinápi niꞌton, co nohuantapihuëꞌ noꞌtën nanan imacaisoꞌ. Inapitantaꞌ co onporontaꞌ Yosëꞌpaꞌ paꞌsapihuëꞌ.