1 Timoteo 1:19 - Chayahuita (Shahui)

¹⁹ Inasáchin natëton, pënëntëquëꞌ. Quisocristo nohuantërinsoráchin yonquiaton, noya niquëꞌ. Noyápiachin cancantaton, piyapiꞌsaꞌ aꞌchintëquëꞌ. Aꞌnaquënso nipirinhuëꞌ cancanëna quëran noya nicacaisoꞌ nitotopirinahuëꞌ, co yanatëpihuëꞌ. Nani Yosë naniantatonaꞌ, co huachi yonquipihuëꞌ. Quisocristo aꞌpoatonaꞌ, co huachi imapihuëꞌ.

1 Timoteo 1:19 ပူးပေါင်းရင်းမြစ်များ

Mateo 6:27

Chiminacaso nanihuachin co napion ancantopiramahuëꞌ, co aꞌna tahuëri tërantaꞌ nanitaramahuëꞌ anaꞌhuëcamasoꞌ.

1 Corintios 11:19

Co yaꞌipi cancanëma quëran imapatamahuëꞌ, nisha nisha yonquiaramaꞌ. Co napopináchin yonquiaramahuëꞌ. Ina quëran Yosë cancanën manëhuasopita nohuitërinënpoaꞌ. Co yaꞌipinpoaꞌ nisha nisha yonquirëhuahuëꞌ. Aꞌnapitaso nipirinhuëꞌ co noya yonquiatonahuëꞌ, co noꞌtëquën imapihuëꞌ.

Gálatas 5:4

“Noꞌtëquën natëhuatëhuaꞌ, Yosë noya niꞌsarinpoaꞌ,” topatamaꞌ, co Quisocristo imaramahuëꞌ. Yosë inaora nohuanton, nosoropirinquëmahuëꞌ, Quisocristo naniantohuatamaꞌ, co huachi catahuarinquëmahuëꞌ.

1 Timoteo 1:5

Noꞌtën nanansáchin imapatëhuaꞌ, catahuarinpoaꞌ noya ninosorocasoꞌ. Noyápiachin cancantohuatëhuaꞌ, co nisha nisha yonquiarihuahuëꞌ. Ina quëran cancanënpoa quëran huarëꞌ natëarihuaꞌ. Ina pochin cancantohuatëhuaꞌ, noya nosoroarihuaꞌ. Ina Yosësoꞌ nohuantërin.

1 Timoteo 3:9

Yosë anitotërinpoasoꞌ nóya nitochinaꞌ. Nitotatonaꞌ, cancanëna quëran huarëꞌ natëinaꞌ. Inapohuachinaꞌ, noyápiachin cancantapi.

1 Timoteo 6:12

Iráca imapisopita niyontonpachinara, chiníquën cancantaton, “Casoꞌ Quisocristo imarahuë,” itëran. Napoaton “Yosë catahuarinco,” taꞌton, sopai minsëquëꞌ. Yosë nani huëntonënquë ayaꞌconinquën niꞌton, imamiatëquëꞌ. Ina quëran aꞌna tahuëri inápaquë nanpimiataran.

1 Timoteo 6:21

Aꞌnaquën nisha nanan imatonaꞌ, Yosë aꞌpopi. Ama inapita natëquësohuëꞌ. Inaora nohuanton, Yosë noya catahuainquën. Nani ninshitëranquën huachi. Paono

1 Timoteo 6:9

Aꞌnaquënso nipirinhuëꞌ coriqui canacasoáchin yonquipi. Inasáchin cancantatonaꞌ, sopai natëpi. Nani maꞌsha nohuantatonaꞌ huënsonquë maꞌsha manëso pochin nisapi. Inasáchin yonquiatonaꞌ, aquë aquëtëꞌ nohuantaponaꞌ. Ina marëꞌ Yosëri chiníquën anaꞌintarin.

2 Timoteo 2:18

Yosë noꞌtëquën aꞌchintopirinpoahuëꞌ, co huachi natëpihuëꞌ. “Yosë nani piyapiꞌsaꞌ ananpitatë pochin nitërin. Co huachi aꞌna tahuëri ananpitaantarinpoahuëꞌ,” toconpi. Napopi niꞌton, co huachi aꞌnaquën imapihuëꞌ.

2 Timoteo 4:4

Yosë noꞌtëquën noninsoꞌ aꞌporahuatonaꞌ, piyapi yonquirinsoꞌ natëapi.

Tito 1:9

Yosë nanamën noꞌtëquën aꞌchintërainquëmaꞌ. Ina nanansáchin ansianoꞌsaꞌ imainaꞌ. Ina naꞌcon yonquihuachinaꞌ, noya pënëntaponaꞌ, noꞌtëquën aꞌchinaponaꞌ. Aꞌnapitaso nisha nanan aꞌchinpirinahuëꞌ, ansianoꞌsarisoꞌ Yosë nanamënáchin aꞌchinchinaꞌ. Ama imapisopita nonpin nanan natëtacaiso marëhuëꞌ inapochinaꞌ.

Hebreos 3:14

Iráca Quisocristo natërëhuaꞌ. Chiminaquë huarëꞌ noya imahuaꞌ. Co aꞌpohuatëhuahuëꞌ, Quisocristorëꞌquënpoaꞌ yaꞌhuëcontarihuaꞌ.

1 Juan 2:19

“Quiyantaꞌ imarai,” topirinahuëꞌ, nani pipipi. Co tëhuënchachin Yosë huëntonënquë yaꞌconpihuëꞌ. Yaꞌconpi naporini, co pipiitonahuëꞌ. Pipipi quëran nitotërëhuaꞌ. “Co onporontaꞌ cancanëna quëran huarëꞌ imapihuëꞌ,” tënëhuaꞌ.

Apocalipsis 3:10

Chiníquën cancantatomaꞌ, imamiatoco, itëranquëmaꞌ. Natëramaco niꞌton, carinquëmantaꞌ naꞌcon catahuaranquëmaꞌ. Aꞌna tahuëri yaꞌipi isoroꞌpaquë yaꞌhuëpisopita chiníquën aparisitarahuë tënicaꞌhuaso marëꞌ. Co naporoꞌ parisitaramahuëꞌ. Nichaꞌësaranquëmaꞌ.

Apocalipsis 3:3

Yaꞌnan natanapomaꞌ, Yosë nanamën noꞌtëquën aꞌchintërinënquëmaꞌ. Ina yonquiatomaꞌ, yaꞌipi co noyahuëꞌ yonquiramasopita naniantocoꞌ. Yaꞌipi cancanëma quëran casáchin yonquico. Co noya cancantaantahuatamahuëꞌ, aꞌnaroáchin anaꞌintaranquëmaꞌ. Ihuatonaꞌpi huëꞌninso pochachin aꞌnanaya anaꞌintaranquëmaꞌ. Co nitotasënquëmahuëꞌ, oꞌmantararahuë.

Apocalipsis 3:8

Cari nohuitëranquëmaꞌ. Yaꞌipi ninamasopitantaꞌ nitotërahuë. Co naꞌaquëmahuëꞌ nipomarahuëꞌ, noya ninamaꞌ. Co chiníquën nanantapomarahuëꞌ, nanamëhuë noya imaramaꞌ. Co tapanatomahuëꞌ, ‘Quisocristoíchin imarai,’ tënamaꞌ niꞌton, yaꞌcoana iꞌsoatërëso pochin catahuaranquëmaꞌ naꞌa piyapiꞌsaꞌ aꞌchintacamasoꞌ. Ca nohuanton, pënëntaramaꞌ. Co insontaꞌ nanitarinhuëꞌ ataꞌtëinquëmasoꞌ.