1 Timoteo 1:17 - Chayahuita (Shahui)

¹⁷ Napoaton Yosëíchin natëahuaꞌ. Nani tahuëriya: “¡Ma noyacha Yosëso paya!” itahuaꞌ. Inasoꞌ co onporontaꞌ taꞌhuantaponhuëꞌ. Co quënanpirëhuahuëꞌ, huaꞌanëntomiatërinpoaꞌ. Inaíchin chinotacasoꞌ yaꞌhuërin. Ama onporontaꞌ ina naniantahuasohuëꞌ. Amen.

1 Timoteo 1:17 ပူးပေါင်းရင်းမြစ်များ

Salmos 145:13

Quëma huaꞌanëntërancoisosoꞌ, yaꞌhuëmiatarin. Co onporonta quëmasoꞌ huaꞌan quëran pipiaranhuëꞌ.

Salmos 90:2

Coꞌhuara isoroꞌpaꞌ, motopiroꞌsaꞌ, inapita yaꞌhuëyátërasohuëꞌ, quëmasoꞌ yaꞌhuëran. Iráca quëran huarëꞌ yaꞌhuëran. Tahuëri nitiquipirinhuë tërantaꞌ, quëmaso yaꞌhuëápon. Quëmasáchin Yosënquën.

Daniel 2:44

Ina copirnoroꞌsa huaꞌanëntasoiꞌ, Yosë inápaquë yaꞌhuërinso huaꞌanëntarin. Ina huaꞌanëntërinsoꞌ, co onporonta taꞌhuantarinhuëꞌ. Co aꞌnapita nacionoꞌsari minsëarinhuëꞌ. Aꞌnapita huaꞌanëntopisoꞌ, yaꞌipi ataꞌhuantapon. Yaꞌhuërëꞌ ina huaꞌanëntërinsosoꞌ, yaꞌhuëmiatapon.

Daniel 4:34

Noyataꞌhuaso tahuëri nanihuachina, ca Napocotonoco inápaquë nëꞌpëtërahuë. Naporo chachin huaꞌyantërahuësoꞌ, noyatërahuë ninatanahuë. Noyatahuato: “Yosparinquën Sinioro,” itërahuë. Inaso yaꞌhuëmiatërin niꞌton, chinotërahuë: “Quëmasoꞌ Sinioro chiníquën nanantëran. Naporansoꞌ, inachachin nisápon. Shihuëipita onpo huënton ocoipirinahuë tërantaꞌ, quëmasoꞌ huaꞌanëntápon.

Daniel 4:37

Iporaso ca Napocotonoco, Yosë inápaquë huaꞌanëntërinso chinotërahuë. Inasáchin noya nicato natërahuë. Inasoꞌ maꞌsha nipachina, noꞌtëquënáchin nisahuaton, noyasáchin ninin. “Caso noya noyaco,” topachina, inari nanitërin atapanacasoꞌ, tënahuë.

Daniel 7:14

Inapotohuachinara, yaꞌipi noya noya huaꞌanëntacaso marëꞌ Ansianori chini chiníquën nanan quëtërin. Inapotohuachina, yaꞌipi nacionoꞌsaquë yaꞌhuëpisopitari, nisha nisha nananquë nonpisopitari ina chinotapi. Chiníquën nanantërinsoꞌ, co onporonta nishataponhuëꞌ. Huaꞌanëntërinsontaꞌ, co onporo taꞌhuantaponhuëꞌ.

Miqueas 5:2

Naquëranchin Sinioro taantarin: “Pirin ninanosoꞌ, Iporata itopi antaꞌ. Inasoꞌ ninanoꞌ, aꞌnapita ninanoroꞌsa Cota huëntonquë yaꞌhuërin quëran nani naniaꞌhuaya. Ina niponahuëꞌ, yaꞌipi israiroꞌsa huaꞌanëntacaso marëꞌ inaquë aꞌnara copirno nasitapon. Ina shimashonënpitasoꞌ, iráca quëran huarëꞌ yaꞌhuëpi,” tënin.

Malaquías 1:14

Aꞌnaquëma pëꞌtahua huëntonëma quëran noya nininsoꞌ, huayonahuatomaꞌ: ‘Iso pëꞌtahua Sinioro marëꞌ acoarahuë,’ tënamaꞌ. Napoapomarahuëꞌ, naponin nininso quëshitomaco, ca marëꞌ tëparamaꞌ. Ina pochin nonpintësoꞌ, paꞌpi co noyahuëꞌ nicato ama huachi noya yaꞌhuëcaso marëhuëꞌ, shaꞌhuitarahuë. Yaꞌipi copirnoroꞌsa quëran, caso chini chiníquën nanantërahuë. Yaꞌipi isoroꞌpaquë nisha nisha piyapiꞌsa yaꞌhuërinsoꞌ, tëꞌhuatatonaco natërinaco. Caso Sinioroco yaꞌipi nanitapato, ina pochin shaꞌhuitaranquëmaꞌ,” itërin.

Mateo 25:34

Ina quëran inchinanëhuë quëran acorahuësopita itarahuë: ‘Yaꞌipinquëmaꞌ huëcatomaꞌ, Yosë huaꞌanëntërinquë yaꞌconquicoꞌ. ¡Ma noyacha Tata Yosë nosororinquëma paya! Isoroꞌpaꞌ ninin quëran huarëꞌ yonquirinquëmaꞌ huaꞌanëntërinquë ayaꞌcoinquëmaso marëꞌ.

Mateo 28:20

Ina quëran yaꞌipi shaꞌhuitëranquëmasoꞌ aꞌchintocoꞌ natëinaco. Insëquësona paꞌpatamaꞌ, carinquëmaꞌ caꞌtanaranquëmaꞌ. Nani tahuëri catahuaranquëmaꞌ. Ayaroꞌ tahuëri naniquë huarëꞌ caꞌtanaranquëmaꞌ. Co onporontaꞌ pataranquëmahuëꞌ, itërin Quisosori. Nani huachi.

Mateo 6:13

Co noyahuëꞌ yonquihuatoi, catahuacoi aꞌnaroáchin nanianchii. Catahuacoi ama sopai minsëincoisohuëꞌ. [Quëmasáchin huaꞌanëntarancoi. Yaꞌipi nanitaparan. Ipora quëran huarëꞌ yaꞌipiya natëinënquën. Amen,]’ itocoꞌ Yosë nontohuatamaꞌ.

Juan 1:18

Co inquënpoa tërantaꞌ Yosë quënanëhuahuëꞌ. Huiꞌniniso nipirinhuëꞌ noyá nohuitërin. Yosë pochachin niꞌton, napopianachin yonquipi. Inasáchin Tata Yosë anohuitërinpoaꞌ.

Juan 5:44

Canpita capini nipaꞌyatacasoráchin yonquiatomaꞌ, co Yosë noya nicainquëmasoꞌ yonquiramahuëꞌ. Napoaton co natëramacohuëꞌ.

Romanos 1:20

Isoroꞌpaꞌ ninin quëran huarëꞌ piyapiꞌsaꞌ nitotopi. Yosësoꞌ co quënanpirëhuahuëꞌ, nani maꞌsha ninin. Ina nicatonaꞌ, “Tëhuënchachin Yosë yaꞌhuërin. Yaꞌipiya nanitaparin niꞌton, ina chinotahuaꞌ,” taꞌcaso nipirinhuëꞌ, co nohuantopihuëꞌ. Napoaton naꞌinpi.

Romanos 1:23

Yosësoꞌ noyasáchin ninin. Co onporontaꞌ chiminaponhuëꞌ. Inaso nipirinhuëꞌ, co ina yonquipihuëꞌ. Ina naniantatonaꞌ, mamanshi nipi moshacaiso marëꞌ. Mamanshi piyapi nonanpisoꞌ moshapi. Co piyapi yaꞌhuëmiatopirinhuëꞌ, ina yamoshapi. Nisha nisha maꞌsharoꞌsantaꞌ moshapi. Aꞌnaquën anpiantëhuanoꞌsaꞌ, aꞌnaquën noꞌpaquë niohuaratërinsopita, inapita moshapi.

Romanos 11:36

Yaꞌipi maꞌsha Yosëri ninin. Ina nohuanton, co taꞌhuantarëhuahuëꞌ. Yosëíchin paꞌyatacaso marëꞌ yaꞌhuërëhuaꞌ. Inaora nohuanton, anoyacancantërinpoaꞌ. Ma noyacha Yosëso paya, itahuaꞌ. ¡Inasáchin chinotahuaꞌ! Amen.

Romanos 16:27

Yosëíchin chinotacasoꞌ yaꞌhuërin. Inaíchin yaꞌipi nitotërin. Quisocristo catahuarinpoaꞌ noya noya ina chinotacaso marëꞌ. Ipora quëran huarëꞌ inasáchin chinotahuaꞌ. Ama onporontaꞌ naniantahuasohuëꞌ. Amen. Nani ninshitëranquëma huachi. Paono

Romanos 2:10

Noya nipisopitaso nipirinhuëꞌ, noya niꞌsarin. Noya noya acorarin. Asanocancanarin. Cotioroꞌsaꞌ noꞌtëquën chachin napotarin. Nisha piyapiꞌsantaꞌ inapochachin nitarin. Yaꞌipinpoaꞌ noya nipatëhuaꞌ, nichaꞌësarinpoaꞌ.

Romanos 2:7

Noyasáchin nipatëhuaꞌ, noya niꞌsarinpoaꞌ. Yosë yonquiatëhuaꞌ, noya acoinpoaso marëꞌ naꞌcon nohuantohuatëhuaꞌ, ananpitaantarinpoaꞌ. Inarëꞌquënpoaꞌ yaꞌhuëmiatarihuaꞌ.

Colosenses 1:15

Tata Yosësoꞌ co quënanëhuëꞌ. Nipirinhuëꞌ, huiꞌnin isoroꞌpaquë oꞌmaton, paꞌpin anohuitërinpoaꞌ. Inantaꞌ Yosë chachin niꞌton, nóya anohuitërinpoaꞌ. Coꞌhuara isoroꞌpaꞌ yaꞌhuëyátërasohuëꞌ, huiꞌniontaꞌ inápaquë yaꞌhuërin.

Hebreos 11:27

Yosë natëton, Moisësë Iquipito quëran pipirin. Copirnori noꞌhuipirinhuëꞌ, co tëꞌhuatërinhuëꞌ. “Yosë co quënanaporahuëꞌ, niꞌsárinco,” taꞌton, chiníquën cancantërin. Chiníquën cancantaton, Yosë piyapinënpita catahuarin.

Hebreos 2:7

Quëma nohuanton, co anquëniroꞌsa pochin chiníquën nanantopiraihuëꞌ, co huaꞌquiya quëranhuëꞌ chiníquën nanan quëtarancoi. Noya noya acoarancoi.

1 Pedro 5:11

Yosë chini chiníquën nanantërin. Yaꞌipiya huaꞌanëntarin niꞌton, co onporontaꞌ pipiarinhuëꞌ. Inasáchin chinochinaꞌ. Amen.

2 Pedro 3:18

Canpitaso nipirinhuëꞌ, Sinioro Quisocristoíchin yonquicoꞌ. Inaora nohuanton, nosororinquëmaꞌ niꞌton, nani tahuëri yacatahuarinquëmaꞌ. Inasáchin yonquihuatamaꞌ, oshaquëran noya noya nohuitaramaꞌ. Inasoꞌ nichaꞌësarinpoaꞌ. Yaꞌipi piyapiꞌsari chinochinaꞌ. Ayaroꞌ tahuëriquë huarëꞌ inasáchin yonquiaꞌahuaꞌ. Amen. Nani ninshitëranquëma huachi. Pitro

1 Juan 4:12

Co inquënpoa tërantaꞌ Yosë quënanpirëhuahuëꞌ, noya ninosorohuatëhuaꞌ, Yosë nohuitarihuaꞌ, yaꞌcoancantomiatërinpoaꞌ. “Yosë naꞌcon nosororinpoaꞌ,” taꞌtëhuaꞌ, canpoantaꞌ noya noya ninosoroarihuaꞌ.

Apocalipsis 15:3

Iráca Moisësë Yosëíchin natëton, inimiconënpita minsërahuaton, cantarin. Inapochachin isopitantaꞌ cantarapi. Carniroaꞌhua cantarinsontaꞌ cantarapi. “¡Ma noyanquëncha, Sinioro, quëmaso paya! Yaꞌipi nanitaparan. Ma noyacha catahuarancoi paya. Chiníquën nanantaton, noya ninan. Noya huaꞌanëntaton, noꞌtëquën anaꞌintëran. Co onporontaꞌ nonpinanhuëꞌ. Yaꞌipi piyapiꞌsaꞌ natëinënquën.

Apocalipsis 17:14

Inapitasoꞌ Carniroaꞌhua yaminsëatonaꞌ, quira nisapirinahuëꞌ, co nanitapihuëꞌ minsëcaisoꞌ. Inari minsëapon. Inasoꞌ Quisocristo chachin. Chini chiníquën nanantarin niꞌton, yaꞌipiya huaꞌanëntarin. Inasáchin natëcasoꞌ yaꞌhuërin. Piyapinënpitari imasapi. Yosëri huayonin niꞌton, natëmiatapi,” itërinco anquëni.

Apocalipsis 19:1

Ina quëran notohuaroꞌ inápaquë yaꞌhuëpisopita nonsapi natanahuë. Capa cancantatonaꞌ, chiníquën nonsapi: “¡Ma noyacha Tata Yosëso piyapiꞌsaꞌ nichaꞌërin paya! Chini chiníquën nanantarin niꞌton, yaꞌipi piyapiꞌsari chinochinaꞌ.

Apocalipsis 19:16

Aipi aꞌmorinsoquë nani ninshitërin: iso quëmapi chini chiníquën nanantaton, yaꞌipi copirnoroꞌsantaꞌ, huaꞌanëntarin. inasáchin natëcasoꞌ yaꞌhuërin tënin. Tonamënquëntaꞌ ina chachin ninshitërin.

Apocalipsis 19:6

Ina quëran huaꞌhuayátërahuë piyapiꞌsaꞌ nonsapisoꞌ natanahuë. Panca soꞌpora pochin tënëëntarin. Chiníquën huira ahuëtërinso pochin natanahuë. “Ma noyacha Tata Yosëso paya. Chini chiníquën nanantaton, yaꞌipiya huaꞌanëntarin.

Apocalipsis 7:12

“Tëhuënchachin Sinioro, piyapiꞌsaꞌ nichaꞌëran. ¡Ma noyanquëncha quëmaso paya! Yaꞌipiya chinochinënquën. Yaꞌipi nitotëran. Chini chiníquën nanantaton, yaꞌipiya nanitaparan niꞌton, yaꞌipi natëinënquën. ‘Yosparinquën,’ ichinënquën. Naꞌcon natëmiatarainquën. Co onporontaꞌ aꞌpoarainquënhuëꞌ. Amen,” itapi.