1 Timoteo 1:1 - Chayahuita (Shahui)

¹ Ca Paonoco ninshitaranquën, niꞌquëꞌ. ¿Noya, yaꞌhuaran? Noya cantaꞌ yaꞌhuarahuë. Yosë nohuanton, Quisocristo acorinco nanamën aꞌchinaꞌhuaso marëꞌ. Yosë chachin anoyacancantërinpoaꞌ. Oshanënpoaꞌ inquitatonpoaꞌ, nichaꞌërinpoaꞌ. Quisocristo imatëhuaꞌ, ina ninarëhuaꞌ. Aꞌna tahuëri inápaquë quëpantarinpoaꞌ.

1 Timoteo 1:1 ပူးပေါင်းရင်းမြစ်များ

Isaías 43:11

Casáchin Yosëco. Casáchin nanitërahuë nichaꞌëtaꞌhuasoꞌ,” itërinquëmaꞌ.

Isaías 43:3

Caso Sinioroco niꞌto, napoarin. Carima nichaꞌësaranquëmaꞌ. Caso Yosëco noyasáchin ninahuë niꞌton, Israiro chinotërinco. Aꞌnapita huaꞌanëntapirinënquëmahuëꞌ, cari paꞌananquëmaꞌ. Iquipito, Itiopia, Sapa, inapita nacionoꞌsa pahuërë pochin quëtato, paꞌananquëmaꞌ.

Isaías 45:15

Sinioro quëmasoꞌ, co aꞌninquëchin yaꞌnoranhuëꞌ. Napoaponahuëꞌ, israiroꞌsacoi nichaꞌërancoi.

Isaías 45:21

Huëco paꞌahua coisëquë. Noꞌtëquën yonquihuatamaꞌ, aꞌpaniaramaco: ¿Inta caniaritërin quëran maꞌpitaso onpocasoꞌ nani shaꞌhuirin? ¿Inta iráca quëran huarëꞌ inapita shaꞌhuirin? Ca mini Sinioroco niꞌto, inapita nani shaꞌhuirahuë. Co aꞌna Yosë ca pochin yaꞌhuërinhuëꞌ. Casáchin noꞌtëquën yonquirahuë. Casáchin nanitërahuë minsëtato nichaꞌëtaꞌhuasoꞌ.

Isaías 49:26

Aparisitërinëmasopita, cari camaiarahuë inahuara noshinëna capatë pochin inahuara capini nitëpacaisoꞌ. Huënainënantaꞌ, huino oꞌotona noꞌpipiso pochin noꞌhuitonënaquë co nitënorocaisohuëꞌ camaiarahuë. Inapotohuato, yaꞌipi piyapiroꞌsa nichaꞌëranquëmasoꞌ nitotaponaꞌ: ‘Sinioro niꞌton, Cacopo quëran pipipisopita nichaꞌërin. Chiníquën nanantaton naporin,’ tosapi,” tënin.

Isaías 60:16

Noya noya cosharonënaꞌ, nacionoꞌsa quëshiponëmaꞌ. Copirnonënantaꞌ, paꞌton nininsopita maꞌshanëna quëshiponëmaꞌ. Ca Sinioroco niꞌton, nichaꞌëranquëmasoꞌ nitotaponaꞌ. Chiníquën nanantërahuëso marëꞌ iráca Cacopontaꞌ, chinotërinco. Inapochinco niꞌton, nichaꞌëranquëmasoꞌ nitotapi.

Isaías 63:8

Inapita yonquiaton Sinioro tënin: “Inapitasoꞌ piyapinëhuëpita. Co onporonta nonpintarinacohuëꞌ,” tënin. Napoaton maꞌsha onpotohuachinara, inaora chachin maꞌsha onpotapiso pochin ninatanin. Ina pochin cancantaton nichaꞌësarin. Co aꞌna aꞌpaton nichaꞌësarinhuëꞌ. Inaora chachin paꞌsahuaton nichaꞌësarin. Nosoromiataton inapotarin. Opatëahuatë iporëso pochin nitarin. Iráca quëran huarëꞌ napotërinsoꞌ, inachachin nisárin.

Oseas 13:4

Sinioro naporin: “Iquipitoquë yaꞌhuërama quëran huarëꞌ, casáchin Sinioroco niꞌto, Yosënëmaco. Co aꞌna ca pochin chinotamaso yaꞌhuërinhuëꞌ. Carinquëmáchin nichaꞌëranquëmaꞌ.

Lucas 1:47

Anoyacancantërinco niꞌton, nóya cancantërahuë.

Lucas 2:11

Ipora tashiꞌ aꞌnara quëmapiaꞌhuaya Pirinquë nasitërin. Inasoꞌ Cristo, Yosëri aꞌpaimarinsoꞌ. Sinioro niꞌton, chinotacasoꞌ yaꞌhuërin. Nani oꞌmarin piyapiꞌsaꞌ cancanënaꞌ anoyatacaso marëꞌ.

Hechos 9:15

“Iꞌhua mini co noyahuëꞌ yonquipirinhuëꞌ, nani huayonahuë ca nanamëhuë aꞌchinacaso marëꞌ. Nisha nisha piyapiꞌsaꞌ aꞌchintarin imainacoso marëꞌ. Huaꞌanoꞌsanënpitantaꞌ shaꞌhuitarin. Israiroꞌsantaꞌ aꞌchintarin imainacoso marëꞌ.

Romanos 1:1

Ca Paonoco ninshitaranquëmaꞌ, niꞌcoꞌ. ¿Noyanquëmaꞌ canpitantaꞌ? Noya cantaꞌ yaꞌhuarahuë. Quisocristoíchin natërahuë. Ina acorinco paato nanamën aꞌchinaꞌhuaso marëꞌ. Yosë nohuanton, noya nanan aꞌchinárahuë.

1 Corintios 1:1

Ca Paonoco ninshitaranquëmaꞌ. ¿Noya canpitantaꞌ yaꞌhuaramaꞌ? Cantaꞌ isëquë noya yaꞌhuarahuë. Yosë nohuanton, Quisocristo acorinco nanamën aꞌchinaꞌhuaso marëꞌ. Iya Sostinisëroꞌco nanan aꞌpatarainquëmaꞌ.

1 Corintios 9:17

Caora nohuanto, aꞌchinahuë naporini, ina marëꞌ canaitohuëꞌ. Nipirinhuëꞌ, ina shaꞌhuitërinco niꞌton, aꞌchinaꞌhuasoꞌ yaꞌhuërin.

2 Corintios 1:1

Ca Paonoco ninshitantaranquëmaꞌ. ¿Noya canpitantaꞌ yaꞌhuaramaꞌ? Noya cantaꞌ yaꞌhuarahuë. Yosë nohuanton, Quisocristo acorinco nanamën aꞌchinaꞌhuaso marëꞌ. Iya Timotioroꞌco nanan aꞌpataranquëmaꞌ. Corintoquë yaꞌhuëramasopita ninshitaranquëmaꞌ. Yosë nohuanton, canpitantaꞌ huëntonënquë yaꞌconamaꞌ. Acaya parti nisha nisha ninanoroꞌsaquë imaramasopita yonquiatënquëmaꞌ, ninshitaranquëmaꞌ.

Gálatas 1:1

Ca Paonoco ninshitaranquëmaꞌ, niꞌcoꞌ. ¿Noyanquëmaꞌ canpitantaꞌ? Noya cantaꞌ yaꞌhuarahuë. Quisocristo acorinco nanamën aꞌchinaꞌhuaso marëꞌ. Co piyapiꞌsaꞌ inahuara nohuanton aꞌparinacohuëꞌ aꞌchinaꞌhuaso marëꞌ. Co inapita acorinacohuëꞌ. Tata Yosë chachin acorinco. Ina nohuanton, Quisocristo nanpiantarin huachi. Nani nanpiantohuachina, ina chachin nanan quëtërinco aꞌchinaꞌhuaso marëꞌ.

Gálatas 1:11

Noꞌtëquën iyaroꞌsaꞌ shaꞌhuitaranquëmaꞌ. Iráca quëran huarëꞌ co piyapi yonquirinsoꞌ aꞌchintëranquëmahuëꞌ.

Colosenses 1:27

“Quisocristo chachin ayaꞌcoancantaranquëmaꞌ,” itërinpoaꞌ. Canpitantaꞌ nisha piyapinquëmaꞌ nipiramahuëꞌ, yaꞌcoancantërinquëmaꞌ. Yaꞌipinpoaꞌ yaꞌcoancantërinpoaꞌ niꞌton, aꞌna tahuëri Yosëꞌpaꞌ noya noya yaꞌhuëcontarihuaꞌ. Iráca co mantaꞌ ina nitotopirinahuëꞌ, nani anitotërinpoa huachi. Quisocristo nohuitatëhuaꞌ, ina ninarëhuaꞌ. Ma noyacha Tata Yosësoꞌ yonquirinpoa paya, tënëhuaꞌ.

2 Tesalonicenses 2:16

Sinioro Quisocristo catahuainquëmaꞌ chiníquën cancantacamaso marëꞌ. Inaora nohuanton, Tata Yosëntaꞌ nosoroatonpoaꞌ, achinicancamiatërinpoaꞌ. Aꞌna tahuëri yaꞌhuërinquë chachin quëpantarinpoaꞌ. Shaꞌhuitërinpoaꞌ niꞌton, ina ninarëhuaꞌ.

1 Timoteo 1:12

Ina marëꞌ Sinioro Quisocristo achinicancaninco. “Noꞌtëquën natëarinco,” taꞌton, acorinco aꞌchinaꞌhuaso marëꞌ. Napoaton: “Yosparinquën Sinioro,” itërahuë.

1 Timoteo 2:3

Ina pochin Yosë nontacasoꞌ nóya. Inasoꞌ nichaꞌërinpoaꞌ. Nontohuatëhuaꞌ, noya nataninpoaꞌ.

1 Timoteo 2:7

Ina nanan shaꞌhuicaꞌhuaso marëꞌ Yosë acorinco. Aꞌparinco nisha piyapiꞌsaꞌ aꞌchintaꞌhuaso marëꞌ. “Yosë noꞌtëquën nontërinpoaꞌ. Ina natëcoꞌ,” itërahuë. Tëhuënchachin noꞌtëquën nonahuë, co nonpinahuëꞌ.

1 Timoteo 4:10

Ina marëꞌ paatëhuaꞌ, Yosë nanamën shaꞌhuirárëhuaꞌ. Parisitarihuarahuëꞌ, aꞌchinárëhuaꞌ. Yosëíchin ninarëhuaꞌ. Inasoꞌ nanpiarin niꞌton, yaꞌipi piyapi nichaꞌëcasoꞌ nohuantërin. Natëhuatëhuaꞌ, anoyacancantatonpoaꞌ, nichaꞌësarinpoaꞌ.

Tito 1:3

Iporaso huachi tahuëri nanihuachina, inaora nohuanton, nanamën anitotërinpoaꞌ. Yosë shaꞌhuitërinco niꞌton, ina nanan chachin pënënanquëmaꞌ. Inasoꞌ nichaꞌësarinpoaꞌ.

Tito 2:10

Ama ihuachinasohuëꞌ. Noꞌtëquën natëtonaꞌ, ama piꞌpian tërantaꞌ nonpiinasohuëꞌ. Noya nipachinaꞌ, aꞌnapitarintaꞌ noya niꞌsapi. “Tata Yosë imatonaꞌ, noya nipi. Ma noyacha Yosë nanamënso paya,” taponaꞌ. Inasoꞌ tëhuënchachin nichaꞌësarinpoaꞌ.

Tito 2:13

Noya cancantatëhuaꞌ, Quisocristo ninarëhuaꞌ. Aꞌna tahuëri chiníquën nanantaton, oꞌmantararin. Inasoꞌ Yosë chachin niꞌton, huënaráchin huënaráchin yaꞌnoarin. Ina quënanpatëhuaꞌ, nóya cancantarihuaꞌ. Chiníquën nanantaton, noyá nichaꞌësarinpoaꞌ.

Tito 3:4

Yosëso nipirinhuëꞌ nosoroatonpoaꞌ, catahuarinpoaꞌ. Inasoꞌ noya niꞌton, huiꞌnin aꞌpaimarin nichaꞌëinpoaso marëꞌ.

Tito 3:6

Quisocristo anoyacancantërinpoaꞌ niꞌton, Ispirito Santo aꞌpatimarinpoaꞌ yaꞌcoancantinpoaso marëꞌ. Noyá yaꞌcoancantohuachinpoaꞌ, naꞌcon catahuarinpoaꞌ.

1 Pedro 1:21

Quisocristo anoyacancantërinquëmaꞌ niꞌton, Yosë nohuitatomaꞌ, natëramaꞌ: “Tëhuënchachin catahuarinpoaꞌ,” tënamaꞌ. Quisocristo chiminaponahuëꞌ, Yosëri ananpitaantarin. Inápaquë quëpantarahuaton, chiníquën nanan quëtërin. Napoaton Yosëíchin imaramaꞌ. “Canpoantaꞌ ananpitaantarinpoaꞌ,” taꞌtomaꞌ, ninaramaꞌ.

1 Pedro 1:3

Ma noyacha Tata Yosëso paya. Quisocristo paꞌpin inasoꞌ. Naꞌcon nosoroatonpoaꞌ, nasitantarëso pochin nasha cancan quëtërinpoaꞌ ina nohuitacaso marëꞌ. Quisocristo huaꞌanëntërinpoaꞌ. “Chiminaponahuëꞌ, nanpiantarin niꞌton, canpoantaꞌ nanpiantarihuaꞌ,” taꞌtëhuaꞌ, noya ninarëhuaꞌ. Natëtomiatërëhuaꞌ.

2 Pedro 1:1

Ca Simon Pitroco ninshitaranquëmaꞌ, niꞌcoꞌ. ¿Noya yaꞌhuaramaꞌ? Noya cantaꞌ yaꞌhuarahuë. Quisocristoíchin huaꞌanëntërinco niꞌton, inasáchin natërahuë. Ina acorinco nanamën aꞌchinaꞌhuaso marëꞌ. Yosë nohuanton, canpitantaꞌ Quisocristo natëramaꞌ. Quiya pochin imaramaꞌ niꞌton, canpitantaꞌ nichaꞌësarinquëmaꞌ. Ma noyacha Quisocristo anoyacancantërinpoa paya, tënëhuaꞌ. Inasoꞌ Yosë niꞌton, chinotërëhuaꞌ. Oshanënpoaꞌ inquitatonpoaꞌ, nóya niꞌninpoaꞌ. Napopianachin nosororinpoaꞌ niꞌton, catahuarinquëmaꞌ canpitantaꞌ cancanëma quëran huarëꞌ natëcamasoꞌ.

1 Juan 4:14

Tata Yosëri huiꞌnin isoroꞌpaquë aꞌpaimarin nichaꞌëinpoaso marëꞌ. Quiyarisoꞌ niꞌnai. Nani tahuëri piyapiꞌsaꞌ shaꞌhuitárai.