1 Tesalonicenses 5:6 - Chayahuita (Shahui)

⁶ Napoaton oꞌmantacasoꞌ tahuëri yonquiatëhuaꞌ, noya ninahuaꞌ. Aꞌnaquënsoꞌ huëꞌërëso pochin cancantatonaꞌ, co ina tahuëri yonquipihuëꞌ. Canpoaso nipirinhuëꞌ noꞌtëquën yonquiatëhuaꞌ, sano cancantahuaꞌ.

1 Tesalonicenses 5:6 ပူးပေါင်းရင်းမြစ်များ

Jonás 1:6

Nancha huaꞌanënsoꞌ, pëꞌpëto quëpapiquë yaꞌcomarahuaton niꞌpirinhuëꞌ, Conasë huëꞌësárin quënamarin. Quënamarahuaton: —¡Capayatëquë huëꞌëitëꞌ! ¡Paꞌpi huëhuëpiro nisarëhuaꞌ! Huënsëaton Yosëparin nontëquëꞌ. Tapona ina yanichaꞌësápirinpoahuëꞌ, itërin.

Mateo 13:25

Ina quëran tashihuachina, huëꞌësoiꞌ inimico huëꞌnin. Huëꞌsahuaton, inaquë chachin pacatëroꞌ trico pochin yaꞌnorinsoꞌ shaꞌquirin antaꞌ. Trico shaꞌninsoꞌ huancanaya ina huancanaya shaꞌquirin. Nani shaꞌpachina, paꞌnin. Co incari tërantaꞌ niꞌninhuëꞌ.

Mateo 24:42

Ama huëꞌërëso pochin cancantatomaꞌ, naniantocosohuëꞌ. Onporosona oꞌmacaꞌhuasoꞌ tahuëri nanihuachin, co nitotaramahuëꞌ.

Mateo 25:13

Napoaton canpitantaꞌ noya yonquiatomaꞌ, oꞌmantaꞌhuasoꞌ tahuëri ninacoꞌ. Onporosoꞌ nanipon nimara, co nitotëramahuëꞌ. Niꞌcona patontatënquëmaꞌ,” itërin.

Mateo 25:5

Huaꞌan huaꞌquirin niꞌton, tashitopi. Yahuëꞌëtonaꞌ, yaꞌipimiáchin huëꞌëpi.

Mateo 26:38

—Paꞌpi sëtërahuë. Chiminchináchin sëtërahuë. Isëquë huënsëtacoꞌ. Ama huëꞌëtomarahuëꞌ, niꞌtácoꞌ, itërin.

Marcos 13:37

Nani aꞌchintëranquëma huachi. Yaꞌipi piyapiꞌsaꞌ nitochinaꞌ. ‘Ama huëꞌërëso pochin cancantatomarahuëꞌ, ninaco,’ itarahuë yaꞌipi piyapiꞌsaꞌ,” itërin Quisosori.

Lucas 12:37

Piyapinënpita ninarapi quënanquintahuachina, huaꞌanëni nóya niꞌsarin. Inari chachin nitaparahuaton, cosharoꞌ acotarin piyapinënpita capacaiso marëꞌ.

Lucas 12:39

Isontaꞌ yonquicoꞌ: Ihuatëꞌ aꞌnanaya huëcaton, pëiquë yaꞌconin. Huaꞌanën co nicasohuëꞌ, maꞌsha ihuarin. Onporosona huëcacasoꞌ nitotërin naporini, huaꞌanëni ninaitonhuëꞌ, co maꞌshanënpita ihuaitonhuëꞌ.

Lucas 21:36

Napoaton noya cancantatomaꞌ, Yosë nontocoꞌ achinicancainquëmaꞌ chaꞌëcamaso marëꞌ. Yosë quëran caso quëmapico niꞌto, co imapisopitahuëꞌ anaꞌintarahuë. Apira apira Yosë nontohuatamaꞌ, naporoꞌ tahuëri co tapanatomahuëꞌ, noya huaniparamaco,” tënin Quisoso.

Lucas 22:46

—¿Onpoatomataꞌ iyaroꞌsaꞌ huëꞌësáramaꞌ? Huënsëatomaꞌ Yosë nontocoꞌ ama sopai minsëinquëmaso marëhuëꞌ, itërin.

Hechos 20:31

Napoaton iyaroꞌsaꞌ, niꞌcona nonpintochinënquëmaꞌ. Cara piꞌipi catahuaranquëmaꞌ. Tahuërirë chachin, tashirë chachin pënënanquëmaꞌ. Naꞌcon nosororanquëmaꞌ niꞌton, naꞌnëto, aꞌnaya aꞌnayanquëmaꞌ pënënanquëmaꞌ. Ina yonquiatomaꞌ, nipënëncoꞌ, nicatahuacoꞌ.

1 Corintios 15:34

Noꞌtëquën yonquiatomaꞌ, noyasáchin nicoꞌ. Ama huachi tëhuëcosohuëꞌ. Aꞌnaquëmaꞌ co Yosë nohuichátëraramahuëꞌ. Ina yonquiatomaꞌ, tapanacamasoꞌ yaꞌhuërin, tënahuë.

1 Corintios 16:13

Ama huëꞌërëso pochin cancantatomarahuëꞌ, noya yonquicoꞌ. Yaꞌipi cancanëma quëran natëmiatocoꞌ. Maꞌsha onpoapomarahuëntaꞌ, chiníquën cancantocoꞌ. Niachinicancancoꞌ.

Efesios 2:3

Iráca yaꞌipinpoaꞌ co Yosë natërëhuahuëꞌ. Co noyahuëꞌ yonquiatëhuaꞌ, co noyahuëꞌ ninëhuaꞌ. Canpoara nohuantërëhuasoráchin ninëhuaꞌ. Yanoꞌhuitohuatëhuara, noꞌhuitërëhuaꞌ. Yanoꞌpihuatëhuara, noꞌpirëhuaꞌ. Yaahuëtohuatëhuara, ahuëtërëhuaꞌ. Ina marëꞌ yaꞌipinpoaꞌ anaꞌintinpoasoꞌ yaꞌhuërin.

Efesios 5:14

Tahuëri nipachina, yaꞌipi quënanëꞌ. Ninshitatona napopiso chachin ninin. “Co noyahuëꞌ nipatamaꞌ, huëꞌërëso pochin cancantaramaꞌ. Ama ina pochin cancantatomarahuëꞌ, Yosë yonquicoꞌ. Chimipi pochin cancantohuatamaꞌ, Yosë nontocoꞌ nasha cancan quëchinquëmaꞌ. Ina quëran nanpiantarëso pochin cancantaramaꞌ. Quisocristo chachin aꞌpintarinquëmaꞌ noya nicacamaso marëꞌ,” topi.

Efesios 6:18

Apira apira Yosë nontocoꞌ. Maꞌsha onpohuatamantaꞌ, ina nontocoꞌ catahuainquëmaꞌ. Noya yonquiatomaꞌ, chiníquën nontocoꞌ. Ispirito Santo catahuarinpoaꞌ cancanënpoa quëran huarëꞌ noya nontacasoꞌ. Ama amiatomahuëꞌ, niꞌsácoꞌ ama aꞌnanaya sopai minsëinquëmaso marëhuëꞌ. Yaꞌipi imarëhuasopita marëꞌ Yosë nontocoꞌ.

Filipenses 4:5

Yaꞌipi piyapiꞌsaꞌ nosoroatomaꞌ, noyasha nontocoꞌ. Quisocristo niꞌsárinpoaꞌ. Co huaꞌquiya quëranhuëꞌ oꞌmantararin. Ina yonquiatomaꞌ, yaꞌipi piyapiꞌsaꞌ noya nontocoꞌ.

Colosenses 4:2

Nani tahuëri Yosë nontocoꞌ. Ama amiatomahuëꞌ, nontácoꞌ. Ama topinan nontocosohuëꞌ. Yaꞌipi cancanëma quëran huarëꞌ noya yonquiatomaꞌ, nontocoꞌ. “Yosparinquën Sinioro,” itocoꞌ.

1 Tesalonicenses 4:13

Chiminpisopita maꞌsona onpocaisoꞌ aꞌchinchinquëmaꞌ, nitotocoꞌ. Quisoso imarëhuasopita chiminpatëhuaꞌ, nanpiantarihuaꞌ. Co imapisopitasohuëꞌ nipirinhuëꞌ, quëmopinënpita chiminpachinara, sëtopi. “Co onporontaꞌ quënantarihuahuëꞌ,” taꞌtonaꞌ sëtápi. Ama inapita pochin sëtacaso marëhuëꞌ canpitasoꞌ aꞌchinchinquëmaꞌ.

1 Tesalonicenses 5:10

Canpoa marëꞌ inasoꞌ chiminin. Aꞌnaquënpoaꞌ nanpiarëhuaꞌ, aꞌnaquënpoaꞌ chiminarihuarahuëꞌ, oꞌmantahuachin, yaꞌipi imarëhuasopita quëpantarinpoaꞌ. Inarëꞌquënpoaꞌ yaꞌhuëmiatarihuaꞌ.

1 Tesalonicenses 5:8

Canpoaso nipirinhuëꞌ tahuëri pochin cancantacasoꞌ yaꞌhuërin. Napoaton noya yonquiatëhuaꞌ, Yosë imamiatahuaꞌ. Niꞌcoꞌ iyaroꞌsaꞌ. Inimicoroꞌsaꞌ huëꞌpachinara, sontaroꞌsaꞌ co topinan paꞌpihuëꞌ. Coton huaꞌna quëran nininsoꞌ aꞌmopi. Cascontaꞌ huaꞌna quëran nininsoꞌ yancopi ama inimicori ohuanacaso marëhuëꞌ. Noya nitapahuachinara, co inimicori minsërinhuëꞌ. Huaꞌna aꞌmopiso pochin canpoantaꞌ Yosë natëahuaꞌ catahuainpoaꞌ. Ina natëtëhuaꞌ, noya ninosoroaꞌahuaꞌ. “Yosë aꞌpaiarinpoaꞌ. Oꞌmahuachin, noyá nichaꞌësarinpoaꞌ,” taꞌtëhuaꞌ noya ninahuaꞌ.

1 Timoteo 2:15

Sanapiꞌsaso nipirinhuëꞌ huaꞌhuinpita noya asoꞌsohuachinaꞌ, Yosëri noya niꞌsarin. “Yosë catahuarinco,” taꞌtonaꞌ, imamiachinaꞌ. Piyapiꞌsaꞌ noya nosoroꞌinaꞌ. Noyasáchin niꞌinaꞌ. Sano yonquiꞌinaꞌ. Inapohuachinaꞌ, nichaꞌësarin.

1 Timoteo 2:9

Sanapiꞌsantaꞌ noya niinaꞌ. Aꞌnaquën sanapiꞌsaꞌ nitapacaisoráchin yonquipi. Naꞌcon naꞌcon yanco nitonpomototopi, notohuaroꞌ miyo pëꞌpëpi, nisha nisha aꞌsontanpapi. Paꞌton nininsopita aꞌmocaisoꞌ paꞌyatopi. Ainën tapacaisoráchin yonquipi. Yosë imarinsopitaso nipirinhuëꞌ, ama inasáchin yonquiatonahuëꞌ, sano yonquiꞌinaꞌ. Ama piyapiꞌsari paꞌyatacaiso marëáchin nitapainasohuëꞌ.

1 Timoteo 3:11

Tiaconaroꞌsantaꞌ natëtonoꞌsaꞌ niinaꞌ. Ama maꞌtona maꞌtona noinasohuëꞌ. Ama pinochinasohuëꞌ. Ama noꞌpiinasohuëꞌ. Noyasáchin niinaꞌ.

1 Timoteo 3:2

Napoaton yayaꞌconpachinaꞌ, nóya nipisopitaráchin yaꞌcoinaꞌ. Ama piyapiꞌsari pinocaiso marëhuëꞌ noyasáchin niinaꞌ. Aꞌna saꞌináchin yaꞌhuëchinaꞌ. Co monshihuanacaisoꞌ yaꞌhuërinhuëꞌ. Sano yonquiꞌinaꞌ. Ama nisha nisha yonquiꞌinasohuëꞌ. Yaꞌipi cancanëna quëran imainaꞌ. Niꞌtoroꞌsaꞌ huëꞌpachinaꞌ, noya nonchinaꞌ, oꞌshichinaꞌ. Aꞌchinacaisoꞌ noya nitochinaꞌ.

2 Timoteo 4:5

Quëmaso nipirinhuëꞌ, yonquínahuan niquëꞌ. Aparisitohuachinënquën, ama noꞌhuitatonahuëꞌ, ahuantëquëꞌ. Aꞌnaya aꞌnaya Yosë nanamën aꞌchintëraꞌpiaquëꞌ. Co imapisopitahuëntaꞌ nitochinaꞌ. Yaꞌipi imapisopita catahuaquëꞌ noya noya imainaꞌ.

Tito 2:12

Nosoroatonpoaꞌ, pënëninpoaꞌ yaꞌipi co noyahuëꞌ yonquirëhuasopita naniantacaso marëꞌ. Ama maꞌsharáchin nohuantahuasohuëꞌ. Co monshihuanacasoꞌ yaꞌhuërinhuëꞌ. Sano yaꞌhuatëhuaꞌ, nóya yonquiaꞌahuaꞌ. Yosë yonquirinsoráchin imahuaꞌ. Nani tahuëri Yosë chinotatëhuaꞌ, noyasáchin niahuaꞌ. Ina marëꞌ pënëninpoaꞌ.

Tito 2:6

Huiꞌnapiꞌsantaꞌ pënënquëꞌ sano yonquiꞌinaꞌ.

1 Pedro 1:13

Napoaton chiníquën cancantatomaꞌ, yonquicoꞌ noya nicacamasoꞌ. Sano yonquicoꞌ. Quisocristo oꞌmantahuachin, inaora nohuanton, nichaꞌësarinpoaꞌ. Ina ninatomaꞌ, noya cancantocoꞌ.

1 Pedro 4:7

Ayaroꞌ tahuëri nani yaꞌcariarinpoaꞌ. Napoaton ama nisha nisha yonquicosohuëꞌ. Noya yonquiatomaꞌ, Yosë nontácoꞌ.

1 Pedro 5:8

Sopaisoꞌ inimiconënpoaꞌ. Yacamairinpoaꞌ co noyahuëꞌ nicacaso marëꞌ. Paꞌpiniꞌ yamaninposo pochachin sopai paꞌsarin piyapiꞌsaꞌ minsëcaso marëꞌ. Napoaton noya yonquiatomaꞌ, niꞌsácoꞌ.

Apocalipsis 16:15

Nani Quisoso shaꞌhuitërinpoaꞌ: “Niꞌcoꞌ, iyaroꞌsaꞌ. Aꞌnanaya oꞌmantararahuë. Ihuatë pochin nicato, co nitotasënquëmahuëꞌ, oꞌmantararahuë niꞌton, nani tahuëri ninaco. Noya ninahuatamaco, noya cancantaramaꞌ. Yosë noya niꞌsarinquëmaꞌ. Noyápiachin aꞌmorëso pochin noyasáchin nicoꞌ. Ina quëran oꞌmantahuato, co tapanapomahuëꞌ. Noya cancantaramaꞌ,” itërinpoaꞌ.

Apocalipsis 3:2

Ipora huantaꞌ niyontonpiramahuëꞌ, topinan quëran naporamaꞌ: ‘Yaꞌipi natëtoi, noya ninai,’ topiramahuëꞌ, co huachi Yosë noya niꞌninquëmahuëꞌ. Huëꞌërëso pochin cancantëramaꞌ niꞌton, co yonquiramahuëꞌ. Pënsha yatacopirinso pochin cancantëramaꞌ. Pën yatacopihuachina, pishitërëꞌ noya orotacaso marëꞌ. Inapochachin canpitantaꞌ chiníquën Yosë yonquiantacoꞌ.