1 Tesalonicenses 5:21 - Chayahuita (Shahui)

²¹ Napoaponahuëꞌ, niꞌcona nonpintochinënquëmaꞌ. Aꞌnaquën “Noꞌtëquën aꞌchintaranquëmaꞌ,” itohuachinënquëmaꞌ, ama aꞌnaroáchin natëtocosohuëꞌ. Yaꞌipi napopisoꞌ Yosë quiricanën quëran tantiacoꞌ. “Inaora yonquinën quëran aꞌchinamara,” taꞌtomaꞌ, tantiacoꞌ. Yosë nanamënsáchin natëcasoꞌ yaꞌhuërin.

1 Tesalonicenses 5:21 ပူးပေါင်းရင်းမြစ်များ

Proverbios 23:23

Noꞌtëquën nanan nitotacasoꞌ, yonquínahuan nicacasoꞌ, aꞌchinpisoꞌ noya natanacasoꞌ, yonqui yonquícharacasoꞌ, inapita cancantëquëꞌ. Ina pochin nipatan, ama aꞌpoquësohuëꞌ.

Proverbios 3:1

(-)

Lucas 12:57

“¿Onpoatomataꞌ canpitaora cancanëma quëran co noꞌtëquën yonquiramahuëꞌ?

Juan 15:4

Imamiatatomaco, nani tahuëri yonquiráco catahuainquëmaꞌ. Noya nichinpitërinso pochin nicoꞌ. Nara sëꞌpaꞌ nohuishatohuachina, co nitërinhuëꞌ. Inapochachin co imamiatohuatamacohuëꞌ, co nanitaparamahuëꞌ noya nicacamasoꞌ.

Juan 8:31

Ina quëran nasha imarinsopita itantarin: —Carinquëmaꞌ aꞌchintëranquëmasoꞌ noya natëhuatamaꞌ, noya imasaramaco.

Hechos 11:23

Inaquë canconahuaton, “Tëhuënchachin nisha piyapiꞌsantaꞌ imasapi. Yosëri naꞌcon catahuarin,” taꞌton, noya cancantërin. Pirnapisoꞌ noya quëmapi. Yosë noya natërin. Ispirito Santori noyá yaꞌcoancantërin niꞌton, piyapiꞌsaꞌ pënënin: “Ama Sinioro aꞌpocosohuëꞌ. Yaꞌipi cancanëma quëran huarëꞌ imamiatocoꞌ,” itërin. Pënënpachina, aꞌnapitantaꞌ Quisoso imapi.

Hechos 14:22

Cara ninanoquë chachin Quisoso imapisopita pënënaꞌpiapi. “Ama iyaroꞌsaꞌ Quisoso aꞌpocosohuëꞌ. Imamiatocoꞌ. Aꞌnapita aparisitarinënpoaꞌ. Parisitacasoꞌ yaꞌhuërin. Parisitatëhuaꞌ, Yosë huaꞌanëntërinquë yaꞌconarëhuaꞌ. Napoaton noya ahuantocoꞌ,” itopi. Pënënpachinara, achinicancanpi.

Hechos 17:11

Inaquë yaꞌhuëpisopitaso nipirinhuëꞌ nóya yonquipi. Co Tisaronicaquë yaꞌhuëpisopita pochinhuëꞌ. Paonori aꞌchintohuachina, nóya natanpi. “Paonosoꞌ noꞌtëquën aꞌchinamara,” taꞌtonaꞌ, nani tahuëri Yosë quiricanën noyásha nontapi noꞌtëquën nitotacaiso marëꞌ.

Romanos 12:2

Iporasoꞌ notohuaroꞌ piyapiꞌsaꞌ co Yosë natëpihuëꞌ. Maꞌsharáchin yonquiatonaꞌ, co Yosë yonquipihuëꞌ. Ama inapita nonancosohuëꞌ. Nani tahuëri Yosë nontocoꞌ yonquirinso chachin quëchinquëmaꞌ. Ina yonquihuatamaꞌ, nohuantërinso chachin anitotarinquëmaꞌ. Ina quëran noya noya cancantohuatamaꞌ, noya niꞌsarinquëmaꞌ.

Romanos 12:9

Yaꞌipi piyapiꞌsaꞌ nosorocoꞌ. Cancanëma quëran huarëꞌ nosorocoꞌ. Co noyahuëꞌ ninamasopita aꞌpocoꞌ. Noyasáchin nicoꞌ.

1 Corintios 15:58

Napoaton iyaroꞌsaꞌ chiníquën cancantocoꞌ. Nosororanquëmaꞌ niꞌton, pënënaranquëmaꞌ: Ama nisha nisha yonquicosohuëꞌ. Naporahuaton, paatomaꞌ aꞌnapita aꞌchintëraꞌpiacoꞌ. Sinioro catahuahuachinquëmaꞌ, co onporontaꞌ topinan quëran aꞌchinaramahuëꞌ. Aꞌchinpatamaꞌ, Yosëri nohuantërinsopita imasapi huachi.

1 Corintios 2:11

Co insontaꞌ piyapi yonquirinsoꞌ nitotërinhuëꞌ. Ispiritonën tëhuënchinso nitotërin. Inapochachin Ispirito Santontaꞌ, Yosë ispiritonën niꞌton, yonquirinso chachin nitotërin.

Gálatas 6:10

Napoaton yaꞌipi piyapiꞌsaꞌ nosoroaꞌhuaꞌ. Nanitohuatëhuaꞌ, catahuahuaꞌ. Quisocristo imarëhuasopita capini naꞌcon naꞌcon nicatahuahuaꞌ.

Efesios 5:10

Noya yonquiatomaꞌ, Yosë nohuantërinsoꞌ nitotocoꞌ. Ina nitotohuatamaꞌ, yaꞌipiya natëcoꞌ.

Filipenses 1:10

Yosë nanamën naꞌcon yonquihuatamaꞌ, noya noya nitotatomaꞌ, noya nisaramaꞌ. Noꞌtëquën yonquihuatamaꞌ, noyápiachin cancantaramaꞌ. Noyasáchin nipatamaꞌ, Quisocristo oꞌmantahuachina, nóya niꞌsarinquëmaꞌ. Co anaꞌintarinquëmahuëꞌ.

Filipenses 3:16

Anitotohuachinpoaꞌ, ama topinan quëran natahuansohuëꞌ. Naꞌcon yonquiaꞌahuaꞌ natëcaso marëꞌ. Yaꞌipi cancanënpoa quëran huarëꞌ imahuaꞌ.

Filipenses 4:8

Isoíchin iyaroꞌsaꞌ pënënaranquëmaꞌ. Noꞌtën nanansáchin yonquicoꞌ. Noya imatonaꞌ, noya nipisopita yonquicoꞌ. Ama nonpin nananoꞌsaꞌ natëtocosohuëꞌ. Noyápiachin cancantocoꞌ. Aꞌnapita noyasáchin yonquirapicoꞌ. Noya nahuininsoráchin yonquicoꞌ. Aꞌnapita noya nipisoꞌ yonquiatomaꞌ: “Ma noyacha Yosëri catahuarin paya,” itocoꞌ. Ina pochin yonquihuatamaꞌ, Yosë noya niꞌsarinquëmaꞌ.

1 Tesalonicenses 5:15

Aꞌnapita maꞌsha onpotohuachinënquëmaꞌ, ama yaiꞌhuërëtocosohuëꞌ. Nani tahuëri noya nontocoꞌ. Noꞌhuipirinënquëmaontaꞌ, nosoroatomaꞌ, catahuacoꞌ. Canpita capini ninosoroatomaꞌ, aꞌnapita piyapiꞌsantaꞌ catahuacoꞌ.

1 Tesalonicenses 5:22

Yaꞌipi aoshahuaninquëmasopita aꞌpocoꞌ.

2 Tesalonicenses 2:15

Napoaton iyaroꞌsaꞌ, chiníquën cancantatomaꞌ, yaꞌipi cancanëma quëran imacoꞌ. Canpitataquë yaꞌhuasocoi, noꞌtëquën aꞌchintërainquëmaꞌ. Ina quëran quirica aꞌpatëranquëmaꞌ naꞌcon naꞌcon nitotacamaso marëꞌ. Noꞌtën nanansáchin imamiatocoꞌ.

2 Timoteo 1:15

Tashinan pëiquë poꞌmohuachinaco, yaꞌipi Asiaquë imapisopita patërinaco. Huiquiro, Imoquinisi, inapita quëran huarëꞌ napotërinaco. Nani nitotëran, tënahuë.

2 Timoteo 3:6

Naꞌa piyapiꞌsaꞌ anishacancantapi. Aꞌnaya aꞌnaya pëiquë paatonaꞌ, sanapiꞌsaꞌ nonpintopi. Nonpintatonaꞌ, aꞌchintapirinahuëꞌ, aꞌnaquënsoꞌ noya natanpi. “Oshahuanco niꞌton, anaꞌintincosoꞌ yaꞌhuërin,” taꞌtonaꞌ, co chiníquën cancantopihuëꞌ. Nani maꞌsha nohuantatonaꞌ, co sano yonquipihuëꞌ niꞌton, aꞌnaroáchin natëtopi.

2 Timoteo 4:14

Aricantëro huaꞌnaquë sacatërinsoꞌ chiníquën shaꞌhuirapirinco. Ina marëꞌ Siniorori anaꞌintarin.

Hebreos 10:23

“Yosë noꞌtëquën shaꞌhuitërinpoaꞌ. Quisocristoíchin nichaꞌësarinpoaꞌ,” taꞌtëhuaꞌ, imamiatahuaꞌ. Ama piꞌpian tërantaꞌ nisha yonquiaꞌhuasohuë. Nani shaꞌhuitërinpoaꞌ niꞌton, co nonpintarinpoahuëꞌ.

1 Juan 4:1

Naꞌcon iyaroꞌsaꞌ nosororanquëmaꞌ niꞌton, pënënaranquëmaꞌ. Naꞌa nonpin nanan pënëntonaꞌpiroꞌsaꞌ nonpin nanan aꞌchinapi. “Yosë nanamën aꞌchinahuë,” topirinahuëꞌ, co noꞌtëquën aꞌchinpihuëꞌ. Napoaton aꞌchintohuachinënquëmaꞌ, ama aꞌnaroáchin natëtocosohuëꞌ. “Nonpin nanan nimara,” taꞌtomaꞌ, yonquicoꞌ. Yaꞌipi Yosë quiricanën quëran aꞌchintërinpoasoꞌ yonquiatomaꞌ, tantiacoꞌ. Co ina pochin aꞌchintohuachinënquëmahuëꞌ, ama natëcosohuëꞌ.

Apocalipsis 2:2

Nani nohuitëranquëmaꞌ. Yaꞌipi ninamasopita nitotërahuë. Chiníquën ca marëꞌ sacatëramaꞌ. Co amiatomacohuëꞌ, noya ninamaꞌ. Aꞌnaquën co noyahuëꞌ nipachinara, co noya niꞌnamahuëꞌ. Nonpin nanan aꞌchinaꞌpiroꞌsantaꞌ co noya niꞌnamahuëꞌ. ‘Yosë aꞌparincoi, aꞌchinarai,’ itopirinënquëmahuëꞌ, nonpinapi. Inapita natanpatamaꞌ: ‘Co noꞌtëquën aꞌchinpihuëꞌ,’ taꞌtomaꞌ, co natëramahuëꞌ.

Apocalipsis 2:25

Chiníquën cancantatomaꞌ, oꞌmantaꞌhuaquë huarëꞌ imamiatoco.

Apocalipsis 3:11

Co huaꞌquiya quëranhuëꞌ oꞌmantararahuë. Ama naniantatomacohuëꞌ, imamiatoco. Niꞌcona sopai minsëchinquëmaꞌ. Ina minsëhuachinquëmaꞌ, co inápaquë canaaramahuëꞌ.

Apocalipsis 3:3

Yaꞌnan natanapomaꞌ, Yosë nanamën noꞌtëquën aꞌchintërinënquëmaꞌ. Ina yonquiatomaꞌ, yaꞌipi co noyahuëꞌ yonquiramasopita naniantocoꞌ. Yaꞌipi cancanëma quëran casáchin yonquico. Co noya cancantaantahuatamahuëꞌ, aꞌnaroáchin anaꞌintaranquëmaꞌ. Ihuatonaꞌpi huëꞌninso pochachin aꞌnanaya anaꞌintaranquëmaꞌ. Co nitotasënquëmahuëꞌ, oꞌmantararahuë.