1 Tesalonicenses 4:3 - Chayahuita (Shahui)

³ Yosë nohuantërin noyasáchin nicacasoꞌ. Ama piꞌpian tërantaꞌ monshihuancosohuëꞌ.

1 Tesalonicenses 4:3 ပူးပေါင်းရင်းမြစ်များ

Salmos 40:8

Quëma nohuantëranso chachin nohuantërahuë nicaꞌhuasoꞌ. Pënëntëransoꞌ, cancanëhuë quëran yonquirárahuë.

Mateo 12:50

Yosë natëpisopita iyahuëpita pochin niꞌnahuë. Sanapiꞌsantaꞌ Yosë nanamën natëhuachinaꞌ, oshihuëpita pochin niꞌnahuë. Payaroꞌsantaꞌ Yosë imapachinaꞌ, mamahuë pochin niꞌnahuë, itërin.

Mateo 15:19

Co noyahuëꞌ yonquihuatamara, tëpatëramaꞌ, nitëhuananpitëramaꞌ, monshihuanacasoáchin yonquiramaꞌ, ihuatëramaꞌ, nonpintëramaꞌ, pinotëramaꞌ.

Mateo 5:32

Caso nipirinhuëꞌ nisha pënënanquëmaꞌ. Co saꞌama monshihuanpachinahuëꞌ, co onporontaꞌ tëꞌyatamasoꞌ yaꞌhuërinhuëꞌ, tënahuë. Topinan tëꞌyatohuatamaꞌ, oshahuanaramaꞌ. Ina sanapintaꞌ soꞌyantahuachin, monshihuaninso pochin nisarin. Nasha soꞌiontaꞌ, monshin pochin nisarin. Co onporontaꞌ tëꞌyatacasoꞌ yaꞌhuërinhuëꞌ, tënahuë,” tënin.

Mateo 7:21

Ina quëran itaantarin: “Naꞌa piyapiꞌsaꞌ: ‘Sinioro, Sinioro,’ itopirinacohuëꞌ, aꞌnaquën co cancanëna quëran imarinacohuë niꞌton, co Yosë huaꞌanëntërinquë yaꞌconapihuëꞌ. Yosë natëpisopitaráchin inatohuaꞌ yaꞌhuëcontapi huachi.

Marcos 3:35

Yosë natëpisopita iyahuëpita pochin niꞌnahuë. Sanapiꞌsantaꞌ Yosë nanamën natëhuachinaꞌ, oshihuëpita pochin niꞌnahuë. Payaroꞌsantaꞌ imapachinaco, mamahuë pochin niꞌnahuë, itërin.

Juan 4:34

—Yosë aꞌpaimarinco nohuantërinsoꞌ nicaꞌhuasoꞌ. Yaꞌipiya yanatërahuë. Ina yonquiato, co huachi cosharoꞌ yonquirahuëꞌ. Cosharo pochin achinirinco.

Juan 7:17

Cancanëma quëran huarëꞌ Yosë yanatëhuatamaꞌ, noꞌtëquën anitotarinquëmaꞌ: “Co inaora yonquinën quëran aꞌchininhuëꞌ. Yosë nanamën chachin aꞌchinarin,” tosaramaꞌ.

Hechos 15:20

Nipirinhuëꞌ, piꞌpian pënënacaso marëꞌ ninshitahuaꞌ. Nisha piyapiꞌsaꞌ maꞌsha tëpapi mamanshi moshacaiso marëꞌ. Ina nosha Quisoso imapisopita tananpichinaꞌ. Naporahuatonaꞌ, aꞌnaquën maconorahuatonaꞌ, maꞌsha tëpapi. Co huënainën noya inquitopihuëꞌ. Ina noshantaꞌ ama caꞌinasohuëꞌ. Naporahuatonaꞌ, ama monshihuainasohuëꞌ, Inaíchin pënëanhuanꞌ.

Hechos 15:29

Aꞌnaquën maꞌsha tëpapi mamanshi moshacaiso marëꞌ. Ina nosha tananpitocoꞌ, tënai. Naporahuaton, aꞌnaquën maconorahuatonaꞌ, maꞌsha tëpapi. Co huënainën noya inquipirinhuëꞌ, caꞌpi. Ina noshantaꞌ ama caꞌcosohuëꞌ. Naporahuaton, ama monshihuancosohuëꞌ. Moisësë naꞌcon pënëntopirinhuëꞌ, inaíchin natëcasoꞌ yaꞌhuërin, tënai. Cotasë, Sirasë, inapitantaꞌ inachachin pënënarinënquëmaꞌ. Natëhuatamaꞌ iyaroꞌsaꞌ, noya nisaramaꞌ. Nani huachi,” topi quiricatatonaꞌ.

Hechos 20:32

Paꞌpato, Yosë noya aꞌpainquëmaꞌ. Quiricanën quëran nontarinquëmaꞌ. Ina quëran nosororinpoasoꞌ anitotarinpoaꞌ. Ina natëhuatamaꞌ, achinicancanarinquëmaꞌ. Oshaquëran noya noya cancantaramaꞌ. Quisocristo imarëhuaꞌ niꞌton, anoyacancantërinpoaꞌ. Ina nohuanton, aꞌna tahuëri yaꞌipi shaꞌhuitërinpoasoꞌ noya acotarinpoaꞌ.

Hechos 26:18

Nisha piyapiꞌsantaꞌ aꞌchintëquëꞌ nanamëhuë nitochinaꞌ. Somaraya pochin cancantatonaꞌ, co nohuitërinacohuëꞌ. Nanamëhuë aꞌchintohuatan, nohuitarinaco. Iporasoꞌ tashi pochin cancantopi. Nohuitohuachinaco, tahuëri pochin cancantapi. Iporasoꞌ sopai huaꞌani camaihuachina, natëpi. Aꞌna tahuërisoꞌ Yosë natërapi. Natëtonaco, imapachinaco, oshanënaꞌ Yosëri inquitarin. Yaꞌipi natërinacosopita nasha cancan quëtarahuë. Yosë piyapinënpita chachin nisapi,’ itërinco.

Romanos 1:29

Paꞌpi co noyahuëꞌ nipi. Nimonshitacaisoráchin yonquipi. Naꞌcon oshahuanpi. Aꞌna piyapi maꞌshanënpita nohuantapapi. Piyapi chinotopi. Niapiratopi. Aꞌnaquën tëpatopi. Ninoꞌhuipi. Nonpinápi. Noꞌhuitápi. Aꞌnapita nonpinapipi.

Romanos 12:2

Iporasoꞌ notohuaroꞌ piyapiꞌsaꞌ co Yosë natëpihuëꞌ. Maꞌsharáchin yonquiatonaꞌ, co Yosë yonquipihuëꞌ. Ama inapita nonancosohuëꞌ. Nani tahuëri Yosë nontocoꞌ yonquirinso chachin quëchinquëmaꞌ. Ina yonquihuatamaꞌ, nohuantërinso chachin anitotarinquëmaꞌ. Ina quëran noya noya cancantohuatamaꞌ, noya niꞌsarinquëmaꞌ.

Romanos 6:22

Iporaso nipirinhuëꞌ co huachi oshanëma huaꞌanëntërinquëmahuëꞌ. Yosë nichaꞌërinquëmaꞌ ama huachi oshahuanacamaso marëhuëꞌ. Ina chachin huaꞌanëntërinquëmaꞌ. Napoaton noyápiachin cancantaramaꞌ. Aꞌna tahuëri Yosëꞌpaꞌ nanpimiataramaꞌ.

1 Corintios 1:30

Yosë nohuanton, Quisocristo imarëhuaꞌ. Imapatëhuaꞌ, yaꞌcoancantërinpoaꞌ niꞌton, yonquínahuan pochin Yosë niꞌninpoaꞌ. Naporahuaton, catahuarinpoaꞌ noꞌtëquën yonquicasoꞌ. Oshanënpoaꞌ inquitohuachinpoaꞌ, noya huachi niꞌninpoaꞌ. Nasha cancan quëtërinpoaꞌ noya nicacaso marëꞌ. Quisocristo chachin nichaꞌërinpoaꞌ.

1 Corintios 7:2

Napoaponahuëꞌ, naꞌa piyapiꞌsaꞌ monshihuanapi niꞌton, naꞌcon naꞌcon quëmapiꞌsaꞌ saꞌainaꞌ. Ama monshihuanacaiso marëhuëꞌ saꞌainaꞌ. Quëmapiꞌsaꞌ saꞌinaráchin yonquiꞌinaꞌ. Inapochachin sanapiꞌsantaꞌ soꞌináchin yonquiꞌinaꞌ.

2 Corintios 12:21

Iráca aꞌnaquëmaꞌ co noyahuëꞌ yonquiramaꞌ. Monshihuanamaꞌ, sanapirachin yonquiramaꞌ. Ipora huantaꞌ aꞌnaquëmaꞌ inapoaramaꞌ nimara. Co ina naniantohuatamahuëꞌ, canconpato, paꞌpi sëtarahuë. Carinquëmaꞌ aꞌchintëranquëmasoꞌ niꞌton, Yosë atapanarinco. Co oshanëmaꞌ aꞌpohuatamahuëꞌ, chiníquën asëtaramaco.

Gálatas 5:19

Piyapiꞌsaꞌ inahuara co nanitopihuëꞌ Yosëíchin yonquicaisoꞌ. Co noyahuëꞌ yonquipisopita nitotërëhuaꞌ. Co noyahuëꞌ yonquihuachinara, co noyahuëꞌ nipi. Yamonshihuanpi, taparoꞌ nonpi, sanapi sëꞌhuachinachin cancantopi.

Efesios 5:17

Ama topinan quëran yaꞌhuëcosohuëꞌ. Yosë nohuantërinsoꞌ nitotatomaꞌ, natëcoꞌ.

Efesios 6:6

Aꞌnaquënsoꞌ patroni niꞌpachinaꞌ, chiníquën sacatërin. Co niꞌpachinahuëꞌ, chiroton co sacatërinhuëꞌ. Canpitaso nipirinhuëꞌ patron co niꞌpirinquëmaontaꞌ, noya sacatocoꞌ Quisocristo noya niꞌinquëmaꞌ. Yosë natëtomaꞌ, yaꞌipi cancanëma quëran noya nicoꞌ.

Colosenses 1:9

Naporo quëran huarëꞌ canpita yonquiatëinquëmaꞌ, Yosë nontërai. Nani tahuëriya nontatoi, itërai: “Quëmasoꞌ Sinioro tëhuënchachin anitotërancoi noꞌtëquën natëcaꞌhuainquënso marëꞌ. Corosasëquë imarinënsopita naꞌcon catahuaquëꞌ. Yaꞌipi nohuantëransoꞌ anitotëquëꞌ. Ispirito Santori catahuain noꞌtëquën yonquiꞌinaꞌ.

Colosenses 3:5

Napoaton piꞌpian tërantaꞌ co noyahuëꞌ yonquihuatamaꞌ, aꞌnaroáchin naniantocoꞌ. Ama monshihuancosohuëꞌ. Ama taparoꞌ yonquicosohuëꞌ. Ama aꞌna sanapi sëꞌhuacamasoꞌ yonquicosohuëꞌ. Ama aꞌna quëmapi saꞌin noyapacosohuëꞌ. Ama nani maꞌsha nohuantapatocosohuëꞌ. Aꞌnaquënsoꞌ maꞌsha naꞌcon nohuantatonaꞌ, mamanshi moshapiso pochin niconpi.

Colosenses 4:12

Ipapërasëntaꞌ canpitataquë yaꞌhuërinsoꞌ saludos aꞌpatarinquëmaꞌ. Inantaꞌ Quisocristo natëton, noya nanan aꞌchinarin. Nani tahuëri canpita marëꞌ Yosë nontárin. “Catahuaquëꞌ Sinioro yaꞌipi nohuantëransoꞌ nitochinaꞌ. Noya nitotatonaꞌ imamiachinën,” itárin.

1 Tesalonicenses 4:2

Sinioro Quisoso aꞌchintërincoiso chachin shaꞌhuitërainquëmaꞌ, natanamaꞌ.

1 Tesalonicenses 4:4

Sanapi nohuantohuatamaꞌ, ama monshitocosohuëꞌ. Nitatomaꞌ, noya saꞌacoꞌ. Yosë yonquiatomaꞌ, noya ichiyaꞌhuëcoꞌ. Nani saꞌapatamaꞌ, inasáchin yonquicasoꞌ yaꞌhuërin.

1 Tesalonicenses 5:18

Maꞌsha onpotopirinënquëmahuëꞌ, ama sëtocosohuëꞌ. Nani tahuëri “Yosparinquën Sinioro,” itocoꞌ. Maꞌsha onpoapomarahuëntaꞌ, noya cancantocoꞌ. “Inantaꞌ Sinioro noya,” itocoꞌ. Quisocristo imarëhuaꞌ niꞌton, ina pochin cancantacasoꞌ Yosë nohuantërin.

1 Tesalonicenses 5:23

Yosëíchin asanocancaninpoaꞌ. Canpita marëꞌ ina nontarahuë noyásha anoyacancanchinquëmaꞌ. “Catahuaquëꞌ Sinioro, yaꞌipi cancanëna quëran noyápiachin yonquiꞌinaꞌ. Naporahuaton, yaꞌipi yonquinëna quëran noya nininsopitaráchin nohuanchinaꞌ. Quëma nohuanton, yaꞌipi nonëna quëran huarë noyasáchin niinaꞌ,” itërahuë. Ina quëran Sinioro Quisocristo oꞌmantahuachin, nóya niꞌsarinquëmaꞌ.

2 Tesalonicenses 2:13

Canpitaso nipirinhuëꞌ iyaroꞌsaꞌ, imaramaꞌ. Sinioro nosororinquëmaꞌ. Iráca quëran huarëꞌ Yosë huayoninquëmaꞌ huëntonënquë yaꞌconacamaso marëꞌ. Noꞌtën nanan natëhuatamaꞌ, Ispirito Santo anoyacancantërinquëmaꞌ Yosë nohuantërinso chachin nicacamaso marëꞌ. Ina yonquiatoi, Yosë nontërai: “Ma noya Sinioro inapitasoꞌ nichaꞌëran niꞌton, ‘Yosparinquën,’ ” itërai, Yosë nontatoi.

Tito 2:14

Iráca canpoa marëꞌ chiminin oshanënpoaꞌ inquitinpoaso marëꞌ. Anoyacancantërinpoaꞌ piyapinënpita nicacaso marëꞌ. Huëntonënquë chachin yaꞌconpatëhuaꞌ, noya nicacasoráchin nohuantarihuaꞌ.

Hebreos 10:36

Maꞌsha onpopiramahuëntaꞌ, noya ahuantocoꞌ. Noya natëhuatamaꞌ, naꞌcon catahuarinquëmaꞌ. Nani shaꞌhuitërinquëmaꞌ niꞌton, co nonpintarinquëmahuëꞌ. Noya nichaꞌësarinquëmaꞌ.

Hebreos 12:16

Niꞌcona nisha nisha cancantotamaꞌ. Ama monshihuancosohuëꞌ. Noyápiachin cancantocoꞌ. Ama maꞌsha yonquiatomaꞌ, Yosë naniantocosohuëꞌ. Isao iráca naporinsoꞌ yonquicoꞌ. Maꞌsharáchin yonquiaton, co onpopinchin Yosë yonquirinhuëꞌ. Tanaton, iin nontërin: “¿Yosë naꞌcon catahuainquënsoꞌ nohuantëran ti? Co casoꞌ ina yonquirahuëꞌ. Cosharoꞌ naꞌcon naꞌcon nohuantërahuë,” itërin.

Hebreos 13:21

Yosë naꞌcon catahuainquëmaꞌ ina nohuantërinsoꞌ nicacamaso marëꞌ. Piꞌpian tërantaꞌ co noyahuëꞌ yonquihuatamaꞌ, anoyacancanchinquëmaꞌ. Quisocristo catahuahuachinpoaꞌ, nani tahuëri nóya nisarëhuaꞌ. Ina quëran noya niꞌsarinpoa huachi. Yaꞌipi piyapiꞌsaꞌ inasáchin chinochinaꞌ. Ama onporontaꞌ ina naniantahuasohuëꞌ. Amen.

Hebreos 13:4

Quëmapiꞌsaꞌ saꞌapachinaꞌ, ama aꞌna sanapi yonquiꞌinasohuëꞌ. Sanapiꞌsantaꞌ soꞌyahuachinaꞌ, ama soꞌinaꞌ tëhuananpichinasohuëꞌ. Ama mantaꞌ monshihuainasohuëꞌ. Monshihuanpatamaꞌ, Yosë chiníquën anaꞌintarinquëmaꞌ.

1 Pedro 1:2

Iráca quëra huarëꞌ Tata Yosë nohuitërinquëmaꞌ. Nosoroatënquëmaꞌ, huayoninquëmaꞌ huëntonënquë yaꞌconacamaso marëꞌ. Ispirito Santo anoyacancantërinquëmaꞌ natëcamaso marëꞌ. Quisocristo corosëquë chiminin oshanëmaꞌ inquitiinquëmaso marëꞌ. Yosë nontëramaꞌ niꞌton, oshanëmaꞌ inquitërinquëmaꞌ. Yosë inaora nohuanton, noya catahuainquëmaꞌ. Asanocancainquëmaꞌ.

1 Pedro 4:2

Napoaton ama iráca naporamaso pochin yonquicosohuëꞌ. Ipora quëra huarëꞌ Yosë nohuantërinsoáchin natëcoꞌ.

1 Juan 2:17

Isoroꞌpaꞌ taꞌhuantarin. Yaꞌipi maꞌshantaꞌ taꞌhuantarin. Inasáchin paꞌyatohuatëhuaꞌ, topinan quëran nanpiarihuaꞌ. Nipirinhuëꞌ, Yosë noya imapatëhuaꞌ, co onporontaꞌ taꞌhuantarihuahuëꞌ. Yaꞌhuëmiatarihuaꞌ.

Apocalipsis 21:8

Aꞌnapitaso nipirinhuëꞌ parisitáponaꞌ. Ayaroꞌ tahuëri naꞌa piyapiꞌsaꞌ pënquë paꞌsapi. Tëꞌhuatonaꞌ aꞌpopisopita, co natëpisopitahuëꞌ, co natëtochináchinhuëꞌ cancantopisopita, tëpatonaꞌpiroꞌsaꞌ, monshihuaninsopita, pënotonoꞌsaꞌ, mamanshi chinotopisopita, nonpinaꞌpiroꞌsaꞌ, inapita panca sono shaꞌpimoꞌshirë chachin pën tënëntápaquë paꞌsapi. Inaquë parisitáponaꞌ. Huaranca huaranca piꞌipintaꞌ nipirinhuëꞌ, co onporontaꞌ pipiapihuëꞌ.

Apocalipsis 22:15

Aꞌnaquënso nipirinhuëꞌ, co onporontaꞌ Yosë yaꞌhuërinquë paꞌsapihuëꞌ. Niꞌni pochin cancantopisopita, pënotonoꞌsaꞌ, monshihuanaꞌpiroꞌsaꞌ, tëpatoroꞌsaꞌ, mamanshi chinotopisopita, inapita aipiran yaꞌhuëmiatapi. Aꞌnaquëontaꞌ nonpinápi niꞌton, co nohuantapihuëꞌ noꞌtën nanan imacaisoꞌ. Inapitantaꞌ co onporontaꞌ Yosëꞌpaꞌ paꞌsapihuëꞌ.