1 Tesalonicenses 2:14 - Chayahuita (Shahui)

¹⁴ Iráca Cotia parti naꞌa piyapiꞌsaꞌ Quisocristo imatonaꞌ, natëpi. Aꞌnapita cotioroꞌsariso nipirinhuëꞌ, noꞌhuitonaꞌ chiníquën aparisitopi. Iporasoꞌ iyaroꞌsaꞌ canpitantaꞌ parisitëramaꞌ. Yaꞌhuëhuanoꞌsaꞌ inapochachin aparisitarinënquëmaꞌ.

1 Tesalonicenses 2:14 ပူးပေါင်းရင်းမြစ်များ

Hechos 11:19

Iꞌhua chachin Istipan tëpahuachinara, Quisoso imapisopita aparisitopi niꞌton, aquë yanquëëpi. Aꞌnaquën Pinisia parti paꞌpi. Aꞌnaquëontaꞌ Chipriquë paꞌpi. Aꞌnapitantaꞌ Antioquiaquëꞌpaꞌ paꞌpi. Nisha nisha parti paatonaꞌ, Quisoso nanamën shaꞌhuipi. Shaꞌhuiponaraihuëꞌ, cotioroꞌsaráchin shaꞌhuitopi.

Hechos 13:50

Cotioroꞌsaso nipirinhuëꞌ ninanoꞌ huaꞌanoꞌsaꞌ nontopi. Sanapiꞌsantaꞌ chiníquën nanantopisopita nontopi, Yosë chinotopisopita nininsoꞌ. “Paono co noya quëmapihuëꞌ. Pirnapintaꞌ co noyahuëꞌ. Co isëquë nohuantëraihuëꞌ,” toconpi. Napotatonaꞌ, aparisitahuatonaꞌ, aꞌpapi.

Hechos 14:19

Napoaponahuëꞌ, cotioroꞌsari huëcapairahuatonaꞌ, anishacancantopi. Aꞌnaquën Antioquia quëran huëꞌpi. Aꞌnapitantaꞌ Iconio quëran huëꞌpi. Huëꞌsahuatonaꞌ, Paono, Pirnapi, inapita shaꞌhuirapipi niꞌton, noꞌhuipi. Noꞌhuirahuatonaꞌ, Paono mapi. Masahuatonaꞌ, naꞌpiquë tëꞌyarahuachinara, chiminpirinhuëꞌ. Ohuararahuatonaꞌ, ninano intonquë tëꞌyatonpi. “Nani chiminin,” taꞌtonaꞌ inaquë patopi.

Hechos 14:2

Aꞌnaquën cotioroꞌsaso nipirinhuëꞌ, co yanatëpihuëꞌ. Napoaton, nisha piyapiꞌsaꞌ nontatonaꞌ, anishacancantopi. “Quisoso imapisopita co noya piyapisahuëꞌ,” itopi. Napoaton aꞌnaquën co yaimatonahuëꞌ, imapisopita noꞌhuipi.

Hechos 14:4

Yaꞌhuëhuanoꞌsasoꞌ nisha nisha yonquipi. Aꞌnaquën cotioroꞌsa pochin cancantopi. Aꞌnaquënso nipirinhuëꞌ Paono, Pirnapi, inapita natëpi.

Hechos 14:5

Cato chachin noya nipirinahuëꞌ, cotioroꞌsasoꞌ nisha piyapiꞌsarëꞌ napopianachin yonquiatonaꞌ, chinotopi ahuëcaisoꞌ. Huaꞌanoꞌsarintaꞌ noꞌhuipi. Naꞌpiquë yatëpapirinahuëꞌ,

Hechos 17:13

Napopisoꞌ, Tisaronicaquë nahuinin. Cotioroꞌsasoꞌ natantahuatonaꞌ, “Piriaquëntaꞌ Paono Yosë nanamën aꞌchinarin,” taꞌtonaꞌ, inatohuaꞌ paꞌpi. Canconahuatonaꞌ, Paono shaꞌhuirapitonaꞌ, piyapiꞌsaꞌ anoꞌhuitopi.

Hechos 18:12

Ina quëran Cariono Acaya parti huaꞌanëntohuachina, cotioroꞌsari Paono noꞌhuitonaꞌ, niyontonpi. Ina masahuatonaꞌ, huaꞌanoꞌsataquë quëpapi anaꞌintacaiso marëꞌ.

Hechos 8:1

Istipan tëpasoiꞌ, Saonontaꞌ: “Tëpacoꞌ,” tënin. Naporo quëran huarëꞌ cotio huaꞌanoꞌsaꞌ noꞌhuitatonaꞌ, Quisoso imapisopita chiníquën aparisitopi. Quirosarinquë napopi. Aparisitatonaꞌ, ayanquëëpi. Yaꞌipi Cotia parti, Samaria parti, inaquëpita yanquëëpi. Caꞌtanoꞌsaráchin co paꞌpihuëꞌ.

Hechos 8:3

Saonoso nipirinhuëꞌ Quisoso imapisopita aparisitaton, pëinënaquë huarëꞌ yaꞌconaꞌpiarin. Quëmapiꞌsaꞌ masahuaton, ohuararahuaton, tashinan pëiquë poꞌmorin. Sanapiꞌsantaꞌ inaquë poꞌmorin.

Hechos 9:1

Saonoso nipirinhuëꞌ noꞌhuitárin. Quisoso imapisopita noꞌhuiton, yatëparin. Napoaton corto huaꞌan chini chiníquën nanantërinsoꞌ nontonin.

Hechos 9:13

Ananiasëso nipirinhuëꞌ co yapaꞌninhuëꞌ. “Ina quëmapisoꞌ Sinioro, paꞌpi co noyahuëꞌ, topi natantërahuë. Quirosarinquë quëma imarinënquënsopita chiníquën aparisitërin.

Hechos 9:31

Ina quëran Quisoso imapisopita noya yaꞌhuapi. Co huachi insoari tërantaꞌ aparisitërinhuëꞌ. Cotia parti, Cariria parti, Samaria parti, inaquëpita sano yaꞌhuatonaꞌ, noya noya imasapi. “Sinioro chiníquën nanantërin,” taꞌtonaꞌ, nóya natëpi. Ispirito Santori catahuarin niꞌton, aꞌnapitanta imasapi.

1 Corintios 10:32

Ama insontaꞌ anishacancantocosohuëꞌ. Cotioroꞌsaꞌ, nisha piyapiꞌsaꞌ, Quisocristo imapisopita, yaꞌipiya nosorocasoꞌ yaꞌhuërin.

1 Corintios 7:17

Yosë nohuanton, nisha nisha ninëhuaꞌ. Co napopináchin ninëhuahuëꞌ. Onpopinsona nicasëhuaꞌ Yosë imapatëhuaꞌ, inachachin niahuaꞌ. Yaꞌhuërëhuaquë chachin sano yonquiatëhuaꞌ, imahuaꞌ. Paato, yaꞌipi imapisopita inachachin pënënarahuë.

Gálatas 1:22

Cotia parti yaꞌhuëpisopitaso nipirinhuëꞌ co nohuichatërarinacohuëꞌ. Inatohuaꞌ naꞌa Quisocristo imapisopita yaꞌhuëpirinahuëꞌ, co nohuitërinacohuëꞌ.

1 Tesalonicenses 1:1

Ca Paonoco ninshitaranquëmaꞌ, niꞌcoꞌ. Noyanquëmaꞌ canpitantaꞌ. Noya quiyantaꞌ yaꞌhuarai. Yaꞌipi Yosë imaramasopita Tisaronicaquë yaꞌhuëramasoꞌ ninshitaranquëmaꞌ. Siripano, Timotio, inapitantaꞌ isëquë yaꞌhuapi. Inapitaroꞌcoi nanan aꞌpatarainquëmaꞌ. Canpitantaꞌ Tata Yosë chinotatomaꞌ, Sinioro Quisocristo imaramaꞌ. Inaora nohuanton, Yosë noya catahuainquëmaꞌ. Asanocancainquëmaꞌ. Quisocristontaꞌ inapochachin catahuainquëmaꞌ, tënahuë.

1 Tesalonicenses 1:6

Ina marëꞌ aparisitopirinacoihuëꞌ, noya cancantërai. Canpitantaꞌ Yosë nanamën noya natanamaꞌ. Imaramaso marëꞌ aparisitopirinënquëmahuëꞌ, Ispirito Santo catahuarinquëmaꞌ niꞌton, nóya cancantëramaꞌ. Quiya pochin cancantatomaꞌ, chiníquën cancantëramaꞌ. Nonanpatamacoi, Quisocristo chachin nonanaramaꞌ.

1 Tesalonicenses 3:4

Canpitataquë yaꞌhuasocoi, shaꞌhuitërainquëmaꞌ. “Imarëhuaso marëꞌ aparisitarinënpoaꞌ,” itërainquëmaꞌ. Napotërainquëmaso pochachin iporasoꞌ aparisitarinënquëmaꞌ.

2 Tesalonicenses 1:1

Ca Paonoco ninshitaranquëmaꞌ, niꞌcoꞌ. Noyanquëmaꞌ canpitantaꞌ. Noya quiyantaꞌ yaꞌhuarai. Yaꞌipi Yosë imaramasopita Tisaronicaquë yaꞌhuëramasoꞌ ninshitaantaranquëmaꞌ. Siripano, Timotio, inapitantaꞌ isëquë yaꞌhuapi. Inapitaroꞌcoi nanan aꞌpatarainquëmaꞌ. Tata Yosë natëtomaꞌ, Sinioro Quisocristo imaramaꞌ. Huëntonënquë chachin ayaꞌconinpoaꞌ niꞌton, “Tata” itërëhuaꞌ.

2 Tesalonicenses 1:4

Yaꞌipi parti Yosë imapisopita shaꞌhuitërai. “Tisaronicaquë yaꞌhuëpisopita noya imasapi. Imapiso marëꞌ naꞌcon aparisitopirinahuëꞌ: ‘Yosë co naniantarinpoahuëꞌ,’ taꞌtonaꞌ, ahuantapi. Co yaaꞌpopihuëꞌ. Maꞌsha onpoaponaraihuëntaꞌ, chiníquën cancantapi,” itërai. Noya natëramaꞌ niꞌton, noya cancantërai.