1 Tesalonicenses 1:5 - Chayahuita (Shahui)

⁵ Quisocristo nanamën aꞌchintohuatëinquëmara, co topinan quëran aꞌchintërainquëmahuëꞌ. Ispirito Santo chachin catahuarincoi aꞌchinaꞌhuaisoꞌ. Canpitantaꞌ catahuarinquëmaꞌ noya natanacamaso marëꞌ. “Noꞌtëquën nontërinpoaꞌ,” taꞌtomaꞌ, yaꞌipi cancanëma quëran natëramaꞌ. Ina nicatoi: “Tëhuënchachin Yosëri huëntonënquë ayaꞌconin,” tënai. Canpitataquë yaꞌhuapoi, noya imarai canpitantaꞌ noya imacamaso marëꞌ.

1 Tesalonicenses 1:5 ပူးပေါင်းရင်းမြစ်များ

Isaías 55:11

Inapochachin nonahuësontaꞌ, co topinan caquë huënantarinhuëꞌ. Inasoꞌ, ca nohuantërahuëso nisarin. Maꞌsona camairahuëso nisarin.

Marcos 16:20

Ina quëran caꞌtanoꞌsanënpita paꞌsahuatonaꞌ, Quisoso nanamën shaꞌhuirapi. Siniorori chachin catahuarin niꞌton, yaꞌipi parti shaꞌhuiraꞌpiapi. Yosë nohuanton, piyapi aꞌnaroáchin anoyatopi. Nani maꞌsha nanitapapi ayonquicaiso marëꞌ. Ina niꞌsahuatonaꞌ, “Noꞌtëquën nontërinpoaꞌ,” topi yaꞌipi piyapiꞌsaꞌ. Nani huachi.]

Lucas 1:1

Quisocristo isoroꞌpaquë oꞌmaton, nóya ninin. Naꞌa piyapiꞌsari ina naporinsoꞌ nani ninshitopi.

Hechos 11:21

Yosëri catahuarin niꞌton, naꞌa piyapiꞌsaꞌ natëtonaꞌ, imapi. Iráca yonquipisoꞌ naniantatonaꞌ, Quisoso imasapi.

Hechos 16:14

Aꞌna sanapi inaquë Yosë chinotërin, Niria itopisoꞌ. Tiatira quëran huëꞌnin. Inasoꞌ tintahuan. Maꞌmaroꞌ nëꞌmëtëꞌ paꞌton nininsoꞌ paꞌanin. Inasoꞌ nisha piyapi niponahuëꞌ, Yosë chinotërin niꞌton, Paonori aꞌchintohuachina, nóya natanin. Yosë nohuanton, aꞌnaroáchin cancanën quëran huarëꞌ yaimarin.

Hechos 2:33

Ina quëran Yosëri inápaquë quëpantarin. Chiníquën nanantërin niꞌton, inchinanën quëran ahuënsërin. Inapotahuaton, shaꞌhuitërin: ‘Ispirito Santo aꞌpamaquëꞌ piyapiꞌsaꞌ yaꞌcoancanchin. Iꞌhua shaꞌhuitëranquënsoꞌ,’ itërin. Ina quëran Quisosori Ispirito Santo aꞌpaimarin, yaꞌcoancantërincoi, niꞌnamaꞌ. Napoaton nisha nisha nananquë nonai, natanamaꞌ.

Romanos 1:16

Co casoꞌ tapanahuëꞌ Quisocristo nanamën aꞌchinaꞌhuaso marëꞌ. Piyapiꞌsaꞌ natëhuachinaꞌ, Yosëri anoyacancantarin. Inaíchin nanitaparin nichaꞌëinpoasoꞌ. Cotioroꞌsariꞌton natëhuachinaꞌ, anoyacancantarin. Iporasoꞌ nisha nisha piyapiꞌsantaꞌ anoyacancantarin. Napoaton paꞌyatërahuë nanamën shaꞌhuicaꞌhuasoꞌ.

Romanos 15:13

Yosëíchin tëhuënchachin catahuarinpoaꞌ chiníquën cancantacasoꞌ. Canpitantaꞌ catahuainquëmaꞌ nóya cancantacamaso marëꞌ. Asanocancainquëmaꞌ. Inasáchin yonquihuatamaꞌ, catahuarinquëmaꞌ. Ispirito Santo yaꞌipi nanitaparin. Catahuahuachinquëmaꞌ, chini chiníquën cancantatomaꞌ, noya ninaramaꞌ.

Romanos 2:16

Ayaroꞌ tahuëri yaꞌipi co noyahuëꞌ yonquirëhuasopita aipitarinpoaꞌ. Poꞌoana quëran maꞌsona tërantaꞌ onporëhuasopita aꞌninquëchin anitotarinpoaꞌ. Naporoꞌ tahuëri Tata Yosë nohuanton, Quisocristo noꞌtëquën shaꞌhuitarinpoaꞌ. Co noyahuëꞌ nipatëhuaꞌ, anaꞌintarinpoaꞌ. Ina nanan yaꞌipi parti shaꞌhuirarahuë.

1 Corintios 1:24

Canpoaso nipirinhuëꞌ Yosë huayoninpoaꞌ niꞌton, Quisocristo imarëhuaꞌ. Inasoꞌ noꞌtëquën yonquirin. Yaꞌipiya nitotaton, noꞌtëquën anitotërinpoaꞌ. Inasáchin nanitaparin anoyacancantinpoasoꞌ, tënëhuaꞌ. Quiyantaꞌ cotio piyapicoi nipiraihuëꞌ, canpitantaꞌ nisha piyapinquëmaꞌ nipomarahuëꞌ, Yosë nohuanton, imarëhuaꞌ.

1 Corintios 10:33

Casoꞌ yaꞌipi piyapiꞌsaꞌ yonquirahuë. Catahuarahuë noya Yosë imacaiso marëꞌ. Co caora costarahuësoꞌ yonquirahuëꞌ. Aꞌnapitantaꞌ yacatahuarahuë inahuantaꞌ Quisocristori anoyacancantacaso marëꞌ.

1 Corintios 3:16

Yosë imapatëhuaꞌ, ina pëinën pochin ninëhuaꞌ. Ispirito Santo yaꞌcoancantohuachinpoaꞌ, cancanënpoaquë yaꞌhuërarin. ¿Co ina nitotëramahuëꞌ ti?

1 Corintios 3:6

Niꞌcoꞌ. Iminpatëra, aꞌnasoꞌ shaꞌtërin. Ina quëran aꞌnantaꞌ pacarapiton, iꞌshaquë oporapitërin noya papotacaso marëꞌ. Nipirinhuëꞌ, Yosëriíchin apapotërin. Inapochachin carinquëmaꞌton aꞌchintëranquëmaꞌ. Ina quëran Aporosëntaꞌ aꞌchintantarinquëmaꞌ. Aꞌchintopirainquëmahuëꞌ, Yosësoꞌ anoyacancantërinquëmaꞌ.

1 Corintios 4:20

Co topinan quëran nonacasoꞌ yaꞌhuërinhuëꞌ. Yosë huaꞌanëntohuachinpoaꞌ, piyapiꞌsaꞌ catahuarëhuaꞌ noya noya imacaisoꞌ.

1 Corintios 9:14

Inapochachin Quisocristontaꞌ shaꞌhuitërinpoaꞌ. “Nani tahuëri nani tahuëri Yosë nanamën aꞌchinpachinaꞌ, natanpisopitari maꞌsha quëchinaꞌ nanpicaiso marëꞌ,” tënin.

2 Corintios 3:6

Ina nani acorincoi aꞌchinaꞌhuaiso marëꞌ. Acohuachincoira, catahuarincoi nasha quëran anoyatërinso aꞌchintaꞌhuainquëmaso marëꞌ. Ina imapatëhuaꞌ, Ispirito Santo catahuarinpoaꞌ Yosë nohuitatëhuaꞌ nanpimiatacaso marëꞌ. Iráca anoyatërinso Moisësëri ninshitopirinhuëꞌ. Ina imapatëhua, co onporontaꞌ noya cancantërëhuahuëꞌ. “Co natëhuatamahuëꞌ, chiminpatamaꞌ, anaꞌintacasoꞌ yaꞌhuërin,” tënin. Co ina aꞌchintërainquëmahuëꞌ.

Gálatas 2:2

Yosë ayonquirinco pacaꞌhuasoꞌ niꞌton, paꞌnahuë imapisopita nontaꞌhuaso marëꞌ. Ansianoꞌsarachin niyontonpachinara, shaꞌhuitërahuë. “Casoꞌ nisha piyapiꞌsaꞌ aꞌchintohuato, Quisocristoíchin imacaisoꞌ yaꞌhuërin, tënahuë. Iráca pënëntërinsoꞌ imacaisoꞌ co aꞌchintërahuëꞌ,” itërahuë. “Co noꞌtëquën aꞌchinanhuëꞌ,” itërinaco naporini, topinan quëran aꞌchinchitënquëmahuëꞌ, tënahuë yonquiato. Ansianoꞌsaso nipirinhuëꞌ “Noya aꞌchinan,” itërinaco.

Gálatas 5:5

Nipirinhuëꞌ, ina imapatëhuaꞌ, Ispirito Santo catahuarinpoaꞌ. “Quisocristoíchin anoyacancantërinpoaꞌ,” topatëhuaꞌ, Yosë noya niꞌsarinpoaꞌ, tënëhuaꞌ. Oshanënpoaꞌ inquitatonpoaꞌ, tëhuënchachin noyápiachin cancan quëtarinpoaꞌ. Ina ninarëhuaꞌ.

Efesios 2:10

Yosë anoyacancantërinpoaꞌ. Anoyacancantahuatonpoaꞌ, acorinpoaꞌ nóya nicacaso marëꞌ. Quisocristo catahuahuachinpoaꞌ, noya nisarëhuaꞌ. Iráca quëran huarëꞌ yonquirinpoaꞌ ina pochin nicacasoꞌ. Ina marëꞌ nichaꞌërinpoaꞌ.

Efesios 3:20

Tata Yosësoꞌ chini chiníquën nanantaton, yaꞌipi nanitaparin. Huaꞌyanën chachin nani yaꞌcoancantërinpoaꞌ niꞌton, noya catahuarinpoaꞌ. Nani tahuëri achinicancaninpoaꞌ niꞌton, cancanënpoa quëran huarëꞌ Yosë yonquiaꞌahuaꞌ. Ina nontohuatëhuaꞌ, “Catahuaco,” itohuatëhuaꞌ, naꞌcon catahuarinpoaꞌ. Naꞌcon nohuantopirëhuahuëꞌ, naꞌcon naꞌcon inasoꞌ nanitaparin nicacasoꞌ. Co nitotërëhuasohuëntaꞌ nanitaparin.

Filipenses 2:13

Co noyahuëꞌ cancantatomaꞌ, co canpitaora nanitëramahuëꞌ Yosë natëcamasoꞌ. Nipirinhuëꞌ, Yosë nontohuatamaꞌ, catahuarinquëmaꞌ nohuantacasoꞌ. Ina quëran Yosë yanatëhuatamaꞌ, inari chachin catahuarinquëmaꞌ noꞌtëquën natëcamasoꞌ. Inasoꞌ noya noya ayonquiarinquëmaꞌ.

Filipenses 4:9

Naꞌcon Yosë nanamën shaꞌhuitëranquëmaꞌ, natanamaꞌ. Yaꞌipi aꞌchintëranquëmasoꞌ noya natëcoꞌ. Canpitataquë yaꞌhuapo, noya ninahuë, niꞌnamaco. Ca pochachin noya nicoꞌ. Noya nipatamaꞌ, Yosë noya catahuarinquëmaꞌ. Ina nohuanton, noya niniꞌtomaꞌ, yaꞌhuaramaꞌ. Inasáchin asanocancaninpoaꞌ.

Colosenses 2:2

Yaꞌipinquëmaꞌ yonquiatënquëmaꞌ, Yosë nontárahuë. “Catahuaquëꞌ Sinioro chiníquën cancanchinaꞌ. Noya ninosoroꞌinaꞌ. Ina quëran aꞌna huëntoínchin pochin nisapi. Ma noyacha quëmasoꞌ yonquirancoi paya. Catahuaquëꞌ quëma nanamën noya yonquiꞌinaꞌ. Quisocristo chachin nohuichinaꞌ. Iracasoꞌ co piyapiꞌsari nohuitopirinahuëꞌ. Iporaso nipirinhuëꞌ anohuitërancoi. Ina nohuitatoi, tëhuënchachin noya cancantarai,” itërahuë, Yosë nontato.

1 Tesalonicenses 2:13

Yosë nanamën aꞌchintohuatëinquëmara, noya natanamaꞌ. “Co piyapi yonquirinsoꞌ aꞌchintërinpoahuëꞌ. Yosë nanamën chachin aꞌchintërinpoaꞌ,” tënamaꞌ. Tëhuënchachin Yosë nanamën niꞌton, ina natëhuatamaꞌ, nanamën quëran anoyacancantarinquëmaꞌ. Ina marëꞌ nani tahuëri “Yosparinquën,” itërai Yosë.

2 Tesalonicenses 2:14

Yosë nanamën aꞌchintohuatëinquëmara, canpitantaꞌ imaramaꞌ. Yosë acorinquëmaꞌ Sinioro Quisocristo pochin nicacamasoꞌ. Aꞌna tahuëri oꞌmantahuachin, ina pochin yaꞌnoaramaꞌ.

2 Timoteo 2:10

“Yosë nohuanton, huayoninsopita oshaquëran imasapi,” taꞌto, yaꞌipiya ahuantërahuë. Quisocristo imapachinaꞌ, nichaꞌësarin. Oshanënaꞌ inquitahuaton, anoyacancantarin niꞌton, aꞌna tahuëri Yosëꞌpaꞌ nanpiantarapi. Inatohuaꞌ noya noya yaꞌhuëcontapi. Co onporontaꞌ pipiapihuëꞌ.

2 Timoteo 2:8

Quisocristo naꞌcon yonquiquëꞌ. Isoroꞌpaquë oꞌmaton, piyapi chachin nasitimarin. Tapi shiin inasoꞌ. Chiminaponahuëꞌ, nanpiantarin. Ina nanan chachin aꞌchinárahuë. Ina imapatëhuaꞌ, nichaꞌësarinpoaꞌ.

Hebreos 10:22

Napoaton Quisocristoíchin natëtëhuaꞌ, yaꞌipi cancanënpoa quëran Yosë nontahuaꞌ. Nani oshanënpoaꞌ inquitërinpoaꞌ niꞌton, noya cancantarëhuaꞌ. Quisocristo anoyacancantërinpoaꞌ niꞌton, noya iꞌquë amarëso pochin noyápiachin cancantarihuaꞌ.

Hebreos 6:11

Chiníquën cancantatomaꞌ, yaꞌipinquëmaꞌ imamiatocoꞌ. “Yosë co naniantarinpoahuëꞌ. Aꞌna tahuëri yaꞌhuërinꞌpaꞌ quëpantarinpoaꞌ,” taꞌtomaꞌ, chiminaquë huarëꞌ nóya imacoꞌ.

1 Pedro 1:12

Ina quëran Yosëri anitotërin. “Pahuanarin nanicasoꞌ. Aꞌna tahuëri yaꞌhuëpisopita nitotacaiso marëꞌ ca nohuanton, ninoramaꞌ,” itërin Yosëri. Canpita iyaroꞌsaꞌ nitotacamaso marëꞌ ninopi. Iporasoꞌ ina noya nanan chachin aꞌchintërainquëmaꞌ. Inápa quëran oꞌmaton, Ispirito Santo catahuarincoi noya aꞌchinaꞌhuaiso marëꞌ. Anquëniroꞌsa quëran huarëꞌ yanitotopirinahuëꞌ, co yaꞌipiya nitotopihuëꞌ.

1 Pedro 1:3

Ma noyacha Tata Yosëso paya. Quisocristo paꞌpin inasoꞌ. Naꞌcon nosoroatonpoaꞌ, nasitantarëso pochin nasha cancan quëtërinpoaꞌ ina nohuitacaso marëꞌ. Quisocristo huaꞌanëntërinpoaꞌ. “Chiminaponahuëꞌ, nanpiantarin niꞌton, canpoantaꞌ nanpiantarihuaꞌ,” taꞌtëhuaꞌ, noya ninarëhuaꞌ. Natëtomiatërëhuaꞌ.

1 Pedro 5:3

Pënëntohuatamaꞌ, ama chiníquën nontocosohuëꞌ. Ama huaꞌan pochin cancantatomaꞌ, camaitocosohuëꞌ. Yosë acorinquëmaꞌ aꞌchintëramasopita catahuacamasoꞌ. Napoaton noya yonquiatomaꞌ, noya nicoꞌ inapitantaꞌ inachachin nonainquëmaso marëꞌ.

2 Pedro 1:10

Napoaton iyaroꞌsaꞌ, naꞌcon yonquicoꞌ yaꞌipi cancanëma quëran huarëꞌ imacamaso marëꞌ. Yosë huayonatënquëmaꞌ, nontërinquëmaꞌ niꞌton, noyá matërëso pochin imamiatocoꞌ. Inapohuatamaꞌ, co nisha cancantatomaꞌ, aꞌpoaramahuëꞌ.

2 Pedro 1:19

Ina yonquiatoi: “Ma noꞌtëquëncha Yosëri ninorin paya,” tënai. Iráca quëra huarëꞌ pënëntonaꞌpiroꞌsaꞌ ninshitërinënpoaꞌ. Yosë nohuanton, coꞌhuara nasichátëraponhuëꞌ, Quisocristo napocasoꞌ ninopi. “Noꞌtëquën ninshitopi,” taꞌtoi, quiricanën naꞌcon natërai. Canpitantaꞌ ina nontatomaꞌ, yonquicoꞌ. Noꞌtëquën anitotërinpoaꞌ. Tashiꞌ nipachina, nanparin noya aꞌpintërinpoaꞌ. Inapochachin Yosë quiricanën quëran aꞌpintërinpoaꞌ noꞌtëquën yonquicaso marëꞌ. Tahuërianpitaquë huarëꞌ nanparin noya orotërin. Inapochachin ipora Quisocristo oꞌmantaquë huarëꞌ quiricanën yaꞌhuëtërinpoaꞌ ina nohuitacaso marëꞌ. Oꞌmantahuachin, noyá nohuitarihuaꞌ. Huënio tayora huënaráchin aꞌpininso pochin aꞌpintarinpoaꞌ.