1 Samuel 31:7 - Chayahuita (Shahui)

⁷ Israiroꞌsa Cortaniiꞌ motopiana aquëtëran yaꞌhuëpisopita natantopi: “Saono, huiꞌninpitarë chachin nani chiminpi. Sontaronënpitanta napopinchin chiminpi. Napopinchin taꞌapi,” topi. Ina natantatonaꞌ, yaꞌhuëpiso ninanoroꞌsa pipinanpitona taꞌapi. Napohuachinara, huiristinoꞌsaso canconahuatona inaquë yaꞌhuëconpi huachi. Ina noꞌpasoꞌ, Cortaniiꞌ quëran piꞌi pipirinso parti quëparitërin.

1 Samuel 31:7 ပူးပေါင်းရင်းမြစ်များ

Jueces 6:2

Huaꞌanëntatonaꞌ, naꞌcon naꞌcon israiroꞌsa aparisitopi. Napoatona inapitasoꞌ, matianoꞌsa tëꞌhuatatona naꞌpishinanoꞌsa nipi. Motopi naninoꞌsaquëntaꞌ, naꞌpipi. Sacaiꞌ pacacaso nininquëpita naꞌpipi.

1 Samuel 13:6

Huiristinoꞌsa notohuaroꞌ huëꞌsapi nicatonaꞌ, israiroꞌsaso panca paꞌyanpi. Napoatona motopi naninoꞌsaquë naꞌpicaiso marëꞌ taꞌapi. Noꞌpaꞌ naninoꞌsaquë, natëtë casonantëroꞌsaquë, iꞌsha paꞌtacaso marëꞌ cashapisopitaquë, posoroꞌsaquë, inaquëpita naꞌpicaiso marëꞌ taꞌapi.

1 Samuel 13:7

Naꞌcon chachin Israiro sontaroꞌsa Cortaniiꞌ pëntontopi. Caro huënton noꞌpanën parti, naꞌpicaiso marëꞌ napopi. Carata partintaꞌ, paꞌpi. Saonoso napoaponahuëꞌ, Quiricaroquëranchin quëparitërin. Yaꞌipi sontaronënpitanta paꞌpi tëꞌhuaponaraihuëꞌ, inarë quëparitopi.

1 Samuel 31:6

Ina pochin naporo tahuëri Saono huiꞌninpitarë chachin chiminin. Catahuacaso marëꞌ acorinso sontarontaꞌ, chiminin. Aꞌnapita sontaronënpitanta chiminpi.

1 Samuel 31:8

Tahuëririnquë huiristinoꞌsasoꞌ, israiroꞌsa chiminpisopita maꞌshanëna matapona paꞌpi. Naporoꞌ Saono huiꞌninpitarë chachin chiminpiso quënanpi.