1 Samuel 3:2 - Chayahuita (Shahui)

^2-3 Aꞌna tashiso napoaponahuëꞌ, poꞌnin: Irisoꞌ patoananënquë huëꞌësárin. Inasoꞌ yasomarayaton, co huachi noya quënantërinhuëꞌ. Samoironta Yosë chinotacaso nëꞌmëtë pëiquë huëꞌësárin. Siniororë anoyatopiso caposonën yaꞌcariya huëꞌësárin. Sëꞌparahuan nanpariontaꞌ, co tacopiyátërarinhuëꞌ.

1 Samuel 3:2 ပူးပေါင်းရင်းမြစ်များ

Génesis 27:1

Isaco noyá mashotohuachina, pëtorayataton co huachi quënantërinhuëꞌ. Aꞌna tahuëri huiꞌnin paninan Isao itopisoꞌ përarin. Huëꞌpachina: —Conpa, itërin. —Maꞌta tata yaꞌhuarahuë, itërin Isaori.

Génesis 48:10

Cacoposoꞌ noyá mashoya niꞌton, co huachi ina inahuë quënantërin. Napoaton Cosiri huiꞌninpita ayaꞌcaririn. Napohuachinara, Cacoposo shinpita iporahuaton apinorin.

Génesis 48:19

Paꞌpinso nipirinhuëꞌ, co nohuantërinhuëꞌ inapocasoꞌ. Napoaton itapon: —¡Naporin mini conpa, nani nitotërahuë! Manasisinta shinpita quëran panca nacion nisarin. Iyaaꞌhuainso napoaponahuëꞌ, noya noya nicaton shinpita quëran naꞌcon naꞌcon nacionoꞌsa pipiarin.

Salmos 90:10

Canchisë shonca piꞌíchin nanpiraiso nanirin. Chiníquënoꞌsasoꞌ, posa shonca nanipi. Ina nápo piꞌipi nanpitona nipaꞌyatopi. Napopirinahuëꞌ, naꞌcon naꞌcon sacai nipi. Naporahuatonaꞌ, aꞌnapitarinta amipi. Naporápirinahuëꞌ, aꞌnaroáchin tahuëri naꞌhuëhuachina, chiminapi anta huachi.

Eclesiastés 12:3

Mashotohuatan, pëi mocarinso pochin nisaran. Naporoꞌ aꞌpairinquënsopita pochin nininsoꞌ, ropatapona huachi. Pëi nonoropitërinso pochin monconpicasoꞌ yaꞌhuëapon. Morinoroꞌsa nitoꞌquiratërinso pochin natëroꞌsanta capa niraꞌpiapon. Inapoaton co huachi noya coshataranhuëꞌ. Huintana quëran costatërëso pochin quënantopiranhuëꞌ, oshaquëran oshaquëran pëtorayataramaꞌ.

1 Samuel 2:22

Iri corto huaꞌanso nipirinhuëꞌ, nani noyá mashotërin. Napoaponahuëꞌ, cato huiꞌninpita napopisoꞌ natantárin. Israiroꞌsa Sinioro marëꞌ maꞌsha tëpahuachinara, napotopiso natantërin. Sanapiꞌsanta Yosë marëꞌ sacatopisopita, ichihuëꞌëpiso natantërin. Ina sanapiꞌsasoꞌ, Yosë chinotacaso nëꞌmëtë pëi yaꞌcoanaquë sacatopirinahuëꞌ, inapotopi.