1 Samuel 2:3 - Chayahuita (Shahui)

³ Ama inso tëranta nocanchinsohuëꞌ. Ama aquëtëꞌ: ‘Ca tëhuënchinsoꞌ,’ chinasohuëꞌ. Siniorosoꞌ Yosë niꞌton, yaꞌipi naporëhuaso nitotërin. Pëꞌtënatë quiro nitotërëso pochin, naporëhuaso nitotaton, noꞌtëquën shaꞌhuitarinpoaꞌ.

1 Samuel 2:3 ပူးပေါင်းရင်းမြစ်များ

1 Reyes 8:39

Quëmasáchin aꞌnaya aꞌnayacoi yonquiraisoꞌ, nitotëran. Ina nitotaton aꞌnaya aꞌnayacoi noꞌtëquën aꞌpanicoi. Oshahuanpiso marëꞌ aparisitëran niꞌton, nirótëatona nontohuachinën, ina inquitaton nanan anoyatëquëꞌ.

Proverbios 8:13

Sinioro noya nicatoma natëhuatamaꞌ, co noyahuëꞌ ninamasopita co quëꞌyamaso yaꞌhuërinhuëꞌ. ‘Caso noya noyaco,’ topachinara, co quëꞌyarahuëꞌ. Nocantohuachinaꞌ, co noyahuëꞌ nipachinaꞌ, nonpinpachinaꞌ, inapohuachinarantaꞌ, co quëꞌyarahuëꞌ.

Daniel 4:37

Iporaso ca Napocotonoco, Yosë inápaquë huaꞌanëntërinso chinotërahuë. Inasáchin noya nicato natërahuë. Inasoꞌ maꞌsha nipachina, noꞌtëquënáchin nisahuaton, noyasáchin ninin. “Caso noya noyaco,” topachina, inari nanitërin atapanacasoꞌ, tënahuë.

Daniel 5:27

Tiquiri pëꞌtënanquë pëꞌtënëso pochin Yosë nitohuachinquëna, pahuanan tapon naporin.

Malaquías 3:13

Naquëranchin Siniorori piyapinënpita nontaton: “Canpitaso israiroꞌsanquëmaꞌ, co noyahuëꞌ yonquirapitomaco pinoramaco. Napoapomarahuëꞌ, ‘¿maꞌta itatëinquën pinorainquënsoꞌ?’ itëramaco.

Hebreos 4:12

Yosë nanamën chiníquën nanantërin. Yosë nanpiárin niꞌton, ipora huantaꞌ quiricanën quëran nontarinpoaꞌ. Noya natëhuatëhuaꞌ, nanamën quëran chachin catahuarinpoaꞌ noya noya imacaso marëꞌ. Coꞌsoꞌ natëhuatëhuahuëꞌ, aquë aquëtëꞌ co noyahuëꞌ cancantarihuaꞌ. Sahuëni cato quëran chachin toꞌnahuatëra, inëshin niꞌton, niahuëpatëra, aꞌnaroáchin nansë acopoquë huarëꞌ nipëꞌsharëꞌ. Inapochachin Yosë nanamënsoꞌ chini chiníquën yaꞌcoancantërinpoaꞌ. Ina yonquihuatëhuaꞌ, noꞌtëquën nitotarihuaꞌ. Yaꞌipi yonquirëhuaso chachin anitotërinpoaꞌ. Yonquinënpoaquë maꞌmarësona naporëhuasopitantaꞌ anitotarinpoaꞌ.

Apocalipsis 2:23

Sanapi imarinsopitasoꞌ co natërinacohuëꞌ niꞌton, ataꞌhuantarahuë. Ina nicatonaꞌ, yaꞌipi imarinacosopitantaꞌ yonquiapi. ‘Tëhuënchachin Sinioro nohuitërinpoaꞌ. Yonquirëhuasontaꞌ nitotërin. Co noyahuëꞌ nipatëhuaꞌ, noꞌtëquën anaꞌintarinpoaꞌ,’ tosapi.

1 Samuel 16:7

Inariso napoaponahuëꞌ, itapon: “Noyapintërinsoꞌ, naporopitërinsoꞌ, ama inasáchin nicaton noya niꞌquësohuëꞌ. Carisoꞌ, co ina nohuantërahuëꞌ. Piyapinquëmasoꞌ, aipi yaꞌnorinsoráchin nicatoma noya niꞌnamaꞌ. Caso nipirinhuëꞌ, acopo cancanën quëran yonquirinso nitotërahuë. Insosona noya yonquihuachina, noya niꞌnahuë,” itërin. Napotërin niꞌton, Samoiroso co Iriapo huayoninsohuëꞌ, nitotërin.