1 Samuel 2:15 - Chayahuita (Shahui)

¹⁵ Napoaponahuëꞌ, aꞌna tahuëriso co napopihuëꞌ. Maꞌsha Sinioro marëꞌ tëpapisoꞌ tomaquën artaroquë ahuiquitacaso nipirinhuëꞌ, coꞌhuara ahuiquichátërasoihuëꞌ, corto huaꞌan piyapinënꞌton huëꞌnin. Huëꞌsahuaton nosha huaꞌanën itapon: “Nosha quëtoco, cancatato corto huaꞌan aꞌcaꞌi. Co inaso anpipinan maꞌpaponquënhuëꞌ,” itërin.

1 Samuel 2:15 ပူးပေါင်းရင်းမြစ်များ

Éxodo 12:9

Ama napoaponahuëꞌ, nanpi caꞌinasohuëꞌ. Co poꞌmopinan tëranta capacaiso yaꞌhuërinhuëꞌ. Chinpinan caꞌinaꞌ. Motën, paꞌinantën, chiꞌchinën, inapitanta chinpinan caꞌinaꞌ.

Romanos 16:18

Quisocristosoꞌ huaꞌanënpoaꞌ nipirinhuëꞌ, co inapitarisoꞌ natëpihuëꞌ. Inahuara nohuantopisoráchin yonquipi. Noyasha nonaponaraihuëꞌ, co noꞌtëquën nonpihuëꞌ. Co noya nitotopiquëhuëꞌ aꞌchintohuachinara, aꞌnaroáchin nonpintopi.

Filipenses 3:19

Inapitasoꞌ co Quisocristo nanamën imapihuëꞌ. Maꞌsona tërantaꞌ yanipachinara, nipi. Ina marëꞌ tapanacasoꞌ yaꞌhuëpirinhuëꞌ, co tapanpihuëꞌ. “Nohuantato, napoarahuë,” toconpi. Isoroꞌpaquë yaꞌhuërinsopitaráchin yonquipi. Aꞌna tahuëri pënquë parisitomiatapi.

Judas 1:12

Quisoso imaramasopita coshatacaso marëꞌ niyontonpatamara, nisha aꞌchinaꞌpiroꞌsantaꞌ huëꞌpi. Naporoꞌ Yosë yonquicaso nipirinhuëꞌ, naꞌcon oꞌotonaꞌ, capa cancantopi. Co Yosë tëꞌhuatatonaraihuëꞌ, napopi. Aꞌnapita catahuacasoꞌ yaꞌhuëpirinhuëꞌ, co nosoropihuëꞌ. Inahuara noya yaꞌhuëcasoráchin yonquipi. Niꞌcoꞌ iyaroꞌsaꞌ. Huaꞌquiꞌ co oꞌnanpachinahuëꞌ, noꞌpaꞌ yaniromarin. Ina pochin nipachina, yararoꞌtëꞌ quënanpatamara, paꞌyatëramaꞌ. “Oꞌnan huëꞌsarin,” topiramahuëꞌ, co oꞌnaninhuëꞌ. Ihuanaꞌ paꞌnin. Inapochachin inapitasoꞌ pënënpirinënquëmahuëꞌ, nonpin nanan aꞌchintatënënquëmaꞌ co catahuarinënquëmahuëꞌ. Nara nitërinsontaꞌ yonquicoꞌ. Piꞌipi tahuëri nanihuachina, nitacasoꞌ yaꞌhuërin. Co nitohuachinahuëꞌ, “Nani chiminin huachi,” taꞌton, huaꞌanëni nishitëtërin. Itënë chachin ocoirin niꞌton, noyá chiminin huachi. Inapochachin nonpin nanan aꞌchinaꞌpiroꞌsaꞌ ina nara pochin niconpi. Quisocristo nanamën nitotaponaraihuëꞌ, chimipi pochin nicatonaꞌ, aꞌpopi. Ina marëꞌ chiníquën anaꞌintacasoꞌ yaꞌhuërin huachi.

1 Samuel 2:16

Napotohuachina aꞌnaquëni itapon: “Coꞌ. Tomaquënꞌton Sinioro marëꞌ corto huaꞌani ahuiquitacaso yaꞌhuërin. Ina piquëran quëmasoꞌ nohuantëransoꞌ maquëꞌ,” itërin. Napotohuachina, inariso itaantapon: “Co naporinhuëꞌ, apiramiachin quëtancoso yaꞌhuërin. Co noya quëran quëtohuatancohuëꞌ, osërëtaranquën,” itërin.