1 Samuel 2:1 - Chayahuita (Shahui)

¹ Naporoꞌ Anantaꞌ, Yosë nontaton itapon: “Sinioro yonquiato capa cancantërahuë. Yaꞌipi cancanëhuë quëran capa cancantërahuë. Achinirinco niꞌton, inimicoroꞌsa aꞌpaniaꞌhuaso nanitërahuë. Catahuarinco niꞌton, noya cancantërahuë.

1 Samuel 2:1 ပူးပေါင်းရင်းမြစ်များ

Salmos 118:14

Ina achinirinco niꞌton, cantanën cantato chinotarahuë. Insáchin nichaꞌërinco.

Salmos 148:14

¡Piyapinënpitanpoa chiníquën nanan quëtërinpoaꞌ! Yaꞌipi imarinsopitari chinochinaꞌ. Israiroꞌsanpoasoꞌ, cancantërinpoaꞌ. Ina piyapinënpoa ninëhuaꞌ. ¡Ma noyacha Sinioroso paya!

Salmos 51:15

Catahuaco Sinioro nichaꞌërancosoꞌ shaꞌhuiꞌi. Noya noyanquën ninansoꞌ yonquiato, cantanën cantai.

Salmos 89:17

Tëhuënchachin quëma catahuarancoi niꞌton, chiníquën cancantarai. Naporahuatoi, noya noya yaꞌnoarai. Noya yonquirancoi niꞌton, chini chiníquën nanantarai.

Salmos 89:18

Sinioronënpoasoꞌ iscoto pochin nicaton, paꞌpoyarinpoaꞌ. Noyasáchin nicaton huaꞌanëntërinpoaꞌ.

Salmos 89:24

Cari nosoroato catahuarápo. Ca nohuanton chini chiníquën nanantapon.

Éxodo 15:1

Inapotaton Siniorori nichaꞌëpachina, Moisësëso yaꞌipi israiroꞌsapitarë chachin Yosë cantanën cantapi. Cantatonaꞌ, itaponaꞌ: “Sinioro nichaꞌërinpoa niꞌton, cantahuaꞌ. Inimiconënpoapitaso huëꞌpirinahuëꞌ, inari paꞌpi huëhuëpiro nitaton, minsërin. Sontaroꞌsaꞌ, cahuarioroꞌsaꞌ, yaꞌipi marëquë tiquiitërin.

Éxodo 15:21

Maria cantaton tapon: “Yosë nichaꞌërinpoa niꞌton, cantahuaꞌ. Inimicoroꞌsaso huëꞌpirinahuëꞌ, Yosëri paꞌpi huëhuëpiro nitaton, minsërin. Sontaroꞌsaꞌ, cahuarioroꞌsaꞌ, yaꞌipi marëquë tiquiitërin huachi,” tënin.

Habacuc 3:1

Sinioro anitotërincoso yonquiato, ina chinotaꞌhuaso marëꞌ iso pochin nontërahuë:

Lucas 1:69

Ina nohuanton, Tata masho Tapi shiin chachin nichaꞌësarinpoaꞌ. Inasoꞌ chini chiníquën nanantapon.

Romanos 5:11

Naporahuaton, “Yosë nosororinpoaꞌ,” taꞌtëhuaꞌ, ina paꞌyatërëhuaꞌ. Huiꞌnin chachin nanan anoyatërinpoaꞌ niꞌton, noya cancantërëhuaꞌ.

Deuteronomio 33:17

Toro yaꞌnan huiꞌnahuaninsoꞌ, noya noyatërin. Tanan ohuacanta chini chiníquën ninin. Inapitasoꞌ pomonëna quëran patatatonaꞌ, chinitërinsopita aꞌpapi. Inapita pochin Cosi huiꞌninpita huëntonoꞌsa nisapi. Huaꞌhuayátërahuë sontaroꞌsa Iprain huëntonquë yaꞌhuapon. Mamasisi huëntonquënta napoapon. Yaꞌipi nisha nisha piyapiroꞌsa minsëaponaꞌ. Isoroꞌpaꞌ nanirinquë huarëꞌ aꞌpaponaꞌ,” tënin.

Filipenses 3:3

Yosë marcanën co nonënpoaquë niacotërëhuahuëꞌ. Cancanënpoaꞌ Yosë anoyacancantërinpoaꞌ. Cancanënpoa quëran ina chinotarëhuaꞌ. Ispirito Santo chachin catahuarinpoaꞌ noya chinotacaso marëꞌ. Co canpoara nanitërëhuahuëꞌ noya cancantacasoꞌ. Quisocristoíchin anoyacancantohuachinpoaꞌ, nichaꞌësarinpoaꞌ, tënëhuaꞌ. Napoaton canpoasoꞌ Yosë piyapinënpita ninëhuaꞌ.

Filipenses 4:4

Nani tahuëri Quisocristo yonquiatomaꞌ, noya cancantocoꞌ. Naquëranchin inachachin shaꞌhuichinquëmaꞌ. Maꞌsha onpoapomarahuëꞌ, noya cancantocoꞌ, tënahuë.

Filipenses 4:6

Maꞌsha onpohuatamaꞌ, ama paꞌyancosohuëꞌ. Ama nisha nisha yonquicosohuëꞌ. Yosë nontocoꞌ catahuainquëmaꞌ. Maꞌsha pahuantohuachinquëmaꞌ, nitocoꞌ. “Ma noya catahuarancoi niꞌton, ‘Yosparinquën, Sinioro,’ ” itocoꞌ.

1 Pedro 1:8

Quisocristo co onporontaꞌ quënanapomarahuëꞌ, nosororamaꞌ. Ipora huantaꞌ co nicapomarahuëꞌ, “Co nonpintarincohuëꞌ. Catahuarinco,” taꞌtomaꞌ, ina natëramaꞌ. Cancanëma quëran ina nohuitatomaꞌ, nóya cancantëramaꞌ. Ina yonquiatomaꞌ, capa cancantëramaꞌ.

Apocalipsis 18:20

Yaꞌipi inápaquë yaꞌhuëramasopitaso nipirinhuëꞌ, ama ina marëꞌ sëtocosohuëꞌ. Imaramaꞌ niꞌton, noya cancantocoꞌ. Aparisitopirinënquëmahuëꞌ, nani Yosëri anaꞌintërin huachi. Ina marëꞌ Quisoso caꞌtaninsopita, pënëntonaꞌpiroꞌsaꞌ, inapitantaꞌ noya cancanchinaꞌ.

1 Samuel 1:6

Napoaton Pininarisoꞌ co yainhuëꞌ nontërin. Naporahuaton Sinioro nohuanton co huaꞌhuanaꞌpihuë niꞌton, nocanaton tëhuarin. Noꞌhuiantërinsoꞌ nichinapon chachin napotërin.

1 Samuel 1:7

Nani piꞌiquë Sinioro chinotacaso pëiquë paꞌpachinara, Anaso naꞌnëton co yacoshatërinhuëꞌ. Pininari noꞌhuirárin niꞌton, naporin.