1 Samuel 19:24 - Chayahuita (Shahui)

²⁴ Naporahuaton oꞌnanpiramantarin. Oꞌnanpirapi Samoiro notënanquë yaꞌipi tahuëri yaꞌipi tashi quëhuënárin. Napoaton piyapiꞌsa nonpachinara paꞌyatopi napocaisoꞌ: “¡Saononta pënëntonaꞌpi antaꞌ!” topi.

1 Samuel 19:24 ပူးပေါင်းရင်းမြစ်များ

2 Samuel 6:14

Tapisoꞌ, aꞌnara ipoto rino piꞌshi quëran nipisoꞌ aꞌmorin. Ina aꞌmosahuaton yaꞌipi cancanën quëran Sinioro marëꞌ nansaraarin.

2 Samuel 6:20

Tapinta pëinënquë paꞌsahuaton, saꞌinpita, huiꞌninpita, inapita nontoonin. Micaroriso nipirinhuëꞌ, nacapirahuaton itapon: Quëmasoꞌ Israiro copirnonquën nipiranhuëꞌ, co taparohuanhuëꞌ ninan. Piyapinënpita quëmapiꞌsaꞌ, sanapiꞌsaꞌ, inapita niꞌtonënquë nansaton naporan, itërin.

Miqueas 1:8

Sinioro napoarin niꞌton, co napion ancantato naꞌnërápo. Sapatë ocoirahuato, iꞌnanpinantë paꞌsápo. Aꞌmorahuësontaꞌ, paꞌcoirahuato iꞌnanpirapi paꞌsápo. Asaniꞌ naꞌnëton, “huaoo,” tárinso pochin cantaꞌ, naꞌnërápo. Huacopi sëtërinso pochin, nisápo.

Números 24:4

Yosë ispiritonën yaꞌcoancantohuachincora, noya noya nitotërahuë. Yosë chachin nanan anitotërinco. Co huëꞌëporahuëꞌ, huaꞌnarëso pochin quënanahuë. Ina Yosëso yaꞌipi nanitaparin.

Hechos 9:21

Yaꞌipi piyapiꞌsaꞌ natanahuatonaꞌ, ina nohuitatonaꞌ, paꞌyanpi. —¿Coꞌna isohuëꞌ Quirosarinquë yaꞌhuapon Quisoso imapisopita chiníquën aparisitërin? Isëquëntaꞌ huëꞌnin imapisopita macacaso marëꞌ. Tonporahuaton, corto huaꞌanoꞌsaquë quëpararin, topiraihuëꞌ. Niꞌquëchi. Nani aꞌchinarin inantaꞌ, topi.

1 Samuel 10:6

Naporoꞌ Sinioro ispiritonën noyá yaꞌcoancantarinquën. Ina nohuanton quëmanta inapita pochin pënëntaran. Inapotahuatënquën Sinioro anishatarinquën.

1 Samuel 15:35

Naporo quëran huarëꞌ Samoirosoꞌ nanpipon co huachi Saono quënanchininhuëꞌ. Siniorori Saono israiroꞌsa copirnonën nicacaso marëꞌ acorin. Napoaponahuëꞌ, co huachi ina marëꞌ nohuantërinhuëꞌ niꞌton, Samoiro sëtërin. Sëtaponahuëꞌ, co huachi niꞌchininhuëꞌ.

1 Samuel 18:10

Tahuëririnquë naquëranchin aparisitërinso sopairi, Saono aparisitaantarin. Napohuachina pëinënquë huaꞌyantaantarin. Nansanën sëꞌquërin quëran huaꞌyantasoꞌ, Tapisoꞌ arpanën piꞌnirarin. Huaꞌyantohuachina yápiꞌnirin niꞌton, napoantarin.