1 Samuel 17:46 - Chayahuita (Shahui)

⁴⁶ Iporasoꞌ ina chachin minsëaꞌhuanquënsoꞌ catahuararinco. Ipora tahuëri chachin tëparahuatënquën nishitëconotaranquën. Aꞌnapita huiristino sontaroꞌsanta chiminpisoꞌ, soporoꞌsaꞌ, niꞌniroꞌsaꞌ, inapita aꞌcaarahuë. Inapotohuato, yaꞌipi isoroꞌpaquë yaꞌhuëpisopita nitotapi: “Israiroꞌsasoꞌ, Yosë chachin chinotopi. Inasoꞌ, chini chiníquën nanantërin,” tosapi.

1 Samuel 17:46 ပူးပေါင်းရင်းမြစ်များ

Génesis 40:19

Cara tahuëriya quëran, huaraonsoꞌ quëmanta tëhuëransoꞌ yonquiantarin. Naporo chachin piyapinënpita camaiapon: “Noninquë huënquëconorahuatomaꞌ, naraquë pëꞌtënco chimiꞌin,” itapon. Inapotohuachinën, chanaro caꞌtëroꞌsari noshanën caponaꞌ, itërin.

2 Samuel 18:28

Aimasë canquirahuaton copirno notënanquë isonin. Noya nicaton isonin quëran noꞌpaquë huarëꞌ monshomarin. Ina quëran nontaton itapon: —¡Ma noyacha Sinioroso paya! Inasoꞌ Yosë chinotëransoꞌ. Ina nohuanton yaocoirinënquënsopita quiyari minsërai, itërin.

1 Reyes 8:60

Inapotohuachinpoaꞌ, Sinioronënpoasáchin Yosë nininsoꞌ, yaꞌipi isoroꞌpaquë nitotapi. Nisha nisha piyapiroꞌsa yaꞌhuëpiso nohuitapi.

2 Reyes 19:19

Quëmaso Sinioro, Yosënëhuënquën. Asiriaroꞌsa chiníquën nanantopirinahuëꞌ, inapita quëran nichaꞌëcoi. Inapotohuatancoi yaꞌipi nacionoꞌsa isoroꞌpaquë yaꞌhuërinsoꞌ, quëmaíchin Sinioronquën ninansoꞌ nitotapi huachi,” itërin.

2 Reyes 5:15

Nani noyatohuachina yaꞌipi caꞌtaninsopitarë chachin Irisio nicapona panantapi. Cantonahuaton: —Yaꞌipi isoroꞌpaquë nisha nisha mamanshi moshapirinahuëꞌ, co inapitaso Yosëhuëꞌ. Isëquësáchin Yosëso yaꞌhuërin tënahuë. Ina nitotato, quëshiranquënsopita maquë topirahuë, itërin.

Salmos 46:10

“¡Taꞌtoco huachi! Ca Yosëco napotaranquëmaꞌ. Cari yaꞌipi nacionoꞌsa huaꞌanëntarahuë. ¡Yaꞌipi roꞌpaꞌ huaꞌanëntaꞌhuaso yaꞌhuërin!” itarin.

Éxodo 9:16

Napoaponahuëꞌ, quëmaso ca nohuanto nanpiaran. Nani acoranquën chiníquën nanantërahuësoꞌ, aꞌnotaꞌhuanquënso marëꞌ. Anaꞌintëranquënsoꞌ nitotohuachinaꞌ, yaꞌipi parti nahuinarahuë huachi.

Isaías 52:10

Nisha nisha piyapiꞌsa niꞌtonënquë Sinioro chiníquën nanantërinsoꞌ aꞌnorin. Yosënënpoa nichaꞌërinpoasoꞌ, yaꞌipiroꞌpaquë yaꞌhuëpisopita nitotaponaꞌ.

Jeremías 19:7

Cota huëntonquë, Quirosarinquë, inaquëpita maꞌsona nicacamasoꞌ yonquipiramahuëꞌ, carima tapitaranquëmaꞌ. Ca nohuanton tëpararinëmasopita huëꞌsahuatonaꞌ, minsërahuatënënquëma tiquiarinënquëmaꞌ. Inapotohuachinënquëma nonëmasoꞌ, chanaro caꞌtëroꞌsaꞌ, niꞌniroꞌsaꞌ, inapitari caꞌsarin.

Daniel 2:47

Ina quëran Naniri itapon: —Canpita Yosë chinotëramasosoꞌ, yaꞌipi yosëroꞌsa quëran chini chiníquën nanantërin. Yaꞌipi copirnoroꞌsa huaꞌanëntërin. Inasáchin co nitotacasohuëꞌ nininsonta anitotërin. Napoaton huaꞌnarahuëso anitotatënquën, maꞌsona tapon naporinsontaꞌ, anitotërinquën, itërin.

Daniel 3:29

Napoaton inso tëranta isopita huiꞌnapiꞌsa Yosë chinotopiso pinopachin, tëpaꞌinaꞌ. Inapotahuatona yaquiꞌinaꞌ. Pëinëonta amoro tëꞌyatacaiso marëꞌ yaꞌhuëapon. Intohuasona yaꞌhuëpirinahuë tërantaꞌ, inapochinaꞌ. Ma nananquësona nonpachinantaꞌ, inapotacaiso yaꞌhuërin. Co aꞌna yosë ina pochin nichaꞌëcaso nanitërinhuëꞌ niꞌton, inapochinaꞌ,” tënin.

Mateo 24:28

Maꞌsharoꞌsaꞌ chiminpachina, aꞌnaroáchin tamëroꞌsari huëcapairin,” itërin Quisosori. (Cristo oꞌmantahuachin, yaꞌipiya nitotapi, tapon naporin.)

Deuteronomio 7:2

Sinioro nohuanton inapita nacionoꞌsa canahuatamaꞌ, ataꞌhuantamaso yaꞌhuërin. Co nosoroamaso yaꞌhuërinhuëꞌ. Naporahuaton ama inapitarëꞌquëma maꞌsha marëꞌ tëranta anoyatocosohuëꞌ.

Deuteronomio 7:23

Co aꞌnaromarëáchin aꞌpapiramahuëꞌ, nani Sinioro acorinquëma oshaquëranchin inapita minsëcasoꞌ. Inapotatoma ataꞌhuantamaso marëꞌ acorinquëmaꞌ.

Josué 10:8

Coꞌhuara Capaonquë paꞌshátërasoihuëꞌ, Siniorori Cosoi itapon: “Ama amororoꞌsa tëꞌhuatëquësohuëꞌ. Carinquën catahuaranquën yaꞌipi inapita minsëamasoꞌ,” itërin.

Josué 4:24

Ina pochin shaꞌhuihuatamaꞌ, yaꞌipi isoroꞌpaquë nisha nisha piyapi nipisopita Sinioro chini chiníquën nanantërinso nitotaponaꞌ. Naporahuaton canpitantaꞌ, ‘Sinioroso Yosënënpoa niꞌton, noya nicatëhua natërápaso yaꞌhuëchinpoaꞌ,’ tosaramaꞌ,” itërin Cosoiri.

1 Samuel 14:6

Papon pochin Conatansoꞌ, catahuarinso itapon: —Huiristino sontaroꞌsasoꞌ motopi aquëtëran yaꞌhuëapi. Inapitasoꞌ co canpoa pochin Yosë chinotopihuëꞌ. Huëquë inatohua paꞌa. Tapona Sinioro catahuarinpo inapita minsërëꞌ. Ina topachina caraíchinta nipirinahuëꞌ, inimicoroꞌsa minsëpi. Naꞌanta nipachina ina nohuanton minsëtopi, itërin.

1 Samuel 17:44

Napotahuaton itaantapon: —Noyapaꞌ. ¡Huëquë nipachin tëpatënquën soporoꞌsaꞌ, niꞌniroꞌsaꞌ, inapita aꞌcaꞌinquën! itërin.