1 Samuel 17:10 - Chayahuita (Shahui)

¹⁰ Ipora tahuëri carinquëma napotaranquëmaꞌ. ¡Aꞌnara aꞌpaimaco oꞌmain! tënin chiníquën noꞌhuitaton.

1 Samuel 17:10 ပူးပေါင်းရင်းမြစ်များ

2 Reyes 19:4

Sinioroso Yosënën niꞌton, yaꞌipi nitotërin. Asiria copirnori huaꞌanoꞌsa aꞌparinsopita quëran pinorinsontaꞌ, natanin. Maꞌcha ina natanaton anaꞌintërin naporini, noya niitonhuëꞌ. Quëmanta Sinioro nontëquë yaꞌhuëarëhuasoꞌ, catahuainpoaꞌ, tënin Isiquiasë,’ itoncoꞌ,” itërin.

Nehemías 2:19

Sanparato, Topiasë, inapitaso napoaponahuë nocanatonacoi, tëhuarinacoi: —¿Maꞌcha canpitanta inaquë yaniantarama nicaya? ¡Copirno ipora noꞌhuitomaꞌ, co huachi yanatëantaramahuëꞌ! itërinacoi. Aꞌna huaꞌaontaꞌ, tëhuarincoi. Inaso Arapia piyapi. Quisimo itopi.

Jeremías 9:23

Sinioro chachin ina pochin shaꞌhuitërinpoaꞌ. Naquëranchin Sinioro taantapon: “Aꞌnaquëma nani maꞌsha nitotëramaꞌ. Napoapomarahuëꞌ: ‘Ma noyacha caso nitotërahuë paya,’ ama tocosohuëꞌ. Chiníquënquëma nipatamantaꞌ: ‘Ma noyacha caso chinirahuë paya,’ ama tocosohuëꞌ. Nani maꞌsha yaꞌhuëtohuachinquëmantaꞌ: ‘Ma noyacha caso nani maꞌsha yaꞌhuëtërinco paya,’ ama tocosohuëꞌ.

Daniel 4:37

Iporaso ca Napocotonoco, Yosë inápaquë huaꞌanëntërinso chinotërahuë. Inasáchin noya nicato natërahuë. Inasoꞌ maꞌsha nipachina, noꞌtëquënáchin nisahuaton, noyasáchin ninin. “Caso noya noyaco,” topachina, inari nanitërin atapanacasoꞌ, tënahuë.

1 Samuel 17:11

Saonoso sontaronënpitarë chachin naporinsoꞌ, natanpi. Ina natanahuatonaꞌ, paꞌpi paꞌyanpi.

1 Samuel 17:36

Paꞌpiniꞌ nisapirinhuëꞌ, tocaniꞌ nisapirinhuëꞌ, inapotato tëparaꞌpiarahuë. Paso huiristinonta co Yosë chinotaponahuëꞌ, naporinso marëꞌ inapotarahuë. Canpoasoꞌ, Yosë nanpiárin nininso imarëhuaꞌ. Ina sontaronënpoapita nipirëhuahuëꞌ noꞌhuirinpoa niꞌton, tëpaarahuë.

1 Samuel 17:45

—Quëmasoꞌ, sahuëni, nansa, nansaꞌhua, inapita tëpaancoso marëꞌ quëshiantaranco. Caso nipirinhuëꞌ, Sinioro nanan quëtërinco niꞌton, huëcapayaranquën. Inasoꞌ Yosë, yaꞌipi nanitaparinsoꞌ. Israiro sontaroꞌsacoi huaꞌanëntërincoi. Ina huaꞌanëntopirincoihuëꞌ, quëmasoꞌ noꞌhuirancoi.