1 Samuel 14:6 - Chayahuita (Shahui)

⁶ Papon pochin Conatansoꞌ, catahuarinso itapon: —Huiristino sontaroꞌsasoꞌ motopi aquëtëran yaꞌhuëapi. Inapitasoꞌ co canpoa pochin Yosë chinotopihuëꞌ. Huëquë inatohua paꞌa. Tapona Sinioro catahuarinpo inapita minsërëꞌ. Ina topachina caraíchinta nipirinahuëꞌ, inimicoroꞌsa minsëpi. Naꞌanta nipachina ina nohuanton minsëtopi, itërin.

1 Samuel 14:6 ပူးပေါင်းရင်းမြစ်များ

2 Samuel 1:20

Amana Cato ninanoquë ina nanan shaꞌhuicosohuëꞌ. Asocaron cachiroꞌsaquëntaꞌ, ama ina nitochinasohuëꞌ. Huiristino sanapiꞌsa nitotatona capa cancantohuachinaꞌ. Inpio sanapiroꞌsa niponaraihuëꞌ, capa cancantohuachinaꞌ.

2 Samuel 16:12

Ipora parisitërahuësoꞌ Sinioronta niꞌsarin. Tapona ipora ina noꞌhuirincoso marëꞌ, Sinioro yacatahuápirincohuëꞌ, itërin.

2 Reyes 19:4

Sinioroso Yosënën niꞌton, yaꞌipi nitotërin. Asiria copirnori huaꞌanoꞌsa aꞌparinsopita quëran pinorinsontaꞌ, natanin. Maꞌcha ina natanaton anaꞌintërin naporini, noya niitonhuëꞌ. Quëmanta Sinioro nontëquë yaꞌhuëarëhuasoꞌ, catahuainpoaꞌ, tënin Isiquiasë,’ itoncoꞌ,” itërin.

Jeremías 9:23

Sinioro chachin ina pochin shaꞌhuitërinpoaꞌ. Naquëranchin Sinioro taantapon: “Aꞌnaquëma nani maꞌsha nitotëramaꞌ. Napoapomarahuëꞌ: ‘Ma noyacha caso nitotërahuë paya,’ ama tocosohuëꞌ. Chiníquënquëma nipatamantaꞌ: ‘Ma noyacha caso chinirahuë paya,’ ama tocosohuëꞌ. Nani maꞌsha yaꞌhuëtohuachinquëmantaꞌ: ‘Ma noyacha caso nani maꞌsha yaꞌhuëtërinco paya,’ ama tocosohuëꞌ.

Jeremías 9:25

(-)

Amós 5:15

Co noyahuëꞌ ninamasopita noꞌhuicoꞌ. Noya nicacamasoso nipirinhuëꞌ, paꞌyatocoꞌ. Nanan anoyatahuatamaꞌ, noꞌtëquënáchin shaꞌhuicamasoꞌ cancantocoꞌ. Tapona naporamaso marëꞌ carayanquëma chaꞌëramasoꞌ, Yosë nosoroápirinquëmahuëꞌ. Inasoꞌ Sinioro. Yaꞌipi nanitaparin.

Mateo 19:26

Yaꞌipiya notëërahuaton, itapon: —Co insontaꞌ inaora nanitërinhuëꞌ chaꞌëcasoꞌ. Yosëíchin nanitërin anoyacancantinquëmasoꞌ. Yaꞌipiya nanitaparin, itërin.

Romanos 8:31

Ina pochin Yosë yonquirinpoaꞌ niꞌquëhuarëꞌ, co insonta nanitërinhuë minsëinpoasoꞌ.

Deuteronomio 32:30

Napoaton israiroꞌsa napotërahuë: Tëhuënchachin mini tananpitëranquëmaꞌ. Napoaton aꞌnaíchin inimico sontaro nipirinhuëꞌ, huarancanquëma nitaꞌatërinquëmaꞌ. Catoyáchinta nipirinahuëꞌ, shonca huarancanquëma nitaꞌatërinquëmaꞌ. Carinquëma aꞌpaiápiranquëmahuë tananpitëranquëma niꞌton, ca nohuanto inimicoroꞌsa minsërinquëmaꞌ,’ itërahuë,” tënin.

Filipenses 3:3

Yosë marcanën co nonënpoaquë niacotërëhuahuëꞌ. Cancanënpoaꞌ Yosë anoyacancantërinpoaꞌ. Cancanënpoa quëran ina chinotarëhuaꞌ. Ispirito Santo chachin catahuarinpoaꞌ noya chinotacaso marëꞌ. Co canpoara nanitërëhuahuëꞌ noya cancantacasoꞌ. Quisocristoíchin anoyacancantohuachinpoaꞌ, nichaꞌësarinpoaꞌ, tënëhuaꞌ. Napoaton canpoasoꞌ Yosë piyapinënpita ninëhuaꞌ.

Jueces 15:18

Naporahuaton Sansonsoꞌ paꞌpi yamororin. Yamoroton Sinioro nontërin: “Quëma catahuaranco niꞌton, ina nápo inimicoroꞌsa minsërahuë. Inaporahuë piquëransoꞌ, co ipora yamoro tëpaincoso nohuantëranhuëꞌ. Yamoro tëpahuachincosoꞌ, isopita piyapiroꞌsa nonëhuë tëhuaponaꞌ. Co marcahuanpirinahuëꞌ, nonëhuë tëhuaponaꞌ,” itërin.

1 Samuel 14:7

Napotohuachina, catahuarinsoari itapon: —Maꞌsona yanipatan niquëꞌ. Carinquën catahuainquën, itërin.

1 Samuel 17:26

Napopisoꞌ, co Tapi nataninhuëꞌ. Co natanatonhuëꞌ, aꞌnapita sontaroꞌsa natanin: —Canpoasoꞌ, Yosë nanpiárin nininso imarëhuaꞌ. Ina catahuarinpoa ahuëtarëhuaꞌ. Paso huiristinosoꞌ, co ina chinotërinhuëꞌ. ¡Napoaton co piꞌpian tëranta ina pochin noꞌhuiinpoaso yaꞌhuërinhuëꞌ! Insosona ina tëpaton taparo nitarinpoasoꞌ acopitohuachinaꞌ: ¿Maꞌta copirnori quëtapon? itërin.

1 Samuel 17:36

Paꞌpiniꞌ nisapirinhuëꞌ, tocaniꞌ nisapirinhuëꞌ, inapotato tëparaꞌpiarahuë. Paso huiristinonta co Yosë chinotaponahuëꞌ, naporinso marëꞌ inapotarahuë. Canpoasoꞌ, Yosë nanpiárin nininso imarëhuaꞌ. Ina sontaronënpoapita nipirëhuahuëꞌ noꞌhuirinpoa niꞌton, tëpaarahuë.

1 Samuel 17:46

Iporasoꞌ ina chachin minsëaꞌhuanquënsoꞌ catahuararinco. Ipora tahuëri chachin tëparahuatënquën nishitëconotaranquën. Aꞌnapita huiristino sontaroꞌsanta chiminpisoꞌ, soporoꞌsaꞌ, niꞌniroꞌsaꞌ, inapita aꞌcaarahuë. Inapotohuato, yaꞌipi isoroꞌpaquë yaꞌhuëpisopita nitotapi: “Israiroꞌsasoꞌ, Yosë chachin chinotopi. Inasoꞌ, chini chiníquën nanantërin,” tosapi.

1 Samuel 17:47

Yaꞌipi isëquë nisapisopita nitotapona huachi: “Siniorori chachin catahuarin ahuëtacaiso niꞌton, canatopi. Napoaton nansa, sahuëni, co inapitaquëáchin canatërëhuëꞌ,” tosapi. Ina nohuanton ipora tahuëri quiyarima minsëarainquëmaꞌ, itërin.

1 Samuel 31:4

Napoaton catahuacaso marëꞌ sontaro acorinsoꞌ, itapon: —Pasopitasoꞌ co marcahuanoꞌsahuëꞌ. Inapitaso yatëpahuachinaco, aparisitatonaco tëpaponaco. Napoaton sahuëninën quëran papitatonco tëpaco, itërin. Napotopirinhuëꞌ, inariso paꞌpi tëꞌhuaton co nohuantërinhuëꞌ. Napohuachina inaora chachin sahuëninën yaꞌhuaratërin.